រដ្ឋសភាបញ្ជាក់ថា ការងារ៦ខែដំបូងក្នុងនីតិកាលទី៧ គឺស្ថាប័ននេះបានបំពេញការងារបម្រើផលប្រយោជន៍ជាតិ និងប្រជាពលរដ្ឋបានជោគជ័យជាទីមោទនៈ ខណៈប្រជាពលរដ្ឋនៅតាមសហគមន៍មួយចំនួនអះអាងថា ពួកគេកំពុងជួបការលំបាកខ្លាំងប៉ុន្តែមិនមានតំណាងរាស្ត្រ ឬមន្ត្រីពាក់ព័ន្ធជួយដោះស្រាយទេ។
សេចក្តីប្រកាសព័ត៌មានស្តីពីការងារ៦ខែដំបូងរបស់រដ្ឋសភាចេញផ្សាយនៅថ្ងៃទី៦ ខែកុម្ភៈ បានបញ្ជាក់ថា ស្ថាប័ននេះបានបំពេញការងារដោយទទួលខុសត្រូវចំពោះមុខប្រជាពលរដ្ឋលើមុខងារ៣សំខាន់ គឺមុខងារនីតិកម្ម តាមដានការអនុវត្តច្បាប់ និងភាពជាអ្នកតំណាង។
សេចក្តីប្រកាសព័ត៌មានបញ្ជាក់ថា ក្នុងរយៈពេល៦ខែគណៈកម្មការនានានៃរដ្ឋសភាបានកោះ អញ្ជើញតំណាងរាជរដ្ឋាភិបាលចំនួន១៧ក្រសួង និងស្ថាប័នដើម្បីពិភាក្សាការងារ គឺជាលទ្ធផល ជោគជ័យ និងមោទនភាព។
របាយការណ៍របស់រដ្ឋសភា៖ «ចាប់ពីថ្ងៃទី២២ខែសីហាឆ្នាំ២០៣មក ហើយបានបិទបញ្ជាក់ សម័យ ប្រជុំលើកទី១នីតិកាលទី៧ កាលពីចុងខែធ្នូ ឆ្នាំ២០២៣ ប្រកបដោយជោគជ័យ និងទទួលបានលទ្ធផលផ្លែផ្កាគួរជាទីមោទនៈ ក្នុងការបម្រើប្រជាពលរដ្ឋនិងប្រទេសជាតិ»។
ដើម្បីសាកសួរបន្ថែមលើបញ្ហាដែលពលរដ្ឋកំពុងជួបប្រទះអ្នកសារព័ត៌មានខេមបូចា បានទាក់ទង តាមទូរសព្ទ និងផ្ញើសារតាមតេឡេក្រាមអ្នកនាំពាក្យរដ្ឋសភា លោក ឡេង ប៉េងឡុង តាំងពីថ្ងៃទី១៦ ខែកុម្ភៈរហូតដល់ថ្ងៃទី១៣ខែមីនា ប៉ុន្តែមិនមានការឆ្លើយតបទេ។
ក្រសួងស្ថាប័នទាំង១៧ដែលរដ្ឋសភាបានជួបនោះរួមមាន អាជ្ញាធរសវនកម្មជាតិ ធនាគារជាតិនៃកម្ពុជា ក្រសួងកសិកម្ម ក្រសួងមុខងារសាធារណៈ ក្រសួងមហាផ្ទៃ ក្រសួងព័ត៌មាន និងក្រសួងទេសចរណ៍ ជាដើម។
នៅក្នុងសេចក្តីប្រកាសព័ត៌មានមិនបានបញ្ជាក់ថា ជំនួបជាមួយក្រសួងនីមួយៗបានជជែកពីបញ្ហាអ្វីខ្លះទេ គ្រាន់តែបញ្ជាក់ថា ជំនួបនេះធ្វើឡើងក្នុងស្មារតីទទួលខុសត្រូវចំពោះមុខប្រជាពលរដ្ឋ និងភាពជាដៃគូមិនអាចខ្វះបានរវាងស្ថាប័ននីតិប្បញ្ញត្តិ និងនីតិប្រតិបត្តិ។
ប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្មនៃរដ្ឋសភា លោក ឈាង វុន មានប្រសាសន៍ប្រាប់ខេមបូចានៅថ្ងៃទី៤ ខែមីនាថា ចំពោះបញ្ហាពលរដ្ឋធ្លាក់ចុះចំណូល និងជួបបញ្ហា វិបត្តិបំណុលលោកមិនទាន់អាចឆ្លើយបានទេ ព្រោះរយៈពេលធ្វើការរបស់រដ្ឋសភាអាណត្តិទី៧ ទើបតែចាប់ផ្តើមមានពេលខ្លីពេក។ ទោះយ៉ាងណាលោកបញ្ជាក់ថា ក្រុមការងារលោកបានធ្វើការងារយ៉ាងយកចិត្តទុកដាក់លើបញ្ហាផ្សេងទៀតដូចជា សកម្មភាពរបស់ក្រុមល្បែងអនឡាញ ដែលធ្វើឱ្យប៉ះពាល់ខ្លាំងដល់ផលប្រយោជន៍ជាតិ និងប្រជាពលរដ្ឋ។
លោក ឈាង វុន មានប្រសាសន៍ថា៖ «គ្រាន់តែឥឡូវនេះ គណៈកម្មការខ្ញុំនេះមានការខ្វាយខ្វល់ច្រើន ហើយកំពុងតែធ្វើកិច្ចការហ្នឹងមមាញឹក គឺបញ្ហាដែលពាក់ព័ន្ធនឹងរឿងល្បែងពាណិជ្ជកម្មនេះ នៅតាមខេត្តក្រុងរាជធានីអស់ហ្នឹងដែលអ្នកអនុវត្ត ល្បែងអស់ហ្នឹងវាធ្វើខុសតាមសៀវភៅបន្ទុកអីៗអស់ហ្នឹងហាណា៎ ចាក់រាយប៉ាយពាសពេញលើហ្នឹង ហើយធ្វើឱ្យមានការព្រួយបារម្ភខ្លាំង»។
បន្ថែមលើនេះ លោក ឈាង វុន ឱ្យដឹងទៀតថា គណៈកម្មការរបស់លោកកំពុងយកចិត្តទុកដាក់តាមដានការប្រើប្រាស់ថវិការបស់រដ្ឋបាលថ្នាក់ជាតិដែលថា មានការប្រើប្រាស់ខុសគោលដៅលើកម្មវិធីអភិវឌ្ឍន៍មួយចំនួន។
ប្រធានគណៈកម្មការផែនការ វិនិយោគ កសិកម្ម រុក្ខាប្រមាញ់ និងនេសាទ អភិវឌ្ឍន៍ជនបទ បរិស្ថាន ធនធានទឹក និងឧតុនិយម នៃរដ្ឋសភា លោក ឡូយ សុផាត មានប្រសាសន៍ថា គណៈកម្មការរបស់លោកបានចុះទៅរាជធានីខេត្តមួយចំនួន ប៉ុន្តែមិនទាន់រកឃើញបញ្ហាអ្វីគួរឱ្យកត់សម្គាល់ទេ គឺកំពុងធ្វើការងារជាមួយអាជ្ញាធរពាក់ព័ន្ធបន្ត។
ចំពោះបញ្ហាកសិករខ្វះទឹកធ្វើកសិកម្ម និងបញ្ហាទីផ្សារកសិផលនោះ លោកបញ្ជាក់ថា ក្រុមការងារ លោកកំពុងតាមដានហើយសហការជាមួយអាជ្ញាធរជំនាញពាក់ព័ន្ធដើម្បីដោះស្រាយ។
លោក ឡូយ សុផាត មានប្រសាសន៍ថា៖ «យើងនឹងត្រួតពិនិត្យទៅលើការអនុវត្តកម្មវិធីនយោបាយទៅតាមវិស័យនានាដែលក្រសួងស្ថាប័នដូចជាបញ្ហាខ្វះទឹកនៅតំបន់ណាយើងទៅមើលសំណូមពរប្រជាជនដើម្បីយើងនឹងមកជម្រាបជូនទៅដល់ស្ថាប័នជំនាញនីមួយដើម្បីនឹងត្រួតពិនិត្យ និងរកដំណោះស្រាយបញ្ហាផ្សេងៗទៀត»។
ប្រជាពលរដ្ឋ និងមន្ត្រីសង្គមស៊ីវិលអះអាងថា នៅក្នុងអាណត្តិទី៧នេះ មានបញ្ហាមួយចំនួនដែលបន្តអូសបន្លាយពីអាណត្តិមុនៗ ហើយពលរដ្ឋនៅតែស្វែងរកដំណោះស្រាយ រួមមានបញ្ហាជម្លោះដីធ្លី បញ្ហាបទល្មើសកាប់បំផ្លាញព្រៃឈើ និងបញ្ហាបរិស្ថានជាដើម។ ចំណែកបញ្ហាដែលកើតថ្មីនៅក្នុងអាណត្តិនេះ គឺបញ្ហាវិបត្តិសេដ្ឋកិច្ចដែលពលរដ្ឋលើកឡើងពីចំណូលធ្លាក់ ជួបការលំបាកមិនមានលុយសងបំណុល បញ្ហាខ្វះទឹកធ្វើកសិកម្ម និងករណីពលរដ្ឋដាក់លុយវិនិយោគជាមួយឧកញ៉ាហើយមិនទទួលបានប្រាក់វិញជាដើម។
ករណីហិង្សាលេចធ្លោមួយចំនួនកើតឡើងថ្មីនេះក៏នាំឱ្យមានការចោទសួរពីមហាជនលើតួនាទីតំណាងរាស្ត្រដែរដូចជា ករណីហិង្សារវាងកម្លាំងសមត្ថកិច្ចខណ្ឌព្រែកព្នៅ រាជធានីភ្នំពេញ និងស្ត្រីនៅបឹងតាមោក នៅថ្ងៃទី២៧ខែកុម្ភៈ និងករណីសមត្ថកិច្ចខេត្តព្រះវិហារបានដុតបំផ្លាញផ្ទះ និងចាប់ខ្លួនប្រជាពលរដ្ឋប្រមាណ៤០នាក់នៅស្រុកគូលែនកាលពីថ្ងៃទី៦ ខែមីនា។
ទោះយ៉ាងណាប្រធានគណៈកម្មការសិទ្ធិមនុស្ស ទទួលពាក្យបណ្តឹង អង្អេត និងទំនាក់ទំនងរដ្ឋសភា ព្រឹទ្ធសភា លោក សរ ចំរ៉ុង បានឱ្យដឹងថា សភាបានយកចិត្តទុកដាក់ដោះស្រាយទុក្ខលំបាករបស់ប្រជាពលរដ្ឋ។ លោកមានប្រសាសន៍ថា គិតត្រឹមថ្ងៃទី១១ ខែមីនា គណៈកម្មការរបស់លោកទទួលបានពាក្យបណ្តឹងពីប្រជាពលរដ្ឋបានជាង៦០០ករណី ហើយបែងចែកបន្តទៅស្ថាប័នពាក់ព័ន្ធឱ្យជួយដោះស្រាយ។
លោក សរ ចំរ៉ុង មានប្រសាសន៍ថា៖ «យើងកំពុងពិនិត្យមួយចំនួន ហើយមួយចំនួនយើងអន្តរាគមន៍ទៅសមត្ថកិច្ចដែលត្រូវដោះស្រាយ»។ លោកបន្តថា៖ «ឧទាហរណ៍ រឿងណាពាក់ព័ន្ធសមត្ថកិច្ចខេត្តយើងបញ្ជូនទៅខេត្ត រឿងណាពាក់ព័ន្ធក្រសួងដែនដីយើងបញ្ជូនទៅក្រសួងដែនដី រឿងណាពាក់ព័ន្ធក្រសួងយុត្តិធម៌ ពាក់ព័ន្ធតុលាការយើងបញ្ជូនទៅក្រសួងយុត្តិធម៌។ ភាគច្រើនរឿងដី និងរឿងក្តីក្តាំនៅតុលាការមិនសុខចិត្តលើសេចក្តីសម្រេចរបស់តុលាការហ្នឹង»។
បើតាមលោក សរ ចំរ៉ុង បណ្តឹងទាំងនោះភាគច្រើនពាក់ព័ន្ធជម្លោះដីធ្លី។ ប៉ុន្តែលោកបញ្ជាក់ថា លោកមិនទាន់បានសរុបរបាយការណ៍ថា ក្នុងចំណោមជាង៦០០បណ្តឹងនោះដោះស្រាយបានប៉ុន្មានបណ្តឹងទេ។
ជុំវិញបញ្ហានេះ អ្នកនាំពាក្យគណបក្សប្រជាជនកម្ពុជាលោក សុខ ឥសាន ជាគណបក្សដែលទទួល បានសមាជិកសភាច្រើនជាងគេរហូតដល់១២០អាសនៈ មិនអត្ថាធិប្បាយទេ ដោយលោកបញ្ជាក់ថា ជាកិច្ចការរបស់ស្ថាប័នសភា។
សម្រាប់អ្នកនាំគណបក្សហ៊្វុនស៊ិនប៉ិចជាគណបក្សដែលបានឈ្នះអាសនៈរដ្ឋសភាចំនួន៥ក្នុងនៅក្នុងអាណត្តិទី៧នៃរដ្ឋសភា លោក ញឿន រ៉ាដែន មានប្រសាសន៍ថា តំណាងរាស្ត្រពីគណបក្សរបស់លោកបានលើកឡើងបញ្ហាជីវភាពពលរដ្ឋក្រីក្រ និងបញ្ហាសេវាសាធារណៈទៅជជែកដេញដោលក្នុងសភា។ លោកបន្តថា ផែនការទៅថ្ងៃអនាគត តំណាងរាស្ត្រពីគណបក្សលោកនឹងប្រឹងប្រែងបំពេញការងារដូចបានសន្យាពេលបោះឆ្នោត។
លោក ញឿន រ៉ាដែន មានប្រសាសន៍ថា៖ «ចំពោះខ្ញុំផ្ទាល់ក៏ដូចជាគណបក្សទាំងមូល គឺព្រះអង្គម្ចាស់[នរោត្តម ចក្រាវុធ]ដែលលោកទទួលបានការគាំទ្រពីប្រជារាស្ត្រ [ហើយ]យើងនឹងបន្តឈរនៅលើគោលជំហរមួយ គឺធ្វើយ៉ាងម៉េចធ្វើឱ្យប្រទេសជាតិយើងហ្នឹងកាន់តែរីកចម្រើន ជាពិសេស យើងនឹងចុះទៅជួយប្រជារាស្ត្រទៅតាមអ្វីដែលយើងធ្លាប់បានសន្យាកន្លងមកទៅតាមគោលជំហររបស់យើងក្នុងនាមជាគណបក្សរាជានិយមមួយនៅប្រទេសកម្ពុជា»។
បើទោះជាស្ថាប័នរដ្ឋសភា សមាជិកសភា និងគណបក្សនយោបាយដែលទទួលបានអាសនៈក្នុងរដ្ឋសភា លើកឡើងពីលទ្ធផលគួរជាទីមោទនៈក៏ដោយ ក៏គណបក្សក្រៅរដ្ឋាភិបាល ប្រជាពលរដ្ឋ និងអ្នកឃ្លាំមើលមួយចំនួនអះអាងថា តំណាងរាស្ត្រនៅតែអសកម្មមិនបានធ្វើសកម្មភាពឆ្លើយតបលើបញ្ហាជាច្រើនដែលកំពុងកើតមាននោះទេ។
អគ្គលេខាធិការគណបក្សឆន្ទៈខ្មែរ លោក គង់ ម៉ូនីកា មានប្រសាសន៍ថា លោកមិនបដិសេធនូវអ្វីដែលតំណាងរាស្ត្រសព្វថ្ងៃបានធ្វើនោះទេ ប៉ុន្តែលោកយល់ថាហាក់នៅមិនទាន់មានភាពសកម្មរស់រវើក និងឆ្លើយតបទៅនឹងតម្រូវការជាក់ស្តែងរបស់ប្រជាពលរដ្ឋដែលកំពុងកើតមាននៅឡើយទេ។ លោកចង់ឱ្យតំណាងរាស្ត្រដែលជាប់ឆ្នោតនៅក្នុងតំណែងទាំងអស់តម្តល់ផលប្រយោជន៍របស់ប្រជាពលរដ្ឋដែលខ្លួនក្នុងភាពជាតំណាងឱ្យបានខ្ពស់។
លោក គង់ ម៉ូនីកា មានប្រសាសន៍ថា៖ «នៅតាមបណ្តាខេត្តជាច្រើនដែលប្រជាពលរដ្ឋដែលបានរងគ្រោះដោយសារបញ្ហាផ្សេងៗដូចជាភាពអយុត្តិធម៌មួយចំនួនពាក់ព័ន្ធនឹងដីធ្លី បញ្ហាជីវភាពរស់នៅអីផ្សេងៗហ្នឹងគឺថាមិនដែលសូវបានឃើញតំណាងរាស្ត្រស្ថិតនៅក្នុងតំណែងបានទៅជួបប្រាស្រ័យផ្ទាល់ជាមួយប្រជាពលរដ្ឋទាំងអស់ហ្នឹងហើយពាំនាំនូវទុក្ខលំបាករបស់ពួកគាត់ដល់រដ្ឋាភិបាលធ្វើការដោះស្រាយទេ»។
បណ្តាញសហគមន៍ព្រៃឡង់ខេត្តកំពង់ធំលោក ហឿន សុភាព អះអាងថា នៅតំបន់របស់លោកមានបញ្ហាជាច្រើនដូចជា សកម្មភាពកាប់បំផ្លាញព្រៃឈើ កសិករដាំដុះបានផលមិនមានទីផ្សារ ពលរដ្ឋជាប់បំណុលធ្ងន់ធ្ងរ និងបញ្ហាផ្លូវខូចជាដើម។ លោកបន្តថា បញ្ហាទាំងនេះ អាជ្ញាធរមូលដ្ឋានមិនបាន ជួយដោះស្រាយ ចំណែកតំណាងរាស្ត្រក៏មិនដែលចុះទៅដល់តំបន់នោះដែរ។
លោក ហឿន សុភាព ថ្លែងថា មន្ត្រី និងតំណាងរាស្ត្រហាក់និយាយល្អតែពេលជិតបោះឆ្នោត ប៉ុន្តែការអនុវត្តមិនបានដូចការលើកឡើងពេលឃោសនាទេ។
លោក ហឿន សុភាព ថ្លែងថា៖ «និយាយទៅគឺយើងអត់ឃើញមានដំណោះស្រាយហ្នឹងវាទៅតាមផែនការនៅក្នុងការសន្យានារដូវបោះឆ្នោត មានការសន្យាបាទដើម្បីទាញយកសន្លឹកឆ្នោត ប៉ុន្តែនៅពេលដែលជាប់ឆ្នោតហើយគឺសំងំសុខ សោយសុខតែម្នាក់ឯងដេកម៉ាស៊ីនត្រជាក់ ហូបអាហារឆ្ងាញ់ៗ មានលុយចាយ មានប្រាក់ខែចេះតែឡើង គាត់ហូបឆ្ងាញ់មិនសូវទុក្ខកង្វល់ មិនសូវយកចិត្តទុកដាក់ពីប្រជាជនដែលគាត់មានទុក្ខលំបាកទេ»។
ពលរដ្ឋនៅខេត្តត្បូងឃ្មុំ លោក ផុន សុផល អះអាងថា តាំងពីរំលាយគណបក្សសង្គ្រោះជាតិ កាលពីឆ្នាំ២០១៧មក លោកមិនដែលបានជួបតំណាងរាស្ត្រទៅសួរសុខទុក្ខ ឬបើកវេទិកាស្តាប់ទុក្ខលំបាករបស់ពួកគាត់ទេ។ លោកបន្តថា ក្នុងស្ថានភាពសេដ្ឋកិច្ចលំបាកកសិករដែលដាំដុះបាន ហើយមិនមានទីផ្សារលក់ និងពលរដ្ឋដែលកំពុងមានជម្លោះដីធ្លីជាមួយក្រុមហ៊ុនកាន់តែលំបាកខ្លាំង។
លោក សុផល ចង់ឱ្យតំណាងរាស្ត្ររៀបចំវេទិកាស្តាប់ទុក្ខលំបាករបស់ពួកគាត់នៅពេលនេះ ហើយជួយស្វែងរកដំណោះស្រាយ។
លោក សុផល ថ្លែងថា៖ «ពាក់ព័ន្ធនឹងជំនាញ ពាក់ព័ន្ធនឹងបញ្ហាសុខទុក្ខពលរដ្ឋ ដូចខ្ញុំលើកឡើងម៉ិញអ៊ីចឹង ពេលយើងយកទៅលក់យកទៅអី អាកង្វល់ពលរដ្ឋពាក់ព័ន្ធនឹងកសិកម្មហ្នឹង គឺគួរណាស់តែតំណាងរាស្ត្រនោះគាត់ចុះមក ចុះមកសួរថាតើពលរដ្ឋមានកង្វល់អ្វីខ្លះ។ រៀបវេទិកាសាធារណៈមួយ នៅវត្ត នៅឃុំអីទៅ ឱ្យពលរដ្ឋសួរដេញដោលអីទៅ»។
អ្នកស្រាវជ្រាវពីការអភិវឌ្ឍន៍សង្គម លោក មាស នី ថ្លែងថា រដ្ឋសភា ក្នុងអាណត្តិទី៧នេះ មិនទាន់បានបង្កើតច្បាប់ណាដែលជួយដល់ផលប្រយោជន៍ប្រជាពលរដ្ឋ និងជាតិនៅឡើយ។ លោកបន្តថា សមាជិកសភាហាក់ធ្វើការស្និទ្ធជាមួយរដ្ឋាភិបាល ចំណែកប្រជាពលរដ្ឋនៅតែមិនស្គាល់តំណាងរបស់ពួកគេ។
លោក មាស នី បញ្ជាក់ថា៖ «ទាំងនេះគឺជាបញ្ហាធំមួយរបស់សភានៅក្នុងស្រុកយើងតាំងពីដើមមក គឺពលរដ្ឋនៅតែមិនទាន់ស្គាល់តំណាងខ្លួនឯងច្បាស់លាស់ថាអ្នកណាជាតំណាងរាស្ត្រនៅក្នុងមណ្ឌលរបស់គាត់គឺនៅតែអ៊ីចឹងដូចតែដដែលទេ»។ លោកបន្តថា៖ «ហើយសភាក៏នៅពេលដែលពលរដ្ឋមានបញ្ហានៅកន្លែងណាក៏ដូចជាវត្តមានសភាតំណាងរាស្ត្រទៅមើលគឺនៅតែមិនទាន់មាន គឺអត់ទាន់ឃើញមានប្រសើរឡើងត្រង់ចំណុចនេះ គឺពេលដែលបោះឆ្នោតហើយគឺតំណាងរាស្ត្រនេះទៅជាប់តែជាមួយរដ្ឋាភិបាលទៅ»។
មន្ត្រីសម្របសម្រួលផ្នែកអង្កេត និងតស៊ូមតិនៃអង្គការខុមហ្វ្រែល(Comfrel)លោក កន សាវាង្ស ថ្លែងថា ស្ថាប័នលោកមិនទាន់សរុបការងារឃ្លាំមើលដំណើរការសភា៦ខែដំបូងនៃអាណត្តិទី៧ទេ។
ទោះយ៉ាងណាលោកថា នៅពេលវ៉ាកងសភាមានតួនាទីសំខាន់ក្នុងការស្វែងយល់ពីទុក្ខលំបាករបស់ប្រជាពលរដ្ឋ និងតាមដានការអនុវត្តច្បាប់របស់រដ្ឋាភិបាល។
លោក កន សាវាង្ស និយាយថា៖ «តួនាទីមួយសំខាន់ណាស់ភាពជាតំណាងរបស់ប្រជាពលរដ្ឋហ្នឹងគឺមិនមែនត្រឹមតែការធ្វើវិសោធនកម្មច្បាប់ទេ។ រឿងសំខាន់គឺថានៅក្រោយសម័យប្រជុំហ្នឹងហេ៎ ជាពិសេស គឺសម័យកាលនៃការវាកងហ្នឹងសភាតំណាងរាស្ត្រគួរតែទៅពិនិត្យមើលអំពីស្ថានភាព អំពីការរស់នៅរបស់ប្រជាពលរដ្ឋ បញ្ហាផ្សេងៗរួមទាំងការអនុវត្តរបស់រដ្ឋាភិបាលផងដែរ»។
មាត្រា៨៤នៃរដ្ឋធម្មនុញ្ញចែងថា នៅចន្លោះសម័យប្រជុំរបស់រដ្ឋសភា គណៈកម្មាធិការអចិន្ត្រៃយ៍នៃរដ្ឋសភា ទទួលបន្ទុកចាត់ចែងការងារ។ គណៈកម្មាធិការអចិន្ត្រៃយ៍នៃរដ្ឋសភា រួមមានប្រធានរដ្ឋសភា អនុប្រធានរដ្ឋសភា និងប្រធានគណៈកម្មការទាំងអស់នៃរដ្ឋសភា។
មាត្រា៩៧នៃរដ្ឋធម្មនុញ្ញបានចែងទៀតថា គណៈកម្មការទាំងឡាយរបស់រដ្ឋសភា អាចកោះអញ្ជើញរដ្ឋមន្ត្រីមកបំភ្លឺ អំពីបញ្ហាអ្វីមួយដែលជាការទទួលខុសត្រូវលើការងាររបស់ខ្លួន។
នៅក្នុងឱកាសបើកសម័យប្រជុំរដ្ឋសភានីតិកាលទី៧លើកដំបូងនៅថ្ងៃទី២១ ខែសីហា ឆ្នាំ២០២៣ ព្រះមហាក្សត្រព្រះបាទនរោត្តម សីហមុនី បានរំឭកពីតួនាទីរបស់សមាជិករដ្ឋសភាក្នុងការជួយឱ្យជាតិរីកចម្រើន និងប្រជាពលរដ្ឋរស់នៅដោយសេចក្តីសុខ។
ព្រះមហាក្សត្រមានបន្ទូលថា៖ «រដ្ឋសភាដែលជាអង្គការមានអំណាចនីតិប្បញ្ញត្តិនឹងបន្តបំពេញភារកិច្ចរបស់ខ្លួនដូចមានកំណត់ក្នុងរដ្ឋធម្មនុញ្ញ និងច្បាប់ជាធរមានដើម្បីបន្តនិរន្តរភាពនយោបាយ សេដ្ឋកិច្ច សង្គម វប្បមធ៌ កសាងព្រះរាជាណាចក្រកម្ពុជាជារដ្ឋដ៏រឹងមាំ និងជឿនលឿនដែលផ្អែកលើច្បាប់ ធានាការអនុវត្តច្បាប់ ដោយស្មើភាពសម្រាប់ប្រជាពលរដ្ឋគ្រប់រូប និងធានាការពារលើកស្ទួយសិទ្ធិសេរីភាពគ្រប់បែបយ៉ាងរបស់ប្រជាពលរដ្ឋ»។
ការបោះឆ្នោតជ្រើសតាំងតំណាងរាស្ត្រអាណត្តិទី៧កាលពីថ្ងៃទី២៣ ខែកក្កដា ឆ្នាំ២០២៣ មានគណបក្សនយោបាយចំនួន១៨ចូលរួម ប៉ុន្តែមានតែគណបក្សនយោបាយ២តែប៉ុណ្ណោះ ដែលទទួលបានអាសនៈក្នុងរដ្ឋសភា គឺគណបក្សប្រជាជនកម្ពុជាទទួលបាន១២០អាសនៈ ចំណែកគណបក្សហ៊្វុនស៊ិនប៉ិចដែលជាគណបក្សរាជានិយមទទួលបាន៥អាសនៈ៕
