ប្រធានគណបក្សកម្លាំងជាតិ លោក ស៊ុន ចន្ធី បានចូលបំភ្លឺនៅសាលាដំបូងខេត្តកំពង់ធំ ពាក់ព័ន្ធនឹងបណ្ដឹងឆបោកប្រាក់ នៅថ្ងៃទី១៤ ខែមីនា ដែលប្ដឹងដោយក្រុមប្រឹក្សាឃុំ-សង្កាត់របស់គណបក្សភ្លើងទៀន។
កាលពីថ្ងៃទី២០ ខែកុម្ភៈ តំណាងអយ្យការអមសាលាដំបូងខេត្តកំពង់ធំ លោក ផៃ តុងហួរ បានកោះហៅ លោក ស៊ុន ចន្ទី ឱ្យចូលបំភ្លឺនៅថ្ងៃទី១៤ ខែមីនា ពាក់ព័ន្ធនឹងបទឆបោកប្រាក់ជាង១២លានរៀល ដែលប្រព្រឹត្តទៅកាលពីអំឡុងឆ្នាំ២០២៣ ក្នុងខេត្តកំពង់ធំ តាមបណ្ដឹងរបស់មន្រ្តីបក្សភ្លើងទៀនចំនួន៨រូប នៅស្រុកសន្ទុក។
បក្សកម្លាំងជាតិបានចាត់ទុក ការប្ដឹងប្រឆាំងនឹងប្រធានបក្សរបស់ខ្លួននេះ គឺបក្សភ្លើងទៀនបានរៀបចំយុទ្ធសាស្រ្តនៅខាងក្រោយ ប៉ុន្តែបក្សភ្លើងទៀនបានច្រានចោលការចោទប្រកាន់នេះ ហើយថា បក្សកម្លាំងជាតិមានចេតនាមូលបង្កាច់ខ្លួន។
ដើមបណ្ដឹង និងចុងចម្លើយបានអះអាងផ្ទុយគ្នា ចំពោះប្រាក់ដែលប្រមូលបានជាង១២លានរៀល ដោយដើមបណ្ដឹងអះអាងថា ប្រាក់នោះសម្រាប់ឃោសនាបោះឆ្នោតសកល ខណៈចុងចម្លើយថា ជាកាតព្វកិច្ចបង់ប្រាក់ និងសម្រាប់ការធ្វើប្រតិបត្តិការរបស់គណបក្ស។
ប្រធានគណបក្សកម្លាំងជាតិ លោក ស៊ុន ចន្ធី ដែលកាលពីដើមឡើយជាប្រធានប្រតិបត្តិបក្សភ្លើងទៀនខេត្តកំពង់ធំ មានប្រសាសន៍ថា នៅព្រឹកថ្ងៃព្រហស្បតិ៍នេះ តំណាងអយ្យការបានសួរនាំលោកអំពីការប្រមូលប្រាក់ និងការសន្យាប្រគល់ប្រាក់នោះឱ្យមន្រ្តីបក្សភ្លើងទៀននៅស្រុកសន្ទុកវិញ។
យ៉ាងណា លោក បដិសេធថា បានសន្យាថានឹងប្រគល់ប្រាក់ដែលប្រមូលបានឱ្យទៅពួកគេវិញ ប្រសិនបើបក្សភ្លើងទៀនមិនអាចចូលរួមការបោះឆ្នោត។ លោកបន្ថែមថា ការកៀរគរថវិកាពីសមាជិកបក្សខេត្តកំពង់ធំ គឺធ្វើឡើងតាមសេចក្ដីសម្រេចរបស់បក្សដោយអនុវត្តជារួមនៅទូទាំងប្រទេស។
លោកបន្តថា វិភាគទាននេះត្រូវបានយកមកទ្រទ្រង់ប្រតិបត្តិការរបស់បក្សប្រចាំខេត្ត សម្រាប់ឆ្នាំ២០២៣ រួមមាន ការចំណាយប្រចាំថ្ងៃ ការរៀបចំវេទិកានានា ថ្លៃអាហារ សាំង ធ្វើស្លាកគណបក្ស និងសម្ភារមួយចំនួនផង។
លោក អះអាងថា នេះជាការបង់ប្រាក់កាតព្វកិច្ច សម្រាប់សមាជិកបក្សជាប់ឆ្នោតជាក្រុមប្រឹក្សាឃុំ-សង្កាត់ ហើយគេមិនអាចដកវិញបានឡើយ។
លោកបញ្ជាក់ថា៖ «គាត់(តំណាងអយ្យការ)សួរថាបានសន្យាផ្ដល់លុយឱ្យវិញទេ តែយើងថាមិនបានសន្យាផ្ដល់លុយឱ្យវិញទេ ពីព្រោះនេះជាការអនុវត្តកាតព្វកិច្ច ស្របតាមលក្ខន្តិកៈគណបក្ស ស្របតាមសេចក្ដីសម្រេចរួមរបស់គណបក្ស។ ចឹងការអនុវត្តកាតព្វកិច្ចនេះ មិនអាចដាក់ហើយទៅទារយកមកវិញបានទេ»។
លោក ថា ការបង់ប្រាក់បានកើតមានជាបន្តបន្ទាប់ចាប់តាំងពីខែមករា ឆ្នាំ២០២៣ ខណៈ គជប ទើបតែបដិសេធនៅខែឧសភា ហើយការបង់ប្រាក់នេះគឺបង់ទៅគណនេយ្យស្រុក រួចទើបបង្វែរ ថវិកា៥០ភាគរយមកគណនេយ្យខេត្ត។
លោកមានមន្ទិលថា ក្រុមប្រឹក្សាឃុំសង្កាត់នៅខេត្តកំពង់ធំចំនួន១៦៥ ហេតុអ្វីមានតែ៨រូបប៉ុណ្ណោះដែលបានដាក់ពាក្យបណ្ដឹងប្រឆាំងនឹងលោក។ លោក ចន្ធី បានចាត់ទុកការដាក់ពាក្យប្ដឹងប្រឆាំងនឹងខ្លួននេះ គឺមានបក្សភ្លើងទៀនរៀបសេណារីយ៉ូ ក្រោមហេតុផលថា ពាក្យបណ្ដឹងដាក់មកបានបញ្ជាក់ថា ជាប្រធានបក្សភ្លើងទៀនប្រចាំស្រុកសន្ទុក។
បន្ថែមពីលើនេះ លោក ជឿថា ការប្ដឹងប្រឆាំងរូបលោកនេះ នឹងក្លាយជាកម្លាំងចិត្តដល់ថ្នាក់ដឹកនាំបក្សកម្លាំងជាតិផ្សេងទៀត ហើយពលរដ្ឋក៏នឹងឃើញច្បាស់ថា បក្សកម្លាំងជាតិទើបជាអ្នកប្រជាធិបតេយ្យពិតដែលកំពុងរងគ្រោះដោយសារអ្នកប្រជាធិបតេយ្យក្លែងក្លាយ។
បើតាមលោក ចន្ធី ឱ្យដឹងថា តំណាងអយ្យការមិនទាន់សម្រេចបែបណាលើលោកនោះទេ ដោយគ្រាន់តែកោះហៅមកបំភ្លឺសិន។
អគ្គលេខាធិការគណបក្សភ្លើងទៀន លោក លី សុធារ៉ាយុទ្ធ បានច្រានចោលការចោទប្រកាន់ថា បក្សភ្លើងទៀនជាប់ពាក់ព័ន្ធនឹងបណ្ដឹងប្រឆាំងប្រធានបក្សកម្លាំងជាតិ។
លោកបញ្ជាក់ថា៖ «សូមបដិសេដចោលទាំងស្រុង»។
កាលពីថ្ងៃទី១ ខែកុម្ភៈ ឆ្នាំ២០២៤ លោក ស៊ន ស៊ុនហេង ប្រធានប្រតិបត្តិគណបក្សភ្លើងទៀនប្រចាំស្រុកសន្ទុក ខេត្តកំពង់ធំ បានដាក់ពាក្យបណ្ដឹងប្រឆាំងលោក ស៊ុន ចន្ធី ទៅសាលាដំបូងខេត្តកំពង់ធំ។
ពាក្យបណ្ដឹង ត្រូវបានសរសេរថា លោក ចន្ធី ដែលកាលនោះជាប្រធានបក្សភ្លើងទៀនខេត្តកំពង់ធំ បានប្រមូលថវិកាពីក្រុមប្រឹក្សាឃុំសង្កាត់ចំនួន១៩រូប ក្នុងស្រុកសន្ទុក ដោយម្នាក់ត្រូវបង់១លាន៦សែនរៀល (សមាជិកខ្លះបានបង់ប្រាក់គ្រប់ចំនួននិងខ្លះទៀតបង់បានពាក់កណ្ដាល) ដើម្បីធ្វើការឃោសនាបោះឆ្នោតគណបក្សភ្លើងទៀនក្នុងឆ្នាំ២០២៣។
បន្ទាប់ពីកៀរគរថវិកាបានជាង២៨លានរៀល (ប្រាក់ប្រមូលបានទូទាំងខេត្ត) លោក ចន្ធី សន្យាថា ប្រសិនបើបក្សភ្លើងទៀនមិនបានធ្វើការឃោសនាបោះឆ្នោត លោកនឹងប្រគល់ប្រាក់ដែលបានបង់ឱ្យសមាជិកទាំង១៩រូបវិញ (សម្រាប់សមាជិកបង់ប្រាក់នៅស្រុកសន្ទុកចំនួនជាង១២លានរៀល)។
លុះក្រោយមក លោក ចន្ធី បានលាឈប់ពីប្រធានបក្សភ្លើងទៀនខេត្ត រួចយកថវិកាដែលប្រមូលបានទៅបង្កើតគណបក្សផ្សេងមួយទៀត ដោយមិនបានប្រគល់ប្រាក់ត្រលប់មកវិញឡើយ។
យោងតាមពាក្យបណ្ដឹង ឱ្យដឹងដែរថា លោក ស៊ុនហេង និងសមាជិកបក្សចំនួន៧រូបទៀត (អ្នកផ្ដិតស្នាមមេដៃលើពាក្យបណ្ដឹង) ស្នើឱ្យតុលាការផ្ដន្ទាទោសលោក ចន្ធី តាមច្បាប់ និងបង្គាប់ឱ្យលោក ចន្ធី សងប្រាក់ជាង១២លានរៀលដល់ពួកគេទាំង៨នាក់វិញ ព្រមទាំងសងជំងឺចិត្ត និងការចំណាយផ្សេងៗចំនួន៥ពាន់ដុល្លារបន្ថែមទៀត។
ដើមបណ្ដឹងមួយរូបលោក ស៊ន ស៊ុនហេង ប្រធានបក្សភ្លើងទៀននៅស្រុកសន្ទុក និងជាជំទប់ទី២ នៅឃុំប្រសាទ ថ្លែងថា ការដាក់ពាក្យប្ដឹងប្រឆាំងនឹងលោក ចន្ធី នេះ ធ្វើឡើងតាមឆន្ទៈរបស់លោក ដោយមិនមានការចង្អុលបង្ហាញពីបក្សភ្លើងទៀនឡើយ។
ការសម្រេចប្ដឹងនេះ លោកអះអាងថា ដោយសារទ្រាំមិនបានចំពោះការនិយាយបែបចំអកពី លោក ចន្ធី។
លោកថ្លែងថា៖ «ថវិកាដែលយើងចូលរួមបដិភាគ គាត់[លោក ចន្ធី] ថាអត់ឱ្យទេ [គាត់ថា] ប្ដឹងដល់ណាប្ដឹងទៅ»។
លោកបញ្ជាក់ថា ក្នុងចំណោមសមាជិកក្រុមប្រឹក្សា១៩រូប មានត្រឹម៨រូបដែលដាក់ប្ដឹងទារប្រាក់មកវិញ ខណៈស្រុកផ្សេង លោកមិនអាចក្ដាប់បាននោះទេ។ លោកថា លោកចន្ធី បានសន្យាថានឹងប្រគល់ប្រាក់ត្រលប់មកវិញប្រសិនបើបក្សភ្លើងទៀនមិនអាចចូលរួមការបោះឆ្នោត តែលោក ចន្ធី មិនបានអនុវត្តតាមការសន្យាឡើយ។
កាលពីថ្ងៃទី១១ ខែមីនា គណបក្សកម្លាំងជាតិបានចេញលិខិតមួយថា លោក ស៊ុន ចន្ធី ប្រធានគណបក្សនឹងចូលបំភ្លឺតាមការកោះហៅរបស់តុលាការ ពាក់ព័ន្ធនឹងបណ្ដឹងរបស់បក្សភ្លើងទៀន។
ឆ្លើយតបចំពោះការអះអាងនេះ ភ្លាមៗក្នុងថ្ងៃតែមួយ គណបក្សភ្លើងទៀនក៏បានចេញសេចក្ដីប្រកាសដោយ បដិសេធទាំងស្រុងចំពោះការភ្ជាប់គណបក្សភ្លើងទៀនទៅនឹងបណ្ដឹងប្រឆាំងលោក ចន្ធី ។ បក្សភ្លើងទៀនបានចាត់ទុកថា ករណីនេះជាការមូលបង្កាច់ និងបង្ខូចគណបក្សភ្លើងទៀនក្នុងចេតនាទុច្ចរិតនយោបាយ។
លោក សុខ ឥសាន អ្នកនាំពាក្យគណបក្សប្រជាជនកម្ពុជា មានប្រសាសន៍ថា លោកមិនមានយោបល់អ្វីចំពោះករណីប្ដឹងផ្ដល់គ្នារវាងក្រុមបក្សប្រឆាំងនេះនោះទេ។
លោកបញ្ជាក់៖ «រឿងហ្នឹង រឿងផ្ទៃក្នុងរបស់បក្សប្រឆាំង»។
លោក ប៉ា ចាន់រឿន ប្រធានវិទ្យាស្ថានកម្ពុជាដើម្បីប្រជាធិបតេយ្យ បានថ្លែងថា ភាគីទាំងសងខាង អាចលើកយកភស្តុតាងដែលខ្លួនមានក្នុងការបង្ហាញដល់តុលាការដើម្បីបញ្ជាក់ពីភាពត្រឹមត្រូវ។ ហើយលោកសង្ឃឹមថា តុលាការនឹងផ្ដល់យុត្តិធម៌ដល់ពួកគេដោយមិនមានការរើសអើង ដើម្បីលើកកម្ពស់យុត្តិធម៌ក្នុងសង្គម៕
