សមាគមសម្ព័ន្ធអ្នកសារព័ត៌មានកម្ពុជា

ពលរដ្ឋខេត្តឧត្តរមានជ័យជិត១០០​គ្រួសារដែលបណ្ដេញចេញពីលំនៅឋានមានជម្លោះជាមួយក្រុមហ៊ុនផលិតស្ករស្នើសុំដីសម្បទានសង្គមកិច្ច

ប្រជាពលរដ្ឋរងផលប៉ះពាល់ជាមួយក្រុមហ៊ុនផលិតស្ករនៅខេត្តឧត្តរមានជ័យ ឡើងមកជួបជុំគ្នានៅសាលាខេត្តឧត្តរមានជ័យ ដើម្បីស្នើសុំដីសម្បទានពីអភិបាលខេត្ត។ រូបថតនៅថ្ងៃទី៨ ខែសីហា ឆ្នាំ២០២២។ រូបភាពផ្ដល់ឱ្យ
ប្រជាពលរដ្ឋរងផលប៉ះពាល់ជាមួយក្រុមហ៊ុនផលិតស្ករនៅខេត្តឧត្តរមានជ័យ ឡើងមកជួបជុំគ្នានៅសាលាខេត្តឧត្តរមានជ័យ ដើម្បីស្នើសុំដីសម្បទានពីអភិបាលខេត្ត។ រូបថតនៅថ្ងៃទី៨ ខែសីហា ឆ្នាំ២០២២។ រូបភាពផ្ដល់ឱ្យ

ប្រជាពលរដ្ឋចំនួន៩២គ្រួសារដែលត្រូវបណ្ដេញចេញពីលំនៅឋានបន្ទាប់ពីមានជម្លោះដីធ្លី​ជាមួយក្រុមហ៊ុនផលិតស្ករនៅសង្កាត់កូនគ្រៀល ក្រុងសំរោង ខេត្តឧត្តរមានជ័យ ស្នើសុំ​ដី​សម្បទានសង្គមកិច្ចចំនួន២ហិកតាក្នុងមួយគ្រួសារ ដោយពួកគេអះអាងថា​ពុំមានដី​សម្រាប់​ធ្វើកសិកម្ម។

អ្នកស្រី គរ ផាន់ វ័យ៤៥ឆ្នាំ ជាកសិករម្នាក់រស់នៅភូមិតាម៉ាន សង្កាត់​កូនគ្រៀល ក្រុងសំរោង ខេត្តឧត្តរមានជ័យ រៀបរាប់ថា គ្រួសារអ្នកស្រីបាត់បង់​ដី៥ហិកតា​ទៅឱ្យក្រុមហ៊ុនអង្គរស៊ូហ្គ័រ​ទាំងគ្មានសំណង។

គ្រួសារអ្នកស្រី គរ ផាន់ គឺជាគ្រួសារមួយក្នុងចំណោម៩២គ្រួសារដែលត្រូវគេឈូសឆាយ​ផ្ទះសម្បែងកាលពីឆ្នាំ២០០៨  ក្នុងជម្លោះជាមួយក្រុមហ៊ុនអង្គរស៊ូហ្គ័រ បានខកខានក្នុងការ​ទទួលដីសម្បទានសង្គមកិច្ចដែលអាជ្ញាធរប្រកាសចែកជូនពលរដ្ឋក្រីក្រអំឡុងឆ្នាំ២០១៧  ដែលកាលនោះគ្រួសារគាត់កំពុងធ្វើការនៅប្រទេសថៃនិងពុំមានប្រាក់ត្រលប់មកវិញ។

កាលពីឆ្នាំ២០១៥ បន្ទាប់ពីទទួលបានព័ត៌មានថាក្រុមហ៊ុនផលិតស្ករត្រូវបិទទ្វា ស្ត្រីមេម៉ាយ​មាន​កូនបីរូបនេះ បានវិលត្រលប់មកលំនៅឋានវិញ​ដើម្បីកាន់កាប់ដីដែលធ្លាប់អាស្រ័យផល។

អ្នកស្រី ផាន់ បញ្ជាក់ថា ដោយសារជីវភាពខ្វះខាតនាំឱ្យគាត់ឡើងចុះទៅធ្វើការ​នៅប្រទេសថៃ​តាមរដូវកាល បណ្ដាលឱ្យបាត់បង់ឱកាសទទួលដីសម្បទានសង្គមកិច្ចដែលរដ្ឋាភិបាលផ្ដល់​ឱ្យ​ពលរដ្ឋក្រីក្រ។

អ្នកស្រី ផាន់​ លើកឡើងពីការគំរាមកំហែងពីក្រុមហ៊ុនថ្មីឈ្មោះ សាន ហាន ដែលចូលមក​គ្រប់គ្រង​ដី​ពីក្រុមហ៊ុនផលិតស្ករ ហេតុនេះនាំឱ្យគាត់ស្នើសុំដីដែលមានប្លង់កម្មសិទ្ធិស្រប​ច្បាប់។

អ្នកស្រី ផាន់ ថ្លែងថា៖ «ខ្ញុំមានផលវិបាកត្រង់ថាពេលដែលយើងចូលធ្វើមានការគំរាមកំហែង​ពី​ក្រុមហ៊ុនថ្មីមិនឱ្យយើងធ្វើទេ ព្រោះដីនេះគេថាដីរដ្ឋ ហើយគេមានដាក់សញ្ញាថាដីរដ្ឋមាន​ប្លង់​រឹង។ គេមិនឱ្យយើងចូលទៅធ្វើប៉ុន្តែយើងមិនមានអីធ្វើ យើងចូលទៅពុះពារគ្រប់​ឧបសគ្គនៅ​លើ​ដី​ហ្នឹង»

អ្នកស្រី ផាន់ ឱ្យដឹងទៀតថា កូនអ្នកស្រីបីនាក់ត្រូវឈប់រៀនទាំងអស់ដោយសារជីវភាព​ខ្សត់​ខ្សោយ។ អ្នកស្រីបន្តថា កូនប្រុសម្នាក់អាយុ២២ឆ្នាំកំពុងធ្វើការសំណង់នៅខេត្តសៀមរាប និង​កូនស្រីពីរនាក់ដែលនៅផ្ទះធ្វើចំការជាមួយគ្នា អាយុ១៩ឆ្នាំរៀនបានត្រឹមថ្នាក់ទី៨ និង​អាយុ១៦​ឆ្នាំ​រៀនបានត្រឹមថ្នាក់ទី៤។

អ្នកស្រី និយាយថា៖ «កូនឈប់រៀនអស់ហើយ ដោយសារជីវភាពខ្ញុំមានការខ្វះខាតទៅ។ ខ្ញុំ​អត់​មានអីឱ្យកូនរៀន វាមានមូលហេតុទាំងរងផលប៉ះពាល់ដីជាមួយក្រុមហ៊ុន[ផលិតស្ករ]​យើង​អត់មានអីធ្វើស្រែ ហើយយើងស៊ីឈ្នួលគេវិញ សម្រាប់ទិញអង្ករហូបផង ផ្គត់ផ្គង់កូនរៀនផង​វាពិបាកមិនស្រួលទេ»

ប្រជាពលរដ្ឋរងផលប៉ះពាល់ជាមួយក្រុមហ៊ុនផលិតស្ករនៅខេត្តឧត្តរមានជ័យ ​ឡើង​មក​ជួបជុំ​គ្នា​នៅ​សាលា​ខេត្តឧត្តរមានជ័យ ដើម្បីស្នើសុំដីសម្បទានពីអភិបាលខេត្ត។ រូបថតនៅថ្ងៃទី៨ ខែសីហា ឆ្នាំ២០២២។ រូបភាពផ្ដល់ឱ្យ

លោក សារាត់ អាយុ៤៦ឆ្នាំ​ សុំមិនបញ្ចេញឈ្មោះពេញដោយបារម្ភពីសុវត្ថិភាពផ្ទាល់ខ្លួន បានរៀបរាប់ថា គាត់ក៍បានបាត់បង់ដីស្រែចំការ​ចំនួន៥ហិកតាទៅឱ្យក្រុមហ៊ុន​អង្គរស៊ូហ្គ័រ ហើយសព្វថ្ងៃ លោកមានដីស្រែតិចតួចនិងដីនោះមិនសូវមានជីវជាតិ​នាំឱ្យការ​ធ្វើស្រែបាន​ត្រឹម១២បាវក្នុងមួយឆ្នាំ។

លោក សារាត់ និយាយថា៖ «សុំ២ហិកតា[ព្រោះអ្នកមុនបានពីរហិកតា] យកមកបង្កបង្កើនផល បើដីដាំដំឡូងមីបានដាំ ធ្វើស្រែបានធ្វើ។ បើសិនខ្វះយើងត្រូវចំណាកស្រុកកូនក៏វាអត់បានរៀន ដោយសារចំណាកស្រុកកូនអត់បានរៀន កូនប្រុស១៩ឆ្នាំ ត្រូវធ្វើការសំណង់»។

លោក សារាត់ ក៏ជាគ្រួសារមួយដែលខកខានក្នុងការទទួលយកដីសម្បទាន​ដោយសារការ​ទទួល​ព័ត៌មានយឺត។

លោក សារាត់ ឱ្យដឹងថា៖ «កាលនោះយើងអត់មានចំការធ្វើ រស់ដោយរៀងខ្លួនរត់ទៅ​ស៊ីឈ្នួលគេ ចំណាកស្រុកនៅថៃ ខ្លះរកស៊ីនៅភ្នំពេញមិនបានទទួលព័ត៌មានទៅ»។

លោក សារាត់ បន្ថែមថា បន្ទាប់ពីវិលត្រលប់មកពីប្រទេសថៃវិញកាលពីឆ្នាំ២០១៧ លោកបាន​ទិញដីទទឹង១២ម៉ែត្រនិងបណ្ដោយ៧០ម៉ែត្រនៅភូមិតាម៉ានដែលទីតាំងនៅក្បែរដីចាស់ និង​ដីស្រែជាងមួយហិកតាសម្រាប់ប្រកបរបរចិញ្ចឹមជីវិត។

លោក ស្រី ណារ៉េន មន្រ្តីសម្របសម្រួលសមាគមអាដហុកប្រចាំខេត្តឧត្តរមានជ័យ បានឱ្យដឹង​ថា ពលរដ្ឋចំនួន២១៤គ្រួសាររស់នៅចំណុចអូបាត់មាន់ ក្នុងភូមិបុស្ស សង្កាត់កូនគ្រៀល ក្រុងសំរោង ដែលរងការឈូសឆាយផ្ទះនៅឆ្នាំ២០០៨ មានត្រឹម១២២គ្រួសារដែលទទួលបាន​ដីសម្បទានសង្គមកិច្ច។ លោក ណារ៉េន បន្តថា ចំណែក៩២គ្រួសារទៀត បានបែកខ្ញែកដើរ​ធ្វើការ​និងរកស៊ីរៀងៗខ្លួននៅពេលអាជ្ញាធរប្រកាសផ្ដល់ដីសម្បទាន។

មន្រ្តីសិទ្ធិមនុស្សរូបនេះ ឱ្យដឹងទៀតថា ពលរដ្ឋចំនួន៩២គ្រួសារបានដាក់ញត្តិ​ជាច្រើនលើក​ដើម្បីទទួលបានដីសម្បទានសង្គមកិច្ចប៉ុន្តែអាជ្ញាធររុញច្រានដាក់គ្នាទៅវិញទៅមក។

លោក ណារ៉េន ថ្លែងថា៖ «៩២គ្រួសារ ក្នុងចំណោម២១៤ អត់ទាន់ទទួលបានដីសម្បទាន​សង្គមកិច្ច​ទេ។ ពួកគាត់បានដាក់ញត្តិយូរហើយប៉ុន្តែមកដល់ពេលនេះអត់ទាន់បាន​ទទួល​លទ្ធផលអ្វីទេ ពីខេត្តរុញទៅក្រុង ក្រុងរុញទៅខេត្ត»។

លោក ណារ៉េន សង្កត់ធ្ងន់ថា មូលហេតុដែលនាំឱ្យពលរដ្ឋចំនួន២១៤គ្រួសារនៅចំណុច​អូបាត់មាន់ ក្នុងភូមិបុស្សត្រូវបណ្ដេញចេញ ព្រោះទីតាំងដែលពួកគេរស់នៅគឺស្ថិតត្រង់​ចំណុច​កណ្ដាលនៃក្រុមហ៊ុនផលិតស្ករទាំងបី។ មន្ត្រីអង្គការការពារសិទ្ធិមនុស្សរូបនេះ បន្តថា ពលរដ្ឋ​ទាំង៩២គ្រួសារទាមទារយកដីនៅទីតាំងចាស់វិញ ខណៈអ្នកធ្លាប់ទទួលដីសម្បទានសង្គមកិច្ច​កន្លងមកថា អាជ្ញាធរតម្រូវឱ្យចាប់ឆ្នោតនិងមួយគ្រួសារបានត្រឹម២ហិកតា។

លោក ណារ៉េន យល់ឃើញថា អាជ្ញាធរអាចផ្ដល់ដីសម្បទានសង្គមកិច្ចជូនពលរដ្ឋ​ដែលនៅ​សល់បានដោយសារទីតាំងដីរបស់ក្រុមហ៊ុនដែលទទួលបានដីពីពលរដ្ឋនោះមានដីសល់​ច្រើន។

បើតាមន្រ្តីអាដហុករូបនេះ ក្រុមហ៊ុនផលិតស្ករទាំងបីនៅតំបន់មានជម្លោះនោះ​ត្រូវក្ស័យធន​ទាំងស្រុងនៅឆ្នាំ២០១៥​ ក្រោយចាប់ផ្ដើមបាន៧ឆ្នាំ។

បង្គោលឈើដែលក្រុមហ៊ុនបោះជាព្រំលើដីមានវិវាទក្នុងភូមិបុស្ស សង្កាត់កូនគ្រៀល ក្រុងសំរោង​ ខេត្តឧត្តរមានជ័យ។ រូបភាពផ្តល់ឱ្យ

ទាក់ទិននឹងក្រុមហ៊ុនទាំងបីដែលមានឈ្មោះ ១-ក្រុមហ៊ុន អង្គរស៊ូហ្គ័រ ២-ក្រុមហ៊ុន ទន្លេស៊ូហ្គ័រខេន ៣-ក្រុមហ៊ុន ខេន និង ស៊ូហ្គ័រវ៉ាលី គឺស្ថិតក្រោមសារជីវកម្មស្ករសមីតរិ៍ប៉ូល (Mitr Phol Corporation)តែមួយ។ចំណែក​ឯសមាជិក​ព្រឹទ្ធ​សភា​កម្ពុជា លោក​ឧកញ៉ា លី យ៉ុង​ផាត់ ក៏​ត្រូវ​បាន​ជឿ​ជាក់​ថាមាន​ជាប់​ពាក់​ព័ន្ធ​ទៅ​នឹង​បញ្ហា​នេះ​ដែរ។

កាលពីឆ្នាំ២០១៣ អង្គការលីកាដូ និងអង្គការសមធម៌ បានដាក់ពាក្យ​បណ្ដឹង​​ទៅ​គណៈ​កម្មា​ធិការ​សិទ្ធិ​មនុស្ស​ប្រទេស​ថៃ ដោយអង្គការទាំងនេះ លើកឡើង​ថា ​ការ​ទទួល​បាន​ដី​​សម្បទាន​របស់សារជីវកម្មស្ករសមីតរិ៍ប៉ូល (Mitr Phol Corporation) ស្ថិត​ក្រោម​រូបភាព​ប្រើកម្លាំង​ក្រុមហ៊ុន កម្លាំង​​មន្រ្ដី​​ប៉ូលិស​​ក្នុង​​ស្រុក កម្លាំងមន្រ្ដីយោធា និងកម្លាំងសន្ដិសុខ ក្នុង​ការ​រឹប​អូស​ដី​របស់​ប្រជាពលរដ្ឋ​ដោយ​មិន​​ស្រប​ច្បាប់ ដោយ​បំផ្លិច​បំផ្លាញ​របស់​ពួកគាត់ សម្លាប់​សត្វ​ពាហនៈ ដុតបំផ្លាញ ដណ្ដើមយកកសិផល វាយដំ គំរាម​កំហែង បំភិត​បំភ័យ និង​ចាប់​ខ្លួន​អ្នក​ភូមិ​​ជា​​ច្រើន​នាក់​ដែលសកម្មភាពទាំងនេះបានបង្កឲ្យមាន ភាពអសន្ដិសុខ​ស្បៀង​អាហារ និង​កាន់​តែ​ធ្វើ​ឲ្យ​​មាន​​ភាព​​ក្រីក្រ​ដល់​គ្រួសារ​ដែលទទួលរងផលប៉ះពាល់។

នៅដើមខែសីហា ឆ្នាំ២០២២នេះ ពលរដ្ឋចំនួន៩២គ្រួសារនោះបាននាំគ្នាមកតាមដានពាក្យ​ស្នើសុំដីសម្បទានសង្គមកិច្ចជាមួយពលរដ្ឋ៨១គ្រួសារ ផ្សេងទៀតមកពី៤ភូមិ​ដែលមក​ដាក់ញត្តិស្នើសុំដីសម្បទានសង្គមកិច្ច។

បើតាមមន្រ្តីអាដហុកលោក ស្រី ណារ៉េន ឱ្យដឹងថា ពលរដ្ឋ៨១គ្រួសារ​ដែលឡើងទៅ​ដាក់​ញត្តិនោះក៏រងផលប៉ះពាល់ជាមួយក្រុមហ៊ុនផលិតស្ករដែរគ្រាន់តែលំនៅឋានពួកគេមិននៅ​ក្បែរក្រុមហ៊ុននិងមិនត្រូវរងការបណ្ដេញចេញដូចពលរដ្ឋ៩២គ្រួសារ។

ពលរដ្ឋម្នាក់រស់នៅភូមិតាម៉ាន សង្កាត់កូនគ្រៀល ក្រុងសំរោង ខេត្តឧត្តរមានជ័យ សុំមិន​បញ្ចេញ​ឈ្មោះដោយបារម្ភពីសុវត្ថិភាព បានឱ្យដឹងថា ពលរដ្ឋ៨១គ្រួសារដែល​ដាក់ញត្តិ​ស្នើ​សុំ​ដីសម្បទានសង្គមកិច្ចនោះ គឺតំណាងឱ្យពលរដ្ឋជាង៣០០គ្រួសារដែលអាជ្ញាធរ​នៅ​មិន​ទាន់​ដោះស្រាយដីធ្លីក្នុងចំណោមពលរដ្ឋរងផលប៉ះពាល់ជាមួយក្រុមហ៊ុនផលិតស្ករសរុប៧១១​គ្រួសារ មកពី៤ភូមិ គឺភូមិខ្ទុំ ភូមិតាម៉ាន ភូមិបុស្ស និងភូមិត្រពាំងវែង សង្កាត់កូនគ្រៀល ក្រុង​សំរោង ខេត្តឧត្តរមានជ័យ។​ ចំពោះការដាក់ញត្តិនេះ ក៏ស្នើសុំឱ្យអភិបាលខេត្តជួយ​ដោះ​ស្រាយ​វិវាទដីធ្លីជាមួយក្រុមហ៊ុនផលិតស្ករផងដែរ។

ទាក់ទិននឹងការដាក់ពាក្យស្នើសុំដីសម្បទាននេះ អភិបាលរងខេត្តឧត្តរមានជ័យ លោក ឌី រ៉ាដូ ថ្លែងប្រាប់អ្នកសារព័ត៌មានខេមបូចា យ៉ាងខ្លីមុនបិទទូរសព្ទថា រាល់ប្រជាពលរដ្ឋណា​ដែល​ខ្វះ​ខាតដីអាចដាក់ពាក្យស្នើសុំតាមនិតិវិធីច្បាប់។

លោក រ៉ាដូ បញ្ជាក់ថា៖ «ករណីបងប្អូនប្រជាពលរដ្ឋលោកខ្វះដីធ្លី យើងនឹងដោះស្រាយ​តាម​នីតិវិធី អត់ដីគាត់ត្រូវស្នើសុំតាមដីសម្បទាន​សង្គមកិច្ច អាជ្ញាធរហ្នឹងពិនិត្យមើលតាមហ្នឹង​ហើយ»

710 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម