សមាគមសម្ព័ន្ធអ្នកសារព័ត៌មានកម្ពុជា

បុគ្គលិកសណ្ឋាគារចំនួន២ជិត៤០នាក់ស្នើឱ្យក្រសួងការងារបញ្ជូនករណីវិវាទការងារទៅក្រុមប្រឹក្សាអាជ្ញាកណ្តាល

បុគ្គលិកសណ្ឋាគារ សូហ្វីតែល និងកាំបូឌីយ៉ាណា ជិត៤០នាក់លើបដានៅមុខក្រសួងការងារដើម្បីឱ្យក្រសួងបញ្ជូនករណីវិវាទការងាររួមទៅក្រុមប្រឹក្សាអាជ្ញាកណ្ដាល រាជធានីភ្នំពេញ។ រូបថតនៅព្រឹកថ្ងៃទី២៥ ខែមេសា ឆ្នាំ២០២៤។ (ខេមបូចា/ ឃាង សុខមាន)
បុគ្គលិកសណ្ឋាគារ សូហ្វីតែល និងកាំបូឌីយ៉ាណា ជិត៤០នាក់លើបដានៅមុខក្រសួងការងារដើម្បីឱ្យក្រសួងបញ្ជូនករណីវិវាទការងាររួមទៅក្រុមប្រឹក្សាអាជ្ញាកណ្ដាល រាជធានីភ្នំពេញ។ រូបថតនៅព្រឹកថ្ងៃទី២៥ ខែមេសា ឆ្នាំ២០២៤។ (ខេមបូចា/ ឃាង សុខមាន)

បុគ្គលិកសណ្ឋាគារ សូហ្វីតែល ភ្នំពេញ ភូគីត្រា និងសណ្ឋាគារ កាំបូឌីយ៉ាណា ជិត៤០នាក់បាន ប្រមូលផ្តុំនៅខាងមុខក្រសួងការងារថ្ងៃទី២៥ ខែមេសានេះ ដើម្បីស្នើឱ្យរដ្ឋមន្រ្តីក្រសួងការងារ​បញ្ជូន​ករណីវិវាទការងាររួមទៅក្រុមប្រឹក្សាអាជ្ញាកណ្តាល ក្រោយ​ពីវិវាទត្រូវបាន​ដោះ​ស្រាយ​មិនសះជា។

តំណាងសណ្ឋាគារ កាំបូឌីយ៉ាណា និងធ្វើការផ្នែកបដិសណ្ឋារកិច្ច៣១ឆ្នាំ​ លោក នុត រ៉ានី បាន​ឱ្យ​ថា បុគ្គលិកកំពុងបម្រើនៅសណ្ឋាគារ កាំបូឌីយ៉ាណា ​ជាង២០០នាក់​នៅមិនទាន់​ទទួល​អត្ថ​ប្រយោជន៍​ក្រោយពីវិវាទបានដាក់មកក្រសួងការងារជាង២ខែ ប៉ុន្ដែក្រសួងមិនបានបញ្ជូន​ទៅ​ ក្រុមប្រឹក្សាអាជ្ញាកណ្តាល។ លោកសង្ឃឹមថា ក្រសួងនឹងជួយពន្លឿនទៅថៅកែសណ្ឋាគារ​ដើម្បី​បញ្ចប់វិវាទនេះ។

លោកបន្តថា៖ «ការដាក់ញត្ដិនេះដើម្បីឱ្យក្រសួងបញ្ជូនវិវាទពួកខ្ញុំទៅក្រុមប្រឹក្សាអាជ្ញាកណ្ដាល​វិវាទ​ការងារនឹងដោះសា្រយ។ ខ្ញុំជឿជាក់ថាក្រសួងនឹងដោះស្រាយឱ្យបានឆាប់​ក្រោយពី​ដាក់​ញតិ្ដនេះ»

ក្នុងលិខិតដាក់ទៅក្រសួងនាព្រឹកនេះបានបញ្ជាក់ថា កាលពីថ្ងៃទី២៣ ខែធ្នូ ឆ្នាំ២០២៣ ពួកគេ​បាន​ដាក់ពាក្យបណ្ដឹងទៅក្រសួងការងារដើម្បីស្វែងរកដំណោះស្រាយ​លើ៣ចំណុចធំៗ​រួមមាន​ទាមទារប្រាក់ខែ១៤០ដុល្លារ អត្ថប្រយោជន៍មាតុភាព និងប្រាក់បន្ថែមសម្រាប់បុគ្គលិក​ដូរវេន។ កាលថ្ងៃទី២៩ ខែកុម្ភៈ ឆ្នាំ២០២៤ កន្លងទៅនាយកដ្ឋានវិវាទការងារបាន​កំណត់ការផ្សះផ្សា​ប៉ុន្ដែ​វិវាទមិនត្រូវបានដោះស្រាយ។

ក្នុងលិខិតដដែលទាមទារឱ្យប្រធានសហព័ន្ធសហជីពកម្មករនិយោជិតវិស័យទេសចរណ៍​កម្ពុជា លោក​ ទូច កុសល ចូលរួមចចារលើអនុសញ្ញារួម​ ក្រោយពីថៅកែសណ្ឋាគារទាំង២​បដិសេធ​។

ការដាក់លិខិតនេះ លោក និន វណ្ណៈ  អគ្គលេខាធិការ​រង​​គណៈកម្មការ​ដោះ​ស្រាយវិវាទ និង​កូដកម្ម​​នៃក្រ​សួងការងារបានបញ្ជាក់ដោយផ្ទាល់ថា លោកនឹងពន្លឿនដំណោះស្រាយ​លើ​វិវាទ​ទាំងនេះដោយសំអាងថា បញ្ជូនលិខិតទៅលោក ហេង សួរ រដ្ឋមន្រ្ដីក្រសួងការងារ។

លោកបញ្ជាក់ថា៖ «ខ្ញុំនឹងដាក់លិខិតនេះទៅរដ្ឋមន្រ្ដីដើម្បីស្វែងរកដំណោះស្រាយជូន»

ការលើកឡើងស្រដៀងគ្នានេះប្រធានសហជីពនៃសណ្ឋាគារ សូហ្វីតែល ភ្នំពេញ ភូគីត្រា លោក ផាត សារួន លើកឡងថា  លោកនឹងបន្ដឃ្លាំមើលពីចំណាត់ការរបស់​ក្រសួងបន្ដទៀត ក្រោយ​ពី​បញ្ហារបស់បុគ្គលិកជាង៣០០នាក់នៅសណ្ឋាគារ សូហ្វីតែលមិនត្រូវបានដោះស្រាយ។

លោកថ្លែងថា៖ «កន្លងមកបញ្ហាពួកយើង ក្រសួងគាត់ទុកចោល។ ខ្ញុំសង្ឃឹមថា បញ្ហារបស់​ពួកយើង​នឹងទទួលបានផ្លែផ្កា»

ខេមបូចា មិនអាចសុំការបំភ្លឺពីលោក ហេង សៀកចេង ប្រធានគ្រប់គ្រង​ទូទៅ​នៃ​សណ្ឋាគារ​សូហ្វីតែល ភ្នំពេញ ភូគីត្រាបានទេ ដោយទូរសព្ទចូល ប៉ុន្ដែគ្មានអ្នកលើក។

ចំណែកលោក ឃុន ធីរ៉ា ប្រធានធនធានមនុស្ស​នៃសណ្ឋាគារ​ កាំបូឌីយ៉ាណា​ មិនអាច​ឆ្លើយ​នឹងសំណួរ ខេមបូចា បានទេ ដោយលោកថា៖ «សុំទោស! ខ្ញុំកំពុងរវល់»

មាត្រា១០២ នៃច្បាប់ការងារថា ប្រាក់ឈ្នួល ទោះបីការកំណត់ ឬរបៀបគិតយ៉ាងណាក៏ដោយ មានន័យថា ឈ្នួលការងារ ឬឈ្នួលសេវាដែលអាចគិតជាប្រាក់បាន ឬកម្រិតបានដោយការ​ព្រម​ព្រៀងគ្នា ឬដោយច្បាប់ជាតិ ហើយដែលនិយោជកត្រូវបើកឱ្យកម្មករ​និយោជិត​តាម​កិច្ច​សន្យា​ជួលការងារ ឬសេវាដោយលាយល័ក្ខណ៍អក្សរ ឬដោយមាត់ទទេ ទោះចំពោះការងារ​ដែល​បានធ្វើក្ដី ឬដែលត្រូវធ្វើក្ដី ចំពោះសេវាដែលបានបំពេញ ឬត្រូវបំពេញក្ដី។

លោក និន វណ្ណៈ អគ្គលេខាធិការរង​នៃ​ក្រសួងការងារ ចេញមកទទួលលិខិតរបស់ បុគ្គលិកសណ្ឋាគារសូហ្វីតែល និងកាំបូឌីយ៉ាណា នៅមុខក្រសួងការងារ នៅថ្ងៃទី២៥ ខែមេសា ឆ្នាំ២០២៤។ (ខេមបូចា/ ឃាង សុខមាន)

លោក កត្ដា អ៊ន អ្នកនាំពាក្យក្រសួងការងារ បានបញ្ជាក់តាមប្រព័ន្ធតេឡេក្រាមថា ការទាមទារ​របស់តំណាងបុគ្គលិកទាំង២សណ្ឋាគារលើការចុះអនុសញ្ញាលើកិច្ចព្រមព្រៀងគឺធ្វើឡើង​ដោយ​ការយល់ព្រមទាំងសងខាងដោយគ្មានការដាក់សម្ពាធលើគ្នានោះទេ។ លោកបន្ដថា ក្រសួងកំពុងធ្វើការសម្របសម្រួលលើករណីនេះដើម្បីឱ្យភាគីទាំងពីរចាកចេញពីវិវាទដ៏រ៉ាំរ៉ៃ។

លោកមានប្រសាសន៍ថា៖‍ «ករណីនេះគឺក្រសួងបានទទួលញត្ដិរួចហើយ ប៉ុន្ដែការទាមទារ សហជីពជាតំណាង គឺមិនអាចដាក់សម្ពាធលើគ្នាបានទេ។ ក្រសួងកំពុងដោះស្រាយបញ្ហា​នេះ»

យោងតាមលិខិតរបស់បុគ្គលិកសណ្ឋាគារ កាំបូឌីយ៉ាណា បានបញ្ជាក់ថា​ កាលពីថ្ងៃទី៧ ខែវិច្ឆិកា ឆ្នាំ២០២៣ ថ្នាក់ដឹកនាំសហជីពកម្មករនិយោជិតវិស័យទេសចរណ៍​នៃសណ្ឋាគារ​កាំបូឌីយ៉ាណា និងថ្នាក់គ្រប់គ្រងសណ្ឋាគារ កាំបូឌីយ៉ាណា រួមនិងថ្នាក់ដឹកនាំសហព័ន្ធ​សហជីព​កម្មករនិយោជិតវិស័យទេសចរណ៍កម្ពុជា បានជួបប្រជុំដើម្បីធ្វើវិធានចចារ​អនុសញ្ញា​រួម។ ប៉ុន្ដែថ្នាក់គ្រប់គ្រងសណ្ឋាគារ កាំបូឌីយ៉ាណា បានបដិសេធវត្ដមានចូលរួមចចារ​របស់​លោក ទូច កុសល។

នៅថ្ងៃទី២៥ ខែធ្នូ ឆ្នាំ២០២៣ ថ្នាក់ដឹកនាំសហជីពបានដាក់ពាក្យបណ្ដឹង​ទៅនាយកដ្ឋាន​វិវាទ​ការងារនៃក្រសួងការងារ។ ថ្ងៃទី២៩ ខែកុម្ភៈ ថ្នាក់ដឹកនាំសហព័ន្ធសហជីពបានចូលរួម​ផ្សះផ្សា​វិវាទការងារនៅនាយកដ្ឋានវិវាទការងារក្រោមការសម្របសម្រួលលោក ហេង ប៊ុនថា ប៉ុន្ដែ​វិវាទ​នេះ​មិនសះជាទេ។​ ករណីវិវាទនេះដូចគ្នានឹងវិវាទការងារ​របស់បុគ្គលិក​សណ្ឋាគារ​សូហ្វីតែល ដែរ។

បើតាមលោក​ ទូច កុសល ប្រធានសហព័ន្ធសហជីពកម្មករនិយោជិតវិស័យទេសចរណ៍កម្ពុជា ដែលបានចូលរួមការដាក់លិខិតនាព្រឹកនេះបានថ្លែងថា ការដាក់ញត្ដិដើម្បីឱ្យក្រសួងជាអាជ្ញា​កណ្ដាលងាកមកដោះស្រាយបញ្ហារបស់បុគ្គលិកលើវិស័យទេសចរណ៍ទទួលបានការយកចិត្ដទុកដាក់ដោយសំអាងថា ការទុកចោលរបស់ក្រសួងធ្វើឱ្យកម្មករបាត់ទំនុកចិត្ដ។

លោកបញ្ជាក់ថា៖ «បញ្ហានេះគឺកើតឡើងច្រើនមិនថាតែ២សណ្ឋាគារហ្នឹងទេតាមខ្ញុំទទួល​បាន​លើ​ករណីនេះ។ យើងចង់ឱ្យក្រសួងកុំទុកវិវាទរបស់កម្មករចោល ត្រូវចេញមុខដោះស្រាយ និងត្រូវបញ្ជូនរាល់វិវាទទៅក្រុមប្រឹក្សាអាជ្ញាកណ្ដាល»

កាលពីខែវិច្ឆិកា ឆ្នាំ២០២០ អតីត​កម្មករ​និយោជិត​ដែល​ធ្លាប់​បម្រើ​ការងារ​នៅ​សណ្ឋាគារ​សូហ្វីតែល​​​ភ្នំពេញ ​ភូគីត្រា ​ចំនួន​៥៣​នាក់​ ដែល​ត្រូវ​បាន​សណ្ឋាគារ​បញ្ឈប់​ពី​ការងារ​នោះ​ បាន​លើក​គ្នា​ទៅ​តវ៉ា​នៅ​ខាងមុខ​ក្រសួង​ការងារ​​ដើម្បី​ស្នើ​សុំ​ឱ្យ​រដ្ឋមន្រ្តី​ក្រសួង​ការងារ​និង​បណ្តុះ​បណ្តាល​​វិជ្ជាជីវៈ​ ដោះស្រាយ​វិវាទ​របស់​ពួកគេ​ តាម​រយៈ​ការ​បញ្ជូន​វិវាទ​នេះ​ទៅកាន់​ក្រុម​ប្រឹក្សា​អាជ្ញាកណ្តាល​ បន្ទាប់​ពី​សំណុំ​រឿង​នេះ​ មិន​អាច​ផ្សះផ្សា​គ្នា​បាន​។

លោក ឃុន ថារ៉ូ អ្នក​គ្រប់​គ្រង​កម្ម​វិធី​ការ​ងារ​នៃ​មជ្ឈ​មណ្ឌល​សម្ព័ន្ធ​ភាព​ការងារ និង​សិទ្ធិ​មនុស្ស ហៅកាត់ថា (សង់ត្រាល់) ថ្លែង​ថា ក្រសួងគួរពន្លឿនបញ្ហាវិវាទឱ្យទាន់ពេលវេលា ដើម្បីធានាថា ក្រសួងពិតជាយកចិត្ដទុកដាក់ក្នុងនាមជាអាជ្ញាកណ្ដាល។

លោកបន្ថែមថា៖ «ក្រសួងគួរពន្លឿនវិវាទហ្នឹងទើបបញ្ហាអាចដោះស្រាយចប់»

យោងតាមរបាយការណ៍របស់អង្គការសង់ត្រាល់ចេញឆ្នាំ២០២០បង្ហាញថា ដោយសារវិបត្តិ​នៃជំងឺកូវីដ១៩ ចាប់តាំងពីខែមីនាឆ្នាំ២០២០ មានបុគ្គលិកសណ្ឋាគារលំដាប់ផ្កាយ៥​ប្រមាណ​ជា ២ ០០០នាក់មកហើយនៃសណ្ឋាគារជាង២០ ដែលត្រូវបានគេបញ្ឈប់ពីការងារ ដោយគ្មាន​ការទូទាត់សំណងសមរម្យ ហើយសណ្ឋាគារខ្លះតួយ៉ាងដូចជា សណ្ឋាគារ Le Meridien Angkor Hotel នៅខេត្តសៀមរាប។ សណ្ឋាគារខ្លះបានបញ្ឈប់បុគ្គលិកពី៣០ទៅ៥០% និងខ្លះទៀត បានកាត់បន្ថយប្រាក់ឈ្នួលបុគ្គលិក ពី១០ទៅ៣០% ជាដើម។

វិស័យ​ទេស​ចរណ៍​​ទទួល​រង​គ្រោះ​ធ្ងន់​ជាង​គេ​​ក្នុង​អំឡុង​វិបត្តិ​កូវីដ​១៩ ដោយ​ចំនួន​ភ្ញៀវ​បរទេស​បាន​ធ្លាក់ចុះ​៩៨​ភាគ​រយ​នៅ​ត្រីមាសទី​២ និង​៤០ភាគ​រយ​នៅ​ត្រីមាសទី​១​ក្នុង​ឆ្នាំ​២០២០៕

424 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម