សមាគមសម្ព័ន្ធអ្នកសារព័ត៌មានកម្ពុជា

ពលរដ្ឋជិត៧០គ្រួសារនៅស្រុកគាស់ក្រឡទៅតវ៉ា​សុំឱ្យ​អាជ្ញាធរ​ខេត្តបាត់ដំបង ផ្តល់បណ្ណកម្មសិទ្ធិដីធ្លីស្របច្បាប់

តំណាងប្រជាពលរដ្ឋយកលិខិតសុំអន្តរាគមន៍ពីអ្នកតំណាងរាស្រ្ត នៅទីស្នាក់ការរដ្ឋសភាមណ្ឌលខេត្តបា់តដំបង ដើម្បីផ្តល់បណ្ណកម្មសិទ្ធិដីធ្លីជូនពួកគាត់ នារសៀលថ្ងៃទី៦ ខែមិថុនា ឆ្នាំ២០២៣ ។ ខេមបូចា/ សុខ សាវី
តំណាងប្រជាពលរដ្ឋយកលិខិតសុំអន្តរាគមន៍ពីអ្នកតំណាងរាស្រ្ត នៅទីស្នាក់ការរដ្ឋសភាមណ្ឌលខេត្តបា់តដំបង ដើម្បីផ្តល់បណ្ណកម្មសិទ្ធិដីធ្លីជូនពួកគាត់ នារសៀលថ្ងៃទី៦ ខែមិថុនា ឆ្នាំ២០២៣ ។ ខេមបូចា/ សុខ សាវី

ប្រជាពលរដ្ឋប្រមាណ៦៩គ្រួសារ នាំគ្នាទៅតវ៉ាមុខរដ្ឋបាល​ខេត្តបាត់ដំបង​ដើម្បីទាមទារ​ឱ្យ​អាជ្ញាធរចេញបណ្ណកម្មសិទ្ធិស្របច្បាប់លើដីធ្លីរបស់ពួកគេដែល​កាប់រានអាស្រ័យផល​តាំង​ពីឆ្នាំ២០១២ លើផ្ទៃដី២៥៤ហិកតានៅចំណុចភ្នំស្ន ភូមិសំរោង ឃុំឆ្នាល់មាន់​ ស្រុកគាស់ក្រឡ​ខេត្តបាត់ដំបង កាលពីព្រឹកថ្ងៃទី៦ ខែមិថុនា ឆ្នាំ២០២៣។

បន្ថែមពីនោះប្រជាពលរដ្ឋក៏បានស្នើសុំឱ្យអាជ្ញាធរបញ្ឈប់ការប្រើប្រាស់ប្រព័ន្ធតុលាការគំរាម​កំហែងពលរដ្ឋដែលអាស្រ័យផលលើដីរបស់ខ្លួនខាងលើ។

តំណាងប្រជាពលរដ្ឋ លោក ឌុច ស្តើង អាយុ៦៥ឆ្នាំ បាននិយាយថានេះជាលើកទីពីរ​ហើយ​ដែល​​ពួកគាត់ ឡើងមកតវ៉ា សុំឱ្យអាជ្ញាធរខេត្តជួយអន្តរាគមន៍ចុះវាស់វែងដីធ្លី ផ្តល់ប្លង់កម្មសិទ្ធិ​ស្របច្បាប់ឱ្យពលរដ្ឋ ការពារកុំឱ្យដកហូតពីពួកគាត់នៅពេលក្រោយ និងអាចយកប្លង់ដី​ដាក់​បញ្ចាំធនាគារយកទុនមកពង្រីកការដាំដុះដើម្បីចិញ្ចឹមជីវិត។

លោក ឌុច ស្តើង ឱ្យដឹងថា៖ «ពួកខ្ញុំចង់បានប្លង់កម្មសិទ្ធិស្របច្បាប់ អាជ្ញាធរ​ប្រៀបដូច​ឪពុក​ម្តាយ​ចែកដីឱ្យកូនបើអត់ប្លង់គាត់ចង់ដកហូតពេលណាក៏បាន បើបានប្លង់ស្របច្បាប់ហើយ​មិនអាចដកហូតវិញបានទេ»

លោក ឌុច ស្តើងអះអាងថា គាត់មានដីបីហិកតាដែលខំរុករានដាំដុះ ដំណាំ ដំឡូង និងស្រូវ តាំងពីឆ្នាំ២០១២ នៅចំណុចខាងលើមកទល់បច្ចុប្បន្នមិនដែលខកខាន។ ប៉ុន្តែនៅឆ្នាំ២០២២ គាត់ និងប្រពន្ធឈ្មោះ ឃឹម ថេន ត្រូវបានអាជ្ញាធរស្រុកគាស់ក្រឡ ប្តឹងមកតុលាការ​ចោទ​ប្រកាន់​ថា បានកាប់រុករានលើដីសាធារណៈរបស់រដ្ឋដែលមកទល់ពេលនេះមិនទាន់​ចប់​រឿង​ក្តី​នៅឡើយ ។ លោកបានស្នើសុំឱ្យអាជ្ញាធរខេត្តជួយអន្តរាគមន៍ បញ្ចប់រឿងក្តីរបស់លោកនឹង​កុំ​ឱ្យបន្តប្តឹងពលរដ្ឋទាក់ទងនឹងដីធ្លីខាងលើថែមទៀតផងដែរ។

តំណាងប្រជាពលរដ្ឋម្នាក់ទៀតលោក ស្វាយ សុភាព អាយុ៥៦ឆ្នាំ រស់នៅភូមិឆ្នាល់មាន់ ឃុំឆ្នាល់មាន់ ស្រុកគាស់ក្រឡខេត្តបាត់ដំបងបាននិយាយថា ដោយក្រីក្ររអត់មានដីធ្លី​លោក និងប្រជាពលរដ្ឋផ្សេងទៀត សរុប៦៩គ្រួសារបានកាប់ឆ្ការព្រៃដើម្បីដាំដុះដំណាំពោត ដំឡូង ស្រូវ នៅទីតាំងខាងលើចាប់ពីឆ្នាំ២០១២ ដល់បច្ចុប្បន្នចំនួន២៥៤ហិកតា។

លោកបន្តថា កន្លងមកអាជ្ញាធរធ្លាប់បានគំរាមដកហូតចបកាំបិត និងសម្ភារៈ​ធ្វើកសិកម្ម​ពី​ពលរដ្ឋជាបន្តបន្ទាប់ដែរ ដោយចោទប្រកាន់ថាពលរដ្ឋរុករានកាប់ឆ្កាលើដី​សាធារណៈ​របស់​រដ្ឋ។

លោកបញ្ជាក់ថា ប្រជាពលរដ្ឋទាំង៦៩គ្រួសារធ្លាប់បាននាំគ្នាផ្តិតស្នាមមេដៃ ដាក់ពាក្យសុំ​អន្តរាគ​មន៍ ទៅអាជ្ញាធរខេត្តបាត់ដំបង និងទៅកាន់ក្រសួងរៀបចំដែនដី នគរូបនីយកម្ម និង​សំណង់ នៅដើមឆ្នាំ២០២៣នេះ ដើម្បីសុំអន្តរាគមន៍ចុះវាស់វែងដីធ្លី និងផ្តល់បណ្ណកម្មសិទ្ធិ​ស្រប​ច្បាប់ដល់ពួកគាត់ដែរ។

ក្នុងលិខិតដែលសុំអន្តរាគមន៍នេះបានបញ្ជាក់ថា ពួកគាត់ទាំង៦៩គ្រួសារបានកាន់កាប់ និង​អាស្រ័យ​ផល​លើផ្ទៃដីចំនួន២៥៤ហិកតា នៅចំណុចភ្នំស្ន ភូមិសំរោង ឃុំឆ្នាល់មាន់ ស្រុកគាស់ក្រឡ តាំងពីឆ្នាំ២០១២មក។ ក្នុងអំឡុងឆ្នាំ២០២០ ក្រុមការងារសុរិយោដីថ្នាក់​ខេត្ត​ស្រុក បានចុះវាស់វែងដីដើម្បីធ្វើបណ្ណកម្មសិទ្ធិ ជូន ពលរដ្ឋនៅចំណុចភ្នំស្ននេះ​ តែក្រុមការងារ​មិនបានធ្វើការវាស់វែងដីធ្លីឱ្យក្រុមពួកគាត់នោះទេ ដោយ ប្រាប់ថាដីរបស់ពួកគាត់ពុំមាន​ឈ្មោះ​​ត្រូវវាស់វែងឡើយ។ ហើយក្រុមមន្រ្តីជំនាញបានធ្វើការវាស់វែងចោះៗ ចំពោះអ្នកដែល​មានឈ្មោះប៉ុណ្ណោះ ហេតុដូច្នេះហើយទើបពួកគាត់មិនមានបណ្ណកម្មសិទ្ធិដូចពលរដ្ឋដទៃ​ដល់​សព្វថ្ងៃ ។

លោក ឌុច ស្តើងបានបន្ថែមថា ក្នុងចំណោមប្រជាពលរដ្ឋទាំង៦៩គ្រួសារនេះមាន៥៣គ្រួសារ​រស់​នៅមូលដ្ឋានខាងលើផ្ទាល់ ដែលមានអត្តសញ្ញាណបណ្ណសៀវភៅគ្រួសារ និងបានបោះ​ឆ្នោត​រាល់អាណត្តិមិនដែលខាន ចំណែកប្រជាពលរដ្ឋ១៦គ្រួសារទៀតរស់នៅស្រុកផ្សេង។

ប្រជាពលរដ្ឋខាងលើបានឱ្យដឹងថា ការឡើងមកសុំអន្តរាគមន៍ពីអាជ្ញាធរខេត្តបាត់ដំបង​នាថ្ងៃអង្គារនេះ ពួកគាត់មិនត្រូវបានអនុញ្ញាតិឱ្យជួបលោកអភិបាលខេត្ត រឺ អភិបាលរងខេត្ត​ទទួលបន្ទុកដំណោះស្រាយដីធ្លីនោះទេ ដោយអាជ្ញាធរបានប្រាប់ពលរដ្ឋឱ្យទៅ​ជួបអភិបាល​ស្រុកគាស់ក្រឡវិញដើម្បីឱ្យ អាជ្ញាធរស្រុករាយការណ៍បន្តមកខេត្ត​ព្រោះថ្នាក់ដឹកនាំខេត្តកំពុង​ជាប់ប្រជុំ ។

ប្រជាពលរដ្ឋ៦៩គ្រួសារប្រមូលផ្តុំនៅមុខសាលាខេត្តបាត់ដំបងសុំអន្តរាគមន៍ពីអាជ្ញាធរខេត្តចុះវាស់វែង និងផ្តល់បណ្ណកម្មសិទ្ធិដីធ្លីជាង២៥៤ហិកតាដល់ពួកគាត់នៅចំណុចភ្នំស្ន ភូមិសំរោង ឃុំឆ្នាល់មាន់ ស្រុកគាស់ក្រឡ នាព្រឹកថ្ងៃទី៦ ខែមិថុនា ឆ្នាំ២០២៣ ។ ខេមបូចា/ សុខ សាវី

ដោយបរាជ័យក្នុងការជួបផ្ទាល់ជាមួយថ្នាក់ដឹកនាំខេត្ត តំណាងប្រជាពលរដ្ឋបានធ្វើលិខិត​មួយ​ច្បាប់ទៀតយកទៅដាក់ជូនដល់ទីស្នាក់ការរដ្ឋសភាមណ្ឌលខេត្តបាត់ដំបង នារសៀលថ្ងៃ​ទី៦ ខែមិថុនា នេះដើម្បីគោរពជូន លោក ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃជា​សមាជិកសភាតំណាងរាស្រ្តមណ្ឌលខេត្តបាត់ដំបងដើម្បីជួយអន្តរាគមន៍បន្ថែម។

ប្រជាពលរដ្ឋលោក ស្វាយ សុភាព បានបញ្ជាក់ថា ពេលទៅដល់ស្នាក់ការ​រដ្ឋសភាមណ្ឌល​ខេត្ត​បាត់ដំបង មានមន្រ្តីម្នាក់ក្នុងចំណោមបីនាក់ បានទទួលពាក្យសុំអន្តរាគមន៍ពីប្រជាពលរដ្ឋ និងបោះត្រាចូលរួចហើយ ដោយមន្រ្តីនោះប្រាប់ថានឹងបញ្ជូនឯកសារពលរដ្ឋ​បន្តទៅរដ្ឋសភា​ជាតិ។

ខេមបូចា ​មិនអាចទំនាក់ទំនងលោក យឹម សឿប អភិបាលរងខេត្តបាត់ដំបងទទួលបន្ទុកដោះ ស្រាយដីធ្លីបាននៅឡើយទេនាសៀលថ្ងៃអង្គារ៍នេះ តាមទូរសព្ទ​ដោយលោកថា​ជាប់រវល់​ប្រជុំ​។ ចំណែកលោក ញ៉ឹក សារ៉ែន អភិបាលស្រុកគាស់ក្រឡ​មិនអាចទំនាក់ទំនង​បាននោះ​ទេ​តាម​ទូរសព្ទ ។

ទោះបីយ៉ាងណាលោក ឌី ពៅ អភិបាលរងស្រុកគាស់ក្រឡ ទទួលបន្ទុកដោះស្រាយដីធ្លី បាន​មានប្រសាសន៍ថា អាជ្ញាធរមិនអាចផ្តល់ប្លង់កម្មសិទ្ធិជូនប្រជាពលរដ្ឋបាននោះទេ ដោយលោក​ចោទ​ថា ប្រជាពលរដ្ឋលួចកាប់ទន្រ្ទានរុករានលើដីដែលមានប្លង់កម្មសិទ្ធិរបស់រដ្ឋ។

លោកបញ្ជាក់ថា ដើមចមទីតាំងដីខាងលើនេះ គឺមានទំនាស់រវាងលោកឧកញ្ញ៉ា សន ថន និង​ប្រជាពលរដ្ឋ ហើយត្រូវបានគណកម្មាធិការថ្នាក់ស្រុក និងខេត្ត ចុះធ្វើអត្តសញ្ញាណ​កម្ម​មនុស្ស និងអត្តសញ្ញាណកម្មដីធ្លី លើកទីមួយ និងលើកទីពីរ នឹងបានហាមមិនឱ្យ​ពលរដ្ឋ​កាប់​ទន្រ្ទាន​រុក​រានព្រៃបន្ថែមទៀត។ លោកបន្តថា ថ្វីត្បិតតែអាជ្ញាធរហាម តែពលរដ្ឋនៅតែលួច​រុករានដី​បន្ត រហូតគណៈកម្មាធិការចុះកំណត់អត្តសញ្ញាណ​ជាលើកចុងក្រោយ​នឹងបានធ្វើ​របាយការណ៍​រាយការណ៍ទៅថ្នាក់ខេត្ត ខេត្តរាយការណ៍ទៅក្រសួង រហូតដល់រាជរដ្ឋាភិបាល​បានសម្រេចដកហូតដីពីឧកញ្ញ៉ា សន ថន ទាំងអស់។

លោកបន្ថែមថា ក្រោយពីរាជរដ្ឋាភិបាលដកហូតដីពីឧកញ្ញ៉ា សន ថន រួចមកនៅឆ្នាំ២០២១ អាជ្ញាធរបាន ផ្តល់ប្លង់កម្មសិទ្ធិដីធ្លីជូនប្រជាពលរដ្ឋដែលមានឈ្មោះក្នុងបញ្ជីធ្វើ​អត្តសញ្ញាណកម្ម​កន្លងមក គឺប្រជាពលរដ្ឋណាដែល កាប់ទន្រ្ទានដីព្រៃបានវាល​នឹងដាំដំណាំ​រួចហើយ ត្រូវផ្តល់កម្មសិទ្ធិស្របច្បាប់ជូនដែលវគ្គទី១ បានជាង៨០គ្រួសារ  ចំណែកដីណា​ដែល​​នៅព្រៃមិនទាន់កាប់វាលដាំដំណាំ គឺត្រូវឆ្វៀលទុកជាដីរបស់រដ្ឋ មិនផ្តល់បណ្ណកម្មសិទ្ធិ​ជូននោះទេ ។

លោកបញ្ជាក់ថា ប្រជាពលរដ្ឋទាំង៦៩គ្រួសារនេះមិនមានឈ្មោះក្នុងបញ្ជីដែល​គណៈកម្មការ​ចុះធ្វើអត្តសញ្ញាណកម្មនោះទេ គឺពួកគាត់មកកាប់ទន្រ្ទានដីរដ្ឋនៅពេលក្រោយដែល​គណៈកម្មាធិការ​ចុះធ្វើអត្តសញ្ញាណកម្ម ហើយពួកគាត់ឃើញប្រជាពលរដ្ឋមុនគេ​ទទួលបាន​ប្លង់កម្មសិទ្ធិ ពួកគាត់នាំគ្នាកៀរគរមកលួចរុករានដីរដ្ឋដើម្បីចង់បានប្លង់កម្មសិទ្ធិដែរ ដោយមិន​មាន​អាជ្ញាធរដឹងលឺ។  

លោក ឌី ពៅ បន្ថែមថា៖ ​«អាជ្ញាធរគ្មានដំណោះស្រាយអ្វីឱ្យ​ពលរដ្ឋនោះទេ​ព្រោះពួកគាត់​ទៅ​រុករានលើដីមានប្លង់កម្មសិទ្ធិរបស់រដ្ឋ រាល់ថ្ងៃពួកគាត់នៅតែលួចកាប់រុករានដីរដ្ឋជាហូហែរ បើទោះបីអាជ្ញាធរ ស្រុកមានវិធានការច្បាប់​មានដីការចាប់ខ្លួន​ដាក់គុកមនុស្សមួយ​ចំនួនក៏​ដោយ តែពួកគាត់នៅតែមិនខ្លាចរឿងច្បាប់ហ្មង»

លោក អ៊ិន គង់ជិត មន្រ្តីសម្របសម្រួលអង្គការសិទ្ធិមនុស្សលីកាដូប្រចាំខេត្តបាត់ដំបង និង​ប៉ៃលិន បានមានប្រសាសន៍ថា ដីខាងលើជាដីដែលមានប្លង់កម្មសិទ្ធិរបស់រដ្ឋ ឯកឧត្តម​អភិបាល​ខេត្ត ជាប្រធានអាជ្ញាធរគ្រប់គ្រងដីរដ្ឋក្នុងខេត្តបាត់ដំបង ហើយប្រជាពលរដ្ឋ​ប្រើ​ប្រាស់​ដីខាងលើនេះមិនច្រើនប៉ុន្មាននោះទេ អាជ្ញាធរគួរតែធ្វើប្រទានកម្ម​ជូនដល់ពួកគាត់​ដើម្បីបានដាំដុះដំណាំចិញ្ចឹមជីវិត។

លោក អ៊ិន គង់ជិត បន្ថែមថា៖ «ព្រោះយើងឃើញថានៅឆ្នាំ២០១៧អាជ្ញាធរខេត្ត បានស្នើ​សុំ​ទៅសម្តេចក្រឡាហោម ស ខេង សុំដី​៧០០​ហិកតាពីឧកញ្ញ៉ា សន ថន ហើយសម្តេច​បាន​យល់​​ព្រមដោយទុក៥០០ហិកតាចែកឱ្យប្រជាពលរដ្ឋអ៊ីចឹង! ដីដែលបែងចែក​នោះមិន​ទាន់​អស់​ទេ យើងស្នើសុំឱ្យអាជ្ញាធរខេត្ត លោកបន្តកិច្ចការនេះដើម្បីបញ្ចប់ ដើម្បីឱ្យពលរដ្ឋ​ទទួលបាន​បណ្ណកម្មសិទ្ធិ ប៉ុន្តែត្រូវធ្វើការជំរឿនច្បាស់លាស់ដែរ»

448 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម