លោកនាយករដ្ឋមន្ត្រី ហ៊ុន ម៉ាណែត ថ្លែងប្រាប់អំពីគោលនយោបាយសំខាន់ៗ ដែលត្រូវបានដាក់ចេញ ដើម្បីលើកកម្ពស់គុណភាពអប់រំ ចាប់ពីថ្នាក់មត្តេយ្យដល់អនុវិទ្យាល័យ ស្របតាមដំណាក់កាលទី១ នៃយុទ្ធសាស្ត្របញ្ចកោណ ដើម្បីពង្រឹងគុណភាពអប់រំ កីឡា វិទ្យាសាស្ត្រ និងបច្ចេកវិទ្យា ក្នុងឆ្នាំសិក្សាថ្មីថ្ងៃទី១ ខែធ្នូ។
យោងតាមការថ្លែងរបស់លោក ហ៊ុន ម៉ាណែត កាលពីថ្ងៃទី ១ ខែធ្នូ ក្នុងឱកាសបើកបវេសនកាលឆ្នាំសិក្សា២០២៣-២០២៤ ត្រូវបានចាត់ទុកថាជាថ្ងៃដំបូងសម្រាប់រដ្ឋាភិបាលថ្មីក្នុងការចាប់ផ្តើមអនុវត្តគោលនយោបាយអាទិភាពសំខាន់ៗសម្រាប់វិស័យអប់រំ ជាមួយនឹងគោលដៅលើកកម្ពស់គុណភាព។
ការដាក់ចេញនូវវិធានការសំខាន់ៗដើម្បីពង្រឹងលើកកម្ពស់គុណភាពអប់រំតាមរយៈសកម្មភាពចំនួនបួន។ ទី១ ការកែលម្អអភិបាលកិច្ចសាលារៀន។ ទីពីរ ពិនិត្យ កែសម្រួល និងរៀបចំកម្មវិធីសិក្សា និងសកម្មភាពក្រៅម៉ោងសិក្សាឱ្យស្របទៅតាមតម្រូវការ។ ទីបី តាមរយៈការថែរក្សាសុខភាពសិស្សតាមរយៈកម្មវិធីអាហារូបត្ថម្ភរបស់កុមារ និងការត្រួតពិនិត្យគុណភាពអាហារនៅក្នុងសាលារៀន។ ជាចុងក្រោយ ដើម្បីលើកទឹកចិត្តឱ្យមានការចូលរួមពីមាតាបិតា អាណាព្យាបាល និងសហគមន៍ក្នុងវិស័យអប់រំ ស្របតាមពាក្យស្លោក «ភាពជាដៃគូរដ្ឋ និងសហគមន៍សម្រាប់ការអប់រំ»។
ដើម្បីបង្កើនការយកចិត្តទុកដាក់លើវិន័យ សីលធម៌ សុជីវធម៌ និងគុណធម៌របស់បុគ្គលិកអប់រំ និងសិស្សានុសិស្ស រដ្ឋាភិបាលក៏បានដាក់ចេញនូវវិធីសាស្ត្រដាក់ពិន្ទុ៨០ភាគរយលើចំណេះដឹង១០ភាគរយលើសិល្បៈនៃការរស់នៅ និង១០ភាគរយលើក្រមសីលធម៌ និងអាកប្បកិរិយា។
លោកនាយករដ្ឋមន្ត្រីថ្លែងថា៖ «នៅថ្ងៃនេះដែរ ក្នុងនាមរាជរដ្ឋាភិបាលកម្ពុជា ខ្ញុំសូមប្រកាសដាក់ចេញនូវ «យុទ្ធនាការសាលារៀនស្អាត គ្មានសំរាម» នៅទូទាំងប្រទេស ចាប់ពីឆ្នាំសិក្សា២០២៣-២០២៤ តទៅ ដើម្បីគាំទ្រដល់ការអនុវត្តចលនាប្រឡងប្រណាំងសាលាស្អាត ដែលកន្លងមក ក្រសួងអប់រំ យុវជន និងកីឡា បានដាក់ចេញនូវគោលការណ៍ លក្ខណៈវិនិច្ឆ័យ និងនីតិវិធីនៃការវាយតម្លៃសាលាស្អាតរួចមកហើយ»។
តាមរយៈការពង្រឹងអភិបាលកិច្ចសាលារៀន រដ្ឋាភិបាលផ្តោតលើវិស័យចំនួនបួន។ ទីមួយ សាលារៀនត្រូវតែមានការគ្រប់គ្រង និងភាពជាអ្នកដឹកនាំល្អ ហេដ្ឋារចនាសម្ព័ន្ធរូបវន្តសមរម្យ និងអនាម័យ ព្រមទាំងប្រើប្រាស់ថវិកាដើម្បីគាំទ្រដល់ការសិក្សា និងការបង្រៀនត្រឹមត្រូវ។ ទីពីរ គ្រូបង្រៀនត្រូវតែមានសមត្ថភាពខ្ពស់ មានចំណេះដឹងផ្នែកបច្ចេកវិទ្យា និងមានលក្ខខណ្ឌការងារ និងជីវភាពសមរម្យ។ ទី៣ សិស្សត្រូវមានអាកប្បកិរិយាវិជ្ជមាន ហើយនៅតាមសាលាជនបទ និងតំបន់ជួបការលំបាកត្រូវមានកម្មវិធីអាហារូបត្ថម្ភ។ ទីបួន ឪពុកម្តាយត្រូវបានលើកទឹកចិត្តឱ្យចូលរួមក្នុងការអប់រំ និងមើលថែពួកគេយ៉ាងដិតដល់ ខណៈពេលដែលផ្តល់ការគាំទ្រផ្នែកអារម្មណ៍ និងសម្ភារៈផងដែរ។
លោកថ្លែងបន្តថា៖ «រាជរដ្ឋាភិបាលកម្ពុជា បានឯកភាពជាគោលការណ៍រួចហើយ ដើម្បីដាក់ឱ្យអនុវត្ដ «ស្តង់ដា សាលារៀនគំរូ» និង«ពានរង្វាន់សាលាគំរូ សម្តេចមហាបវរធិបតី» នៅទូទាំងប្រទេស ចាប់ពីឆ្នាំសិក្សា២០២៣-២០២៤ នេះតទៅ»។
លោក សេក សុជាតិ នាយកប្រតិបត្តិអង្គការអភិវឌ្ឍន៍ផ្នត់គំនិត ថ្លែងថា លោកចូលរួមត្រេកអរជាមួយគោលនយោបាយថ្មីដែលធ្វើឱ្យគុណភាពវិស័យអប់រំនៅកម្ពុជាកាន់តែមានភាពប្រសើរ។ លោក សុជាតិ ចង់ឃើញការប្តេជ្ញាចិត្តរបស់រដ្ឋាភិបាលដើម្បីឱ្យការដាក់ចេញនៅគោលនយបាយថ្មីទទួលបានជោគជ័យ ជាពិសេសមិនឱ្យមានអំពើពុករលួយ ដូចជាការយកលុយពីសិស្ស និងអាណាព្យាបាល ក្នុងការបង់ប្រាក់វិភាគទានក្រៅផ្លូវការ។ លោកបន្ថែមថា៖ «សូមបញ្ឈប់បន្តឱ្យមានការបង្រៀនក្រៅម៉ោង ព្រោះធ្វើឱ្យសិស្សត្រូវចំណាយប្រាក់ច្រើនដើម្បីបានសិក្សា ដែលនឹងធ្វើឱ្យពួកគេមានការលំបាក»។
លោកបន្តថា គុណភាពវិស័យអប់រំបច្ចុប្បន្ននៅកម្ពុជាមានលក្ខណល្អប្រសើរតិចតួចណាស់ ហើយលោកចង់ឃើញគុណភាពវិស័យអប់រំនៅកម្ពុជាមានភាពល្អប្រសើរឡើង ជាពិសេសត្រូវឱ្យសិស្ស និងលោកគ្រូមានសេរីភាពពេញលេញ ដែលធ្វើឱ្យពួកគេអាចស្រាវជ្រាវនិងនិយាយពីបញ្ហាជាក់ស្តែងនៅក្នុងសង្គម។ លោកនិយាយថា៖ «ផ្តល់សេរីភាពឱ្យសិស្សធ្វើការស្រាវជ្រាវទីតាំងប្រវត្តិសាស្រ្ត ឬ ព្រំដែន ដើម្បីឱ្យសិស្សបានយល់ពីប្រវត្តិសាស្រ្តពិត និងមានសិទ្ធិបញ្ចេញមតិរបស់ពួកគេ»។
ប្រធានសមាគមគ្រូបង្រៀនកម្ពុជាឯករាជ្យ អ្នកស្រី អ៊ុក ឆាយ៉ាវី ថ្លែងថា ការដែលមានការដាក់គោលនយោបាយថ្មីដើម្បីពង្រឹងវិស័យអប់រំនៅកម្ពុជាព្រោះរដ្ឋាភិបាលថ្មីដឹងថាប្រព័ន្ធអប់រំនៅកម្ពុជាមិនទាន់មានស្តង់ដា និងទាន់អាចទទួលយកបានទេ ដែលជាកត្តាជំរុញឱ្យរដ្ឋាភិបាលថ្មីគិតគូរនិងដាក់ចេញនៅគោលនយោបាយថ្មីដែលតម្រូវឲ្យគ្រូទាំងអស់យកចិត្តទុកដាក់ជាមួយសិស្សានុសិស្ស ដើម្បីពង្រឹងវិស័យអប់រំឲ្យមានគុណភាពឡើងវិញ។
អ្នកស្រី អ៊ុក ឆាយ៉ាវី និយាយថា៖ «យើងឃើញថាមួយរយៈនេះសិស្សនិទ្ទេស A មានការកើនឡើង១០០០ជាងនាក់មែន ប៉ុន្តែសិស្សដែលទទួលបានពិន្ទុទាបក៏មានច្រើនដែរ»។
អ្នកស្រីក៏មើលឃើញថា ការលើកកម្ពស់ ឬការផ្តល់ឱ្យសម្ភារៈ និងការលើកទឹកចិត្តដល់សិស្សដែលទទួលបាននិទ្ទេស A មិនទាន់អាចទទួលបាយកបានទេ ព្រោះការជួយនេះអ្នកស្រី ឆាយ៉ាវី ថា ជួយតែសិស្សមួយចំនួនប៉ុណ្ណោះ ចំណែកសិស្សដទៃដែលទទួលបាននិទ្ទេស A និងមានជីវភាពខ្វះខាតដូចគ្នា មិនទទួលបានការឧបត្ថម្ភទេ ហើយអ្នកស្រី ឆាយ៉ាវី ចង់ឱ្យរដ្ឋាភិបាលថ្មីជួយឧបត្ថម្ភនិងគាំទ្រដល់សិស្សដ៏ទៃទៀតដើម្បីឱ្យស្មើភាពគ្នា។
អ្នកស្រីបន្ថែមថា៖«ខ្ញុំចង់ឃើញសិស្សានុសិស្សដែលពួកគេខិតខំរៀនហើយទទួលបាននិទ្ទេសល្អ ឱ្យពួកគេបានជាការលើកទឹកចិត្តពីរដ្ឋាភិបាលស្មើៗគ្នា»៕
ប្រែសម្រួលពីអត្ថបទភាសាអង់គ្លេស៖ New Government Rolls Out Standard Policies for Schools to Improve Education Quality
