សមាគមសម្ព័ន្ធអ្នកសារព័ត៌មានកម្ពុជា

ពលរដ្ឋដែលទើបផ្លាស់ប្តូរទីលំនៅថ្មីនៅខណ្ឌច្បារអំពៅទទូចឱ្យ​អាជ្ញាធរពាក់ព័ន្ធជួយសម្រួលការភ្ជាប់ប្រព័ន្ធទឹកភ្លើងចូលក្នុង​សហគមន៍​ថ្មីពួកគេ

ពលរដ្ឋអង្គុយក្រោមតង់កៅស៊ូដែលជាផ្ទះថ្មីរបស់ពួកគាត់ នៅភូមិចំពុះក្អែក សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ កាលថ្ងៃទី១០ ខែធ្នូ ឆ្នាំ២០២៣។ (ខេមបូចា/ ហ៊ែល កំសាន)
ពលរដ្ឋអង្គុយក្រោមតង់កៅស៊ូដែលជាផ្ទះថ្មីរបស់ពួកគាត់ នៅភូមិចំពុះក្អែក សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ កាលថ្ងៃទី១០ ខែធ្នូ ឆ្នាំ២០២៣។ (ខេមបូចា/ ហ៊ែល កំសាន)

ប្រជាពលរដ្ឋដែលទើបតែមកតាំងទីលំនៅថ្មីនៅភូមិចំពុះក្អែក ទទូចឲ្យអាជ្ញាធរពាក់ព័ន្ធ​ជួយ​សម្រួលការតភ្ជាប់ប្រព័ន្ធទឹកភ្លើង ព្រោះជាង២ខែមកហើយដែលពួកគាត់បានទៅរស់នៅ​ទី​តាំង​នោះតាមការស្នើរបស់អាជ្ញាធរខណ្ឌច្បារអំពៅ ប៉ុន្តែពួកគាត់នៅតែមិនទាន់មាន​ទឹក​ស្អាត​​​និងភ្លើងប្រើប្រាស់គ្រប់គ្រាន់។

លោក ជឹម ស្រី ដែលជាពលរដ្ឋម្នាក់ដែលយល់ព្រមផ្លាស់ប្តូរទៅទីតាំងថ្មីក្នុងសង្កាត់ព្រែកថ្មី ខណ្ឌច្បារអំពៅ ថ្លែងប្រាប់ ខេមបូចា នៅថ្ងៃទី១២ ខែធ្នូ ថា លោកនិងក្រុមគ្រួសារ​បាន​សម្រេច​ចិត្តរុះរើផ្ទះមករស់នៅទីតាំងថ្មីនៅភូមិចំពុះក្អែក អស់រយៈពេលជិត៣ខែហើយ ប៉ុន្តែនៅតែមិន​ទាន់​ឃើញ​មានការរៀបចំតភ្ជាប់ប្រព័ន្ធទឹកស្អាត នៅឡើយទេ ចំណែកប្រព័ន្ធភ្លើង​គឺទើបតែ​មាន​​ការតភ្ជាប់ចូលក្នុងភូមិបានជិតមួយសប្តាហ៍ប៉ុណ្ណោះ។

 លោកបន្ថែមថា​ ពេលដែលពលរដ្ឋមិនទាន់យល់ព្រមរុះរើផ្ទះមករស់នៅទីតាំងថ្មី អាជ្ញាធរ​ធ្លាប់​សន្យាថានឹងតភ្ជាប់ប្រព័ន្ធទឹកភ្លើងជូនពួកគាត់ឲ្យបានប្រើប្រាស់គ្រប់ៗគ្នា ទោះបីជាពលរដ្ឋ​ដែល​មិនមានលទ្ធភាពក៏អាចបង់រម្លស់តភ្ជាប់ទឹកភ្លើងប្រើប្រាស់ដែរ តែជាក់ស្តែងបន្ទាប់​ពី​ពលរដ្ឋ​យល់ព្រមរុះរើផ្ទះ ពួកគាត់មិនអាចតភ្ជាប់ប្រព័ន្ធទឹកភ្លើងបានទេ គឺទាល់តែមានលុយ​គ្រប់​​​ទើបអាចតភ្ជាប់បាន គឺមិនអាចបង់រម្លស់បានទេ។

 លោក ជឹម ស្រី និយាយថា៖ «មិនមែនបាន[តភ្ជាប់ប្រព័ន្ធភ្លើង]ទាំងអស់គ្នាទេ អ្នកបានៗ អ្នកអត់ៗ ឡូវបានប្រហែល៤ ១០ផ្ទះហ្នឹង! [..] ទាល់តែមានលុយបង់លុយ​ឲ្យគេបានគេភ្ជាប់​[ប្រព័ន្ធ​ទឹក​ភ្លើង]​ឲ្យ»។លោកបន្តថា៖ «គាត់[អាជ្ញាធរ]និយាយបាតដៃខ្នងដៃ គាត់គោរពសម្តី​ដែល​ខ្លួននិយាយអត់បានផង»។

លោក ជឹម ស្រី បញ្ជាក់ទៀតថា ទឹកដែលអាជ្ញាធរខណ្ឌច្បារអំពៅផ្តល់ឲ្យ​ពលរដ្ឋក្នុងមូលដ្ឋាន​ដែល​កំពុងខ្វះខាតមានត្រឹមតែមួយឡានក្នុងមួយថ្ងៃ ហើយពលរដ្ឋដែលរង់ចាំប្រើប្រាស់​ទឹក​នោះ​មានជាង៣០០គ្រួសារ ដែលធ្វើឲ្យពួកគាត់មិនអាចបំពេញតម្រូវការ​សម្រាប់ប្រើប្រាស់​ប្រចាំថ្ងៃ​បានទេ។

លោក ជឹម ស្រី បានស្នើឲ្យអាជ្ញាធរជួយពន្លឿនការរៀបចំតភ្ជាប់ប្រព័ន្ធទឹកចូលក្នុងភូមិ ដើម្បី​សម្រួលដល់ពលរដ្ឋ ព្រោះបច្ចុប្បន្នរូបលោកផ្ទាល់ពេលដែលត្រូវការងូតទឹក គឺត្រូវទៅងូត​ទឹក​បឹង​ដែលនៅសល់ពីការចាក់ដីលុប ហើយទឹកបឹងនោះពេលងូតរួចគឺវាបង្កឲ្យកើត​រមាស់​លើ​រាងកាយទៀតផង។

លោកបន្ថែមថា៖ «ពិបាកប្រើណាស់រឿងទឹក ងូតទឹកបឹងទឹកអីម្តងៗរមាស់ចង់ងាប់​[..]បាន​ទឹក​សុទ្ធ​ខាងសប្បុរសជនគេចែកឲ្យប្រើប្រាស់ បានទឹកហ្នឹងដាំបាយស្លអីហូប បើយកទឹកបឹង​មក​ស្លហូបម៉េចកើត? »។

ពលរដ្ឋជាង៣០០គ្រួសារដែលរស់នៅតាមបណ្តោយប្រឡាយព្រែកប្រា ស្ថិត​នៅ​ភូមិអូរអណ្តូង និងភូមិចំពុះក្អែក១ សង្កាត់ព្រែកប្រា និងសង្កាត់ព្រែកថ្មី រាជធានីភ្នំពេញ ជាដីបឹងដែល​ទើបតែ​ចាក់ដីលុប ពួក​គាត់​​​ត្រូវបាន​អាជ្ញាធរ​ខណ្ឌច្បារអំពៅស្នើឱ្យរុះរើផ្ទះទៅទីតាំងថ្មីកាលពីថ្ងៃទី២៤ ខែតុលា ដែល​ស្ថិត​ក្នុង​ភូមិ​ចំពុះក្អែក សង្កាត់ព្រែកថ្មី ខណ្ឌច្បារអំពៅ ដែលមានចម្ងាយ​ប្រមាណ​​ជាង៦គីឡូ​ម៉ែត្រ​​ពីទី​តាំង​ចាស់។ ព្រោះរដ្ឋត្រូវការទីតាំងចាស់នោះដើម្បី​ជីក​ស្តារ​ធ្វើ​ជា​ប្រឡាយ​សម្រាប់​រំដោះ​ទឹកវិញ។

ចំណែកលោកស្រី ជួន ស្រីនាង ពលរដ្ឋដែលកំពុងរស់នៅភូមិចំពុះក្អែក​ដែលជាទីតាំងថ្មីថ្លែង​ថា លោកស្រីបានតភ្ជាប់ប្រព័ន្ធភ្លើងរូចហើយ តែពលរដ្ឋភាគច្រើនពួកគាត់មិនទាន់​មាន​លទ្ធភាព​​ដើម្បីអាចតភ្ជាប់ប្រព័ន្ធភ្លើងយកមកប្រើប្រាស់បានទេ ព្រោះថវិកាដែលរក​បាន​គឺ​ត្រូវ​យក​ទៅសាងសង់ផ្ទះថ្មី ដោយសារផ្ទះចាស់របស់ពួកគាត់ត្រូវបានវាយកម្ទេចចោល​អស់ហើយ​។ ទោះបីបានភ្ជាប់ប្រព័ន្ធភ្លើងហើយក្តី លោកស្រី ស្រីនាង ក៏មិនខុសពីលោក ជឹម ស្រី ដែរ លោកស្រីថានៅតែប្រឈមបញ្ហាមួយចំនួនដូចជាមិនមានទឹកស្អាតគ្រប់គ្រាន់សម្រាប់ងូត និងដាំស្ល។

លោកស្រីរៀបរាប់ថា៖ «វារាងពិបាកដែរ គ្រាន់អត់ទឹកប្រើអីចឹង ប៉ុន្តែខាងគេ​(សប្បុរសជន)​​ដាក់ទឹកសុទ្ធឲ្យយើងហូបរាល់ថ្ងៃមួយថ្ងៃគេដាក់ឲ្យជាង២០០យួរ»។

លោកស្រី ស្រីនាង បន្តថាមកដល់ថ្ងៃទី១២ ខែធ្នូ ក្រុមគ្រួសារលោកស្រីនៅមិនទាន់ទទួល​បាន​ប្លង់កម្មសិទ្ធិដីទេ(ប្លង់រឹង)នៅឡើយទេ តែអាជ្ញាធរខណ្ឌច្បារអំពៅ​សន្យាជាមួយពួកគាត់ថា​នឹង​ផ្តល់ឲ្យនៅខែមករា ឆ្នាំ២០២៤។

លោកស្រី ស្រីនាង និយាយថា៖ «ខែ១គេ(អាជ្ញាធរខណ្ឌច្បារអំពៅ)ថាចេញប្លង់ឲ្យ គេថាខែ១​ប្លង់​ធ្លាក់​មក គេធ្វើប្លង់រឹងឲ្យ តែខ្ញុំអត់ច្បាស់ដែរចាំមើលដល់ខែ១សិន»។

យុវជនពីរនាក់ជិះម៉ូតូឆ្លងកាត់ភូមិចំពុះក្អែក សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ ជាទីតាំងដែលពលរដ្ឋបានប្តូរទៅ។ រូបថតនៅថ្ងៃទី១០ ខែធ្នូ ឆ្នាំ២០២៣។ (ខេមបូចា/ ហ៊ែល កំសាន)

អតីតនាយករដ្ឋមន្រ្តីប្រទេសកម្ពុជាលោក ហ៊ុន សែន ធ្លាប់មានប្រសាសន៍ នៅ​ក្នុង​​ពិធី​សម្ពោធ​ដាក់ឲ្យប្រើ​​រោងចក្រ​ប្រព្រឹត្តិកម្ម​ទឹក​ស្អាតបាក់ខែងកាលពីខែមិថុនាថា ១០០ភាគរយ​នៃ​ប្រជាពលរដ្ឋ ដែលរស់នៅ​តាម​ក្រុង និងទីប្រជុំជននានានៅក្នុង​ប្រទេសកម្ពុជា​នឹងមាន​ទឹកស្អាត​​ប្រើប្រាស់នៅត្រឹម​ឆ្នាំ​២០២៥។

លោក ហ៊ុយ ចាន់ អនុប្រធានភូមិចំពុះក្អែក១ ថ្លែងនៅថ្ងៃទី១៣ ខែតុលា ​ថា ប្រព័ន្ធភ្លើង​អាជ្ញាធរបានរៀបចំដាក់ឲ្យពលរដ្ឋអាចតភ្ជាប់យកប្រើប្រាស់​បានមួយរយ​ភាគ​រយ​ហើយ តែពលរដ្ឋមួយចំនួនពួកគាត់មិនទាន់មានលទ្ធភាពដើម្បីអាចភ្ជាប់បានទេ។

លោក ហ៊ុន ចាន់ បន្តថា៖ «បងប្អូនអ្នកមានលទ្ធភាពគាត់តភ្ជាប់មុន ទៅចែកចាយបងប្អូន​អ្នក​អត់​ទាន់មានលទ្ធភាពតភ្ជាប់ប្រើតាមផ្ទះ»

ចំណែកប្រព័ន្ធទឹកស្អាតលោក ហ៊ុយ ចាន់​ ថាអាជ្ញាធរកំពុងរៀបចំឯកសារបញ្ជូនទៅ​រដ្ឋាករ​ទឹក​ស្វយ័តក្រុងភ្នំពេញ ដើម្បីឲ្យរដ្ឋាករទឹកចុះមកសិក្សាទីតាំង និងរៀបចំតភ្ជាប់​ដាក់ឲ្យ​ពលរដ្ឋ​បាន​ប្រើប្រាស់ តែលោកមិនបានបញ្ជាក់ថានឹងរួចរាល់នៅថ្ងៃខែណានោះទេ។

លោក ហ៊ុយ ចាន់ បន្ថែមថា៖ «ខាងរដ្ឋាករទឹកគេទទួលឯកសារពីយើងបានច្រើនសិន គេនឹង​ចុះ​មក[..]ហើយ»។

លោកស្រី វ៉ា សុរិន ចៅសង្កាត់ព្រែកថ្មីក៏បានលើកឡើងដែរថា អាជ្ញាធរកំពុងពន្លឿន​ការ​រៀបចំ​តភ្ជាប់​ប្រព័ន្ធទឹកភ្លើង​ជាបណ្តើរៗហើយ ដោយមិនឲ្យពលរដ្ឋរង់ចាំយូរឡើយ។ លោកស្រី​បន្ត​ថា ពលរដ្ឋដែលមិនទាន់មានលទ្ធភាពពួកគាត់អាចបង់រម្លស់តភ្ជាប់ទឹកស្អាត​យកប្រើ​ប្រាស់​បាន ចំណែកប្រព័ន្ធភ្លើងលោកស្រីមិនទាន់រៀបចំឲ្យមានការបង់រម្លស់បានទេ។

លោកស្រី សុរិន មានប្រសាសន៍ថា៖ « មានក្នុងកិច្ចសន្យា ឃើញយកមកឲ្យមីង​ស៊ីញេ​(ចុះហត្ថលេខា)​​​ឃើញដូចជាបង់រម្លស់(តភ្ជាប់ទឹក)បាន បើភ្លើងមីង​ដូចក្តាប់​មិនទាន់បាន»។

ចំពោះបណ្ណកម្មសិទ្ធិដីធ្លីលោកស្រី វ៉ា សុរិន បញ្ជាក់ថា អាជ្ញាធរនឹងខិតខំធ្វើឲ្យ​ហើយនៅ​ខែមករា ឬយឺតជាងនេះ ដើម្បីអាចចែកជូនដល់ពលរដ្ឋឲ្យបានគ្រប់ៗគ្រួសារ។ លោកស្រី ចៅសង្កាត់ព្រែកថ្មីមានប្រសាសន៍ថា៖ «យើងកំពុងតែខិតខំយ៉ាងណាឲ្យបាននៅក្នុងខែ១ វាអាចទាន់ ឬមួយក៍យឺតយ៉ាវតិចតួចចឹង តែរដ្ឋបាលយើងនឹងខិតខំប្រឹងប្រែងជូនគាត់»

ពាក់ព័ន្ធនឹងបញ្ហានេះលោក អំ សំអាត ​នាយក​ទទួល​បន្ទុក​កិច្ច​ការ​ទូទៅ​នៃ​អង្គការ​សិទ្ធិ​មនុស្ស ​លីកាដូ​ មើលឃើញថា ប្រជាពលរដ្ឋដែលត្រូវផ្លាស់ប្តូរទីលំនៅថ្មី តែងតែ​ប្រឈម​នឹង​ការ​លំបាក ព្រោះការតាំងទីលំនៅថ្មីត្រូវចំណាយពេលវេលាច្រើនទៅលើការរុះរើ និង​សាង​សង់​ផ្ទះថ្មី ដែលធ្វើឲ្យប៉ះពាល់ដល់មុខរបរ ការសិក្សារបស់កូន និងជីវភាពរស់នៅ​របស់​ពួកគាត់។

លោក អំ សំអាត ថ្លែងថា៖ «អត់ដែលឃើញថាគាត់(ពលរដ្ឋ)មិនបានជួបផលលំបាកទេ នៅ​ក្នុង​ការផ្លាស់ប្តូរនិងការតាំងទីលំនៅថ្មី»។

លោក សំអាត បន្តថា អាជ្ញាធរគួរតែរៀបចំហេដ្ឋារចនាសម្ព័ន្ធមាន សាលារៀន ប្រព័ន្ធទឹកភ្លើង និងផ្លូវនៅទីតាំងថ្មីឲ្យបានរួចរាល់ជាមុនសិន ហើយឲ្យប្រជាពលរដ្ឋទៅរស់នៅតាមក្រោយ​ទើប​ពួកគាត់មិនសូវជួបការលំបាក។

លោក អំ សំអាត បន្ថែមថា៖ «ការទៅរស់នៅទីតាំងថ្មីហើយចាំមានការរៀបចំហេដ្ឋារចនា​សម្ព័ន្ធ​ថ្មី ទឹកភ្លើងថ្មី តាមយើងឃើញកន្លងមកគឺពលរដ្ឋជួបផលលំបាកច្រើនណាស់»

214 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម