អង្គការមូលនិធិបង្ការរបួសអាស៊ីដែលធ្វើការលើសុវត្ថិភាពចរាចរណ៍ផ្លូវគោកជាថ្មីម្ដងទៀតបានស្នើដល់រដ្ឋាភិបាលឲ្យអនុវត្តគោលនយោបាយនៅតាមរោងចក្រស្ដីពី «សុវត្ថិភាពចរាចរណ៍សម្រាប់កម្មករនិយោជិតកម្ពុជា» និងដាក់កំហិតឱ្យរោងចក្រត្រូវតែអនុវត្ត។
កាលពីថ្ងៃទី១ ខែធ្នូ អង្គការមូលនិធិបង្ការរបួសអាស៊ី បានរៀបចំសិក្ខាសាលាមួយដើម្បីចែករំលែកបទពិសោធន៍ និងការអនុវត្តល្អៗក្រោយពីមានការអនុវត្តកម្មវិធី សុវត្ថិភាពចរាចរណ៍សម្រាប់កម្មករនិយោជិតកម្ពុជា (CSCW) សម្រាប់រយៈពេលបួនឆ្នាំកន្លងមក។ អ្នកចូលរួមមានប្រហែល១០០នាក់មានមន្ត្រីរដ្ឋាភិបាល តំណាងអង្គការជាតិ និងអន្តរជាតិ តំណាងខាងរោងចក្រ និងសហជីពជាដើម។
អ្នកគ្រប់គ្រងកម្មវិធីរបស់មូលនិធិបង្ការរបួសអាស៊ីប្រចាំកម្ពុជា អ្នកស្រី ធីម សុខា មានប្រសាសន៍ថា ក្នុងរយៈពេលបួនឆ្នាំកន្លងមកនេះ ស្ថាប័នរបស់ខ្លួនបានធ្វើការយ៉ាងជិតស្និទ្ធជាមួយនឹងអ្នកបណ្ដុះបណ្ដាលចំនួន៤៥០នាក់ ក្នុងរោងចក្រគោលដៅចំនួន៣០ ដើម្បីកសាងសមត្ថភាពលើគោលនយោបាយសុវត្ថិភាពចរាចរណ៍សម្រាប់កម្មករនិយោជិតកម្ពុជា ក៏ដូចជាការបង្កើនការយល់ដឹងលើគម្រោងមួយទៀតហៅថា «ហ៊ាននិយាយ» ដោយបានបណ្ដុះបណ្ដាលប្រធានក្រុមឲ្យក្លាយជាមនុស្សបង្គោលសម្រាប់កម្មករលើកបញ្ហាអំពីអសុវត្ថិភាពក្នុងការធ្វើដំណើរ។
កម្មវិធីនេះបានផ្ដល់អត្ថប្រយោជន៍ដោយផ្ទាល់ទៅកម្មករក្នុងវិស័យកាត់ដេរ និងស្បែកជើងចំនួន៧៥ ០០០នាក់ និងអ្នកបើកបរចំនួន២ ៦០០នាក់តាមរយៈការផ្សព្វផ្សាយព័ត៌មាន។ មូលនិធិបង្ការរបួសអាស៊ីក៏បានរៀបចំសិក្ខាសាលា និងវគ្គបណ្ដុះបណ្ដាលថ្នាក់ជាតិ និងថ្នាក់ក្រោមជាតិសម្រាប់ដៃគូពាក់ព័ន្ធជាង២ ០០០ និងការចេញបានចែកឯកសារបោះពុម្ពទាក់ទឹងនឹងកម្មវិធីចំនួន១៥០។
តាមរយៈភាពជោគជ័យនេះ អ្នកស្រី សុខា មានថ្លែងថា៖ «ដោយផ្ដោតសំខាន់លើធាតុបីសំខាន់ ធ្វើឲ្យកម្មករមានចំណេះដឹងកើនឡើងទាក់ទងនឹងសុវត្ថិភាពចរាចរណ៍ និងឥរិយាបទនៃការប្រើប្រាស់ផ្លូវ ដូចជាការពាក់មួកសុវត្ថិភាពទៅតាមការផ្សព្វផ្សាយ»។ អ្នកស្រីបន្តថា៖ «ក្នុងន័យសុវត្ថិភាពចរាចរណ៍ ផែនការថ្នាក់ជាតិរំពឹងថានឹងកាត់បន្ថយអត្រាគ្រោះថ្នាក់ចរាចរណ៍ឲ្យបាន៥០ភាគរយក្នុងរង្វង់១០ឆ្នាំ»។
អ្នកស្រីក៏បានគូសបញ្ជាក់ដែរថាបញ្ហាប្រឈមដែលកំពុងកើតមានគឺមានទាំងការមិនចូលរួមរបស់អ្នកបើកបរ និងការពាក់មួកសុវត្ថិភាពនៅមានកម្រិតទាបចំពោះកម្មករនិយោជកាត់ដេរ បើធៀបនឹងក្រុមគោលដៅរបស់កម្មវិធី។
ដូចនេះ អ្នកស្រីបានជំរុញឲ្យរោងចក្រគោលដៅទាំង៣០ឲ្យបន្តតាមដានគោលនយោបាយសុវត្ថិភាពចរាចរណ៍ដែលមានស្រាប់ និងជួយសម្រួលដល់ម៉ោងពេលធ្វើការរបស់កម្មករ ពិសេសប្រធានក្រុមដើម្បីឲ្យបានទទួលវគ្គបណ្ដុះបណ្ដាល ក៏ដូចជាអនុវត្តផែនការសកម្មភាព។ អ្នកស្រីក៏បានស្នើឲ្យមានការចូលរួមពីខាងសហជីពដោយថាសហជីពគឺដើរតួសំខាន់ក្នុងការណែនាំដល់កម្មករអំពីសុវត្ថិភាពចរាចរណ៍។
ចំពោះរដ្ឋាភិបាលវិញ អ្នកស្រីបានជំរុញឲ្យរដ្ឋាភិបាលបង្កើតឲ្យមានគោលនយោបាយកម្រិតរោងចក្រស្ដីអំពីសុវត្ថិភាពចរាចរណ៍សម្រាប់កម្មករនិយោជិតកម្ពុជា និងអនុវត្តឲ្យបានទូទាំងប្រទេស។
អគ្គនាយករងនៃបេឡាជាតិសន្តិសុខសង្គម និងជាប្រធានក្រុមសុវត្ថិភាពចរាចរណ៍ផ្លូវគោកសម្រាប់កម្មករ លោក ហេង សុផាន់ណារិទ្ធ ថ្លែងក្នុងសិក្ខាសាលាថានៅពីរឆ្នាំខាងមុខក្រសួងការងារនឹងធ្វើកិច្ចសហប្រតិបត្តិការជាមួយភាគីពាក់ព័ន្ធដើម្បីសិក្សាអំពីយន្ដការគាំទ្រ និងជំរុញឲ្យមានការផ្លាស់ប្ដូរលើមធ្យោបាយដឹកជញ្ជូនកម្មករ ដែលស្របទៅតាមបទដ្ឋានច្បាប់ និងផ្ដល់ភាពងាយស្រួលដល់កម្មករនៅឆ្នាំ២០២៧។
លោកមានប្រសាសន៍ទៀតថា៖ «នេះបង្ហាញថារដ្ឋាភិបាលបានគិតគូរគ្រប់ចំណុច[ទាក់ទង]នឹងកម្មករ មិនមែនត្រឹមតែបញ្ហាសុខភាពនោះទេ។ សូម្បីការធ្វើដំណើររបស់កម្មករក៏ជាកង្វល់របស់រដ្ឋាភិបាលដែរ»។ យ៉ាងណាលោកមិនបាននិយាយដល់ការបង្កើតគោលនយោបាយនោះទេ។
បើតាមលោក សុផាន់ណារិទ្ធិ ពីខែមករាដល់ខែតុលា ក្នុងឆ្នាំនេះ មានគ្រោះថ្នាក់ចរាចរណ៍កើតឡើងចំនួន ៣ ៨៨២លើក មានជនរងគ្រោះ ៤ ៩៩៨នាក់ រួមមានអ្នកស្លាប់ចំនួន១១២នាក់ ខណៈអ្នករងរបួសធ្ងន់ចំនួន១ ៣៣៩នាក់ និងអ្នករបួសស្រាលចំនួន៣ ០៤៧នាក់។ ក្នុងចំណោមគ្រោះថ្នាក់ចរាចរណ៍ទាំងនេះមាន១៤លើកជារថយន្ដដឹកកម្មករ ដែលមានជនរងគ្រោះចំនួន២៣៨នាក់ បណ្ដាលឲ្យមានអ្នកស្លាប់ម្នាក់ របួសធ្ងន់៥៤នាក់ និងរបួសស្រាល១៨៣នាក់។
ដោយឃើញពីការបន្តកើនឡើងនៃគ្រោះថ្នាក់ចរាចរណ៍ លោកថាក្រសួងបានរៀបចំក្រុមការងារសុវត្ថិភាពចរាចរណ៍ផ្លូវគោកសម្រាប់កម្មករដើម្បីអប់រំ បណ្ដុះបណ្ដាល និងរៀបចំការប្រឡងយកបណ្ណបើកបរ។ ជាមួយគ្នានេះដែរ ក៏បានសហការជាមួយទីតាំងត្រួតពិនិត្យបច្ចេកទេសយានយន្ត និងអគ្គស្នងការនគរបាលជាតិដើម្បីធ្វើបច្ចុប្បន្នភាពរថយន្ដដឹកកម្មករ។
លោកថាក្រុមការងារបានលើកទឹកចិត្តដល់អ្នកបើកបរឲ្យគោរពច្បាប់ចរាចរណ៍ដើម្បីបង្កើនសុវត្ថិភាពកម្មករ និងកាត់បន្ថយគ្រោះថ្នាក់ចរាចរណ៍របស់កម្មករ។ លោកបញ្ជាក់ថាក្រុមការងារនេះមានសមាសភាពចម្រុះមកពីខាងរដ្ឋាភិបាល អង្គការជាតិ និងអន្តរជាតិ។
ដើម្បីបង្កើនសុវត្ថិភាពកម្មករពេលធ្វើដំណើរលើដងផ្លូវ លោកជំរុញឲ្យកម្មករពាក់មួកសុវត្ថិភាពពេលបើកបរម៉ូតូ មិនថាធ្វើដំណើរផ្លូវឆា្ងយឬជិត ហើយអ្នកបើកបររថយន្តវិញត្រូវបើកតាមល្បឿនកំណត់របស់ច្បាប់ និងគោរពស្លាកសញ្ញាចរាចរណ៍ ពាក់ខ្សែក្រវ៉ាត់ឲ្យបានត្រឹមត្រូវ កុំវ៉ាជែងដោយប្រថុយប្រថាន និងមិនត្រូវប្រើប្រាស់ទូរស័ព្ទពេលបើកបរ។ លោកបន្ថែមថា៖ «សូមកុំដាក់អ្នកជិះ ឬទំនិញលើសចំណុះ»។
ប្រធានសម្ព័ន្ធសហជីពចលនាកម្មករ លោក ប៉ាវ ស៊ីណា មានប្រសាសន៍ថា គ្រោះថ្នាក់ចរាចរណ៍របស់កម្មករអាចមានការថយចុះបើធៀបនឹងឆ្នាំកន្លងទៅ ប៉ុន្តែថាមិនចុះច្រើននោះទេ។
លោក ប៉ាវ ស៊ីណា ដែលបានចូលរួមក្នុងសិក្ខាសាលាដែរនោះ មានប្រសាសន៍ទៀតថាបញ្ហារថយន្ដដឹកកម្មករនៅតែជាបញ្ហារសើបរបស់កម្មករ និងអ្នកពាក់ព័ន្ធ ដែលទាមទារឲ្យមានការយកចិត្តទុកដាក់បន្ថែមទៀត និងមានការចូលរួមទាំងអស់គ្នាដើម្បីកាត់បន្ថយចំនួនគ្រោះថ្នាក់ចរាចរណ៍។
ទាក់ទងនឹងការចង់ឲ្យបង្កើតគោលនយោបាយសម្រាប់រោងចក្រ លោកថាពិតជាមានសារៈសំខាន់សម្រាប់កម្មករ និយោជក និងអ្នកពាក់ព័ន្ធ ដើម្បីអាចពិនិត្យវឌ្ឍនភាពរបស់កម្មវិធីសុវត្ថិភាពចរាចរណ៍សម្រាប់កម្មករនិយោជិតកម្ពុជា។ បើសិនជាមិនមានការអនុវត្តបានទូលំទូលាយទេ លោកថាគ្រោះថ្នាក់ចរាចរណ៍នឹងប៉ះពាល់ដល់ផលិតកម្មរបស់រោងចក្រ និងធ្វើឲ្យកម្មករបាត់បង់ចំណូលដូចគ្នា។
លោកបន្តថា៖ «ពេលកម្មករមានរបួស ពួកគាត់មិនអាចធ្វើការបាន ដែលវាប៉ះពាល់ដល់ខ្សែ ផលិតកម្មរបស់រោងចក្រ ធ្វើឲ្យដំណើរការមិនបានល្អ។ ជាការពិតវាក៏អាចប៉ះពាល់ដល់អារម្មណ៍ និងផ្លូវចិត្តរបស់កម្មករដូចគ្នា ព្រមទាំងសមាជិកគ្រួសាររបស់ពួកគាត់ដែរ។ កម្មករដែលរងរបួសអាចបាត់បង់ចំណូល និងបង្កើនបន្ទុកគ្រួសារបន្ថែម»។
លោកបន្ថែមថា និយោជកក៏រងផលប៉ះពាល់ដូចគ្នា។ លោក ប៉ាវ ស៊ីណា បានជំរុញឲ្យក្រសួងការងារពិនិត្យលើគ្រប់រោងចក្រ និងធានាថាពួកគេបានចុះបញ្ជីត្រឹមត្រូវ និងបានបំពេញនីតិវិធីសម្រាប់បទបញ្ញត្តិក្នុងស្រុកបានត្រឹមត្រូវ។ លោកជឿថាបើក្រសួងទាមទារឲ្យអនុវត្តគោលនយោបាយនៅក្នុងរោងចក្រ និយោជកនឹងមិនបដិសេធទេ៕
ប្រែសម្រួលពីអត្ថបទភាសាអង់គ្លេស៖ NGOs Urge to Form Factory-level Workers’ Commuting Safety Policy
