ពលរដ្ឋរស់នៅជាយក្រុងភ្នំពេញខ្វះទឹកស្អាតប្រើប្រាស់នារដូវប្រាំង

ផ្ទះអ្នកភូមិ ស្របពេលបណ្តាញផ្គត់ផ្គង់ទឹកស្អាតរបស់រដ្ឋត្រូវបានទុកចោលដោយសារតែពុំមានទឹក។
ផ្ទះអ្នកភូមិ ស្របពេលបណ្តាញផ្គត់ផ្គង់ទឹកស្អាតរបស់រដ្ឋត្រូវបានទុកចោលដោយសារតែពុំមានទឹក។
Share on facebook
Share on twitter
Share on linkedin
Share on telegram
Share on whatsapp

លោក ជឿន​ សំអុល កំពុង​អាំងសាច់​គោ​នៅ​ចិញ្ចើម​ផ្លូវ​ ខណៈ​រថយន្ត​​កំពុងមមាញឹក​ដឹកទឹក​ដាក់​តាម​ផ្ទះ​អ្នក​ភូមិ ស្រប​ពេលបណ្តាញ​ផ្គត់ផ្គង់​ទឹកស្អាត​របស់​រដ្ឋ​ត្រូវ​បាន​ទុក​ចោល​ដោយ​សារតែពុំមាន​ទឹក។

លោក​ សំអុល​ បាន​ថ្លែង​ប្រាប់​ ខេមបូចា នា​ពេល​ព្រឹក​មួយ​នៅ​ភូមិ​ទួលកី​​ កាល​ពី​សប្តាហ៍​មុន​ថា៖ «អស់រយៈពេល​ពីរ​ខែ​មក​ហើយ ដែល​យើង​មិនមាន​ទឹកស្អាត​ប្រើប្រាស់សូម្បីមួយដំណក់​។ ដូចបង​​បាន​ឃើញ​ហើយ គេ​យក​ទឹក​ពី​កន្លែង​ផ្សេង​មក​ផ្គត់ផ្គង់​ប្រជាពលរដ្ឋ​នៅ​តំបន់​នេះ»

ដោយ​ចង្អុល​ទៅ​កាន់​រ៉ូប៊ីណេ​នៅ​ខាង​មុខ​ហាង​របស់​ សំអុល ​បាន​បន្ត​ថា ទឹក​ដែលពលរដ្ឋ​ទិញ​ពីអ្នក​ដឹក​លក់​តាម​ឡាន មិនមានសុវត្ថិភាពទេសម្រាប់​​ទទួលទាន ឬ​ចំអិន​អាហារ​នោះទេ ហើយ​លោក​បាន​ទិញ​ទឹកសុទ្ធ សម្រាប់ផឹក និង​ចំអិន ពេលខ្លះលោក​ត្រូវ​ទៅ​ដឹក​ទឹក​ស្រះ​នៅ​វត្ត​ក្បែរនោះដោយ​ខ្លួន​ឯង​​សម្រាប់ការ​បោកគួក និង​ងូត។ ​

លោក​និយាយថា៖ «បង​​មើល​ទៅ! ខ្ញុំ​បាន​បើករ៉ូប៊ីណេ​​ចោល​អស់​រយៈពេល​ពីរ​ខែ​មក​ហើយ មិនមាន​ទឹក​នោះ​ទេ។ ខ្ញុំ​មាន​គម្រោង​ទិញ​ធុង​ចម្រោះ​ទឹក​ដើម្បី​ប្រើប្រាស់​ប្រចាំ​ថ្ងៃ។ ប៉ុន្តែ​ដើម្បី​អី្វ? បើ​មិន​មាន​ទឹក​ចេញ​មក​នោះ»

​ទួល​កីគឺ​ជាសហគមន៍​មួយ​នៅ​ក្នុង​ចំណោម​​សហគមន៍មួយ​ចំនួន​ ដែល​ពលរដ្ឋ​ត្រូវ​​ទិញ​ទឹក​ប្រើប្រាស់​​ពី​​​អ្នក​លក់​ទឹក​ដឹក​តាមឡាន  ខណៈ​ពេល​មាន​កង្វះខាត​ទឹក និង​ស្រប​ពេល​សីតុណ្ហភាព​កាន់​តែ​ឡើង​ក្តៅ​នៅ​ចុង​រដូវ​ប្រាំង​ហួតហែង​ និង​មាន​រយៈពេល​វែង។

​រដ្ឋាករ​​ទឹក​ស្វយ័ត​ក្រុង​ភ្នំពេញ​បាន​លើកឡើង​កាល​ពី​ដើម​ខែ​មីនា​ថា ពលរដ្ឋ​ជាង​ ៤​ម៉ឺន​គ្រួសារ ស្មើ​នឹង ១២​ភាគរយ​នៃ​ពលរដ្ឋ​សរុប​នៅ​ក្រុង​ភ្នំពេញ​ កំពុង​ប្រឈម​នឹង​កង្វះខាត​ទឹកស្អាត​ប្រើប្រាស់។

រដ្ឋាករ​​ទឹក​ស្វយ័ត​ក្រុង​ភ្នំពេញ​លើកឡើង​​ថា កម្រិត​ទឹក​ទន្លេ​ «ទាប​ខុស​ពី​ធម្មតា» នៅ​ទន្លេ​មេគង្គ​ កំពុង​បង្ក​ឲ្យ​មាន​កង្វះខាត​ទឹក ប៉ុន្តែ​ក្រុម​អ្នក​សង្កេត​ការណ៍​បាន​ចង្អុល​ទៅ​កាន់​ការ​អភិវឌ្ឍ​លើសលុប​ រួម​មាន​ការ​ចាក់​បំពេញ​បឹង និង​ការ​គ្រប់គ្រង​អន់​ខ្សោយ​ ជា​កត្តា​រួម​ចំណែក។

រដ្ឋមន្រ្តី​ក្រសួង​ឧស្សាហកម្ម​ និង​សិប្បកម្ម​ ​លោក ចម ប្រសិទ្ធ បាន​មានប្រសាសន៍​នៅ​អំឡុងពេល​សម្ពោធ​ការដ្ឋាន​ចម្រាញ់​ទឹក​ស្អាត​នៅ​សង្កាត់​បាក់ខែង​ថា ​នៅ​ឆ្នាំ ២០៣០ ក្រុង​ភ្នំពេញ​ត្រូវ​បាន​រំពឹង​ថា នឹង​មាន​ចំនួន​ប្រជាជន​កើន​ទ្វេ​ដង ​រហូត​ដល់​ទៅ​ ០៤​លាន​នាក់។​

​បច្ចុប្បន្ន រដ្ឋាករ​​ទឹក​ស្វយ័ត​ក្រុង​ភ្នំពេញ​​មានសមត្ថ​ភាព​ផលិត​ទឹក​ស្អាត ​ប្រចាំ​ថ្ងៃ​នៅ​ក្រុង​ភ្នំពេញ​បាន​តិច​ជាង ៨៥​ភាគរយ​ប៉ុណ្ណោះ។ នេះ​បើ​យោង​ទៅ​​តាម​របាយការណ៍​ដែល​បាន​បង្ហាញ​ក្នុង​មហាសន្និ​បាត​​​ម្ចាស់​ភាគហ៊ុន​ប្រចាំ​ឆ្នាំ​របស់​រដ្ឋាករ​​ទឹក​​ ដែល​បាន​​ចុះ​បញ្ជី​នៅ​ក្នុង​ក្រុមហ៊ុន​មូលប័ត្រ​កម្ពុជា។ របាយការណ៍​នោះ​ក៏​បាន​លើកឡើង​ពី​ចំនួន​អ្នក​ប្រើប្រាស់​ថ្មី​​ចំនួន ៤៣.០០០​នាក់​រវាង​ឆ្នាំ ២០១៩ និង​២០២០​ផង​ដែរ។​

ខណៈ​​ក្រុង​ភ្នំពេញ​កំពុង​ជំរុញ​​ដោយ​ការ​អភិវឌ្ឍ​នា​ពេល​ប៉ុន្មាន​ឆ្នាំ​ថ្មីៗ​នេះ រដ្ឋាភិបាល​​បាន​រង​ការ​រិះគន់​ពី​ការ​រៀបចំ​ផែនការ និងបទបញ្ញតិនៅទន់ខ្សោយ ដែល​បង្ក​​ជា​បញ្ហា​ជា​ច្រើន​សម្រាប់​សហគមន៍​ពលរដ្ឋ និង​បរិស្ថាន។

អង្គការ​​គាំពារ​សិទ្ធិ​មនុស្ស​និយាយ​ថា ការ​ផ្គត់ផ្គង់​ទឹក​ស្អាត​ទៅ​កាន់​ពលរដ្ឋ​គួរ​តែ​ជា​អាទិភាព​ចម្បង។

លោក​ សន ជ័យ នាយកប្រតិបត្តិ​ប្រចាំ​ប្រទេស​កម្ពុជា​នៃ​សម្ព័ន្ធភាព​គណនេយ្យ​សង្គម បាន​និយាយ​ថា៖ «ជាមួយ​នឹង​ការ​អភិវឌ្ឍ​យ៉ាង​ឆាប់​រហ័ស​ និង​ការ​កើនឡើង​​ចំនួន​ប្រជាជន ពួកគេ​ត្រូវ​ការ​គោលនយោបាយ​គ្រប់គ្រង​ទឹកស្អាត​ដើម្បី​ឆ្លើយ​តប​ទៅ​នឹង​ការ​រីកធំ​របស់​ទីក្រុង»

លោក​បាន​បន្ថែមថា៖ «កង្វះខាតទឹក​អាច​បង្ក​ឡើង​ដោយសារ​កត្តា​មួយ​ចំនួន ដូចជា បម្រែបម្រួល​អាកាសធាតុ ការ​ពង្រីក​ទីក្រុងដែល​ទាមទារ​នូវ​ទឹកស្អាត​កាន់​តែ​ច្រើន ខណៈ​ការ​ចាក់​លុប​បឹង​កំពុង​កាត់​បន្ថយ​ការ​ស្តុក​ទឹកធម្មជាតិ»។​

អគ្គនាយក​រដ្ឋាករ​​ទឹក​ស្វយ័ត​ក្រុង​ភ្នំពេញ​ លោក ស៊ឹម ស៊ីថា មិន​អាច​ទាក់ទង​សុំ​អត្ថធិប្បាយ​បាន​នោះ​ទេ។​ អ្នក​នាំពាក្យ​សាលារាជធានី​ភ្នំពេញ​លោក ម៉េត មាសភក្តី បដិសេធ​ធ្វើអត្ថាធិប្បាយ។

ពលរដ្ឋយកទឹកពីបាសាំងស្តុកទឹកនៅបុរីពិភពថ្មី ជាយក្រុងភ្នំពេញកាលពីសប្តាហ៍មុន។ខេមបូចា/ស៊ន សារ៉ាត
ពលរដ្ឋយកទឹកពីបាសាំងស្តុកទឹកនៅបុរីពិភពថ្មី ជាយក្រុងភ្នំពេញកាលពីសប្តាហ៍មុន។ ខេមបូចា/ស៊ន សារ៉ាត

ជាង ២០​ភាគរយ​នៃ​ប្រជាជន​កម្ពុជា​មិនមាន​លទ្ធភាព​ទទួល​បាន​ទឹកស្អាត​ដើម្បី​ទទួល​ទាន។ នេះ​បើ​យោង​ទៅ​តាម​កម្មវិធី​ត្រួត​ពិនិត្យ​រួម​​គ្នា​រវាង​អង្គការ​សុខភាព​ពិភពលោក និង​អង្គការ​យូនីសេហ្វ ដែល​មាន​ទិន្នន័យ​ពាក់ព័ន្ធ​នឹង​ការ​ទឹកប្រើប្រាស់ និង​អនាម័យ​​នៅ​លើ​សាកលលោក។

ទិន្នន័យ​ឆ្នាំ ២០១៧ បង្ហាញ​ថា ពលរដ្ឋ ១១​ភាគរយ​កំពុង​ពឹងផ្អែក​លើ​ទឹក​ដែល​មាន​ពី​ត្រពាំង បឹង និង​ទន្លេ ហើយ​ថា មនុស្ស​សរុប​ ៣,៤​លាន​នាក់​នៅ​តែ​ត្រូវ​ការ​ទឹកស្អាត​ប្រើប្រាស់​នៅ​កម្ពុជា។

គោលដៅ​អភិវឌ្ឍ​ប្រក​ប​ដោយ​ចីរភាព​​ របស់​រដ្ឋាភិបាល​បាន​កំណត់​ថា​​នៅ​ត្រឹម​ឆ្នាំ ២០៣០ ប្រជាជនកម្ពុជា​ទាំងអស់ នឹង​​មាន​លទ្ធភាព​ទទួល​បាន​ទឹកស្អាត និង​អនាម័យ​សម្រាប់​មនុស្ស​គ្រប់គ្នា។

អ្នកជំនួញវិស័យ​​អចលនទ្រព្យ​លោក គីម​ ហ៊ាង បាន​និយាយ​ថា ​ ការ​អភិវឌ្ឍ​យ៉ាង​លឿន​នៃ​ទីក្រុង​ភ្នំពេញ​នឹង​មិន​ប្រកប​ដោយ​ចីរភាព​នោះ​ទេ​ ប្រសិន​បើ​នៅ​តែ​បន្ត​កង្វះ​ទឹកស្អាត​ ហើយ​ដែល​អាច​ជា​កត្តា​ធ្វើ​ឲ្យ​អ្នក​វិនិយោគ​ស្ទាក់ស្ទើរ និង​រារាំង​ការ​អភិវឌ្ឍផង​ដែរ​។​

លោក​ គីម​ ហ៊ាង ដែល​ជា​​​នាយក​ប្រចាំ​​តំបន់​នៃ​ក្រុមហ៊ុន​អចលនទ្រព្យ​មាន​មូលដ្ឋាន​នៅ​សហរដ្ឋអាមេរិក Keller William Cambodia និង​ជា​នាយក​ប្រតិបត្តិ​ក្រុមហ៊ុន​ Khmer Real Estate Co. Ltd បាន​និយាយ​ថា៖ «ពួកគេ​ត្រូវមាន​ផែនការមេ​ច្បាស់លាស់សម្រាប់​នគរូបនីយកម្ម​យ៉ាង​ហោចណាស់​ ១០​ឆ្នាំ​មុន​»

​លោក​បាន​បន្ត​ថា៖ «មិនមាន​ហេតុផល​ណា​ដែល​ក្រុង​ភ្នំពេញ​មិនមាន​ទឹក​ប្រើប្រាស់​គ្រប់គ្រាន់​នោះ​ទេ។ នេះ​គឺ​ជា​រឿង​មិន​អាច​ទទួល​យក​បាន។ ការ​ផ្គត់ផ្គង់​ទឹក​គឺ​ត្រូវ​មាន​លើសពី​តម្រូវការ បើមិន​ដូច្នេះ​ទេ នឹង​ធ្វើ​ឲ្យ​ការ​អភិវឌ្ឍ​យឺតយ៉ាវ»

ប្រែសម្រួលពីអត្ថបទភាសាអង់គ្លេស៖ On Phnom Penh’s outskirts, residents live on unsafe water as hot season dries state supply

264 views
Share on facebook
Share on twitter
Share on linkedin
Share on telegram
Share on whatsapp
ព័ត៌មានទាក់ទង
ព័ត៌មានថ្មីៗ »
អត្ថបទពេញនិយម »