មន្ត្រីកម្ពុជាបានបញ្ជាក់ថា កងទ័ពថៃបានបើកការបាញ់ប្រហារទៅលើជនស៊ីវិលនៅក្នុងភូមិមានជម្លោះមួយកន្លែង តាមបណ្តោយព្រំដែននាខេត្តបន្ទាយមានជ័យ កាលពីល្ងាចថ្ងៃពុធ បណ្តាលឱ្យមនុស្សម្នាក់ស្លាប់ និងយ៉ាងហោចណាស់បីនាក់ផ្សេងទៀតរងរបួស។
ភ្លាមៗនោះ កងទ័ពថៃបានបដិសេធថា ខ្លួនមិនបានកំណត់គោលដៅ ឬធ្វើឱ្យជនស៊ីវិលរងរបួសនោះទេ ដោយអះអាងថា ការបាញ់ប្រហារនេះគឺចេញពីកងកម្លាំងកម្ពុជាតែប៉ុណ្ណោះ ហើយកងទ័ពរបស់ខ្លួនមិនបានបាញ់តបតវិញនោះទេ។
ក្រសួងការពារជាតិកម្ពុជាបានថ្កោលទោសចំពោះការបាញ់ប្រហារនេះថា ជា«ទង្វើអមនុស្សធម៌ដ៏សាហាវឃោឃៅប្រឆាំងនឹងជនស៊ីវិលកម្ពុជា» ដែល «បានរំលោភយ៉ាងច្បាស់» លើលក្ខខណ្ឌនៃបទឈប់បាញ់បន្ថែមដែលបានចុះហត្ថលេខាដោយប្រទេសទាំងពីរ ដែលទីក្រុងបាងកកបានផ្អាកកាលពីដើមសប្តាហ៍នេះ។
អ្នកនាំពាក្យខេត្តបន្ទាយមានជ័យ លោក ណង វុទ្ធី បានប្រាប់ សារព័ត៌មានខេមបូចា ភ្លាមៗបន្ទាប់ពីហេតុការណ៍នេះថា៖ «ពួកគេបានបាញ់ប្រហារទៅលើអ្នកភូមិដែលកំពុងរស់នៅក្នុងតង់។ ឥឡូវនេះ ពួកគាត់[អាជ្ញាធរ] កំពុងបញ្ជូនពួកគេទៅមន្ទីរពេទ្យបង្អែកស្រុក»។
លោក វុទ្ធី បានបញ្ជាក់ពីការស្លាប់មនុស្សម្នាក់ និងបាននិយាយថា អាជ្ញាធរកំពុងជម្លៀសប្រជាជនចេញពីតំបន់នោះ។
វីដេអូដែលត្រូវបានផ្សព្វផ្សាយដោយរដ្ឋមន្ត្រីក្រសួងព័ត៌មានលោក នេត្រ ភក្ត្រា បង្ហាញពីអ្នករងរបួសដែលត្រូវបានដឹកដោយនគរបាលដោយប្រើម៉ូតូ។ រដ្ឋមន្រ្តីរូបនេះបានមានប្រសាសន៍ថា វីដេអូនេះត្រូវបានថតនៅក្នុងភូមិព្រៃចាន់ ដែលកម្ពុជាអះអាងថា ជាផ្នែកមួយនៃខេត្តបន្ទាយមានជ័យ កាលពីថ្ងៃពុធ បន្ទាប់ពីការបាញ់ប្រហារ។
ព្រៃចាន់ និងភូមិជោគជ័យ បានក្លាយជាចំណុចក្ដៅគគុកនៃភាពតានតឹងនៅតាមព្រំដែន បន្ទាប់ពីកងកម្លាំងថៃបានសាងសង់របាំងលួសបន្លាក្នុងភូមិទាំងនោះ ក្រោយពីបានបញ្ចប់ជម្លោះព្រំដែនរយៈពេលប្រាំថ្ងៃកាលពីខែកក្កដា។ ប្រជាពលរដ្ឋខ្មែរមួយចំនួនដែលបានរស់នៅក្នុងតំបន់នេះអស់រយៈពេលរាប់ទសវត្សរ៍មកហើយ ត្រូវបានហាមឃាត់មិនឱ្យចូលផ្ទះសម្បែងរបស់ពួកគាត់ និងត្រូវបានបញ្ជាឱ្យចាកចេញពីទីនោះ។ ការប៉ះទង្គិចគ្នាកាលពីលើកមុនៗនៅក្បែររបាំងទាំងនោះនាឆ្នាំនេះក៏បានបណ្ដាលឱ្យអ្នកភូមិរងរបួសដោយគ្រាប់បែកផ្សែង និងកាំភ្លើងគ្រាប់ជ័រ។
ហេតុការណ៍នេះកើតឡើងបន្ទាប់ពីប្រទេសថៃបានផ្អាកកិច្ចព្រមព្រៀសន្តិភាព កាលពីថ្ងៃចន្ទ ដោយចោទប្រកាន់កម្ពុជាថា បានដាក់មីនថ្មីនៅជិតព្រំដែនខេត្តព្រះវិហារ ស៊ីសាកេត ដែលបណ្តាលឱ្យទាហានថៃជាច្រើននាក់រងរបួស។ រដ្ឋាភិបាលកម្ពុជាបានននិយាយថា អ្នករងរបួសទាំងនោះបណ្តាលមកពីមីនចាស់ដែលបន្សល់ទុកពីសម័យសង្គ្រាមស៊ីវិលនៅកម្ពុជា។
សេចក្តីថ្លែងការណ៍រួមស្តីពីសន្តិភាពរវាងប្រទេសកម្ពុជា និងថៃត្រូវបានចុះហត្ថលេខាក្នុងអំឡុងពេលកិច្ចប្រជុំកំពូលអាស៊ានកាលពីខែមុននៅប្រទេសម៉ាឡេស៊ី និងធ្វើជាសាក្សីដោយប្រធានាធិបតីសហរដ្ឋអាមេរិក លោក ដូណាល់ ត្រាំ និងនាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម ដែលបានជួយសម្រុះសម្រួលកិច្ចព្រមព្រៀងដំបូង។
មុនពេលមានការបាញ់ប្រហារនៅព្រៃចាន់ ទីក្រុងបាងកកក៏បានទាមទារឱ្យមានការសុំទោសពីកម្ពុជា ចំពោះករណីផ្ទុះមីននេះផងដែរ។
ហ៊ុល ម៉ាលីស ជាអ្នកភូមិព្រៃចាន់ម្នាក់ ដែលផ្ទះរបស់គាត់ត្រូវបានហ៊ុមព័ទ្ធដោយបន្លាលួសដែលថៃរាយព័ទ្ធយកអស់រយៈពេលជាងបីខែមកហើយ បានអះអាងថា គាត់បានឃើញទាហានថៃបាញ់ទៅលើជនស៊ីវិលដែលមិនធ្វើសកម្មភាពបង្កហេតុណាមួយឡើយ។
អ្នកស្រីបានរៀបរាប់ថា៖ «អ្នកភូមិខ្លះកំពុងដេក ហើយអ្នកខ្លះទៀតកំពុងធ្វើម្ហូប ស្រាប់តែទាហានថៃបើកការបាញ់ប្រហារតែម្តង»៕
ប្រែសម្រួលពីអត្ថបទភាសាអង់គ្លេស៖ One Dead in Prey Chan Shooting as Border Tensions Flare Again
