សមាគមសម្ព័ន្ធអ្នកសារព័ត៌មានកម្ពុជា

របាយការណ៍អង្គការមិនមែនរដ្ឋាភិបាល៖ សមាជិកបក្សប្រឆាំងត្រូវគេវាយដំនិងកាប់នៅក្នុងការវាយប្រហារច្រើនករណី

ទង់គណបក្សភ្លើងទៀនកំពុងបក់រវិចៗ អំឡុងពេលសមាជគណបក្សនៅរាជធានីភ្នំពេញកាលពីថ្ងៃទី១៥ ខែមិថុនា ឆ្នាំ២០២២។ (ខេមបូចា/ ព្រីង សំរាំង)
ទង់គណបក្សភ្លើងទៀនកំពុងបក់រវិចៗ អំឡុងពេលសមាជគណបក្សនៅរាជធានីភ្នំពេញកាលពីថ្ងៃទី១៥ ខែមិថុនា ឆ្នាំ២០២២។ (ខេមបូចា/ ព្រីង សំរាំង)

អ្នក​រៀបចំ​ក្រុម​យុវជន​​​គណបក្ស​ភ្លើងទៀនមួយ​រូប​​នៅ​​រាជធានី​ភ្នំពេញ​កំពុង​ទិញ​កាហ្វេ​កាល​ពី​ថ្ងៃ​ទី​៦ ខែ​មេសា ខណៈ​បុរស​ពីរ​នាក់​ក្នុងសម្លៀកបំពាក់​ពណ៌​ខ្មៅ​បាន​​ជិះ​ម៉ូតូសំដៅ​​មក​រក​គាត់ ហើយ​ទាញ​ដំបង​ដែក​វាយ​ចំ​ស្មារបស់​គាត់​​។

អ្នក​រៀបចំរូប​នេះ​​ព្យាយាម​គេច​ខ្លួនចូល​ក្នុង​រថយន្តរបស់​ខ្លួន​ ក្រុម​អ្នក​​វាយប្រ​ហារ​​បាន​ត្រឡប់​មក​វិញ ហើយ​គប់​ដុំ​ថ្មបន្ថែម​ធ្វើ​ឱ្យ​ស្រាំកញ្ចក់​រថយន្ត ។

អ្នករៀបចំរូបនេះ​បានរំលឹកថា លោកបានដាក់លិខិតទៅអាជ្ញាធររាជធានីភ្នំពេញមួយ​សប្តាហ៍មុន ដោយបានជូនដំណឹងអំពីការជួបជុំគ្នាទាមទារឱ្យមានការដោះលែងអ្នកទោសនយោបាយ។ សំណើនេះត្រូវបានបដិសេធ។

ខណៈដែលផែនការរបស់អ្នករៀបចំការ​ជួបជុំរបស់​គណបក្សភ្លើងទៀនបានដំណើរការទៅមុខ អ្នកវាយប្រហារអនាមិកបានចង្អុលមុ​ខលោក​ ហើយស្រែកថា «សម្លាប់អ្ហែងចោល!»។

អង្គការឃ្លាំមើលសិទ្ធិមនុស្ស (HRW) បានរាយការណ៍កាលពីថ្ងៃចន្ទថា​​ ករណីនេះគឺជាអំពើហិង្សាមួយក្នុងចំណោមអំពើហិង្សាយ៉ាងតិចចំនួនប្រាំពីរករណី​ ដែលបួនករណី​ពាក់ព័ន្ធនឹងអ្នកវាយប្រហារដែលប្រើមធ្យោបាយ​​ម៉ូតូ មក​លើ​សមាជិកគណបក្សប្រឆាំងចំនួនប្រាំមួយនាក់​​ចាប់តាំងពីខែមករាមក​ ។ អង្គការ​នេះ បាន​សម្ភាស​ជនរងគ្រោះ​បួន​នាក់​នៃ​ការ​វាយ​ប្រហារដោយ​ផ្ទាល់​ ​ដែល​ត្រូវ​​គេ​កាប់ វាយដំ និង​គំរាម​កំហែង​ដោយ​ពាក្យ​សម្ដី។

សមាជិកគណបក្សភ្លើងទៀនប្រាំនាក់ រួមទាំងជនរងគ្រោះបីនាក់ដែល​រងការវាយប្រហារ​ពី​មុន បានទៅការិយាល័យសិទ្ធិមនុស្សរបស់អង្គការសហប្រជាជាតិក្នុងរាជធានីភ្នំពេញកាលពីថ្ងៃទី២០ ខែមីនា។ មួយសប្តាហ៍ក្រោយមក សមាជិកម្នាក់ក្នុងចំណោមសមាជិកដែលបានចូលរួមជាមួយជនរងគ្រោះបានស្ថិតនៅមុខផ្ទះរបស់គាត់ នៅពេលនោះ​គាត់បានឮគេនិយាយថា «តើវាមែនទេ?» បន្ទាប់​មក​លោក​​ត្រូវគេ​កាប់​​ចំ​ក្បាល។

អង្គការឃ្លាំមើលសិទ្ធិមនុស្សបាន​រាយការណ៍​ថា គាត់​បាន​ងាក​​មើលជុំវិញ​ឃើញ​​បុរស​ពីរ​នាក់ ដែល​ម្នាក់​ក្នុង​ចំណោម​នោះ​មាន​​កាន់ «កាំបិត​ដែក​ធំមួយ​»។ មុខរបួសនេះ ត្រូវដេរដប់បីថ្នេរ។ លោក​បានរាយការណ៍ពីឧបទ្ទវហេតុនេះទៅប៉ូលិសក្នុងមូលដ្ឋាន​ ប៉ុន្តែអង្គការឃ្លាំមើលសិទ្ធិមនុស្សបានអះអាងថា លោក​មិនចង់​ផ្សព្វ​ផ្សាយព័ត៌មានអំពីការ​វាយ​ប្រហារ​នេះ​ជាសាធារណៈទេ​ ព្រោះលោក​ខ្លាចមានការ​សងសឹកបន្ថែមទៀត។

តំណាង​អង្គការ​សហប្រជាជាតិប្រចាំនៅ​រាជធានី​ភ្នំពេញ​មិន​បាន​ឆ្លើយ​តប​នឹង​សំណើ​សុំ​ការ​អត្ថាធិប្បាយ​ទេ។

អ្នកនាំពាក្យរបស់គណបក្សភ្លើងទៀនពី​ររូប​បានបញ្ជាក់ប្រាប់ខេមបូចាថា មានអំពើ​ហិង្សាមក​លើសមាជិកបក្ស ហើយបានបន្ថែមថា មានការវាយប្រហារបន្ថែមនាពេលថ្មីៗនេះ។ លោក គឹមសួរ ភិរិទ្ធ មានប្រសាសន៍ថា គណបក្សបានចែករំលែកព័ត៌មានលម្អិតនៃការវាយប្រហារនេះ​ដល់នគរបាល​មូលដ្ឋានរួចហើយ។

លោក ភិរិទ្ធ បាន​មាន​ប្រសាសន៍​ថា៖ «យើង​បាន​ធ្វើ​រួច​ហើយ។ យើង​បាន​ដាក់​ពាក្យ​​បណ្ដឹង​ទៅ​អាជ្ញាធរ។ យើង​បាន​សហការ​ជាមួយ​ពួក​គាត់​ ​ដើម្បី​ផ្ដល់​ព័ត៌មាន។ នៅ​កន្លែង​ណា និង​ពេល​ណា»។  លោកបានបន្ថែមថា៖ «ចំពោះ​លទ្ធផល​ ពួកគាត់​​គ្រាន់​តែ​ទទួល​ពាក្យ​បណ្តឹង​ប៉ុណ្ណោះ ប៉ុន្តែ​រហូត​មក​ដល់​ពេល​នេះ​ ការ​ស៊ើប​អង្កេត​រក​អ្នក​បង្ក​នោះ​នៅ​មិន​ទាន់​ឃើញ​នៅ​ឡើយ​ទេ»។

លោក សាន សុខ​សីហា អ្នក​នាំ​ពាក្យ​នគរបាល​រាជធានី​ភ្នំពេញមិន​បាន​ឆ្លើយ​តប​នឹង​សំណើ​សុំ​ការ​អត្ថាធិប្បាយ​ទេ។

ការ​វាយ​ប្រហារ​ដែល​បាន​រាយការណ៍​នេះ​បាន​កើត​ឡើង​​ប៉ុន្មាន​ខែ​ បន្ទាប់​ពី​លោក​នាយក​រដ្ឋមន្ត្រី ហ៊ុន សែន ព្រមាន​ពី​អំពើ​ហិង្សា​លើ​អ្នក​ប្រឆាំង។ នៅក្នុងសុន្ទរកថាថ្ងៃទី៩ ខែមករា គាត់បានផ្តល់ជម្រើស​ឱ្យអ្នកប្រឆាំងដែលនៅសេសសល់រវាង​វិធានការ​ផ្លូវច្បាប់ ឬការវាយ​ដំ​។

លោក​បាន​មាន​ប្រសាសន៍ថា៖ «ខ្ញុំ​ចង់​សួរ​ទៅអ្នកវិញ​​ថា ​ជម្រើស​មាន​តែពីរ​ទេ។​មួយ​​ គឺ​ប្រើ​ផ្លូវ​ច្បាប់​និង​មួយ​ទៀត គឺប្រើ​​ដំបងតែម្តង។ តើយក​មួយ​ណា​ពីរនេះ​?» ។

លោក គឹមសួរ ភិរិទ្ធ ជា​អ្នក​នាំពាក្យ​គណបក្ស​ភ្លើងទៀន​មាន​ប្រសាសន៍​ថា លោក​មិន​​​យក​ចិត្ត​ទុក​ដាក់​នឹង​សុន្ទរកថា​របស់​លោក ហ៊ុន សែន ទេ ប៉ុន្តែ​បាន​អំពាវនាវ​ឲ្យ​​គ្រប់​គណបក្ស និង​អ្នក​នយោបាយ​ធ្វើ​ការ​ជាមួយ​គ្នា​ដោយ​សន្តិវិធី។

លោក ភិរិទ្ធ មាន​ប្រសាសន៍ថា៖ «កុំ​សងសឹក កុំ​ប្រើ​អំពើ​ហិង្សា និង​ការ​អាក់អន់​ចិត្ត​ដើម្បី​កម្ចាត់​គូបដិបក្ស។ ហើយ​ខ្ញុំ​គិត​ថា ​ប្រសិន​បើ​យើង​អាច​ធ្វើ​បាន​ហើយ​អត់​ឱន​​ឲ្យ​គ្នា​ទៅ​វិញ​ទៅ​មក​នោះ ប្រជាជន​កម្ពុជា​នឹង​មាន​សាមគ្គីភាព​​កាន់​តែ​ល្អ​ជាង​មុន» ។

ទោះ​ជា​យ៉ាង​ណា សមាជិក​បក្ស​ប្រឆាំង​នៅ​តែ​បន្ត​ប្រឈម​មុខ​ទាំង​ផ្លូវ​ច្បាប់ និង​អំពើ​ហិង្សា​លើ​រាង​កាយ។ អង្គការឃ្លាំមើលសិទ្ធិ​មនុស្ស​បានរាយការណ៍ថា ការវាយ​ប្រហារហាក់ដូចជាសំដៅទៅលើជនរងគ្រោះ ខណៈដែលអ្នកវាយប្រហាររង់ចាំកំណត់អត្តសញ្ញាណពួកគេច្បាស់​លាស់​មុនពេលវាយប្រហារ។

កាល​ពី​​ថ្ងៃ​ទី១៨ ខែ​មីនា បុរស​ម្នាក់ដែលមាន​កាន់ «ដំបង​ដែក​អាច​រលាស់​​បាន” បាន​ស្រែក​ថា“ម្នាក់​ហ្នឹងមែន!”​ ​ មុន​ពេល​បុរសរូបនោះ​​វាយ​ទៅលើ​សមាជិកគណបក្ស​ភ្លើងទៀនម្នាក់​ដែល​ចាក​ចេញ​ពី​កិច្ច​ប្រជុំ​គណបក្ស​ អំឡុង​​ពេល​រសៀល​​ថ្ងៃ​ទី១៨ ខែ​មីនា។

ក្រុម​ជន​ដៃដល់​បាន​វាយ​មក​លើ​សមាជិក​បក្ស​ប្រឆាំង​រូបនោះ​​​ប្រាំ​ដង មុន​ពេល​គាត់​ដួល​ទៅ​លើ​ដី។ អង្គការ​ឃ្លាំ​មើល​សិទ្ធិ​មនុស្ស​បាន​រាយការណ៍​ថា គាត់​មាន​ស្នាម​ជាំ​ធ្ងន់ធ្ងរ​នៅ​កំភួន​ដៃ និង​ដើម​ទ្រូង។

កាល​ពី​ព្រឹក​ថ្ងៃ​ទី​៨ ខែ​មេសា សមាជិក​គណបក្ស​ភ្លើងទៀន​ម្នាក់​កំពុង​ធ្វើ​ដំណើរ​​ទៅ​ធ្វើ​ការ​ក្នុង​រាជធានី​ភ្នំពេញ ស្រាប់តែ​បុរស​ពីរ​នាក់​ស្លៀក​ពាក់ពណ៌ខ្មៅ​និង​​បិទ​មុខ​យក​ដំបងដែក​វាយ​គាត់​។ សមាជិកគណបក្ស​ភ្លើងទៀនរូប​នេះ​បានរត់គេចខ្លួន ប៉ុន្តែត្រូវបានបុរសកាន់ដំបងរត់​ដេញតាម ហើយវាយ៥ដងបន្ថែម​ទៀត បណ្តាលឱ្យមានស្នាមរបួសពេញខ្លួន។

សមាជិក​គណបក្ស​ភ្លើងទៀនរូបនេះ​​បាន​ប្រាប់​អង្គការ​ឃ្លាំ​មើល​សិទ្ធិ​មនុស្ស​ថា លោក​ជឿ​ថា ការ​វាយ​ប្រហារ​នេះ​ គឺ​ជា​ការ​សងសឹក​ចំពោះ​ការ​ចូល​រួម​ក្នុង​កម្មវិធី​ជួប​ជុំ​គណបក្ស​កាល​ពី​ថ្ងៃ​ទី​៧ ខែ​មេសា ក្នុង​រាជធានី​ភ្នំពេញ។

សកម្មជននយោបាយចំនួន១៣នាក់ដែលជាប់ពាក់ព័ន្ធជាមួយគណបក្សបេះដូងជាតិដែលឥឡូវនេះ លែងដំណើរការ ត្រូវបានចាប់ដាក់ពន្ធនាគារជុំវិញ​អ្វីដែលអង្គការឃ្លាំមើលសិទ្ធិមនុស្សចាត់​ទុក​ថា ជា «ការចោទប្រកាន់ដោយហេតុផលនយោបាយ»។ កាលពីខែមេសា សមាជិកគណបក្សភ្លើងទៀនបួននាក់ ដែលពីរនាក់ក្នុងចំណោម​នោះ ជាមន្ត្រីជាប់ឆ្នោតត្រូវបានឃុំខ្លួនដោយចោទប្រកាន់ពីបទក្លែងបន្លំឯកសារ។

ខណៈ​អត្តសញ្ញាណ​របស់​អ្នក​វាយ​ប្រហារនៅ​មិន​ទាន់​ច្បាស់ អង្គការ​ឃ្លាំ​មើល​សិទ្ធិ​មនុស្ស​បាន​ចោទ​ថា គណបក្ស​ប្រជាជន​កម្ពុជា​នៅ​ពី​ក្រោយ​ការ​វាយ​ប្រហារ​នេះ​​។

លោក ហ្វីល រ៉ូបឺតសិន នាយក​រងប្រចាំ​តំបន់​អាស៊ី​នៃអង្គការ​ឃ្លាំ​មើល​សិទ្ធិ​មនុស្ស​បាន​មាន​ប្រសាសន៍ថា៖ «លោកនាយករដ្ឋមន្ត្រី ហ៊ុន សែន កំពុងប្រើគ្រប់ឧបករណ៍គាបសង្កត់ដែល​មាន​ ដើម្បីកម្ចាត់ក្រុមប្រឆាំងនយោបាយណាមួយ នៅមុនការបោះឆ្នោតខែកក្កដា។ រដ្ឋាភិបាលបរទេសគួរតែផ្ញើសារជាសាធារណៈនិង​ច្បាស់ថា ការកម្ទេច​គណបក្សប្រឆាំង និងការដកសិទ្ធិ ការវាយដំ និងចាប់ខ្លួនសមាជិកបក្សប្រឆាំង​មុនថ្ងៃបោះឆ្នោត មានន័យថា នឹងមិនមានការបោះឆ្នោតពិតប្រាកដទាល់តែសោះ» ។

លោក សុខ ឥសាន អ្នក​នាំ​ពាក្យ​គណបក្ស​ប្រជាជន​កម្ពុជាមិន​បាន​ឆ្លើយ​តប​នឹង​សំណើ​សុំ​ការ​អត្ថាធិប្បាយ​ទេ។

កាលពីថ្ងៃទី១៦ ខែមីនា មុនពេលមានសេចក្តី​រាយការណ៍អំពី​ការវាយប្រហារជាច្រើនលើសមាជិកគណបក្ស​ភ្លើងទៀន សភាសហភាពអឺរ៉ុបបានអនុម័តសេចក្តីសម្រេចមួយ ដោយជំរុញឱ្យរដ្ឋាភិបាលកម្ពុជាដោះលែងអ្នកទោសនយោបាយ និងសកម្មជន និងបញ្ឈប់ការបំភិតបំភ័យសមាជិកបក្សប្រឆាំង។ សហភាពអឺរ៉ុបបានព្រមានថា ការព្យួរបន្ថែម​ទៀត​នូវ​ឋានៈអនុគ្រោះ​ពន្ធ​ «អ្វីៗគ្រប់យ៉ាងលើកលែងតែអាវុធ» សម្រាប់​កម្ពុជាអាចកើតមាន «ប្រសិនបើការបោះឆ្នោតឆ្នាំ២០២៣ ងាក​ចេញ​ពីស្តង់ដារអន្តរជាតិ ឬការ​រំលោភសិទ្ធិមនុស្សនៅតែបន្តមាន​»។

សេចក្តីសម្រេចរបស់សភាសហភាពអឺរ៉ុប​បានសរសេរថា៖ «[យើង] អំពាវនាវឱ្យអាជ្ញាធរបញ្ឈប់រាល់ទម្រង់នៃការយាយី ការបំភិតបំភ័យ និងការចោទប្រកាន់បទឧក្រិដ្ឋដោយហេតុផលនយោបាយលើ​សមាជិកគណបក្សប្រឆាំង»។ សេចក្តីសម្រេចដដែលបានបន្ថែមថា៖ «អនុញ្ញាតឲ្យ គ្រប់​គណបក្សនយោបាយ ធ្វើ​យុទ្ធនាការបោះឆ្នោតដោយស្មើភាព ដោយ​សេរី និងតម្លាភាព ក្រោមគណៈកម្មាធិការជាតិរៀបចំការបោះឆ្នោត ប្រកប​ដោយ​តម្លាភាពនិង​បរិយាប័ន្ន​ជាងមុន»។

ស្ថានទូតអាឡឺម៉ង់ ជប៉ុន និងសហរដ្ឋអាមេរិកបានប្រាប់ខេមបូចាថា ពួកគេក៏កំពុងតាមដានមើល​ការបោះឆ្នោតនៅកម្ពុជាយ៉ាងជិតស្និទ្ធ ហើយនៅបន្ត​សន្ទនាជាមួយរដ្ឋាភិបាលកម្ពុជា ដើម្បីកែលម្អបរិយាកាសនយោបាយ។

លោក Stephanie Arzate អ្នកនាំពាក្យស្ថានទូតអាមេរិកបានឲ្យដឹង​នៅក្នុងសេចក្តី​ថ្លែងការណ៍មួយថា៖ «សហរដ្ឋ​អាមេរិក​បាន​​នឹង​បន្ត​ទទូច​ឲ្យ​​អាជ្ញាធរ​កម្ពុជា​ពង្រឹង​លទ្ធិប្រជាធិបតេយ្យ​សេរី​ពហុបក្ស ដោយ​អនុញ្ញាត​ឲ្យ​មាន​ទស្សនៈ​នយោ​បាយ​ប្រឆាំង ជំរុញការប្រកួតប្រជែងតាមរយៈការបោះឆ្នោតដោយសេរី និងយុត្តិធម៌ លើកកម្ពស់​ការផ្លាស់ប្តូរគំនិតបើកចំហ និងអនុញ្ញាតឱ្យសង្គមស៊ីវិល និងប្រព័ន្ធផ្សព្វផ្សាយដំណើរការដោយសេរី ដោយគ្មានការភ័យខ្លាចនៃអំពើហិង្សា»

ប្រែសម្រួលពីអត្ថបទភាសាអង់គ្លេស៖ Opposition Party Members Beaten and Slashed in Multiple Assaults, NGO Reports

249 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម