សមាគមសម្ព័ន្ធអ្នកសារព័ត៌មានកម្ពុជា

តុលាការខេត្តកំពង់ស្ពឺសាកសួរសកម្មជនព្រៃឈើភ្នំឱរ៉ាល់តាមបណ្តឹងមន្ត្រីយោធា

អ្នកភូមិលើកបដាតវ៉ានៅមុខសាលាដំបូងខេត្តកំពង់ស្ពឺ ដើម្បីទាមទារទម្លាក់ការចោទប្រកាន់តំណាងរបស់ពួកគេ នៅថ្ងៃទី២៣ ខែកុម្ភៈ ឆ្នាំ២០២២។ រូបភាពផ្តល់ឲ្យដោយ៖ CCFC
អ្នកភូមិលើកបដាតវ៉ានៅមុខសាលាដំបូងខេត្តកំពង់ស្ពឺ ដើម្បីទាមទារទម្លាក់ការចោទប្រកាន់តំណាងរបស់ពួកគេ នៅថ្ងៃទី២៣ ខែកុម្ភៈ ឆ្នាំ២០២២។ រូបភាពផ្តល់ឲ្យដោយ៖ CCFC

តំណាង​សហគមន៍​ព្រៃ​ឈើ​ចំនួន ៦​នាក់ នៅ​ស្រុក​ឱរ៉ាល់ ខេត្ត​កំពង់ស្ពឺ ត្រូវ​បាន​សាលា​ដំបូង​ខេត្ត​សាកសួរ​​នៅ​ថ្ងៃ​ពុធ ពី​បទ​បង្ក​ឲ្យ​ខូច​ខាត គំរាមកំហែង ប្រមាថ​ជា​សាធារណៈ និង​ញុះញង់។

យោងតាមដីការបស់សាលាដំបូងចុះថ្ងៃទី៧ ខែកុម្ភៈ សកម្មជនទាំង៦នាក់នោះ ត្រូវបានប្តឹងដោយលោក បេន សារិទ្ធ ដែលជាមន្ត្រីយោធានៅអង្គភាពបញ្ជាការដ្ឋានរថក្រោះ។ ទោះ​យ៉ាង​ណា អ្នក​ភូមិបាន​អះអាង​ថា ពួក​គេ​ជា​អ្នក​រង​ការ​គំរាម​កំហែង​ពី​ទាហាន​ដែល​ឈូស​ឆាយ​ដី។

លោក ស៊ឹង សុខុម ជាពលរដ្ឋម្នាក់ក្នុងចំណោមមនុស្សប្រាំមួយនាក់ដែលត្រូវបានសាលាដំបូងសាកសួរបាននិយាយថាគាត់កំពុងត្រូវបានចោទប្រកាន់ពីបទញុះញង់ប្រជាពលរដ្ឋផ្សេងទៀតឱ្យទន្ទ្រានយកដីព្រៃរបស់រដ្ឋ។

លោក​បាន​និយាយ​ថា៖ «ខ្ញុំ​គិត​ថា​នេះ​ជា​រឿង​អយុត្តិធម៌​សម្រាប់​ខ្ញុំ ព្រោះ​ខ្ញុំ​មិន​បាន​ប្រព្រឹត្ត​ដូច​ការ​ចោទ​ប្រកាន់ ហើយ​ខ្ញុំ​ស្នើសុំ​ឲ្យ​តុលាទំលាក់ចោរការចោទប្រកាន់​មក​លើ​រូប​ខ្ញុំ និង​អ្នក​ភូមិ​ផ្សេង​ទៀត»។ លោកបន្ថែមថា៖ «យើង​គ្រាន់តែ​ការពារ​ទ្រព្យសម្បត្តិ​រដ្ឋ​ដើម្បី​ផលប្រយោជន៍​សាធារណៈ ប៉ុន្តែ​យើង​រង​ការចោទប្រកាន់​ជំនួស​វិញ ខណៈ​អាជ្ញាធរ​មិន​បាន​សិក្សា​ឱ្យបាន​ហ្មត់ចត់​លើ​ករណីនេះ​»​

នៅខែមេសា ឆ្នាំ២០០៣ ក្រសួងបរិស្ថានបានប្រកាសផ្នែកមួយនៃដីជាតំបន់ការពារសហគមន៍។

កាល​ពី​ខែ​សីហាឆ្នាំ​មុន រដ្ឋាភិបាល​បាន​ចេញ​អនុក្រឹត្យ​មួយ​ដែល​ធ្វើ​អនុប្រយោគ​លើ​ដី​ព្រៃ​ចំនួន ២៦២,២៤ ហិកតា នៅ​ជិត​ភូមិ​ពោធិ៍មាស ឃុំ​ត្រពាំងជោ ស្រុក​ឱរ៉ាល់។ នៅក្នុងអនុក្រឹត្យនោះក៏បានបន្ត​ថា ដី​នោះ​គឺ​សម្រាប់​សមាជិក​កង​ទ័ព​សម្រាប់​សង់​ផ្ទះ និង​ធ្វើ​ស្រែ​ចម្ការ។

អ្នកភូមិជាច្រើននាក់បានតវ៉ាប្រឆាំងនឹងការផ្លាស់ប្តូរនេះកាលពីខែវិច្ឆិកា នៅពេលដែលទាហានមួយក្រុមមកពីអង្គភាពបញ្ជាការដ្ឋានរថក្រោះបានមកបោះបង្គោលព្រំដែនដី ហើយបានចាប់ផ្តើមឈូសឆាយវាដោយប្រើគ្រឿងចក្រ។

ទង្វើ​នេះ​បាន​ប្រែក្លាយ​អ្នក​ភូមិ​ក្នុង​តំបន់​ទៅ​ជា​សកម្មជន​បរិស្ថាន។ ពួកគាត់​បាន​បោះតង់​នៅ​ជើងភ្នំ​ឱ​រ៉ា​ល់ ដើម្បី​ការពារ​ព្រៃឈើ​កុំ​ឲ្យ​មានការ​កាប់ឆ្ការ​។

អ្នក​ភូមិបាន​អះអាង​ថា កាល​ពី​ថ្ងៃ​អង្គារ ទាហានជាច្រើននាក់​បាន​ប្រើ​អំពើ​ហិង្សា​លើ​អ្នក​ភូមិ ដែល​ព្យាយាម​រារាំង​កងទ័ព​មិន​ឲ្យ​ឈូស​ឆាយ​ដី​ព្រៃ។

អ្នកភូមិលើកបដាតវ៉ានៅមុខសាលាដំបូងខេត្តកំពង់ស្ពឺ ដើម្បីទាមទារទម្លាក់ការចោទប្រកាន់តំណាងរបស់ពួកគេ នៅថ្ងៃទី២៣ ខែកុម្ភៈ ឆ្នាំ២០២២។ រូបភាពផ្តល់ឲ្យដោយ៖ CCFC
អ្នកភូមិលើកបដាតវ៉ានៅមុខសាលាដំបូងខេត្តកំពង់ស្ពឺ ដើម្បីទាមទារទម្លាក់ការចោទប្រកាន់តំណាងរបស់ពួកគេ នៅថ្ងៃទី២៣ ខែកុម្ភៈ ឆ្នាំ២០២២។ រូបភាពផ្តល់ឲ្យដោយ៖ CCFC

ក្នុង​ពេល​សួរ​ដេញដោល អ្នក​ភូមិ​ជិត ៥០០​នាក់ បាន​មក​តវ៉ា​នៅ​មុខសាលាដំបូង​ដើម្បី​ទាមទារ​ឲ្យ​ទម្លាក់​សំណុំ​រឿង​នេះ។

លោក កាក់ សឿន អ្នកភូមិដែលចូលរួមការតវ៉ានៅមុខសាលាដំបូងខេត្តបាននិយាយថា អ្នកភូមិបីនាក់ត្រូវបានទាហានវាយដំ ខណៈព្យាយាមរារាំងពួកគេមិនឱ្យឈូសឆាយដីព្រៃ។

លោកបានបន្ថែមថា៖ «ពួកគេបានបាញ់កាំភ្លើងទៅលើមេឃ ហើយវាយខ្ញុំ។ ពួកគេ​ប្រាប់​ប្រជាជន​ឲ្យ​ឈប់​មក​ទីនេះ ដើម្បី​រំខាន និង​រារាំង​សកម្មភាព​របស់​ពួកគេ បើ​មិន​ដូច្នេះ​ទេ​យើង​នឹង​ត្រូវ​គេ​បាញ់​»​

លោក ឆាយ គឹមហ៊ន ដែល​បាន​ចូល​រួម​ក្នុង​ការ​តវ៉ា​ផង​ដែរ​បាន​ថ្លែង​ថា​៖ «យើង​មក​នេះ​ដើម្បី​គាំទ្រ​តំណាង​របស់​យើង​ដែល​កំពុង​ត្រូវ​បានសាលាដំបូង​សាកសួរ។ យើង​ជា​សហគមន៍​អ្នក​ស្រឡាញ់​ព្រៃឈើ និង​បរិស្ថាន យើង​គ្រាន់​តែ​ចង់​ការពារ​ព្រៃឈើ​កុំ​ឲ្យ​កាប់​បំផ្លាញ»

អាជ្ញាធរ​មូលដ្ឋាន​គ្រប់​លំដាប់​ថ្នាក់​បាន​អះអាង​ថា ពួកគេ​មិន​បាន​ដឹង​ពី​អំពើ​ហិង្សា​លើ​ប្រជាពលរដ្ឋ​ដែល​ធ្វើ​ឡើង​ដោយ​ទាហាននោះទេ។

លោក ម៉ៅ ផល្លា អ្នក​នាំ​ពាក្យ​កង​ទ័ពជើងគោក បាន​បដិសេធ​មិន​ធ្វើ​អត្ថាធិប្បាយ​ទេ ដោយ​លោក​ថា​លោក​មិន​បាន​ដឹង​អំពី​ហេតុការណ៍​នេះ​ទេ។

លោក ទេព នឹម មេឃុំត្រពាំងជោ បានបញ្ជាក់ថា អាជ្ញាធរប្រាប់អ្នកភូមិឲ្យឈប់តវ៉ា ព្រោះដីនេះត្រូវបានប្រគល់ឲ្យយោធាស្របច្បាប់ហើយ។

លោក​បាន​បន្ត​ថា​៖ «​ពួកគេ​នៅ​តែ​បន្ត​សកម្មភាព​ខុស​ច្បាប់ ខណៈ​ដី​នោះ​ត្រូវ​បាន​រដ្ឋ​ប្រគល់​ឲ្យ​គ្រួសារ​យោធិន​រួច​ហើយស្របទៅ​តាម​ច្បាប់»

អង្គការសិទ្ធិមនុស្សលីកាដូ បាននិយាយនៅក្នុងរបាយការណ៍ខ្លីមួយថា អ្នកភូមិបីនាក់បានរងរបួសក្នុងអំពើហិង្សាកាលពីថ្ងៃអង្គារ រួមមានបុរសអាយុ២៣ ឆ្នាំម្នាក់ បុរសអាយុ៤១ ឆ្នាំ និងស្ត្រីអាយុ៥៩ ឆ្នាំម្នាក់។

គូសបញ្ជាក់ផងដែរថា វិវាទដីធ្លីដែលកំពុងបន្តមានប្រជាពលរដ្ឋជាង ២៥៣គ្រួសារ ដែលភាគច្រើនបានប្រមូលផ្តុំគ្នាជាច្រើនខែដើម្បីការពារដីព្រៃរបស់ពួកគេ។

លោក រ័ត្ន ថាវី អ្នក​សម្រប​សម្រួល​សមាគម​ការពារ​សិទ្ធិ​មនុស្ស​អាដហុក​ប្រចាំ​ខេត្ត​កំពង់ស្ពឺ ក៏​បាន​ថ្លែង​ថា ក្រុម​ការងារ​បាន​ទទួល​ព័ត៌មាន​ករណីអំពើ​ហិង្សាដោយ​យោធា។ លោក​បាន​និយាយ​ថា មនុស្ស​បី​នាក់​ត្រូវ​បាន​ចាប់​ខ្លួន និង​វាយ​ដំ​មុន​ពេល​ពួកគេ​ត្រូវ​បាន​ដោះលែង។

លោក​បាន​ថ្លែ​ថា៖ «វា​មិន​អាច​ទទួល​យក​បាន​ទេ ព្រោះ​កម្ពុជា​មាន​ច្បាប់ ហើយ​វា​ត្រូវ​ធ្វើ​តាម​ច្បាប់ និង​គោរព​សិទ្ធិ​មនុស្ស»។ លោក​បន្ថែមថា​៖ «​ការ​ចោទ​ប្រកាន់​នេះ​ជា​រឿង​អយុត្តិធម៌​សម្រាប់​អ្នក​ភូមិ​ព្រោះ​ពួកគេ​គ្រាន់តែ​ការពារ​ព្រៃឈើ​ដើម្បី​ផលប្រយោជន៍​សហគមន៍​ប៉ុណ្ណោះ​មិនមែន​សម្រាប់​បុគ្គល​ទេ​»​៕

ប្រែសម្រួលពីអត្ថបទភាសាអង់គ្លេស៖ Oral forest activists protest legal case against them over land dispute

180 views

ព័ត៌មានថ្មី

អត្ថបទពេញនិយម