ប្រជាពលរដ្ឋនៅរស់នៅតាមបណ្តោយផ្លូវដែក ក្នុងរាជធានីភ្នំពេញ មានក្ដីកង្វល់អំពីផលជះចំពោះលំនៅដ្ឋាន ដោយការអភិវឌ្ឍហេដ្ឋារចនាសម្ព័ន្ធអយស្ម័យយាន និងបញ្ហាសុវត្ថិភាពចរាចរណ៍ ។
ក្នុងឆ្នាំ២០២៤ គ្រោះថ្នាក់នៅលើផ្លូវដែកបានមាន ៩ ករណី ក្នុងរាជធានីខេត្ត ក្នុងនោះ ខេត្ត ពោធិ៍សាត់ ៣ ករណី ខេត្តបាត់ដំបង ១ករណី ខេត្តកណ្តាល ១ករណី ខេត្តបន្ទាយមានជ័យ ១ករណី ខេត្តព្រះសីហនុ ១ករណី និងរាជធានីភ្នំពេញ ២ករណី ដែលបណ្តាលឱ្យមានមនុស្សស្លាប់ និងរបួស ។
ទាក់ទិននឹងបញ្ហានេះ ក្រសួងធារណការ និងដឹកជញ្ជូន បានដាក់ចេញនូវវិធានការចំនួន ៣ ទី១ គឺបង្កើនការបំពាក់ហេដ្ឋារចនាសម្ព័ន្ធការពារសុវត្ថិភាពតាមផ្លូវរថភ្លើង និងដាក់ឆ្មាំការពាររបាំងផ្លូវរថភ្លើង ទី២ បំពាក់ស្លាកសញ្ញាចរាចរណ៍ និងទី៣ បង្កើនវិធានការផ្សព្វផ្សាយអប់រំ ។
កម្ពុជាមានផ្លូវអយស្ម័យយាន ឬរថភ្លើងចំនួនពីរខ្សែ គឺមួយខ្សែពីភ្នំពេញទៅប៉ោយប៉ែត និងមួយខ្សែទៀតពីភ្នំពេញទៅខេត្តព្រះសីហុន ដោយឆ្លងកាត់ខេត្តកំពត ។ សរុបទាំងពីរខ្សែមានប្រវែង ៦៥០គីឡូម៉ែត្រ ។ បច្ចុប្បន្ន ផ្លូវដែកទាំងពីរខ្សែដំណើរការក្រោមកិច្ចសហការរវាងក្រសួងសាធារណការ និងដឹកជញ្ជូន និងក្រុមហ៊ុន រ៉ូយ៉ាល់ រេលវេ កម្ពុជា ៕
