ប្រជាពលរដ្ឋប្រមាណជាង១ពាន់គ្រួសាររស់នៅបុរីពិភពថ្មីកំបូល ស្ថិតនៅភូមិថ្មដា សង្កាត់កន្ទោក ខណ្ឌកំបូល រាជធានីភ្នំពេញ សំណូមពរដល់លោកនាយករដ្ឋមន្ត្រី ហ៊ុន សែន ឱ្យជួយអន្តរាគមន៍ដោយសារក្រុមហ៊ុនបុរីពិភពថ្មីកំបូល មិនអនុវត្តតាមកិច្ចសន្យា និងរឹបអូសផ្ទះ។
តំណាងប្រជាពលរដ្ឋជាងមួយពាន់គ្រួសាររស់នៅក្នុងបុរីពិភពថ្មីកំបូល បានសំណូមពរដល់ ប្រមុខដឹកនាំនៃរាជរដ្ឋាភិបាលកម្ពុជា ឱ្យជួយអន្តរាគមន៍ទៅអ្នកឧកញ៉ា ហុង ពីវ អគ្គនាយកក្រុមហ៊ុនបុរីពិភពថ្មី ធ្វើយ៉ាងណាឱ្យក្រុមហ៊ុនេះទទួលទិញផ្ទះត្រឡប់វិញ ក្នុងតម្លៃ៥០ភាគរយ ក្នុងករណីប្រជាពលរដ្ឋគ្មានលទ្ធភាពបង់ប្រាក់បន្តជូនក្រុមហ៊ុន ឱ្យស្របតាមកិច្ចសន្យាដែលក្រុមហ៊ុននេះធ្លាប់បានអនុវត្តជាមួយអតិថិជននាពេលកន្លងមក។
តំណាងប្រជាពលរដ្ឋបានបន្តថា បច្ចុប្បន្ននេះមានប្រជាពលរដ្ឋរាប់ពាន់គ្រួសារ ដែលមិនមានលទ្ធភាពបង់ប្រាក់រំលស់ផ្ទះជូនក្រុមហ៊ុនបុរីពិភពថ្មីកំបូលតាមកាលកំណត់របស់ក្រុមហ៊ុន ព្រោះជួបវិបត្តិសេដ្ឋកិច្ចធ្ងន់ធ្ងររកប្រាក់ចំណូលមិនបាន។ ហើយក៏បង្ខំចិត្តលក់ផ្ទះជូនក្រុមហ៊ុនវិញ ដែលអ្នកខ្លះបានបង់រំលស់ចាប់ពី៣ទៅ៥ឆ្នាំមកហើយនោះ។ ប៉ុន្តែបែរជាក្រុមហ៊ុនបុរីពិភពថ្មីកំបូល មិនទទួលទិញយកផ្ទះបង់រំលស់នោះវិញទេ។ នៅពេលប្រជាពលរដ្ឋមិនមានប្រាក់បង់ជូនក្រុមហ៊ុនបន្តទៀត គឺខាងក្រុមហ៊ុនបានមកបិទសេចក្តីជូនដំណឹងរឹបអូសយកផ្ទះ និងយកសោចាក់ទ្វារផ្ទះមិនឱ្យប្រជាពលរដ្ឋរស់នៅ។
អ្នកស្រី ប្រាក់ សេងហូ រស់នៅក្នុងបុរីពិភពថ្មីកំបូល៣ ខណ្ឌកំបូល រាជធានីភ្នំពេញ ជាតំណាងពលរដ្ឋរងគ្រោះម្នាក់ បានលើកដៃសំពះរៀបរាប់ មកកាន់អ្នកសារព័ត៌មានថា «នាងខ្ញុំបានមកទិញផ្ទះបង់រំលស់សុទ្ធនៅបុរីពិភពថ្មីកំបូល៣ គម្រោង៦ គឺបានបង់រំលស់ជូនក្រុមហ៊ុនចំនួន៣៣ខែកន្លងមកហើយ ប៉ុន្តែពេលនេះ នាងខ្ញុំមិនមានលទ្ធភាពបង់ប្រាក់ឱ្យក្រុមហ៊ុនបន្តទៅមុខទៀតទេ។ ហើយក៏បានស្នើសុំទៅខាងបុរី ឱ្យទទួលទិញផ្ទះខ្ញុំត្រឡប់វិញក្នុងតម្លៃ៥០ភាគរយតាមកិច្ចសន្យា និងស្របតាមគោលការណ៍របស់បុរីពិភពថ្មីធ្លាប់បានអនុវត្តពីមុនមក តែពេលនេះ ខាងបុរីបានបដិសេធមិនទទួលទិញផ្ទះពីនាងខ្ញុំទេ ជាហេតុនាំឱ្យនាងខ្ញុំមានការយឺតយ៉ាវបង់ប្រាក់ជូនក្រុមហ៊ុនចំនួន៣ខែកន្លងមកហើយ ហើយពេលនេះ ខាងបុរីក៏បានចុះមកជូនដំណឹង និងបិទក្រដាសឱ្យនាងខ្ញុំរើអីវ៉ាន់ចេញពីផ្ទះ ដោយទុករយៈពេល៧ថ្ងៃ ឱ្យនាងខ្ញុំត្រូវរើអីវ៉ាន់ចេញពីផ្ទះឱ្យអស់ជាកំហិត»។
ត្រង់ចំណុចនេះ ទើបតំណាងប្រជាពលរដ្ឋរស់នៅបុរីពិភពថ្មីកំបូលឈានទៅផ្តិតស្នាមមេដៃ សំណូមពរដល់ថ្នាក់ដឹកនាំក្រសួងស្ថាប័នពាក់ព័ន្ធ ជាពិសេស លោកនាយករដ្ឋមន្ត្រី ហ៊ុន សែន ឱ្យជួយអន្តរាគមន៍ជាបន្ទាន់ ដ្បិតបច្ចុប្បន្ននេះ ខាងក្រុមហ៊ុនបុរីពិភពថ្មីកំបូល បានចុះរឹបអូសយកផ្ទះ ដែលប្រជាពលរដ្ឋខ្វះលទ្ធភាពបង់រំលស់ទាំងនោះទាំងកម្រោល ហើយព្រមានចាត់វិធានការផ្លូវច្បាប់ បើហ៊ានប្រឆាំងសេចក្តីជូនដំណឹងរបស់ក្រុមហ៊ុននោះ។
អ្នកស្រី សេងហូ បានទទូចថា៖ «សូមឱ្យក្រុមហ៊ុនបុរីពិភពថ្មី ទទួលទិញផ្ទះរបស់គាត់ក្នុងតម្លៃ ៥០ភាគរយ តាមគោលការណ៍នៃកិច្ចសន្យា ដែលក្រុមហ៊ុននេះធ្លាប់បានអនុវត្តកន្លងមក»។
អ្នកស្រីបន្តថា អ្នកស្រីក៏ដូចជាពលរដ្ឋរស់នៅក្នុងបុរីពិភពថ្មីដទៃទៀត ធ្លាប់បានដាក់ពាក្យស្នើ សុំកិច្ចអន្តរាគមន៍ទៅលោកអភិបាលខណ្ឌកំបូល ជាបន្តបន្ទាប់មិនតិចជាង៣លើករួចមកហើយទេ ប៉ុន្តែមិនទទួលបានដំណោះស្រាយអ្វីសោះឡើយ។
អ្នកស្រីបន្តថា៖ «ហើយបន្តរហូតមកដល់ពេលនេះ ខាងក្រុមហ៊ុនបុរីពិភពថ្មីកំបូល នៅតែបន្តចុះបិទស្លាករឹបអូសយកផ្ទះនាងខ្ញុំ ខណៈនាងខ្ញុំជាម្ចាស់ផ្ទះអស់លទ្ធភាពបង់ប្រាក់បន្ត ហើយខាងបុរីមិនព្រមរកដំណោះស្រាយជូននាងខ្ញុំឡើយ។ ហើយករណីនេះ នាងខ្ញុំព្រួយបារម្ភ និងភ័យខ្លាចក្រុមហ៊ុនរឹបអូសយកផ្ទះនាងខ្ញុំ ដែលកំពុងរស់នៅ ហើយសូមសំណូមពរដល់សម្តេចនាយករដ្ឋមន្ត្រី សម្តេចពុក សម្តេចម៉ែ និងមន្ត្រីគ្រប់ជាន់ថ្នាក់ជួយដោះស្រាយរកយុត្តិធម៌ដល់នាងខ្ញុំ ក៏ដូចជាពលរដ្ឋដទៃទៀត ឱ្យបានឆាប់បំផុត និងដោយអនុគ្រោះផងចុះ»។
ស្រដៀងគ្នាដែរ ជាតំណាងពលរដ្ឋរងគ្រោះម្នាក់ទៀត គឺលោក ហេង តារា ទីលំនៅបច្ចុប្បន្ន ផ្ទះលេខ០២ ផ្លូវលេខ១២A បុរីពិភពថ្មីកំបូល៣ ខណ្ឌកំបូល រាជធានីភ្នំពេញ បានលើកឡើងថាគាត់បានទិញផ្ទះបង់រំលស់នៅបុរីពិភពថ្មីនេះ៥ឆ្នាំកន្លងមកហើយ។ ប៉ុន្តែពេលនេះគាត់ខ្វះលទ្ធភាពមិនមានលុយបង់រំលោះជូនក្រុមហ៊ុនបន្តទៀត ក៏សម្រេចចិត្តដាក់ពាក្យស្នើសុំលក់ផ្ទះឱ្យក្រុមហ៊ុនវិញ ប៉ុន្តែបែរជាក្រុមហ៊ុនបុរីពិភពថ្មី មិនព្រមទទួលទិញយកវិញឡើយ។ ដូចច្នេះ គឺខុសនឹងគោលការណ៍នៃកិច្ចសន្យាដែលក្រុមហ៊ុនធ្លាប់បានអនុវត្តកន្លងមក។
លោក ហេង តារា បញ្ជាក់ថា៖ «ខ្ញុំបាទបានទិញផ្ទះបង់រំលស់សុទ្ធនៅក្នុងបុរីពិភពថ្មីកំបូលនេះ រយៈពេល៥ឆ្នាំកន្លងមកហើយ ហើយដោយសារតែមានបញ្ហាវិបត្តិសេដ្ឋកិច្ចធ្វើឱ្យខ្ញុំបាទមានការយឺតយ៉ាវក្នុងការបង់ប្រាក់តាមពេលវេលាកំណត់។ ខាងបុរីពិភពថ្មី បានជូនដំណឹងមកខ្ញុំបាទឱ្យរុះរើផ្ទះ»។
លោកបន្តទៀតថា នៅពេលដែលខ្ញុំយកផ្ទះទៅលក់ជូនខាងក្រុមហ៊ុនវិញ បុរីបែរជាប្តូរគោលការណ៍ ហើយមិនបានជូនដំណឹងដល់ខាងខ្ញុំបាទជាម្ចាស់ផ្ទះ។ ហើយករណីបុរីពិភពថ្មី មិនទទួលទិញផ្ទះពីខ្ញុំវិញនេះ ទើបធ្វើឱ្យរូបខ្ញុំខកខានមិនបានបង់លុយជូនបុរីចំនួន១០០ថ្ងៃមកហើយ ពេលនេះ ខាងបុរីក៏បានជូនសេចក្តីជូនដំណឹងមកខ្ញុំជាម្ចាស់ផ្ទះឱ្យរុះរើផ្ទះតាមរយៈមេធាវី តាមរយៈការិយាល័យបុគ្គលិក ដែលបានផ្តល់ព័ត៌មានឱ្យខ្ញុំរុះរើផ្ទះក្នុងរយៈពេល៧ថ្ងៃជាបន្ទាន់។
លោក តារា បានស្នើថា៖ «ខ្ញុំបាទសូមសំណូមពរដល់សម្តេចពុក សម្តេចម៉ែ ដែលជាថ្នាក់ដឹកនាំ និងជាបិតាមាតា សន្តិភាព ជួយអន្តរាគមន៍ និងរកយុត្តិធម៌ដល់រូបខ្ញុំបាទ ក៏ដូចជាពលរដ្ឋច្រើនរយគ្រួសារទៀត កំពុងរស់នៅក្នុងបុរីពិភពថ្មីកំបូល ឱ្យបានឆាប់ផង»។
ចំណែក ស្ត្រីឈ្មោះ ព្រុំ វត្តី ទីលំនៅបច្ចុប្បន្ន ផ្ទះលេខ០២ ផ្លូវលេខ១៣C បុរីពិភពថ្មីកំបូល៣ ខណ្ឌកំបូល រាជធានីភ្នំពេញ ក៏បានឱ្យដឹងថាប្រជាពលរដ្ឋធ្លាប់បានដាក់ពាក្យស្នើសុំកិច្ចអន្តរាគមន៍ទៅកាន់លោកអភិបាលខណ្ឌកំបូល ដើម្បីស្នើសុំឱ្យអាជ្ញាធរមូលដ្ឋាននេះជួយអន្តរាគមន៍ទៅក្រុមហ៊ុនបុរីពិភពថ្មីកំបូល អនុវត្តតាមគោលការណ៍ ទទួលទិញយកផ្ទះពីពលរដ្ឋ ដែលខ្វះលទ្ធភាពបង់រំលស់បន្តក្នុងតម្លៃ៥០ភាគរយ ប៉ុន្តែ សំណើរសុំអន្តរាគមន៍ពីថ្នាក់ដឹកនាំខណ្ឌកំបូល ហាក់មិនទទួលបានលទ្ធផលអ្វីទេ គឺអាជ្ញាធរខណ្ឌនេះបានត្រឹមកោះអញ្ជើញតំណាងប្រជាពលរដ្ឋ និងតំណាងក្រុមហ៊ុនបុរីពិភពថ្មី មកជួបពិភាក្សាគ្នា និងធ្វើកំណត់ហេតុតែប៉ុណ្ណោះ។
ស្ត្រីរងគ្រោះរូបនេះបានសំណូមពរដល់សុំសម្តេតេជោ ហ៊ុន សែន ដែលដឹកនាំប្រទេសកម្ពុជាមានសុខសន្តិភាពរហូតមកដល់ពេលនេះជួយកូនចៅ ជួយអន្តរាគន៍ទៅក្រុមហ៊ុនបុរីពីភពថ្មី ឱ្យទទួលទិញផ្ទះបង់រំលស់ប្រឡប់វិញ ចំពោះប្រជាពលរដ្ឋដែលមិនមានលទ្ធភាពបង់រំលស់ផ្ទះបន្តក្នុងតម្លៃ៥០ភាគរយ ព្រោះពលរដ្ឋកំពុងជួបវិបត្តិសេដ្ឋកិច្ចធ្ងន់ធ្ងរ។
បន្ថែមលើនេះ កាលពីថ្ងៃទី១៥ ខែឧសភា ឆ្នាំ២០២៣ តំណាងប្រជាពលរដ្ឋចំនួន៣នាក់ រស់នៅបុរីពិភពថ្មីកំបូល ក៏បានដាក់ពាក្យស្នើសុំអន្តរាគមន៍ទៅកាន់លោកអភិបាលខណ្ឌកំបូល ជាថ្មីទៀត ដោយបានស្នើសុំឱ្យអភិបាលខណ្ឌកំបូល ជួយអន្តរាគមន៍ទៅក្រុមហ៊ុនបុរីពិភពថ្មី សូមឱ្យក្រុមហ៊ុននេះរក្សាគោលការណ៍ដូចដើម គឺក្រុមហ៊ុនត្រូវទទួលទិញយកផ្ទះដែលពួកគាត់ខ្វះលទ្ធភាពបង់ក្នុងតម្លៃ៥០ភាគរយ ដែលក្រុមហ៊ុនធ្លាប់បានអនុវត្តតាមកិច្ចសន្យា។
ជាការឆ្លើយតប កាលពីរសៀលថ្ងៃទី៧ ខែមិថុនា ឆ្នាំ២០២៣ លោក ឃឹម ស៊ុនសូដា អភិបាលខណ្ឌកំបូល បានដឹកនាំកិច្ចប្រជុំបន្ទាន់មួយ ជាមួយភាគីពាក់ព័ន្ធដើម្បីជួបពិភាក្សាទៅលើពាក្យស្នើសុំអន្តរាគមន៍របស់ប្រជាពលរដ្ឋរស់នៅក្នុងបុរីពិភពថ្មី អនុវត្តតាមគោលការណ៍ ដែលធ្លាប់បានអនុវត្តកន្លងមក ស្ថិតនៅភូមិថ្មដា សង្កាត់កន្ទោក ខណ្ឌកំបូល រាជធានីភ្នំពេញ។
នៅក្នុងកំណត់ហេតុ នៃកិច្ចប្រជុំនោះ បានបង្ហាញថា ក្រោយពីជួបជុំសមាសភាព ដែលត្រូវចូលរួម និងមានការសម្រុះសម្រួលពីលោក ឃឹម ស៊ុនសូដា អភិបាលខណ្ឌកំបូល ដែលជាប្រធានអង្គប្រជុំរួចមក ទទួលបានលទ្ធផលដូចជា លោក សែម ហួ តំណាងក្រុមហ៊ុនបុរីពិភពថ្មី បានលើកឡើងថា គោលការណ៍របស់ក្រុមហ៊ុន ដែលអាចទទួលទិញផ្ទះពីអតិថិជនត្រឡប់ចូលក្រុមហ៊ុនវិញក្នុងតម្លៃ៥០ភាគរយនៃប្រាក់ដែលបានបង់ទៅក្រុមហ៊ុន លុះត្រាតែនៅលើកិច្ចសន្យាដែលក្រុមហ៊ុនធ្វើជាមួយអតិថិជន មានបញ្ចូលលក្ខខណ្ឌទទួលទិញផ្ទះត្រឡប់វិញ។
ចំណែក តំណាងពលរដ្ឋនៅបុរីពិភពថ្មីកំបូល ក៏បានលើកឡើងថា នៅពេលពួកគាត់ទៅទិញផ្ទះពីក្រុមហ៊ុនបុរីពិភពថ្មីកំបូល ផ្នែករដ្ឋបាលក្រុមហ៊ុន បានប្រាប់ពួកគាត់ពីគោលការណ៍របស់ក្រុមហ៊ុនពាក់ព័ន្ធនឹងការទទួលទិញផ្ទះពីអតិថិជនត្រឡប់ចូលក្រុមហ៊ុនវិញក្នុងតម្លៃ៥០ភាគរយនៃប្រាក់ដែលបានបង់ទៅឱ្យក្រុមហ៊ុន។ ហេតុនេះ ពួកគាត់ជាអតិថិជនស្នើសុំទៅក្រុមហ៊ុនបុរីពិភពថ្មី ទទួលទិញផ្ទះពីអតិថិជនត្រឡប់ចូលក្រុមហ៊ុនវិញក្នុងតម្លៃ៥០ភាគរយនៃប្រាក់ដែលបានបង់ទៅក្រុមហ៊ុន ចំពោះផ្ទះដែលអតិថិជនមិនមានលទ្ធភាពបង់ប្រាក់បន្តទៅក្រុមហ៊ុន និងស្នើសុំក្រុមហ៊ុនផ្អាកគិតប្រាក់ពិន័យពីអតិថិជនដែលបានបង់ប្រាក់យឺតយ៉ាវ នៅក្នុងអំឡុងពេលដែលប្រជាពលរដ្ឋកំពុងស្នើសុំអន្តរាគមន៍ទៅរដ្ឋបាលខណ្ឌកំបូល រហូតដល់មានការដោះស្រាយសមស្រប។
ក្រោយពីស្តាប់ការលើកឡើងរបស់ភាគីតំណាងក្រុមហ៊ុនបុរីពិភពថ្មី និងតំណាងពលរដ្ឋ នៅក្នុងជំនួបពិភាក្សាកាលពីល្ងាចថ្ងៃទី៧ ខែមិថុនា រួចមក លោក ឃឹម ស៊ុនសូដា អភិបាលខណ្ឌកំបូល ក៏បានជម្រាបទៅតំណាងប្រជាពលរដ្ឋថា រដ្ឋបាលខណ្ឌនឹងធ្វើលិខិតទៅម្ចាស់ក្រុមហ៊ុន ដើម្បីស្នើសុំក្រុមហ៊ុនទទួលទិញផ្ទះពីអតិថិជនត្រឡប់ចូលក្រុមហ៊ុនវិញក្នុងតម្លៃ៥០ភាគរយនៃប្រាក់ដែលបង់ទៅក្រុមហ៊ុន និងស្នើសុំផ្អាកការរឹបអូសផ្ទះពីអតិធិជនជាបណ្តោះអាសន្នចំពោះផ្ទះដែលអតិថិជនមិនមានលទ្ធភាពបង់ប្រាក់បន្តទៅក្រុមហ៊ុន។
លោក ឃឹម ស៊ុនសូដា ក៏បានប្រាប់សារព័ត៌មាន ខេមបូចា តាមទូរស័ព្ទនៅព្រឹកថ្ងៃទី៨ ខែមិថុនានេះថា៖ ថ្ងៃនេះរូបលោកបានឱ្យមន្ត្រីរដ្ឋបាលសរសេរលិខិតដាក់ជូនទៅម្ចាស់ក្រុមហ៊ុនបុរីពិភពថ្មីរួចហើយ ដើម្បីស្នើសុំឱ្យក្រុមហ៊ុននេះ ទទួលទិញផ្ទះពីអតិថិជនក្នុងតម្លៃ៥០ភាគរយ ចំពោះពលរដ្ឋដែលខ្វះលទ្ធភាពបង់ប្រាក់រំលស់ផ្ទះជូនក្រុមហ៊ុនបន្តទៀត។ ជាពិសេសស្នើឱ្យក្រុមហ៊ុនផ្អាករឹបអូសយកផ្ទះប្រជាពលរដ្ឋដែលកំពុងរស់នៅ ហើយខ្វះលទ្ធភាពបង់ប្រាក់ជាបណ្តោះអាសន្នសិន ដើម្បីរង់ចាំដំណោះស្រាយដោយសន្តិវិធី។
លោកអភិបាលខណ្ឌថ្លែងថា៖ «កង្វល់របស់ប្រជាពលរដ្ឋរស់នៅបុរីពិភពថ្មីកំបូល ក្នុងមូលដ្ឋាននេះ គឺរូបលោកក៏ដូចជាមន្ត្រីថ្នាក់ដឹកនាំដទៃទៀត កំពុងយកចិត្តទុកដាក់បំផុត ធ្វើយ៉ាងណារកចំណុចឈ្នះៗ ទាំងភាគីក្រុមហ៊ុន និងប្រជាពលរដ្ឋឱ្យស្របតាមគោលនយោបាយដឹកនាំ របស់សម្តេចតេជោ ហ៊ុន សែន នាយករដ្ឋមន្ត្រី និងជាបិតាសន្តិភាពនៃកម្ពុជារបស់យើង»។
ដោយឡែក លោក សែម ហួ តំណាងក្រុមហ៊ុនបុរីពិភពថ្មី មិនអាចទាក់ទងតាមទូរសព្ទ ដើម្បីបំភ្លឺជុំវិញកង្វល់របស់ប្រជាពលរដ្ឋរស់នៅបុរីពិភពថ្មីកំបូលបានទេ នៅព្រឹកថ្ងៃទី៨ ខែមិថុនានេះ ដោយអ្នកលើកទូរសព្ទរបស់លោកនិយាយថា លោក សែម ហួ កំពុងជាប់រវល់។
យ៉ាងណាក៏ដោយ ក្រុមប្រជាពលរដ្ឋរស់នៅបុរីពិភពថ្មីកំបូល ដែលកំពុងប្រឈមវិបត្តិសេដ្ឋកិច្ចធ្ងន់ធ្ងរ ហើយខ្វះលទ្ធភាពបង់រំលស់ផ្ទះជូនក្រុមហ៊ុនបុរីតាមកំណត់ បានថ្លែងអំណរគុណដល់ថ្នាក់ដឹកនាំរដ្ឋបាលខណ្ឌកំបូល ដឹកនាំដោយ លោក ឃឹម ស៊ុនសូដា ដែលបានជួយសម្របសម្រួល និងដោះស្រាយកង្វល់របស់ប្រជាពលរដ្ឋពួកគាត់រំពឹងថា ក្រុមហ៊ុនបុរីពិភពថ្មីកំបូល នឹងអនុវត្តតាមគោលការណ៍នៃកិច្ចសន្យា ដែលក្រុមហ៊ុនេះធ្លាប់អនុវត្តកន្លងមកដោយរលូនឡើងវិញ។
តាមការអះអាងពីតំណាងពលរដ្ឋបានបន្ថែមថា បច្ចុប្បន្ននេះ យ៉ាងហោចណាស់មានប្រជាពលរដ្ឋប្រមាណ១ពាន់២រយគ្រួសារ កំពុងប្រឈមខ្វះលទ្ធភាពបង់ប្រាក់រំលស់ផ្ទះ ឱ្យទាន់ខែនីមួយៗជូនក្រុមហ៊ុនបុរីពិភពថ្មីកំបូល។ ខណៈមានផ្ទះប្រជាពលរដ្ឋខ្លះត្រូវក្រុមហ៊ុនរឹបអូស និងមានពលរដ្ឋច្រើនទៀត បានបង្ខំចិត្តរើអីវ៉ាន់ចាកចេញពីបុរីនេះ ដោយចាកចេញទាំងខ្លួនទទេ ព្រោះពេលម្ចាស់ផ្ទះខ្វះលទ្ធភាពបង់ប្រាក់បង់រំលស់ឱ្យក្រុមហ៊ុនតាមកំណត់ក៏ត្រូវក្រុមហ៊ុនបុរីពិភពថ្មី ពិន័យ រឹបអូសយកផ្ទះ និងចាក់សោបិទទ្វារផ្ទះ មិនឱ្យពលរដ្ឋទាំងនោះចូលទៅរស់នៅបានទៀតទេ។
យ៉ាងណាក៏ដោយ នៅក្នុងពិធីជួបសំណេះសំណាលជាមួយកម្មករ កម្មការិនីជិត២ម៉ឺននាក់ នៅខេត្តកំពង់ឆ្នាំង នៅព្រឹកថ្ងៃទី៩ ខែមិថុនា ឆ្នាំ២០២៣ នេះ លោកនាយករដ្ឋមន្ត្រី ហ៊ុន សែន បានមានប្រសាសន៍ថា ស្នើទៅម្ចាស់បុរី ឱ្យរៀបចំការបង់ប្រាក់រំលស់ផ្ទះជូនពលរដ្ឋឡើងវិញ ដើម្បីជួយសម្រួលដល់ពួកគាត់ ដែលកំពុងជួបបញ្ហាហិរញ្ញវត្ថុ និងបញ្ឈប់ការរឹបអូសយកផ្ទះពីប្រជាពលរដ្ឋតទៀត។ ហើយបញ្ជាឱ្យមន្ត្រីដែលទទួលបន្ទុកលើការងារហ្នឹង ពិនិត្យលើការបង់រំលស់ផ្ទះនៅតាមបុរីនានា ដែលក្រុមហ៊ុនបានរឹបអូស ដើម្បីឱ្យប្រាកដថា មានប្រជាពលរដ្ឋប៉ុន្មានគ្រួសារ និងមានក្រុមហ៊ុនបុរីណាខ្លះ បានរឹបអូសយកផ្ទះពីប្រជាពលរដ្ឋ ដែលមិនមានលទ្ធភាពបង់រំលស់ផ្ទះជាមួយក្រុមហ៊ុនបន្តទៀត។
លោកនាយករដ្ឋមន្ត្រី ហ៊ុន សែន បានថ្លែងថា៖ «ម្ចាស់បុរី ត្រូវអញ្ជើញម្ចាស់ផ្ទះ ដែលក្រុមហ៊ុន បានបានរឹបអូសផ្ទះមកជជែកគ្នា ឈានទៅផ្តល់ផ្ទះត្រឡប់ទៅវិញ ដោយចិត្តធម៌ ចិត្តសប្បុរស ហើយយកផ្លូវឈ្នះ ឈ្នះ ធ្វើជាគោល។ ដោយម្ចាស់បុរី មិនត្រូវបន្តរឹបអូសផ្ទះពីប្រជាពលរដ្ឋ ដែលខ្វះលទ្ធភាពបង់រំលស់ទៀតទេ ហើយប្តូរមកពន្យារយៈពេល នៃការបង់រំលស់ជូនពលរដ្ឋ ឱ្យវែងជាងមុន ឬបន្ធូបន្ថយថ្លៃបង់រំលស់ប្រចាំខែមកទាបជាងមុនវិញ»៕
