សមាគមសម្ព័ន្ធអ្នកសារព័ត៌មានកម្ពុជា

ប្រជាពលរដ្ឋកំពុងប្រឈមនឹងចំណីអាហារបរិភោគប្រចាំថ្ងៃមាន​សារជាតិគីមីច្រើន

មន្ត្រីជំនាញរបស់អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (កបប) នៃក្រសួងពាណិជ្ជកម្ម ចុះត្រួតពិនិត្យ បន្លែ ត្រី សាច់ នៅតាមផ្សារ។ រូបភាពផ្តល់ឱ្យ
មន្ត្រីជំនាញរបស់អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (កបប) នៃក្រសួងពាណិជ្ជកម្ម ចុះត្រួតពិនិត្យ បន្លែ ត្រី សាច់ នៅតាមផ្សារ។ រូបភាពផ្តល់ឱ្យ

ប្រជាពលរដ្ឋមានការព្រួយបារម្ភពីផលប៉ះពាល់សុខភាពដោយសារតែសារជាតិគីមីដែលមាននៅ​ក្នុង បន្លែ សាច់ ផ្លែឈើ ដែលមានលក់នៅលើទីផ្សារបច្ចុប្បន្ន ព្រោះជាម្ហូបអាហារចម្បង​ប្រចាំ​ថ្ងៃដែលពលរដ្ឋមិនអាចអត់បាន ហើយមិនដឹងថាមាន​ប្រភពពីណា​ច្បាស់​លាស់និងការ​ផលិត​ត្រឹមត្រូវកម្រិតណា។

ជាអ្នកដាំស្លប្រចាំថ្ងៃ​ និងជាស្ត្រីមេផ្ទះ ដែលមានសមាជិកគ្រួសារ ៥នាក់​ អ្នកស្រី ឆេង រស់​នៅ​ក្នុងទីក្រុងភ្នំពេញ តែងតែទៅផ្សារដើម្បីទិញម្ហូបអាហារមកចម្អិនស្ទើរជារៀងរាល់ថ្ងៃ បានរៀប​រាប់​ថា ពេលទៅផ្សារម្តងៗអ្នកស្រីទិញ បន្លែផ្សេងៗពីគ្នា និងសាច់ ដើម្បីធ្វើជាម្ហូប​ប្រចាំ​ថ្ងៃ មួយ​ពេលត្រូវចំណាយសម្រាប់គ្រួសារប្រហែល ៨ពាន់រៀល ឬលើសពីនេះតាមរបស់​ដែលត្រូវ​ទិញ។

អ្នកស្រីបន្តថា ពេលទៅផ្សារទិញបន្លែ ផ្លែឈើ អ្នកស្រីតែងសម្គាល់ បន្លែ ផ្លែឈើណា​រាងតូចៗ​មិនសូវ​ធំ គឺរបស់​នៅ​ក្នុងស្រុក ភាគច្រើនអ្នកស្រីរកមើលម៉ូយ ដែលអ្នកស្រីធ្លាប់ទិញជាប្រចាំ ព្រោះ​គិត​ថា​​ពួកគេ​ប្រមូល​បន្លែពីក្នុងស្រុក។​ អ្នកស្រីមិនសូវហ៊ានទិញបន្លែពីកន្លែងផ្សេងៗ ពី​អ្នក​បោះ​ដុំធំៗ ព្រោះ​មិន​ដឹងថា គេយករបស់នោះពីណា ហើយអ្នកលក់ក៏មិនសូវដឹងច្បាស់​ព្រោះ​​យកត​ពី​គេដែរ។

ដោយគ្មានជម្រើស ក្នុងការដឹងទំនិញមួយណាធម្មជាតិ ឬ​ដាក់គីមី ហើយគួបផ្សំនឹងតំលៃ អ្នកស្រី​ទិញហើយត្រូវយកមកលាងត្រាំទឹកទុករយៈពេល៣០នាទីទៅមួយម៉ោងមុនចម្អិន​ដើម្បីឱ្យអស់ក្លិនផ្សេងៗ ហើយមិនសូវហ៊ានហូបបន្លែឆៅជាញឹកញាប់ទេ ។

អ្នកស្រីបញ្ជាក់ថា បន្លែនាំចូលភាគច្រើនមកពីប្រទេសវៀតណាម ចិន ថៃ បន្លែខ្មែរមិនសូវមាន​ច្រើន តែបើលក់គឺតំលៃថ្លៃជាងគេ ហើយបើកសិផលសរីរាង្គដែលលក់នៅក្នុងផ្សារទំនើបមាន​តម្លៃថ្លៃខ្លាំងណាស់ ហើយអ្នកស្រីក៏មិនប្រាកដក្នុងចិត្តថាសុទ្ធដែរ អ្នកស្រីតែងតែទៅទិញ​នៅ​តាមផ្សារធម្មតា។

អ្នកស្រី ឆេង បានបន្ថែមថា៖ «ពេលខ្លះយើងក៏បារម្ភពីបន្លែម្ហូបអី វាមិនមែនជារបស់ស្រុកខ្មែរ​យើង នាំចូល វាមានសារជាតិគីមី តែយើងចេះតែបារម្ភៗហើយ តែធ្វើម៉េចចំណីអាហារ​បន្លែ​ប្រឡុកយើងត្រូវហូបចុករាល់ថ្ងៃ ខានមិនបាន»

អ្នកលក់រាយអាហារសមុទ្រស្រស់ នៅផ្សារទួលសង្កែ មានមឹក បង្គា ក្តាម និងរបស់​សមុទ្រ​ផ្សេង​ទៀត អ្នកស្រី ភាព បានថ្លែងថា គាត់លក់តែមួយព្រឹកៗក្នុងមួយថ្ងៃៗលក់បាន​ជាង១០០​គីឡូជាប្រចាំ គាត់ទទួលយកបន្តពីម៉ូយម្តុំស្វាយប៉ាក​ក្នុងរាជធានីភ្នំពេញ តាំងពីម៉ោង២ទៅ ម៉ោង​៣ភ្លឺ ដើម្បីបានរបស់ថ្មីៗយកទៅលក់និងរៀបចំ។ ពេលរបស់នៅសល់ អ្នកស្រីលក់​បញ្ចុះ​តំលៃ ដើម្បីឱ្យឆាប់អស់ជារៀងរាល់ថ្ងៃ អ្នកស្រីអាចរកប្រាក់ចំណេញមួយថ្ងៃៗ​ប្រហែលជាង​៥០ដុល្លារ ប៉ុន្តែត្រូវធ្វើការហត់ខ្លាំងណាស់។

អ្នកស្រីឱ្យដឹងថា លក់មិនដែលសល់ទេ លក់អស់ជារៀងរាល់ថ្ងៃ ទាក់ទងនឹងការដាក់​សារជាតិគីមី​បន្ថែម អ្នកស្រីបានដឹងដែរ តែមិនដែលធ្វើទេ​ ហើយក៏មិនដឹងថាជាអ្វីឱ្យ​ពិត​ប្រាកដ។

អ្នកស្រី ភាព បានបញ្ជាក់ថា៖ «ធ្លាប់លឺដឹងដែរ គេបានដាក់ហើយ តាំងពីមុនយើងយកមកលក់ តែមិនដឹងជាដាក់អី តែមីងលក់មិនដែលសល់ទេ បើសល់តិចតួចក្លាសេទៅ ហើយចែកបងប្អូន ញ្ញាតិមិត្តទៅ លក់តែរបស់ថ្មីៗ»

 ចំណែក កញ្ញា ស្រីកា ជាបុគ្គលិកក្រុមហ៊ុនម្នាក់ បានរៀបរាប់ថា កញ្ញាមិនសូវ​មាន​ពេលទៅ​ផ្សារ​ទិញម្ហូបមកចម្អិន​ទេ ដោយសារ​រវល់និងកាងារ កញ្ញានិងមិត្តភក្តិដទៃទៀត តែងតែ​ទៅ​បរិភោគអាហារដែលចម្អិន​ហើយស្រាប់ ដែលលក់នៅតាមតូប ឬភោជនីយដ្ឋាន។ កញ្ញាមាន​ការ​បារម្ភពីសុវត្ថិភាពចំណីអាហារ​ ក្នុងការលាងសំអាត អនាម័យដាំស្ល របស់អ្នកលក់ដែរ និង​មិនសូវហ៊ានបរិភោគអាហារលក់តាមផ្លូវទូទៅទេ កញ្ញាតែងតែសង្កេតរក​អ្នកលក់​ដែល​មើល​ទៅមានអនាម័យ មុនទិញចំណីអាហារ។

កញ្ញា ស្រីកា​ និយាយថា៖ «បារម្ភដែរ ខ្លាចធ្វើអត់ស្អាត អត់អនាម័យ ខ្លាចមានជាតិគីមី តែ​មិនដឹងធ្វើម៉េច មានតែកុំសូវគិតច្រើនទើបហ៊ានបរិភោគ ខ្ញុំមើលកន្លែងដែរ មុនទៅញុំា»។ កញ្ញាបន្តថា៖ «ខ្ញុំក៏ចង់ឱ្យមានការចុះទៅត្រួតពិនិត្យ សុវត្ថិភាពចំណីហារដែលមាន​លក់ស្រាប់ និង​លក់នៅតាមទីផ្សារនានា ដើម្បីឱ្យគ្រប់គ្នាអាចមានទំនុកចិត្ត​ក្នុងការទិញនិងទទួលទាន»

ច្បាប់ស្តីពីសុវត្ថិភាពម្ហូបអាហារ ដែលរដ្ឋសភាបានអនុម័តកំឡុងពេលថ្មីៗនេះ ក្នុងខែឧសភា ឆ្នាំ២០២២ មានបទបញ្ញត្តិទូទៅ ធានាសុវត្ថិភាព គុណភាព អនាម័យគ្រប់ដំណាក់​កាល​នៃ​ខ្សែ​ផលិតកម្ម ដើម្បីផ្តល់សុខភាព និងធានាការធ្វើពាណិជ្ជកម្ម​ម្ហូបអាហារដោយ​ស្មោះ​ត្រង់ដល់អ្នក​បរិភោគ។ រាល់អាជីវកម្មម្ហូបអាហារ ត្រូវមានលិខិតអនុញ្ញាត​ពីស្ថាប័ន​មាន​សម្ថកិច្ចដែល​កំណត់​ដោយច្បាប់​អនុលោម តាមលក្ខខណ្ឌតម្រូវស្តីពីម្ហូបអាហារ។

បើតាមអ្នកជំនាញម្នាក់ខាងសុវត្ថិភាពចំណីអាហារនិងអាហារូបត្ថម្ភ​ដែលសុំមិន​បញ្ចេញ​ឈ្មោះ បានមើលឃើញថា សុវត្ថិភាព​ចំណី​អាហារដែលបានដាក់លក់នៅលើទីផ្សារបច្ចុប្បន្ន មិនទាន់​មានការ​បញ្ជាក់ឱ្យ​អ្នកប្រើប្រាស់បានដឹង និងឱ្យយល់អំពីផលប៉ះពាល់​ដល់សុខភាព​យ៉ាងណា​នោះទេ។ អ្នកបរិភោគកំពុងមានការព្រួយបារម្ភអំពីបញ្ហាសុវត្ថិភាពចំណីអាហារ​ក្នុងខ្សែ​ផលិតកម្ម ប្រើប្រាស់ធាតុចូល ដូចជា ពូជ ជី ទឹក ថ្នាំកសិកម្ម ចំណីសត្វ ថ្នាំព្យាបាល​ និង​ធាតុ​សកម្មផ្សេងទៀត តើត្រឹមត្រូវតាមបទដ្ឋានបច្ចេកទេស ស្របច្បាប់ប្រទេស​ ឬ​ច្បាប់​ហាម​ឃាត់​ជាសកលដែរឬទេ។

លោកមានប្រសាសន៍ថា៖ «ការប្រមូលផល ការធ្វើសត្ដឃាត ការស្តុក វេចខ្ចប់ ដឹកជញ្ជូន តើ​អនុវត្ត​បានតាមស្តង់ដារបច្ចេកទេសដែរទេ។ ម្យ៉ាងទៀត ការប្រើប្រាស់សាធាតុមួយចំនួន ដើម្បីរក្សាសោភ័ណភាព និងគុណភាពទុកបានយូរ ក៏អ្នកប្រើប្រាស់មិនបានដឹង ហើយគ្មាន​ជម្រើសត្រូវបន្តទិញដើម្បីយកមកបរិភោគ»

លោកបន្តថា ការលាងសំអាតបន្លែដោយលាងទឹកស្អាត ឬទឹកមានលាយសារធាតុ​ពែម៉ង់កាណាត ម៉ាស៊ីនសំអាតផ្សេងៗ ឬការចម្អិន គឺជាជម្រើសមួយ ប៉ុន្តែក៏មិនប្រាកដថា ចំណីអាហារនោះមានសុវត្ថិភាពទេ ជាពិសេសគឺចំណីអាហារដែលបានប្រើប្រាស់​ប្រភេទ​ថ្នាំកសិកម្មសំលាប់សត្វល្អិតតាមប្រភេទផ្សេងៗ ឬសារធាតុសកម្មដទៃទៀត។

បន្ថែមពីនេះលោកថា សារធាតុគីមីមួយចំនួនអាចត្រូវបានប្រើប្រាស់ក្នុងកម្រិតបច្ចេកទេស ដើម្បីរក្សាទុកនូវគុណភាព និងសោភ័ណភាពចំណីអាហារ ប៉ុន្តែបើសិនមានការប្រើប្រាស់ ត្រូវតែអនុវត្តឱ្យបានត្រឹមត្រូវគោរពទៅតាមច្បាប់ និងសុវត្ថិភាពចំណីអាហារ។ ជាចំបាច់គឺ​ការរៀបចំប្រព័ន្ធអធិការកិច្ច និងយកវត្ថុវិភាគមកពិនិត្យជាប្រចាំ និងអនុវត្តវិធានការច្បាប់​ជា​មូលដ្ឋាន។

បន្លែច្រកថង់សំរាប់លក់បោះដុំនៅពេលយប់ នៅបរិវេណផ្សារដើមគ រាជធានីភ្នំពេញ។ រូបថតក្នុងខែតុលា ឆ្នាំ២០២២។ ខេមបូចា/ នង ម៉ៃចរីយា

លោក​ ផាន​ អូន ប្រតិភូរាជរដ្ឋាភិបាល​ ទទួល​បន្ទុក​ជាអគ្គនាយក​នៃអគ្គនាយកដ្ឋាន​ការពារ​អ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ នៃក្រសួងពាណិជ្ជកម្ម បានមាន​ប្រសាសន៍ថា រដ្ឋាភិបាលបានអនុម័តច្បាប់នានា និងច្បាប់សុវត្ថិភាពចំណីអាហារថ្មីៗនេះ និងក្រសួងកំពុងត្រៀមរៀបចំអនុក្រឹត្យបន្ថែម និងកែសម្រួល។

លោកថា មានសារធាតុគីមីមួយចំនួនអាចត្រូវបានដាក់នៅក្នុងចំណីអាហារ និងកម្រិតត្រឹមត្រូវ​បានអនុញ្ញាត តែចំពោះសារជាតិគីមីដែលដាក់លើសចំណុះ ហើយដូចជាពពួកហ្វ័រម៉ុល​ដែល​ធ្វើឱ្យបន្លែ សាច់នៅស្រស់ និងសារធាតុដទៃទៀតដែលធ្វើឱ្យប៉ះពាល់សុខភាព គឺត្រូវហាម​ឃាត់ ហើយបុគ្គលដែលប្រព្រឹត្តនិងត្រូវប្រឈមមុខចំពោះច្បាប់ត្រូវមានទោសទណ្ឌ ។

លោកបន្តថា ក្រសួងមានវិធានការហើយ​លោក​អំពាវនាវ​ដល់ភាគី​ពាក់​ព័ន្ធ​ចូលរួមនិងការ​ផ្សព្វផ្សាយ​ឱ្យបានទូលំទូលាយ ឱ្យអ្នកប្រើប្រាស់​បានយល់ និងចូលរួមពីពលរដ្ឋ​គ្រប់រូប​ហើយ​ព្រមទាំងការអនុវត្តច្បាប់ ជាពិសេសគឺកាតព្វកិច្ច​របស់​អាជីកម្មប្រតិបត្តិករម្ហូបចំណីអាហារ

ក្រសួងជាមួយមន្ទីពិសោធន៍ចុះពិនិត្យនៅតាមផ្សារក្នុងរាជធានីភ្នំពេញ១ខែបួនដង។

លោក ផាន​ អូន មានប្រសាសន៏ ៖ «យើងមានវិធានការចុះពិនិត្យជាក់ស្តែងទាំងបន្លែ ទាំង​សាច់ជា​យន្តការចុះពិនិត្យទីផ្សារគឺយើងចុះពិនិត្យជាប្រចាំ បើសិនជាមានបណ្តឹង​របស់​ប្រជាពលរដ្ឋយើង យើងរឹតតែចុះទៀត ចុះភ្លាមៗតែម្តង»

លោកបានបញ្ជាក់ថា សារជាតិគីមីមិនអាចពិនិត្យមើលដោយភ្នែកបានទេ ទាល់តែមាន​មន្ទីរ​ពិសោធន៏​និងឧបករណ៍ត្រួតពិនិត្យ។​ ការយល់ដឹងរបស់ពលរដ្ឋ​និងអាជីវករ​នៅមាន​កម្រិត​ដូច្នេះទាមទារឱ្យមានការផ្សព្វផ្សាយ។

លោកបន្ថែមថា៖ «បើតាមតួលេខយើងនៅតែមានការព្រួយបារម្ភដែរ ធម្មតាម្ហូបអាហារ ១ថ្ងៃ​បី​ពេលរបស់មនុស្ស មានការរកឃើញការប្រើប្រាស់សារធាតុណាមួយលើអ្វីមួយ លើស ឬប្រើ​សារធាតុ​ដែលគេមិនអនុញ្ញាត ទោះបីមួយមុខឬពីរមុខក៏ដោយ ក៏យើងសម្តែងការ​ព្រួយ​បារម្ភ​ដែរ ព្រោះមិនគួរឱ្យកើតមានការប្រើប្រាស់សារធាតុដែលហាមឃាត់»

លោក ប៉ិច សុផាណា​ និស្សិតកំពុងបន្តការសិក្សាបរិញ្ញាបត្រជាន់ខ្ពស់ នៅ​សកលវិទ្យាល័យ អ៊ុប៊ុនរាចក្រថានី ប្រទេសថៃ ជំនាញបច្ចេកវិទ្យាចំណីអាហារ បានឱ្យដឹង​ថាសុវត្ថិភាព​បន្លែនៅ​មាន​កម្រិតដោយសារឆាប់ខូចមិនសូវអាចយក​ទៅកែច្នៃឱ្យ​បានច្រើនដូច​សាច់ ហើយមិនបាន​អនុវត្ត​​នូវក្បួនកសិកម្មឱ្យត្រឹមត្រូវទាំងការដឹកជញ្ជូន​ធ្វើឱ្យកសិផល​ឆាប់​ខូច ហើយជាប់នូវ​សារធាតុគីមីពេលដាំដុះ ការទុកដាក់មិនបានល្អ ធ្វើឱ្យជាប់​និង​សារធាតុ​កខ្វក់ផ្សេងៗ​ដែលអាច​ចម្លងមកកាន់អ្នកបរិភោគ រួមនិងការលាងសំអាតមិនបានត្រឹមត្រូវ អាច​ធ្វើ​ឱ្យមានការ​ពុល​អាហារ ដែលធ្វើឱ្យឈឺក្បាល ក្អួតចង្អោរ រាករុះ រលាកក្រពេះពោះវៀន ឬអាចពុលសន្លប់​ភ្លាមៗ។

លោកបន្ថែមថា ការលាងសំអាតឱ្យបានត្រឹមត្រូវនិងការស្រុះវាអាចជួយបានខ្លះ តែមិនបាន​ទាំងស្រុងនោះទេ ហើយការស្រុះអាចធ្វើឱ្យបាត់សារធាតុចិញ្ចឹមជួយដល់រាងកាយ​ប្រហែល​២០ទៅ៣០ភាគរយ។ ពលរដ្ឋត្រូវជ្រើសរើស បន្លែ សាច់ ចេញដោយគោលការ​សុវត្ថិភាព​​កសិកម្ម ប្រភេទអាហារសរីរាង្គ ឬកន្លែងដែលមានប្រភពច្បាស់លាស់ ព្រោះកសិផលទាំងអស់ មិនអាចមើលសំគាល់ដោយភ្នែកបានទេ។

លោកមើលឃើញថា ដោយសារមានការចុះពិនិត្យពីក្រសួងមានសមត្ថកិច្ច និងការរឹតបន្តឹង​ច្បាប់ផ្សេងៗ ហានិភ័យនៃការព្រួយបារម្ភនៅតិចប្រហែល ១០ទៅ១៥ភាគរយ​ដែលប្រើប្រាស់​សារធាតុគីមីមិនត្រឹមត្រូវលើចំណីអាហារ។ លោកក៏សំណូមពរឱ្យមានការផ្សព្វផ្សាយឱ្យ​បាន​ច្រើន ហើយចុះទៅបង្រៀនអាជីករឱ្យយល់ដឹងកាន់តែច្បាស់​និងជំរុញការស្រាវជ្រាវ​បន្ថែម​​នៅ​តាម​តំបន់នីមួយៗដើម្បីបង្ហាញ លើសុវត្ថិភាពចំណីអាហារ ដើម្បីលើកទឹកចិត្ត​ដល់​អ្នក​ផលិត​គោលការណ៍សុវត្ថិភាពឱ្យបានច្រើន។

លោក សុផាណា​ បន្ថែមថា គួរបង្កើតប្រព័ន្ធរាយការណ៏ជាសម្ងាត់ដើម្បីលើកទឹកចិត្ត​ដល់អ្នក​រាយការណ៏ ពេលដឹងមានអ្នកផលិតខុសស្តង់ដារ និងអ្នកប្រើប្រាស់គីមីដើម្បីឱ្យ​ក្រសួងចុះ​ទៅពិនិត្យ ណែនាំ និងធ្វើតាមវិធានការផ្លូវច្បាប់។

បើតាមការចេញផ្សាយដោយវិទ្យុបារាំងពីអ្នកជំនាញ បានប្រាប់ថា មានការប្រើប្រាស់ សារធាតុហ្វ័រម៉ុលមាននៅលើ បន្លែ សាច់ ចំណីអាហារ ដែលធ្វើឱ្យអាហារនៅស្រស់ទុក​បាន​យូរ។ សារធាតុ​នោះមានអាយុកាល៤ឆ្នាំ អាចប្រើជាថ្នាំសម្រាប់លាបជញ្ជាំង ថ្នាំលាបកុំ​ឱ្យជ្រះ​ចាប់ ឬ ជូតឥដ្ឋសម្លាប់មេរោគ ថ្នាំចាក់សាកសពកុំឱ្យស្អុយ  ។ អាចបង្កអាឡាក់ស៊ី​ដល់​សុខភាព ធ្វើឱ្យ​កើត​កមរម៉ាស់ស្បែក ឈឺភ្នែក រលាក បំពង់ក ​បំពង់ខ្យល់ បំពង់អាហារ ឈឺ​ក្រពេះ តែង​តែ​ឈឺក្បាល ជ្រុះសក់ និងធ្វើឱ្យហត់ ភ្លេចភ្លាំង បាត់ស្មារតី​ គេងមិនលក់ ខួរក្បាល​ចុះ​​ខ្សោយ និងបង្កឱ្យកើតជាជំងឺមហារីក។

លោក តាន់ ផាន់ណារ៉ា ប្រតិភូរាជរដ្ឋាភិបាលទទួលបន្ទុកអគ្គនាយកនៃអគ្គនាយកដ្ឋាន​សុខភាពសត្វ បានមានប្រសាសន៏ថា អគ្គនាយកដ្ឋានមានម៉ាស៊ីនពិនិត្យនិងវិភាគ អាចមើល​ដឹងសាច់មានជាតិគីមីផ្សេងៗ ទាំងសាច់ដែលនាំចូលនិងលក់មាននៅទីផ្សារ។

ការនាំចូលមានការត្រួតពិនិត្យដោយឧបករណ៏ត្រួតពិនិត្យ គឺមានវិញ្ញាបនបត្របញ្ជាក់ពី​ពេទ្យ​សត្វ ពីសុវត្ថិភាពពីជំងឺផ្សេងៗទើបអនុញាតឱ្យនាំចូល។ ចំពោះផលិតកម្មក្នុងស្រុក ក្រសួង​កំពុង​ជំរុញឱ្យមានការចិញ្ជឹមសត្វតាមស្តង់ដារ ស្របតាមប្រទេសផ្សេងៗ។ ចំពោះជ្រូករស់​មិន​បាន​នាំចូលជិតមួយឆ្នាំហើយ និងការនាំចូលសត្វមាន់ក៏មានចំនួនតិចតួច ការ​លក់​​សាច់មាន់​ក្នុងស្រុកមានតម្លៃប្រកួតប្រជែងគឺតម្លៃថោកខ្លាំង។

ចំណែក សមាជិកខុន្ទការិយាល័យរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ទទួល​បន្ទុកផ្នែកព័ត៌មាន កញ្ញា អ៊ឹម រចនា បានមានប្រសាសន៍ថា  តម្រូវការផ្តត់ផ្គង់​បន្លែនៅកម្ពុជា សព្វថ្ងៃ ជារៀងរាល់ថ្ងៃត្រូវការ ជាង៣ពាន់តោន ប៉ុន្តែផលិតកម្ម​បន្លែក្នុងស្រុក​ផលិតបាន​តែ​ជាង២ពាន់តោន ដែលស្មើនិង៧៣ភាគរយ។ ដោយការផ្គត់ផ្គង់មិនបានពេញលេញ​ជាហេតុ​ត្រូវការឱ្យវិស័យឯកជននាំចូលចំនួនជាង ៩០០តោនក្នុង១ថ្ងៃ ស្មើ២៧ភាគរយ។ ជា​ពិសេស​រដូវប្រាំង ផលិតកម្មបន្លែក្នុងស្រុកជួបប្រទះការរាំងស្ងួត ខ្វះប្រភពទឹក និងរដូវវស្សា​មានទឹក​ជំនន់ឡើងខ្លាំង ដល់រដូវរំហើយកសិករអាចផលិតបានច្រើន។

កញ្ញាបន្ថែមថា រាជរដ្ឋាភិបាលកម្ពុជានិងភាគីដៃគូកំពុងពង្រឹងហេដ្ឋារចនាសម្ព័ន្ធ ដូចជា​ប្រព័ន្ធ​ស្រោចស្រព ផ្ទះសំណាញ់ ឧបករណ៍ សំភារៈកសិកម្ម និងធ្វើការបញ្ចុះតម្លៃ​លើធាតុ​ចូល​កសិកម្ម ដូចជា ពូជ ជី ថ្មាំបំប៉ន និងការគាំទ្របច្ចេកទេសដាំដុះផ្សេងៗ និងការលើកទឹកចិត្ត​ឱ្យកសិករ និង អ្នកវិនិយោគក្នុងស្រុកលើវិស័យដំណាំ។

កញ្ញា រចនា បន្ថែមថា ក្រសួងកំពុងបន្តប្រឹងប្រែងបន្ថែមទៀត ក្នុងការពង្រឹងនិងជំរុញការដាំដុះ​ក្នុងស្រុកដោយរៀបចំផែនការយុទ្ធសាស្ត្ររយៈពេល​​​ធម្យម និងរយៈពេលវែង ដើម្បើលើក​ទឹក​ចិត្ត​ប្រជាកសិករនិងអ្នកផលិតក្នុងស្រុក ដើម្បីបំពេញតម្រូវការទីផ្សារឱ្យបានពេញលេញ។

អ្នកជំនាញចង់ឃើញ​ ភាគីពាក់ព័ន្ធគ្រប់រូប ទាំងរដ្ឋាភិបាល វិស័យឯកជន កសិករ និងអ្នក​ប្រើ​ប្រាស់ ត្រូវតែរួមចំណែក អនុវត្តតាមលិខិតបទដ្ឋានគតិយុត្ត ដើម្បីទទួលបាននូវ​ចំណីអាហារ​ដែលមានសុវត្ថិភាព ទាំងចំណីអាហារនាំចូល ទាំងអាហារក្នុងស្រុក​​។ ត្រូវមានក្រុមសីលធម៌ គិតបុណ្យបាប និងមានទំនួលខុសត្រូវក្នុងសង្គម ពង្រឹងការអនុវត្តច្បាប់ឱ្យបានម៉ត់ចត់បំផុត រួមនិងពង្រឹងការផ្សព្វផ្សាយ លើកកម្ពស់ការយល់ដឹង។​

អ្នកស្រី ឆេង សំណូមពរឱ្យមានការដាំដុះតាមធម្មជាតិ​ និងប្រើប្រាស់ជីធម្មជាតិនៅក្នុងស្រុក មិនចង់ឱ្យមានការប្រើប្រាស់សារជាតិគីមី ដើម្បីឱ្យមានគុណភាពល្អ និងមិនត្រូវគិតតែពីប្រាក់​ចំណេញនោះទេ  ប៉ុន្តែត្រូវគិតពីផលប៉ះពាល់ដល់សុខភាព។ អ្នកស្រីបន្តថា អ្នកស្រីក៏បារម្ភការ​នាំចូល​កសិផលពីបរទេសដែរមិនដឹងថាធ្វើយ៉ាងម៉េច។ អ្នកស្រីចង់ឱ្យមានការដាំដុះកសិផល​ក្នុង​ស្រុក​កុំឱ្យមានតម្លៃថ្លៃជាងរបស់នាំចូល ដើម្បីឱ្យពលរដ្ឋគ្រប់រូបអាចទទួលយកបាន​ទាំង​អស់​​គ្នា។

អ្នកស្រី ឆេង បន្ថែមថា៖ «របស់នៅស្រុកខ្មែរយើងកុំលក់ថ្លៃលើសបរទេស ពេលដល់លក់ថ្លៃ​លើស​បរទេស ប្រជាជនយើងទៅទិញរបស់បរទេស វានិងខូចសុខភាពប្រជាជនយើង។ ឧទាហរណ៍​ថាតូប១លក់បន្លែមួយគីឡូ២ពាន់ តូបមួយលក់ដល់៣ពាន់ឬ៤ពាន់ អ្នកខ្លះគ្នា​អត់​លុយ ចំពោះ​អ្នកគេមានលុយគេរើសបន្លែ សុខភាពគេល្អ ដល់ពេលអ្នកអត់លុយថាដូចតែគ្នា​ហ្នឹង»

479 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម