ផ្លូវដែកមួយខ្សែមានប្រវែង២៥០គីឡូម៉ែត្រ សម្រាប់ដឹកទំនិញ និងអ្នកដំណើរពីភ្នំពេញទៅខេត្តព្រះសីហនុ ឆ្លងកាត់ខេត្តតាកែវ និងកំពត ដែលរាជរដ្ឋាភិបាល បានជួសជុលដាក់ឲ្យប្រើប្រាស់ឡើងវិញ កន្លងមកតែងតែបង្កគ្រោះថ្នាក់ដល់ប្រជាពលរដ្ឋរស់នៅក្បែរផ្លូវនិងអ្នកដំណើរឆ្លងកាត់។
អ្នកស្រី ដា ជាពលរដ្ឋក្នុងស្រុកទឹកឈូបានលើកឡើងថា នាពេលកន្លងមក មានមន្ត្រីជំនាញពាក់ព័ន្ធបានចុះពន្យល់ណែនាំពលរដ្ឋរស់នៅក្បែរផ្លូវរថភ្លើងឱ្យដឹងពីផលប៉ះពាល់នានា ដោយណែនាំឲ្យសង់លំនៅឋានឆ្ងាយ ចម្ងាយយ៉ាងតិច១៥ម៉ែត្រពីផ្លូវរថភ្លើង និងហាមឃាត់ចំពោះការយកសត្វពាហនៈដូចជាគោក្របី ទៅចងនៅលើ ឬជិតផ្លូវរថភ្លើង។
អ្នកស្រីអោយដឹងបន្ថែមទៀតថា៖ «ខ្ញុំបានដឹងដំណឹងអំពីគ្រោះថ្នាក់ចរាចរណ៍ដោយសាររថភ្លើងជាញឹកញាប់ ពេលខ្លះធ្ងន់ធ្ងរ រហូតបាត់បង់ជីវិតក៏មានដែរ»។
ពលរដ្ឋរស់នៅក្នុងស្រុកទឹកឈូលើកឡើងថា គ្រោះថ្នាក់ដោយសាររថភ្លើងភាគច្រើនគឺបណ្តាលមកពី កង្វះការយល់ដឹង នឹងមិនមានការប្រុងប្រយ័ត្នរបស់ពលរដ្ឋ ហើយពួកគាត់ចង់ឲ្យមានភ្លើងសញ្ញាចរាចរណ៍ របាំងបិទផ្លូវនិងប៉ូលិសចរាចរយាមជាប្រចាំនៅពេលមានរថភ្លើងឆ្លងកាត់។
ជាការឆ្លើយតប លោក ចាន់ សំលេង ប្រធាននាយកដ្ឋានផ្លូវដែកនៃក្រសួងសាធារណៈការនិងដឹកជញ្ជូន បានថ្លែងតាមរយៈសារសំឡេងក្នុងកម្មវិធីសន្ទនាមតិរបស់វិទ្យុជាតិ៩មករា ថា ដើម្បីលើកកម្ពស់ សុវត្ថិភាព តាមផ្លូវដែក ក្រសួងសាធារណៈការនិងដឹកជញ្ជូនក៏ដូចជារាជរដ្ឋាភិបាល ធ្លាប់បានចេញសេចក្តីប្រកាសលេខ០៦.ប្រក្រ ចុះថ្ងៃទី២៧ ខែកញ្ញា ឆ្នាំ១៩៩៩ ស្តីពីការលុបបំបាត់ជាអាណាធិបតេយ្យ ទន្រ្ទានកាន់កាប់ដីធ្លីតាមផ្លូវដែក និងសេចក្តីប្រកាសលេខ១៤ សរណន ចុះថ្ងៃទី១៧ ខែធ្នូ ឆ្នាំ២០០៣ស្តីពីការទប់ស្កាត់គ្រោះថ្នាក់ចរាចរណ៍តាមដងផ្លូវដែក ដែលនិយាយពីផល់ប៉ះពាល់ដូចបានចែង។
លោកបានឲ្យដឹងបន្តទៀតថា៖ «ក្រៅពីនេះខាងរាជាយស្វ័យយាន្តកម្ពុជា និងនាយកដ្ឋានផ្លូវដែក បានផ្សព្វផ្សាយដល់ប្រធានខណ្ឌផ្លូវដែកទាំងអស់ឱ្យចុះណែនាំដល់ប្រជាពលរដ្ឋបានយល់ដឹងពីផលប៉ះពាល់និងគ្រោះថ្នាក់ផ្សេង»។
លោកបានថ្លែងបន្ត សារាចរណ៍ណែនាំឱ្យប្រជាពលរដ្ឋសាងសង់លំនៅឋានឱ្យឆ្ងាយពីផ្លូវរថភ្លើង បើនៅក្រុងមានគម្លាត១៥ម៉ែត្រ នៅទីប្រជុំជនមានគម្លាត២០ម៉ែត្រ នៅតាមទីជនបទ ជួរភ្នំគួរតែនៅឲ្យឆ្ងាយដើម្បីជៀសវាងគ្រោះថ្នាក់ចរាចរណ៍ដោយរថភ្លើង។
តបតាមតម្រូវការពលរដ្ឋ នាយកដ្ឋានផ្លូវដែកមានការដាក់ពង្រាយស្លាកសញ្ញាចរាចរណ៍នៅតាមដងផ្លូវដែកភ្លើងចរាចរណ៍ក៏ដូចជារបាំងបិទបើកស្វ័យប្រវត្តិនៅនៅពេលមានរថភ្លើងឆ្លងកាត់។ លោកបានបញ្ជាក់បន្ថែមថា៖ «ករណីមានគ្រោះថ្នាក់ចរាចរាណ៍ដោយសារថភ្លើង ខាងនាយកដ្ឋានផ្លូវដែកមិទទួលខុសត្រូវលើសំណងទេ»។
គួរបញ្ជាក់ផងដែរថា ផ្លូវដែកកម្ពុជា បានចាប់ផ្តើមសាងសង់ដំបូងក្នុងទសវត្សរិ៍ឆ្នាំ១៩៣០ ដល់ឆ្នាំ១៩៤០ ។ ផ្លូវដែកកម្ពុជាមានចំនួន ២ខ្សែ គឺ ខ្សែភាគខាងជើង និងខ្សែភាគខាងត្បូង ដែលមានប្រវែងសរុប ៦៥០គីឡូម៉ែត្រ។ ផ្លូវដែកភាគខាងជើង មានប្រវែង ៣៨៦គីឡូម៉ែត្រ ពីភ្នំពេញ ទៅដល់ប៉ោយប៉ែត (ព្រំដែនកម្ពុជា-ថៃ) ត្រូវបានកសាងឡើងចាប់ ពីឆ្នាំ១៩២៩ ដល់ឆ្នាំ១៩៤២ ក្នុងសម័យអាណានិគមបារាំង និងផ្លូវដែកភាគខាងត្បូង ត្រូវបានកសាង ឡើងចន្លោះឆ្នាំ១៩៦០ ដល់ឆ្នាំ១៩៦៩ ក្នុងសម័យសង្គមរាស្ត្រនិយម ក្រោមព្រះរាជកិច្ចដឹកនាំរបស់ ព្រះករុណាព្រះបាទសម្តេចព្រះនរោត្តម សីហនុ ក្រោមជំនួយរបស់ប្រទេសបារាំង អាល្លឺម៉ង់ខាងលិច និងចិន ដែលមានប្រវែងសរុប ២៦៤គីឡូម៉ែត្រ។ ផ្លូវដែកទាំងពីរខ្សែនេះ ត្រូវបានទទួល រងការខ្ទេចខ្ទាំយ៉ាងធ្ងន់ធ្ងរ ហើយផ្នែកខ្លះត្រូវបានបំផ្លាញទាំងស្រុងដោយរបបកម្ពុជាប្រជាធិបតេយ្យ៕
