សមាគមសម្ព័ន្ធអ្នកសារព័ត៌មានកម្ពុជា

សាលាឧទ្ធរណ៍ភ្នំពេញតម្កល់សាលក្រមពីបទញុះញង់លើ លោក ថាច់ សេដ្ឋា

លោក ថាច់ សេដ្ឋា អនុប្រធានគណបក្សភ្លើងទៀនថ្លែងនៅទីស្នាក់ការគណបក្សក្នុងរាជធានីភ្នំពេញកាលពីថ្ងៃទី៤ ខែមេសា ឆ្នាំ២០២២ មុនពេលលោកត្រូវបានចាប់ខ្លួនពីបទចេញមូលប្បទានប័តគ្មានសាច់ប្រាក់។ (ខេមបូចា/ ព្រីង សំរាំង)
លោក ថាច់ សេដ្ឋា អនុប្រធានគណបក្សភ្លើងទៀនថ្លែងនៅទីស្នាក់ការគណបក្សក្នុងរាជធានីភ្នំពេញកាលពីថ្ងៃទី៤ ខែមេសា ឆ្នាំ២០២២ មុនពេលលោកត្រូវបានចាប់ខ្លួនពីបទចេញមូលប្បទានប័តគ្មានសាច់ប្រាក់។ (ខេមបូចា/ ព្រីង សំរាំង)

សាលាឧទ្ធរណ៍ភ្នំពេញនៅព្រឹកថ្ងៃអង្គារ ទី២៧ ខែកុម្ភៈ បានសម្រេចតម្កល់សាលាក្រមលើ លោក ថាច់ សេដ្ឋា អនុប្រធានគណបក្សភ្លើងទៀន ពាក់ព័ន្ធនឹងបទចោទញុះញង់បង្កឱ្យមាន​ភាពវឹកវរដល់​សន្តិសុខសង្គម។

អ្នកនាំពាក្យសាលាឧទ្ធរណ៍ភ្នំពេញ លោក ឃុន លាងម៉េង ថ្លែងថា ប្រធានក្រុមប្រឹក្សា​ជំនុំ​ជម្រះ លោក ស៊ិន វិសាល បានសម្រេចតម្កល់សាលក្រមសាសាដំបូងរាជធានីភ្នំពេញ​លើ​សំណុំ​រឿង លោក ថាច់ សេដ្ឋា ក្រោមបទចោទ «ញុះញង់ឱ្យមានភាពវឹកវរធ្ងន់ធ្ងរដល់​សន្តិសុខ​សង្គម នឹងញុះញង់ឱ្យមានភាពរើសអើង» តាមបញ្ញត្តិ តាមមាត្រា៤៩៤ ៤៩៥ និង៤៩៦។

លោក លាងម៉េង បញ្ជាក់ថា៖ «គាត់ (ចៅក្រម) បានសម្រេចតម្កល់»។ លោកបានបដិសេធ​មិន​បក​ស្រាយជុំវិញការសម្រេចនេះទេ។

កាលពីថ្ងៃទី១៨ ខែតុលា ឆ្នាំ២០២៣ សាលាដំបូងរាជធានីភ្នំពេញបានផ្តន្ទាទោស អនុប្រធានគណបក្សភ្លើងទៀន លោក ថាច់ សេដ្ឋា ដាក់ពន្ធនាគារ​រយៈ​ពេល​​៣ឆ្នាំ​ និងពិន័យជាប្រាក់៤លានរៀល ពីបទញុះញង់​​បង្ក​ឱ្យ​មានភាពវឹកវរក្នុងសង្គម ដែលបានប្រព្រឹត្តកាលពីខែមករា ឆ្នាំ២០២៣។ លោកត្រូវបានផ្តន្ទាទោសពីបទញុះញង់ឱ្យ​ប្រព្រឹត្ត​បទឧក្រិដ្ឋជាអាទិ៍ និងបទញុះញង់ឱ្យមានការរើសអើង តាមមាត្រា៤៩៤ ៤៩៥ និង៤៩៦។

បន្ទាប់ពីបញ្ចប់ការប្រកាសសាលដីកា មេធាវីការពារក្ដីឱ្យ លោក សេដ្ឋា គឺលោក ជូង ជូងី ថ្លែង​​ទៅ​កាន់អ្នកសារព័ត៌មានថា ការសម្រេចតម្ដល់សាលក្រមនេះ ជាការវិនិច្ឆ័យដោយ​អយុត្តិធម៌​ចំពោះកូនក្ដីរបស់លោក។

លោក ជូងី បានអះអាងទៀតថា សាលដីការបស់សាលាឧទ្ធរណ៍នេះជាការសម្រេចដោយ​មិន​មាន​ភស្តុតាងដើម្បីដាក់បន្ទុកបន្ថែមឡើយ គ្រាន់តែផ្អែកលើការសំអាងហេតុ​របស់តុលាការ​ជាន់​ទាបប៉ុណ្ណោះ។

បើតាមមេធាវីរូបនេះបន្តទៀតថា ក្នុងសវនាការ លោក ថាច់ សេដ្ឋា ក៏បានស្នើឱ្យ​សាលា​ឧទ្ធរណ៍​​ផ្ដល់យុត្តិធម៌​ដល់​លោក និងយកចិត្តទុកដាក់លើប្រវត្តិសាស្រ្តកម្ពុជាផងដែរ។

ចំពោះអង្គហេតុដែលបានកើតឡើង កាលពីដើមខែមករា ឆ្នាំ២០២៣ ទាំងមេធាវី និង​សាច់​ញាតិ​របស់លោក ថាច់ សេដ្ឋា ជឿថា អ្វីដែលលោក សេដ្ឋា លើកឡើងអំឡុង​ពេលជួប​អ្នក​គាំទ្រ​នៅប្រទេសកូរ៉េ និងជប៉ុន គ្រាន់តែជាការនិយាយអំពីប្រវត្តិសាស្រ្តកម្ពុជាប៉ុណ្ណោះ ដោយមិនបានជាប់ពាក់ព័ន្ធនឹងអំពើញុះញង់​​ឱ្យមានភាពវឹកវរក្នុងសង្គម​និងការរើសអើង​ឡើយ។

លោក ជូងី បញ្ជាក់ថា  នៅពេលនោះ លោក សេដ្ឋា បានលើកយករឿងរ៉ាវនៅកម្ពុជាពាក់​ព័ន្ធ​នឹង​ថ្ងៃ៧មករា ប្រវត្តិនៃការបង្កើតគណបក្ស [ប្រជាជនកម្ពុជា] និងសម្ដែងនូវការមិនពេញចិត្ត​ចំពោះការសង់ស្តូបដែលមានរូបមនុស្ស៣នាក់នៅទូទាំងប្រទេស។

លោកបន្ថែមថា៖ «ខ្ញុំយល់ឃើញថាអ្វីដែលគាត់និយាយគឺជារឿងប្រវត្តិសាស្រ្ត ជាប់ពាក់ព័ន្ធ​រឿងនយោបាយ ហើយមិនមែនជាបទល្មើសដូចការចោទប្រកាន់ទេ»។ 

ភរិយារបស់លោក ថាច់ សេដ្ឋា គឺអ្នក​ស្រី ថាច់ សុខ ​បូរ៉ានី​ មានប្រសាសន៍ថា តុលាការ​មិនបានស្ដាប់ហេតុផលប្ដីរបស់អ្នកស្រីដែលបានលើកឡើងក្នុងសវនាការនោះទេ។

អ្នកស្រីនិយាយថា៖ «គាត់ថាមិនបានញុះញង់ មិនបានឱ្យខ្មែរឈ្លោះគ្នា គាត់និយាយ​ប្រវត្តិសាស្រ្ត​ប្រទេសជាតិ»។

ដោយសារមិនពេញចិត្តចំពោះសាលដីការបស់សាលាឧទ្ធរណ៍ អ្នកស្រី បូរ៉ានី ថា នឹងដាក់ពាក្យបណ្ដឹងសាទុក្ខទៅតុលាការកំពូលនាពេលខាងមុខ។ 

ក្នុងនាមជាភរិយាមួយរូប អ្នកស្រី បូរ៉ានី ឱ្យដឹងថា​ សព្វថ្ងៃអ្នកស្រីបារម្ភអំពីសុខភាពរបស់ លោក ថាច់ សេដ្ឋា ដោយសារលោកបានខកខានក្នុងការពិនិត្យសុខភាពរៀងរាល់៣ខែម្ដង ពាក់ព័ន្ធនឹងជំងឺបេះដូង អំឡុងពេលលោកជាប់ពន្ធនាគារជាង១ឆ្នាំមកនេះ។

ទន្ទឹមនេះ អ្នកស្រីបន្ថែមថា កូនៗរបស់គាត់ក៏កំពុងបាក់ទឹកចិត្តក្នុងការរៀនសូត្រ ដោយ​រៀន​ធ្លាក់​ចំណាត់ថ្នាក់ពីលេខ១ទៅលេខជិត១០វិញ។

នៅឯសាលាតុលាការជាន់ទាប លោកស្រីចៅក្រម​ ឈុន ដាវី លើកទ្បើងថា​ លោក ថាច់​​ សេដ្ឋា បានប្រព្រឹត្តបទញុះញង់​​បង្ក​ឱ្យ​មានភាពវឹកវរក្នុងសង្គម នៅថ្ងៃទី​១៣ ខែមករា ឆ្នាំ​២០២៣​ តាមរយៈបង្ហោះសារ​វីដេអូលើ​បណ្តាញ​​សង្គមយូធូប [YouTube] រិះគន់ក្នុង​ការ​ប្រារព​ខួប៤៤ឆ្នាំថ្ងៃ៧មករារបស់គណបក្ស​ប្រជាជនកម្ពុជា។

កាលពីជំនុំជម្រះថ្ងៃទី២១ ខែកញ្ញា ឆ្នាំ២០២៣ នោះដែរ  លោក សេង ហៀង តំណាងអយ្យការ ថ្លែងថា ការចោទប្រកាន់​នេះព្រោះលោក ថាច់ សេដ្ឋា បានថ្លែងមុនថ្ងៃបោះឆ្នោតថ្នាក់ជាតិ ដែល​ចោទថាលោក​បាន​ចេញសារនយោបាយ និង​ចង់​វាយ​ប្រហារមកលើរាជរដ្ឋាភិបាល និងដើម្បីឱ្យប្រជាជន​មាន​ការខឹង​សម្បារ​ពេលដែល​នឹកដល់ប្រវត្តិសាស្រ្តខ្មែរ និងវៀតណាម។

លោក អំ សំអាត​ នាយកទទួលបន្ទុកចាត់ការទូទៅ​ប្រចាំ​អង្គការ​សិទ្ធិមនុស្ស​លីកាដូ មាន​ប្រសាសន៍​ថា ប្រសិនបើជនជាប់ចោទមិនពេញចិត្តចំពោះសាលដីការបស់​សាលា​ឧទ្ធរណ៍ គេអាចដាក់ពាក្យ​បណ្ដឹងសាទុក្ខទៅតុលាការកំពូល។

លោកថ្លែងថា៖ «តែទោះជាយ៉ាងណាក៏ដោយ​យើងឃើញថានៅមានតុលាការ​កំពូលមួយ​ទៀត ដែលសម្រាប់ការប្ដឹងសាទុក្ខ របស់ជនដែលត្រូវចោទប្រសិនជាគាត់មិនសុខចិត្ត​នឹង​សាលដីកា​របស់សាលាឧទ្ធរណ៍»

614 views

ព័ត៌មានថ្មីៗ

អត្ថបទពេញនិយម