សមាគមសម្ព័ន្ធអ្នកសារព័ត៌មានកម្ពុជា

សាលាដំបូងរាជធានីភ្នំពេញបើកសវនាការសំណុំរឿងលោក សុន ឆ័យ ជុំវិញការរិះគន់ដំណើរការបោះឆ្នោតឃុំសង្កាត់

លោក សុន ឆ័យ អនុប្រធានគណបក្សភ្លើងទៀនមកដល់សាលាដំបូងរាជធានីភ្នំពេញកាលពីថ្ងៃព្រហស្បតិ៍ ដើម្បីចូលរួមសវនាការលើសំណុំរឿងបរិហាកេរ្តិ៍ដែលប្តឹងដោយគ.ជ.ប។ ខេមបូចា/ ព្រីង សំរាំង
លោក សុន ឆ័យ អនុប្រធានគណបក្សភ្លើងទៀនមកដល់សាលាដំបូងរាជធានីភ្នំពេញកាលពីថ្ងៃព្រហស្បតិ៍ ដើម្បីចូលរួមសវនាការលើសំណុំរឿងបរិហាកេរ្តិ៍ដែលប្តឹងដោយគ.ជ.ប។ ខេមបូចា/ ព្រីង សំរាំង

សាលាដំបូងរាជធានីភ្នំពេញ​កាលពីថ្ងៃព្រហស្បតិ៍​បាន​បើកសវនាការកាត់ក្តីលើសំណុំរឿង​របស់លោក សុន ឆ័យ អនុប្រធាន​គណបក្ស​ភ្លើងទៀន​ ដែលគណៈកម្មាធិការជាតិរៀបចំការបោះ​ឆ្នោត​បាន​ប្តឹងលោក​ពីបទបរិហាកេរ្តិ៍​ដោយ​សារតែ​លោករិះគន់​ការបោះឆ្នោត​ឃុំសង្កាត់កាលពីខែ​មិថុនា​។

តុលាការគ្រោងនឹងប្រកាសសាលក្រម​នៅថ្ងៃទី៧​ ខែតុលា​ ហើយក៏ជាពេលដែល​តុលាការនឹងបើកសវនាការបន្តលើសំណុំរឿងបរិហាកេរ្តិ៍ទី២​ដែល​ប្តឹងដោយ​គណបក្សប្រជាជនកម្ពុជា​ផងដែរ។

លោក ប្លង់ សុផល​ ព្រះរាជអាជ្ញារងសាលាដំបូងរាជធានីភ្នំពេញ​បាន​ស្នើឲ្យ​តុលាការផ្តន្ទាទោស​លោក សុន ឆ័យ តាម​មាត្រា៣០៥នៃក្រមព្រហ្មទណ្ឌ​។ ប្រសិនបើ​រកឃើញ​ពិរុទ្ធភាព​ លោកនឹងត្រូវ​ពិន័យ​រហូត​ដល់​២.៥០០​ដុល្លារ។ 

លោកមាន​ប្រសាសន៍ថា៖ «​យើង​យល់ឃើញថា លោក សុន ឆ័យ ពិតជាបាន​បរិហាកេរ្តិ៍​ដែល​ធ្វើឲ្យ​ប៉ះពាល់ដល់កិត្តិយស​របស់​គណៈក​ម្មាធិការជាតិរៀបចំការបោះឆ្នោត​ ហើយអ្វីដែល​លោកអះអាងគឺជាការបំភ្លៃការពិត និងគ្មានមូលដ្ឋាន»។

បន្ទាប់ការបោះឆ្នោត​ឃុំសង្កាត់កាលពីថ្ងៃទី​៥ ខែមិថុនា​ លោក សុន ឆ័យ បានប្រាប់​បណ្តាញព័ត៌មានថា មាន​ភាពមិនប្រក្រតី និងការលួច​សន្លឹកឆ្នោត​។ គ.ជ.ប បានដាក់ពាក្យបណ្តឹង​ដោយ​អះអាងថា លោក សុន ឆ័យ បានបរិហាកេរ្តិ៍​ស្ថាប័ន​រៀបចំការបោះឆ្នោត​ ខណៈពេល​គណបក្ស​ប្រជាជន​កម្ពុជា​បាន​ដាក់ពាក្យបណ្តឹងបរិហាកេរ្តិ៍​របស់ខ្លួន​ ដោយ​ទាមទារជំងឺចិត្ត​១លាន​ដុល្លារ​ដោយសារតែការអះអាងរបស់លោកសុន ឆ័យ ថា គ.ជ.ប​ មាន​ភាពលម្អៀង​មក​គណបក្ស​កាន់អំណាច។  

ខណៈពេល​ គ.ជ.ប មិន​បាន​ទាមទារសំណង​ជំងឺចិត្ត​ លោក យិច សមិទ្ធី មេធាវី​របស់​គ.ជ.ប បានស្នើឲ្យតុលាការ​ពិន័យ​លោក​ សុន ឆ័យ​ ជាប្រាក់​ក្នុងចំនួនអតិបរមា​ដែលមាន​ចែងក្នុង​មាត្រា​៣០៥ និង​ស្នើឲ្យ​លោក​ សុន ឆ័យ ធ្វើការសូមទោស​ជា​សាធារណៈ។

លោក សុន ឆ័យ និង​មេធាវីការពារក្តីលោក​ ជូង ជូងី​ បានបដិសេធ​ថា គ្មាន​ការបរិហាកេរ្តិ៍ណាមួយទេ ដោយ​​អះអាងថា សំណុំរឿងនេះគឺជា​រឿងនយោបាយ​។

លោក សុន ឆ័យ ថ្លែងថា៖ «​ខ្ញុំ​នៅ​តែ​ជឿថា ខ្ញុំគ្មាន​កំហុស។ ខ្ញុំគ្រាន់តែ​ [លើកឡើង] ដើម្បី​លើកកម្ពស់​លទ្ធិប្រជាធិបតេយ្យ​សេរីពហុបក្ស​។ ខ្ញុំ​មិនអាចរារាំងការចោទប្រកាន់មកលើរូបខ្ញុំបានទេ ប៉ុន្តែ​ការកាត់ក្តីដោយយុត្តិធម៌​នឹងបង្កើន​ទំនុកចិត្ត​លើស្ថាប័ន​មួយនេះ»។

លោក សុន ឆ័យ កត់សម្គាល់ថា គណបក្ស​របស់​លោក​បាន​ដាក់ពាក្យបណ្តឹង​អំពីភាពមិនប្រក្រតី​ដោយ​ផ្ទាល់ទៅ​គ.ជ.ប ប៉ុន្តែ​គ.ជ.ប មិនបានឆ្លើយ​តបឬស៊ើបអង្កេតទេ បែរជា​ប្តឹង​លោក​ពីបទបរិហាកេរ្តិ៍ទៅវិញ។ 

លោកបន្ត​ថា៖ «​យើង​គ្រាន់តែ​លើក​ពីបញ្ហា​នេះ។ យើង​ចង់​ឲ្យ​ការបោះឆ្នោត​លើកក្រោយ​ល្អប្រសើរ​ជាងនេះ។ យើង​គ្មាន​បំណង​បង្ខូច​មុខមាត់​របស់​គ.ជ.ប​ទាល់តែសោះ ហើយយើងយល់ថា គ.ជ.ប នៅ​មាន​ចំណុច​ដែល​ត្រូវ​កែលម្អ​»។ 

មេធាវីការពារ ជូង ជូងី​ បាន​មាន​ប្រសាសន៍ថា ប្រាកដណាស់ រឿងក្តីនេះគឺជា​រឿងនយោបាយ​ ហើយ​មិន​គួរ​យកមក​កាត់ក្តីនៅតុលាការនោះទេ។

លោក ជូងី បានបញ្ជាក់ថា៖ «អ្វីដែល​លោក សុន ឆ័យ លើកឡើងនៅក្នុងបទសម្ភាស​ជាមួយ​ ឌឹ ខេមបូឌា ដេលី មិន​ប៉ះពាល់​កិត្តិយស​របស់ គ.ជ.ប ទេ ដោយ​សារតែលោក​មិន​បាន​និយាយពីឈ្មោះគ.ជ.ប។ វាគឺជា​សម្តីរបស់អ្នក​នយោបាយ​ ដើម្បីតស៊ូមតិ​កែលម្អស្ថាប័ននេះ»។

លោក សុន ឆ័យ អនុប្រធានគណបក្ស​ភ្លើងទៀន​ស្វាគមន៍អ្នក​គាំទ្រ​របស់លោក​ ខណៈលោកមកដល់សាលាដំបូងរាជធានី​ភ្នំពេញ​កាលពីថ្ងៃព្រហស្បតិ៍​ ដើម្បី​ចូលរួម​សវនាការលើបណ្តឹងបរិហាកេរ្តិ៍របស់គ.ជ.ប។ ខេមបូចា/ ព្រីង សំរាំង

លោក សោម សូរីដា អគ្គលេខាធិការរងគ.ជ.ប បាន​មានប្រសាសន៍​ថា បណ្តឹងមួយចំនួន​ដែល​គណបក្ស​ភ្លើងទៀន​បាន​ប្តឹង​ធ្វើ​ឡើង​ក្រោយ​ពេល​កំណត់​ដែល​មិន​អាចឲ្យ​គ.ជ.ប យកមកដោះស្រាយ​ឬស៊ើបអង្កេតបាន។ 

លោក សូរីដា បន្ត​ថា យោងតាមមាត្រា​៣០​នៃច្បាប់បោះឆ្នោត​ គណបក្ស​នយោ​បាយ​​អាចដាក់ពាក្យបណ្តឹង​ពាក់ព័ន្ធនឹងភាពមិនប្រក្រតី​នៅថ្ងៃបោះឆ្នោត និង​ត្រឹម​ម៉ោង​១១កន្លះ​នៃថ្ងៃបន្ទាប់ពី​ថ្ងៃបោះ​ឆ្នោត​។

លោក​ថ្លែងថា៖ «បណ្តឹងមួយចំនួន​ហួសពេលកំណត់​ ដូច្នេះ​គ្មាន​ភស្តុតាងគួរឲ្យ​ជឿជាក់ដែលបង្ហាញពីភាពមិនប្រក្រតីនោះទេ​»។ ទោះបីជាយ៉ាងណា​លោក​ទទួល​ស្គាល់ថា មាន​ភាពមិនប្រក្រតីខ្លះ​នៅក្នុង​ទម្រង់​១១០២ ដោយ​សារតែ​ការ​ប្រើប្រាស់​មន្ត្រី​ជាប់កិច្ច​សន្យា​រយៈ​ពេល​ខ្លី​។

នៅក្នុង​ការ​បោះឆ្នោត​ឃុំសង្កាត់​ គណបក្សប្រជាជនកម្ពុជា​ទទួល​បាន​អាសនៈមេឃុំ​​១.៦៤៨នៅក្នុងចំណោម​អាសនៈឃុំសង្កាត់១.៦៥២នៅទូទាំង​ប្រទេស​ ចំណែក​គណបក្ស​ភ្លើងទៀន​ទទួល​បាន​៤អាសនៈ។ គណបក្ស​កាន់អំណាច​ទទួល​បាន​៧៤,៣ភាគរយ​ឬស្មើ​នឹង​៩.៣៧៦​នៅក្នុងចំណោម​អាសនៈក្រុម​ប្រឹក្សាឃុំសង្កាត់​១១.៦២២។

បន្ទាប់ពី​ការ​បោះឆ្នោត​ក្រុមប្រឹក្សាឃុំសង្កាត់​ ស្ថាប័នស៊ើបអង្កេត​ការ​បោះ​ឆ្នោត​ចំនួន​៥​បាន​ចេញ​របាយ​ការណ៍​ស្តីពីភាពមិនប្រក្រតី​រួម​ទាំង​វត្តមាន​កម្លាំងប្រដាប់អាវុធ​នៅតាម​មណ្ឌលបោះឆ្នោត។

អង្គការ​ខុមហ្វ្រេល​បាន​ចេញរបាយ​ការណ៍​មួយ​កាល​ពីថ្ងៃអង្គារ ​ដោយ​គូសបញ្ជាក់​ពី​ភាពមិន​ប្រក្រតីមួយចំនួន​អំឡុង​ពេល​បោះឆ្នោត​ឃុំសង្កាត់។

អង្គការ​ខុម​ហ្វ្រេល​រកឃើញ​ថា មន្ត្រី​មួយ​ចំនួន​របស់គណៈកម្មការឃុំសង្កាត់រៀបចំការបោះ​ឆ្នោត និង​គណៈកម្មការរាប់សន្លឹកឆ្នោត​គឺជា​សកម្មជន​របស់​គណបក្ស​ប្រជាជន​កម្ពុជា។

អង្គការ​ខុម​ហ្វ្រេល​ក៏រកឃើញ​ផងដែរ​ថា ភាពមិនប្រក្រតី​មួយចំនួន​ពាក់ព័ន្ធនឹង​មន្ត្រីដែល​ត្រូវ​បាន​ជ្រើសរើស​ថ្មី​ដែល​មាន​ទំនាក់ទំនងជិតស្និទ្ធជាមួយ​គ្នា​ដូចជា​ឪពុកក្មេក ​និង​កូន​ប្រសា​រដែល​ធ្វើ​ការ​នៅ​ក្នុង​ការិយាល័យតែមួយ។

របាយការណ៍នេះក៏រកឃើញផងដែរនូវភាពមិនប្រក្រតីនៅក្នុងទម្រង់​១១០២​ ដោយ​គូសបញ្ជាក់ថា​ទម្រង់ដែល​គ.ជ.ប បាន​បង្ហាញ​ខុសពី​ទម្រង់​ដែលបាន​ព្រីន​ជាក់ស្តែង​ជាច្រើនករណី​ដូចជាការបាត់ទិន្នន័យ​ និងការលុបលើតួលេខជាដើម។​

លោក កន សាវាង្ស អ្នក​សម្របសម្រួល​ផ្នែកតស៊ូមតិ និងអង្កេតនៅអង្គការខុមហ្វ្រេល​បាន​ឲ្យ​ដឹងថា ប្រព័ន្ធតុលាការមិនគួរ​ត្រូវបាន​ប្រើប្រាស់​ ដើម្បី​វិនិច្ឆ័យលើបញ្ហា​បោះឆ្នោតទេ។

លោក​ថ្លែងថា៖ «​ខ្ញុំ​មិន​ដែល​ឃើញអាជ្ញាកណ្តាល​ប្តឹង​អ្នក​ចូលរួម​ប្រកួត​ទេនៅក្នុង​ពិភព​លោក។ ការប្រើប្រាស់តុលាការ​នៅក្នុង​នីតិវិធីបោះឆ្នោត​គឺមិន​ស្របនឹងគោលការ​ណ៍​នៃច្បាប់បោះឆ្នោតនោះទេ ខណៈពេលដែលគ.ជ.បគឺជា​ស្ថាប័ន​រដ្ឋ​»

ប្រែសម្រួលពីអត្ថបទភាសាអង់គ្លេស៖ Phnom Penh Court Begins Trial of Son Chhay Over Commune Election Criticisms

135 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម