សមាគមសម្ព័ន្ធអ្នកសារព័ត៌មានកម្ពុជា

សាលាដំបូងរាជធានីភ្នំពេញសាកសួរលោក ទាវ វណ្ណុល ប្រធានគណបក្សភ្លើងទៀន

លោក ទាវ វណ្ណុល ប្រធានគណបក្សភ្លើងទៀនចូលមកបំភ្លឺនៅសាលាដំបូងរាជធានីភ្នំពេញ នៅថ្ងៃទី២៥ ខែមេសា ឆ្នាំ២០២៤។ (ខេមបូចា/ ព្រីង សំរាំង)
លោក ទាវ វណ្ណុល ប្រធានគណបក្សភ្លើងទៀនចូលមកបំភ្លឺនៅសាលាដំបូងរាជធានីភ្នំពេញ នៅថ្ងៃទី២៥ ខែមេសា ឆ្នាំ២០២៤។ (ខេមបូចា/ ព្រីង សំរាំង)

សាលាដំបូងរាជធានីភ្នំពេញបានសាកសួរលោក ទាវ វណ្ណុល​ ប្រធានគណបក្សភ្លើងទៀន ជុំវិញ​​ការអត្ថាធិប្បាយរបស់លោកជាមួយ​បណ្តាញសារព័ត៌មានបរ​ទេស​មួយថា លទ្ធិ​ប្រជាធិបតេយ្យ​នៅកម្ពុជាកំពុងដើរថយក្រោយ​ក្រោមការដឹកនាំ​របស់​លោកនាយករដ្ឋមន្ត្រី ហ៊ុន ម៉ាណែត ដោយ​មាន​ការធ្វើទុក្ខបុកម្នេញលើមន្ត្រីនយោបាយ។

មេធាវី​រដ្ឋាភិបាល​បាន​ដាក់​ពាក្យ​បណ្ដឹង​កាល​ពី​ថ្ងៃ​ទី​១៤ ខែ​កុម្ភៈ ឆ្នាំ​២០២៤ ដោយ​​ចោទ​លោក ទាវ វណ្ណុល បានផ្តល់បទសម្ពាសន៍ដល់សារព័ត៌មាន Nikkei Asia របស់ជប៉ុន និង​វិទ្យុបារាំង​អន្តរជាតិ RFI ថា ​ធ្វើ​ឲ្យ​ប៉ះពាល់ដល់កិត្តិយសប្រមុខរាជរដ្ឋាភិបាល និង​រាជរដ្ឋាភិបាល​កម្ពុជា។ លោក ទាវ វណ្ណុ​ល ត្រូវ​បាន​អនុញ្ញាត​ឱ្យ​ត្រឡប់​ទៅ​ផ្ទះ​វិញ ​បន្ទាប់​ពី​ត្រូវ​បាន​សាក​សួរ​កាល​ពី​ថ្ងៃ​ព្រហស្បតិ៍។

​អំឡុង​ពេល​សាកសួរ​​រយៈពេល​បី​ម៉ោង ព្រះរាជអាជ្ញា​រង​ ប្លង់​ សុផល បាន​សាក​សួរ​លោក វណ្ណុល ជុំវិញ​បទសម្ភាសន៍​របស់​លោក​ជាមួយ​នឹងសារព័ត៌មាន​ Nikkei Asia។ សេចក្តី​​រាយការណ៍​​ដែលត្រូវ​​បាន​ចុះ​ផ្សាយ​កាល​ពី​ខែ​កុម្ភៈបាន​ដក​ស្រង់​​សម្តីរបស់​​លោកដែល​​ថា លទ្ធិ​ប្រជាធិបតេយ្យ​នៅ​កម្ពុជា​បាន​ដើរ​ថយ​ក្រោយ​​ចាប់​តាំង​ពី​លោក ហ៊ុន ម៉ាណែត ចូល​កាន់​តំណែង​។ លោក​ក៏​បានលើ​ក​​ឡើង​ផង​ដែរដែល​តាម​ចោទ​​ថា រដ្ឋាភិបាល​​បាន​ដំឡើង​កាមេរ៉ា​សុវត្ថិភាព ​ដើម្បី​តាមដាន​សកម្មភាព​របស់​មេដឹកនាំ​គណបក្ស​ភ្លើង​ទៀន។

លោក ទាវ វណ្ណុល បាន​ប្រាប់​អ្នកសារព័ត៌មាន​ បន្ទាប់​ពី​លោក​ចេញ​ពី​តុលាការ​ថា៖ «ខ្ញុំ​និយាយ​ការពិត​នៅក្នុងសង្គមកម្ពុជា​របស់យើង។ ខ្ញុំសង្កេតឃើញ។ ជាមតិ​ផ្ទាល់​ខ្លួនរបស់ខ្ញុំថា តាំងពី​ឯកឧត្តម​ធិបតី​ ហ៊ុន ម៉ាណែត បាន​ឡើងមក​កាន់តួនាទីហ្នឹង [នាយករដ្ឋមន្ត្រី] […] ការរឹតត្បិត ការចាប់សកម្មជនគណបក្សប្រឆាំង និង​អ្នក​សម្តែង​មតិ….វាកាន់តែអាក្រក់ទៅ​»

លោកក៏បានលើកឡើងពីករណីរបស់​លោក នី ណាក់ អ្នករិះគន់រដ្ឋាភិបាលឥតសំចៃ​នៅក្នុងបទសម្ភាសន៍ជាមួយ​សារព័ត៌មាន​ Nikkei Asia ដែលលោកថា លោក នី ណាក់ «គ្រាន់តែអនុវត្តសិទ្ធិសេរីភាពនៃ​ការ​បញ្ចេញមតិរបស់​គាត់​ប៉ុណ្ណោះ»

លោក ទាវ វណ្ណុល មាន​ប្រសាសន៍​ថា៖ «ដំណើរលទ្ធិប្រជាធិបតេយ្យនៅក្នុង​ប្រទេស​កម្ពុជា​ក្រោយពីឯកឧត្តម​ធិបតី​ ហ៊ុន ម៉ាណែត ឡើង​មក​ហ្នឹង​ វាអត់មាន​ប្រសើរជាង​មុន​​ទេ។ វា​មាន​​តែ​អាក្រក់​ជាង​មុន​»

លោកបានបន្តថា៖ «ឧទាហរណ៍ គេចោទថា បាន​និយាយថា រាជរដ្ឋាភិបាលដាក់​កាមេរ៉ា ដើម្បី​ឃ្លាំ​​មើល​​​សកម្មភាពរបស់ថ្នាក់​ដឹកនាំគណបក្ស​ភ្លើងទៀន​ ខ្ញុំថា ខ្ញុំមិន​និយាយថា រាជរដ្ឋាភិបាល​​នោះទេ ខ្ញុំ​ថា ​អាជ្ញាធរ​មាន​សមត្ថកិច្ច​​ដាក់​​កាមេរ៉ា​ ដើម្បី​ឃ្លាំមើល​​សកម្ម​ភាព​​ថ្នាក់​ដឹកនាំ​គណបក្ស​ភ្លើងទៀន»

លោក វ​ណ្ណុល មាន​ប្រសាសន៍ថា៖ «តុលាការ​មាន​សិទ្ធិ​កោះហៅ​ខ្ញុំ​មក​សាកសួរ​ថា​ពិត​ឬ​អត់។ សម្រាប់​ខ្ញុំ វា​មិន​បញ្ហា​​ទេ ហើយ​ខ្ញុំ​ក៏​មិន​បារម្ភ​​ដែរ»

លោក ប្លង់​ សុផល ព្រះរាជអាជ្ញារងអម​សាលាដំបូង​រាជធានីភ្នំពេញ​ បានប្រាប់ ខេមបូចា​តាម​រយៈ​បណ្តាញសង្គមតេឡេក្រាម​ថា ការសាកសួរត្រូវបានបញ្ចប់ ហើយនឹងអនុវត្ត​តាម​នីតិវិធី​បន្ទាប់។

លោក ប្លង់ សុផល ​បដិសេធ​មិន​ផ្តល់​ចម្លើយ​ជាក់លាក់​ទេ ​នៅ​ពេល​អ្នក​សារព័ត៌​មាន​​សួរ​ថា តើ​លោក ទាវ វណ្ណុល នឹង​ត្រូវបាន​​ចោទ​ប្រកាន់​ឬ​យ៉ាង​ណា។ លោកមាន​ប្រសាសន៍ថា៖ «ខ្ញុំ​គិត​ថា ប្រសិន​បើ​អ្នក​សារ​ព័ត៌មាន​អាន​ក្រម​នីតិវិធី​ព្រហ្មទណ្ឌ ប្រាកដណាស់ នឹង​អាច​ឆ្លើយ​សំណួរ​នេះបាន»

លោក ជូ​ង ជូងី មេធាវី​របស់​លោក ទាវ វណ្ណុល​ ​បាន​មាន​ប្រសាសន៍​ថា ​កូន​ក្តី​របស់​លោក​បាន​បញ្ចេញ​មតិ​ដោយ​ផ្អែក​លើ​ការ​ពិត ហើយ​បាន​ជំរុញ​ឲ្យ​តុលាការ​ទម្លាក់​ចោល​ការ​ចោទ​ប្រកាន់​នេះ។

លោកបញ្ជាក់ថា៖ «អ្វីដែលគាត់បានលើកឡើងជាសាធារណៈ និងចែករំ​លែក​ក្នុងបទ​សម្ភាសន៍ គឺជាការពិត។ វា​មិន​មានកំហុសទេ ទោះបីអ្វីដែលជាការពិតលើកទ្បើងនោះ​ប៉ះ​ពាល់​កិត្តិយសក៏ដោយ ផ្លូវច្បាប់លុះត្រា​តែ​អ្វី​ដែល​គាត់​លើក​ឡើង​មិន​ពិត ហើយ​ប៉ះ​ពាល់​កិតិ្តយសទើបមានកំហុស»

លោក អំ សំអាត នាយកប្រតិបត្តិនៃអង្គការសិទ្ធិមនុស្សលីកាដូបាន​អំពាវនាវឲ្យ​អ្នក​នយោបាយ​ខ្មែរមកតុចរចា ដើម្បីធានាដល់​ការអភិវឌ្ឍន៍ និងកំណែទម្រង់ឲ្យ​លទ្ធិ​ប្រជាធិបតេយ្យ និងសិទ្ធិមនុស្សល្អប្រសើរ​ជាង​មុន​។

លោក​មាន​ប្រសាសន៍​ថា៖​ «​ស្ថានភាព​សិទ្ធិ​មនុស្ស​បច្ចុប្បន្ន​ត្រូវ​បាន​រឹតត្បិត​នៅ​កម្ពុជា​។ ខ្ញុំគិត​ថា អ្នកនយោបាយទាំងអស់អាចនិយាយគ្នាអំពីបញ្ហាទាំងអស់នោះ គេ​មិន​គួរ [ចាត់​ទុក​ថា] ធ្វើឲ្យមានការរិះគន់ [ព្រោះវា] ពាក់ព័ន្ធនឹងសេរីភាពនៃលំហនយោ​បាយ»

លោកក៏បានក្រើនរំឭក​ដល់ការអំពាវនាវរបស់អ្នកជំនាញសិទ្ធិ​មនុស្សរបស់អង្គការ​សហ​ប្រជាជាតិ​ឲ្យ​​ប្រទេស​កម្ពុជាបញ្ចប់រាល់សកម្មភាព​យាយី​ និងការចោទ​ប្រកាន់​លើ​អ្នកការពារ​សិទ្ធិមនុស្ស សកម្មជនសង្គមស៊ីវិល និងអ្នកនយោបាយ​ដែលត្រូវបាន​អាជ្ញាធរ​កោះហៅ ឬចាប់​ខ្លួនដោយសារ​សកម្មភាពពាក់ព័ន្ធនឹងការ​ងារ​ជួយ​ពលរដ្ឋរបស់ពួកគេ។

លោក គី តិច មេធាវី​រដ្ឋាភិបាល​មិន​អាច​ទាក់ទង​សុំ​ការ​អត្ថាធិប្បាយ​បាន​ទេ ខណៈ​លោក ប៉ែន បូណា ​អ្នក​នាំ​ពាក្យ​រដ្ឋាភិបាលបដិសេធ​មិន​ធ្វើ​អត្ថាធិប្បាយទេ៕

ប្រែសម្រួលពីអត្ថបទភាសាអង់គ្លេស៖ Phnom Penh Court Questions Candlelight Party President Teav Vannol

894 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម