សមាគមសម្ព័ន្ធអ្នកសារព័ត៌មានកម្ពុជា

សកម្មជនកម្ពុជាប្រារព្ធ​ខួប​៣ឆ្នាំនៃការបាត់ខ្លួនសកម្មជនថៃនៅទីក្រុងភ្នំពេញ

សកម្មជនកម្ពុជាដើរពីខុនដូ Mekong Gardens ដល់ស្ពានជ្រោយចង្វារ។ តាមផ្លូវពួកគេបានបញ្ចេញមតិអំពីការបាត់ខ្លួនសកម្មជនថៃ វ៉ាន់ឆាឡឺម និងទទូចឱ្យរដ្ឋាភិបាលចាត់វិធានការលើករណីរបស់គាត់ នៅថ្ងៃទី៤ ខែមិថុនា ឆ្នាំ២០២៣។ (ខេមបូចា/ សុវណ្ណ ស្រីពេជ្រ)
សកម្មជនកម្ពុជាដើរពីខុនដូ Mekong Gardens ដល់ស្ពានជ្រោយចង្វារ។ តាមផ្លូវពួកគេបានបញ្ចេញមតិអំពីការបាត់ខ្លួនសកម្មជនថៃ វ៉ាន់ឆាឡឺម និងទទូចឱ្យរដ្ឋាភិបាលចាត់វិធានការលើករណីរបស់គាត់ នៅថ្ងៃទី៤ ខែមិថុនា ឆ្នាំ២០២៣។ (ខេមបូចា/ សុវណ្ណ ស្រីពេជ្រ)

សកម្មជនកម្ពុជាបានទាម​ទារ​ឱ្យរដ្ឋាភិបាលទទួល​ខុស​ត្រូវ​​ អំឡុង​ពេល​រៀប​ចំ​ពិធី​រម្លឹកខួ​ប​កាលពីថ្ងៃអាទិត្យនៃការបាត់ខ្លួនរបស់សកម្មជនថៃ វ៉ាន់ឆាឡឺម សាត់ស័ក្តិសិទ្ធ​ ដែលតាម​ចោទ​ថា ត្រូវបានគេ​ចាប់ពង្រត់នៅរាជ​ធានី​ភ្នំពេញកាល​ពី​ឆ្នាំ២០២០។

សកម្មជន និងនិស្សិតវ័យក្មេង​ប្រមាណ២០នាក់ បានឈរ​តម្រង់ជួរនៅលើ​ដងផ្លូវខាង​​ក្រៅអគារខុនដូ​ Mekong Gardens នៅ​ខណ្ឌជ្រោយចង្វារ រាជធានីភ្នំពេញ ទី​ដែល​លោក វ៉ាន់ឆាឡឺម ត្រូវបានគេឃើញជា​លើ​ក​ចុងក្រោយកាលពីថ្ងៃទី៤ ខែមិថុនា ឆ្នាំ២០២០។ ពួក​គេ​បាន​កាន់​រូប​​លោក វ៉ាន់ឆាឡឹម នៅ​ពី​មុខ​​ពួក​គេ ដោយ​មាន​​បូខ្មៅស​​​នៅ​ជាប់​នឹង​អាវ​របស់​ពួក​គេ។ ព្រះសង្ឃ​៤​អង្គ​បាន​សូត្រធម៌ ដោយ​គោរព​ដល់​​អំពើ​ល្អ​របស់​សកម្មជន​ដែល​បាត់​ខ្លួន​​។

សកម្មជនកម្ពុជាអាយុ២០ឆ្នាំឈ្មោះ មាន​ លីហ្សា ដែលជាអ្នករៀបចំ​ម្នាក់​​ក្នុង​ចំ​ណោម​អ្នក​រៀប​ចំ​ពិធី​រម្លឹកខួប​បាននិយាយថា វាជារឿងសំខាន់ក្នុងការរឭកដល់លោក វ៉ាន់ឆាឡឺម និងទាម​ទារ​ឱ្យ​រដ្ឋាភិបាលទទួល​ខុស​ត្រូវ​។

មាន​ លីហ្សា បានរងការរិះគន់​ខ្លះពីយុវជនកម្ពុជាដូចគ្នា​ ដែលសួរថា ហេតុអ្វីបានជា​ផ្តោតការ​យក​ចិត្ត​ទុក​ដាក់​ទៅលើសកម្មជនថៃ ប៉ុន្តែនាងគិតថា វាជា​រឿង​សំខាន់​ក្នុងការតស៊ូ ដើម្បី​សិទ្ធិមនុស្ស​របស់ប្រជាជនទាំងអស់ មិនថា ពួកគេមាន​សញ្ជាតិអ្វីនោះទេ​ និងដើម្បីកសាង​បណ្តាញសកម្មជននៅទូទាំងតំបន់។

លីហ្សា បាន​និយាយថា៖ «រវាងប្រទេសថៃ និងកម្ពុជា យើងមានប្រវត្តិជូរចត់ជា​មួយ​គ្នា។ ប្រជាជន និង​យុវជន​នៅ​ក្នុង​ប្រទេស​កម្ពុជា​នៅ​តែ​មាន​អារម្មណ៍​ថា ​មិន​ភ្លេច​រឿងនេះ​​ទេ។ ខ្ញុំ​ព្យាយាម​ផ្តោត​លើ​បច្ចុប្បន្ន និង​អនាគត​ឱ្យបាន​ច្រើន​ជាង​ ជា​អ្វី​​ដែល​យើង​អាច​កសាង​សាមគ្គីភាព»

ប៉ុន្តែនៅពេលនិយាយដល់​អ្វីដែល លីហ្សា សង្ឃឹមថា នឹងទទួល​បាន​តាម​រយៈ​ពីពិធី​រម្លឹក​ខួប​នេះ​ លីហ្សា មិនរំពឹងថា នឹងមានចំណាត់ការច្រើនពីរដ្ឋាភិបាលនោះទេ​។

លីហ្សា បានឱ្យដឹង​ថា៖ «យើង​ពិត​ជា​មិន​រំពឹង​ថា​ រដ្ឋាភិបាល​នឹង​ចាត់​វិធានការ​ ឬ​សូម្បី​តែ​ស្ថានទូត​ថៃ​។ ​ប៉ុន្តែ​យើង​គ្រាន់​តែ​ចង់​ដាស់ស្មារតី បង្ហាញ​រូបភាព​ជា​សាធារណៈ​ ដើម្បី​ [បង្ហាញ​] ប្រជាជន​នូវ​អ្វី​ដែល​រដ្ឋាភិបាល​កំពុង​ធ្វើ។ មាន​រឿង​អយុត្តិធម៌​ជា​ច្រើន ​ដែល​កើត​ឡើង​នៅ​កម្ពុជា»

សកម្មជនកម្ពុជា​ប្រមាណ២០នាក់ រម្លឹកដល់ឈ្មោះ​ លោក វ៉ាន់ ឆាឡឺម សកម្មជនថៃដែលត្រូវបានចាប់ពង្រត់​កាល​ពី​ឆ្នាំ២០២០ នៅភ្នំពេញថ្ងៃទី៤ ខែមិថុនា ឆ្នាំ២០២៣។ (ខេមបូចា/ សុវណ្ណ ស្រីពេជ្រ)
ខុនដូ Mekong Gardens ក្នុងខណ្ឌជ្រោយចង្វារ រាជធានីភ្នំពេញ អំឡុង​ពិធីរម្លឹកខួបលើកទី៣ នៃការបាត់ខ្លួនរបស់លោក វ៉ាន់​ឆាឡឺម សាត់ស័ក្តិសិទ្ធ នៅថ្ងៃទី៤ ខែមិថុនា ឆ្នាំ២០២៣។ (ខេមបូចា/ សុវណ្ណ ស្រីពេជ្រ)

វ៉ាន់ឆាឡឺម គឺជាសកម្មជនគាំទ្រលទ្ធិប្រជាធិបតេយ្យ ដែលក៏​ផ្តោតការយក​ចិត្ត​ទុក​​ដាក់​លើសិទ្ធិអ្នកស្រឡាញ់ភេទដូចគ្នា និងមេរោគអេដស៍នៅក្នុងប្រទេសថៃផង​ដែរ​។ លោក​បាន​ប្រើ​ពាក្យ​ភាព​កំប្លុកកំប្លែង ​ដើម្បី​ចំអក​ឱ្យ​មន្ត្រី​នៃ​របប​យោធា​ថៃ​តាម​ប្រព័ន្ធ​អ៊ីនធឺណិត និង​បានបង្កើត​​ក្រុម​អ្នក​គាំទ្រ​​តាម​រយៈ​ទំព័រ​ហ្វេសប៊ុក​បែប​រិះគន់​នេះ​។

កាល​ពី​ឆ្នាំ២០១៤ រដ្ឋប្រហារយោធាបានផ្តួលរំលំរដ្ឋាភិបាលគណបក្សភឿថៃពីអំណាច​។ នៅ​ពេលនោះ លោក វ៉ាន់ឆាឡឹម មានទំនាក់ទំនងជាមួយគណបក្សភឿថៃ និងចលនា​អាវ​ក្រហម​។ លោក​ត្រូវបានគេកោះហៅឱ្យទៅចូលរួមកិច្ចប្រជុំនៅ​ឯជំរុំយោធាមួយ បន្ទាប់​ពី​រដ្ឋប្រហារ ហើយបានសម្រេចចិត្តភៀសខ្លួនមកប្រ​ទេសកម្ពុជា ជាកន្លែងដែលលោក​រស់នៅ​រហូត​ដល់​ពេល​​លោក​បាត់ខ្លួន។

សាក្សីនិយាយថា ពួកគេបានឃើញបុរសប្រដាប់អាវុធបង្ខំ វ៉ាន់ឆាឡឺម ចូលទៅក្នុង​រថយន្ត​កាល​ពីថ្ងៃទី៤ ខែមិថុនា ឆ្នាំ២០២០ ហើយខ្សែអាត់​វីដេអូដែលត្រូវបានចេញ​ផ្សាយ​ដោយសារ​ព័ត៌មានថៃ Prachatai បានបង្ហាញរថយន្តដដែល​នេះ​បើកចេញពីខុនដូ​ Mekong Gardens ។ នេះ​គឺ​ជាការ​ចាប់ពង្រត់ ឬ​សម្លាប់​សកម្មជន​ថៃ​និរទេស​ខ្លួន​លើក​ទី​ប្រាំបួន​ចាប់តាំងពី​ឆ្នាំ២០១៦​មក​ នេះបើយោងតាម​អង្គការលើក​លែង​ទោស​អន្តរជាតិ​។

អ្នកនាំពាក្យក្រសួងមហាផ្ទៃ ក្រសួងយុត្តិធម៌ និងអគ្គស្នងការនគរបាលជាតិ មិនបានឆ្លើយតប​សំណើសុំការអត្ថាធិប្បាយរបស់ខេមបូចា ជុំវិញ​ដំណើរ​ការ​ នៃការស៊ើប​អង្កេតនេះទេ គិតត្រឹម​ល្ងាចថ្ងៃអាទិត្យនេះ។

ក្នុងបទសម្ភាសន៍ជាមួយវិទ្យុបារាំងអន្តរជាតិ កាលពីខែមេសា ឆ្នាំ២០២២ លោក ខៀវ សុភ័គ អ្នកនាំពាក្យក្រសួងមហាផ្ទៃកម្ពុជា មានប្រសាសន៍ថា កម្ពុជាបានធ្វើការ​សហការជាមួយ​ស្ថានទូត​ថៃ និងអាជ្ញាធរថៃ ប៉ុន្តែមិនបានទទួលជោគជ័យក្នុង​ការស្វែងរក​ វ៉ានឆាឡឺម នោះ​ទេ។

លោក ខៀវ សុភ័គ បាន​ប្រាប់​វិទ្យុ​បារាំង​អន្តរជាតិថា៖ «តស៊ូ​ដល់​ស្លាប់ យើង​នៅ​តែ​រក​មិន​ឃើញ។ យើង​ក៏​ចង់​បាន​ការ​សរសើរ​ដែរ មិន​មែន​ការ​ចំអក​ទេ។​ អ្នក​ខ្លះ​បាន​ត្អូញត្អែរ​ថា [ការ​ស៊ើប​អង្កេត] មាន​ហេតុផល​នយោបាយ។ បើទោះជានាយកអង្គការមានភ្នែក១០០ ហើយ​បន្ថែម​ភ្នែក១០០ ឬ១០០០ ទៀតក៏ដោយ ក៏គាត់នៅតែរកមិនឃើញ [វ៉ាន់ឆាឡឹម] ដែរ»

កាលពីខែកក្កដា លោក សុភ័គ បានប្រាប់ VOD ថា៖ «គ្មាន​តម្រុយ​ថ្មីទេ»​ក្នុងការស៊ើបអង្កេត​ការ​បាត់ខ្លួនរបស់ វ៉ាន់ឆាឡឺម ហើយនគរបាល​មូលដ្ឋានបាន «បាន​បាត់​ដាន​ហើយ»

ក្រុម​អង្គការ​សិទ្ធិ​មនុស្ស​បាន​រិះគន់​រដ្ឋាភិបាល​កម្ពុជា និងរដ្ឋាភិបាល​​ថៃ ដែល​មិន​បាន​ធ្វើ​ការ​ស៊ើប​​អង្កេត​ឱ្យ​បាន​ត្រឹម​ត្រូវ​លើ​ការ​បាត់​ខ្លួន​នេះ។

ការ​ប្រមូល​ផ្តុំ​​ស្រដៀង​គ្នា​នេះ​បាន​ធ្វើ​ឡើង​ក្នុង​ប្រទេស​ថៃ​កាល​ពី​ថ្ងៃ​អាទិត្យ​ ដើម្បី​រំឭក​​ដល់​សកម្មជន​រូប​នេះ។ ប៉ុន្តែ​គ្រួសារ​របស់ វ៉ាន់ឆាឡឺម បាន​សម្រេច​ចិត្ត​មិន​រៀប​ចំពិធី​​រម្លឹក​ឡើយ នេះ​បើ​តាម​បង​​ស្រី​របស់​គាត់ឈ្មោះ​ ស៊ីថានុន សាត់ស័ក្តិសិទ្ធ។

អ្នកស្រី​បាន​និយាយ​ថា៖​ «បរិយាកាស​ឆ្នាំ​នេះ​មិន​បាន​ផល​ច្រើន​នោះ​ទេ​ ប្រសិនបើ​ខ្ញុំ​រៀបចំ​អ្វី​មួយ​នោះ​​។ ប្រសិនបើ​ខ្ញុំ​សម្រេចចិត្ត​រៀបចំ​អ្វីមួយ ​ហើយ​វា​នឹង​មិន​មាន​ឥទ្ធិពល​ខ្លាំង​នោះ​ទេ ខ្ញុំ​មាន​អារម្មណ៍​ថា ​ពិធី​រម្លឹកឬការ​រឭកនោះ​នឹង​រងទុក្ខនិង​សោកសៅ»

អ្នក​ស្រី ស៊ីថានុន ចងចាំយ៉ាងច្បាស់ពីការ ​ដែលប្អូន​ប្រុសរបស់អ្នក​ស្រី​បាននិយាយ​​ថា៖ «ខ្ញុំមិន​អាចដកដង្ហើម» នៅ​ពេល​និយាយទូរស័ព្ទជាមួយ​អ្នក​ស្រី​ដែល​តាម​ចោទថា ជា​ពេល​ដែលគាត់​ត្រូវបានគេចាប់ពង្រត់កាលពីបីឆ្នាំមុន។ អ្នក​ស្រី​បាននិយាយថា អ្នក​ស្រី​មានការខកចិត្ត​យ៉ាង​ខ្លាំង​ចំពោះប្រព័ន្ធយុត្តិធម៌ និងនគរបាល​នៅក្នុងប្រទេសកម្ពុជា ដោយសារតែមាន​ភស្តុតាង​ជាច្រើនដែលថា ប្អូន​​ប្រុសរបស់អ្នកស្រី​ត្រូវបានចាប់​ពង្រត់​នៅក្នុងប្រទេសនេះ​ ប៉ុន្តែអ្នក​ស្រី​មិនបានឮអំពីការរីកចម្រើននៅ​ក្នុង​ការស៊ើបអង្កេតនេះ​ទេ។

អ្នក​ស្រី​​ក៏​មាន​ការ​ព្រួយ​បារម្ភ​ពី​សុវត្ថិភាព​របស់​ប្រជាជន​កម្ពុជា​ ដែល​មាន​គម្រោង​និង​ចូលរួម​ក្នុង​ព្រឹត្តិការណ៍​នានា​នៅ​ភ្នំពេញផងដែរ។

អ្នកស្រី​បាន​និយាយថា៖ «ពេល​ខ្ញុំ​និយាយ​ចេញ ខ្ញុំ​ក៏​ត្រូវ​អាជ្ញាធរ​ថៃ​ចោទ​ប្រកាន់​ដែរ​។ ប៉ុន្តែ​នៅ​ប្រទេស​ថៃ ពេល​ខ្ញុំ​ត្រូវ​បាន​គេ​ចោទ​ប្រកាន់ យើង​មាន​មេធាវី​សិទ្ធិ​មនុស្ស យើង​មាន​ប្រព័ន្ធ​ផ្សព្វ​ផ្សាយ​ដើម្បី​ជួយ​ខ្ញុំ។ ប្រសិនបើមានអ្វីកើតឡើង [ចំពោះអ្នកតវ៉ាកម្ពុជា] ដែលស្រដៀង​នឹង​អ្វី​ដែល​បានកើតឡើងចំពោះខ្ញុំ ឬអាក្រក់ជាងនេះ តើមាន​អ្វី​ការពារអ្នក​ការពារ​សិទ្ធិ​មនុស្ស​នៅកម្ពុជា?»។​

អ្នក​ស្រី ស៊ីថានុន​ បានបង្ហាញខ្លួននៅមុខតុលាការក្រុងភ្នំពេញកាល​ពី​ខែធ្នូ ឆ្នាំ២០២០ ដើម្បី​ដាក់​ភស្តុតាងនៃការបាត់ខ្លួនប្អូនប្រុសរបស់អ្នក​ស្រី​ ដែល​ក្រោយ​មក​តុលាការ​បាន​ចោទប្រកាន់​លើបុគ្គលមិន​ស្គាល់អត្តសញ្ញាណ​ពី​បទ​ប្រើប្រាស់​អាវុធ​និងបង្ខាំងមនុស្ស​ដោយខុសច្បាប់​ក្នុង​សំណុំរឿងនេះ។ មិន​មាន​ការ​រីក​ចម្រើន​ក្នុង​សំណុំរឿង​នេះ​ចាប់​តាំង​ពី​ពេល​នោះ​មក។

កាល​ពី​ថ្ងៃ​អាទិត្យ មិន​មាន​​អន្តរាគមន៍​ពី​ប៉ូលិស​ទេ ខណៈ​ក្រុមសកម្មជន​​ដើរ​តាម​បណ្តោយ​ផ្លូវ​ជាតិ​លេខ​៦ ពី​ខុនដូ Mekong Garden ​ទៅ​​ស្ពាន​ជ្រោយចង្វា ដោយ​មាន​បដា និង​ស្លាក​​សរសេរ​ថា “#JusticeForWanchalearm”

នៅពេលល្ងាច ក្រុមសកម្មជន និងនិស្សិតដដែល​បានប្រារព្ធពិធីមួយនៅខាងក្រៅស្ថានទូតថៃ ហើយអ្នករៀបចំបាននិយាយថា ពួកគេមានបំណងដាក់​លិខិតមួយច្បាប់ទៅស្ថានទូត​នៅពេល​បើកដំណើរការនៅថ្ងៃច័ន្ទ។

កែ ចំរើន ​អាយុ២៨​ឆ្នាំ បាន​និយាយ​ថា លោក​​បាន​ចូល​រួម​ក្នុង​ព្រឹត្តិការណ៍​នេះ​ដើម្បី​ទាមទារ​យុត្តិធម៌​សម្រាប់​គ្រប់​ជាតិ​សាសន៍។ លោក​បញ្ជាក់​ថា លោក​មិន​មាន​ពាក់ព័ន្ធ​នឹង​របៀបវារៈ​នយោបាយ ឬ​គណបក្ស​នយោបាយ​នោះ​ទេ។

លោក​​បាន​និយាយ​ថា៖​ «​ខ្ញុំ​ក៏​ជា​យុវជន​ដែរ ខ្ញុំ​ចង់​បង្ហាញ​ពី​អារម្មណ៍​របស់​ខ្ញុំ​អំពី​ការ​បាត់​ខ្លួន​របស់ [វ៉ាន់ឆាឡឺម] អស់​រយៈពេល​បី​ឆ្នាំ ហើយ​រហូត​មក​ដល់​ពេល​នេះ​គ្មាន​​យុត្តិធម៌​សម្រាប់​គាត់​ទេ។ ​គាត់​បាន​បាត់​ខ្លួន​ជា​យូរ​មក​ហើយ ​ហើយ​មិន​មាន​ព័ត៌មាន​។ ដូច្នេះ​ រដ្ឋាភិបាល​សូម​ជួយ​ជំរុញ​ដំណើរ​ការ​ស្វែង​រក​ វ៉ាន់ឆាឡឺម​ផង»

លោក ចំរើន និយាយថា លោកសង្ឃឹមថា រដ្ឋាភិបាលកម្ពុជានឹងមិននៅស្ងៀម ចំពោះការ​បាត់​ខ្លួន​របស់ វ៉ាន់ឆាឡឺម ទៀតទេ ហើយបានជំរុញឱ្យរដ្ឋាភិបាលការ​ពារយុវជន ដែលខ្វល់ខ្វាយ​ពីបញ្ហាសង្គម៕

រាយការណ៍​បន្ថែម​ដោយ អុឺង ស៊ា

ប្រែសម្រួលពីអត្ថបទអង់គ្លេស៖ Phnom Penh Memorial Marks Third Anniversary of Thai Activist’s Abduction

368 views

ព័ត៌មានថ្មីៗ

អត្ថបទពេញនិយម