នៅរសៀលថ្ងៃពុធ ទី២៧ ខែវិច្ឆិកា ឆ្នាំ២០២៤ មេដឹកនាំសហជីព គឺ លោក ម៉ម រិទ្ធី ប្រធានសហព័ន្ធសហជីពកម្មករនិយោជិតវិស័យទេសចរណ៍សេវាកម្មកម្ពុជា ត្រូវបាននាំខ្លួនមកសាលាដំបូងរាជធានីភ្នំពេញ ដើម្បីបើកសវនាការអង្គសេចក្ដីលើករណីបទញុះញង់ឱ្យប្រព្រឹត្តបទល្មើសជាអាទិ៍ ។
មេដឹកនាំសហជីព មន្ត្រីអង្គការសង្គមស៊ីវិល និងអ្នកសារព័ត៌មានខ្លះ បានចូលរួមស្ដាប់ និងតាមដានសវនាការអង្គសេចក្ដីករណី លោក ម៉ម រិទ្ធី ។
លោក ម៉ម រិទ្ធី ត្រូវបានចាប់ខ្លួនកាលពីយប់ថ្ងៃទី៧ ខែឧសភា ឆ្នាំ២០២៤ និងបានបញ្ជូនទៅពន្ធនាគារព្រៃស បន្ទាប់ពីសាលាដំបូងរាជធានីភ្នំពេញបានកាត់ទោសកំបាំងមុខ ក្នុងថ្ងៃដដែល តាមមាត្រា ៤៩៤ ៤៩៥ និង ៥២៣ នៃក្រមព្រហ្មទណ្ឌ ហើយលោកត្រូវបានតុលាការផ្ដន្ទាទោសឱ្យជាប់ពន្ធនាគាររយៈពេល ១៨ខែ ពីបទញុះញង់ឱ្យប្រព្រឹត្តបទឧក្រិដ្ឋជាអាទិ៍ និងបទធ្វើឱ្យបាត់បង់ជំនឿលើសេចក្តីសម្រេចរបស់តុលាការ ហើយនិងត្រូវបានពិន័យជាប្រាក់ចំនួន ពីរលានរៀល (ប្រមាណ ៥០០ដុល្លារ) ។
ការកាត់ទោស លោក ម៉ម រិទ្ធី ឱ្យជាប់ពន្ធនាគាររយៈពេល ១ឆ្នាំ និង ៦ខែ គឹធ្វើឡើងតាមបណ្តឹងរបស់ក្រុមហ៊ុនមួយឈ្មោះ ជីនប៉ី គ្រុប ដែលជាកម្មសិទ្ធិរបស់ជនជាតិចិន ។
រហូតមកដល់ពេលនេះ លោក ម៉ម រិទ្ធី បានជាប់ពន្ធនាគារអស់រយៈពេលជាង ៦ខែ ហើយ ហើយតុលាការនឹងប្រកាសសាលក្រមនៅថ្ងៃទី៤ ខែធ្នូ ឆ្នាំ២០២៤ ថាតើ លោក ម៉ម រិទ្ធី នឹងត្រូវបានដោះលែងឱ្យនៅក្រៅឃុំ ឬមួយយ៉ាងណានោះ ៕
