សាលាដំបូងរាជធានីភ្នំពេញ នៅព្រឹកថ្ងៃពុធ ទី៤ ខែធ្នូ ឆ្នាំ២០២៤ បានសម្រេចតម្កល់សាលក្រម ដែលផ្ដន្ទាទោសមេដឹកនាំសហជីព គឺ លោក ម៉ម រិទ្ធី ឱ្យជាប់ពន្ធនាគាររយៈពេល ១៨ខែ ពីបទញុះញង់ឱ្យប្រព្រឹត្តបទឧក្រិដ្ឋជាអាទិ៍ និងបទធ្វើឱ្យបាត់បង់ជំនឿលើសេចក្តីសម្រេចរបស់តុលាការ ហើយនិងត្រូវបានពិន័យជាប្រាក់ចំនួន ពីរលានរៀល (ប្រមាណ ៥០០ដុល្លារ) នោះ ឱ្យនៅជាបានការដដែល ។
ការសម្រេចតម្កល់សាលក្រម ដោយទុកឱ្យ លោក ម៉ម រិទ្ធី ប្រធានសហព័ន្ធសហជីពកម្មករនិយោជិតវិស័យទេសចរណ៍សេវាកម្មកម្ពុជា បន្តជាប់ពន្ធនាគារ បានធ្វើឱ្យអ្នកតាមដានស្ថានភាពសិទ្ធិមនុស្ស មេដឹកនាំសហជីព ក៏ដូចជាក្រុមគ្រួសារ លោក ម៉ម រិទ្ធី ខកចិត្តយ៉ាងខ្លាំង ។
ភរិយា លោក ម៉ម រិទ្ធិ លោកស្រី គង់ សុដា រៀបរាប់ថា កាន់តែគួរឱ្យរន្ធត់ទៅទៀតនោះ គឺនៅពេលដែលលោកស្រីបានឃើញស្ថានភាពសុខភាព និងរូបរាងកាយស្គមស្គាំងរបស់ស្វាមី ។
ប្រធានសហភាពការងារកម្ពុជា លោក គង់ អាទិត្យ អះអាងថាសហភាពការងារកម្ពុជានឹងបន្តជួយគាំពារ លោក ម៉ម រិទ្ធី តាមគ្រប់វិធី រួមមានជំនួយផ្នែកច្បាប់ ដើម្បីឱ្យមានការដោះលែង លោក ម៉ម រិទ្ធី ។
លោក ម៉ម រិទ្ធី ត្រូវបានចាប់ខ្លួនកាលពីយប់ថ្ងៃទី៧ ខែឧសភា ឆ្នាំ២០២៤ និងបានបញ្ជូនទៅពន្ធនាគារព្រៃស បន្ទាប់ពីសាលាដំបូងរាជធានីភ្នំពេញបានកាត់ទោសកំបាំងមុខ ក្នុងថ្ងៃដដែល តាមមាត្រា ៤៩៤ ៤៩៥ និង ៥២៣ នៃក្រមព្រហ្មទណ្ឌ ។
ការកាត់ទោស លោក ម៉ម រិទ្ធី ឱ្យជាប់ពន្ធនាគាររយៈពេល ១ឆ្នាំ និង ៦ខែ គឹធ្វើឡើងតាមបណ្តឹងរបស់ក្រុមហ៊ុនមួយឈ្មោះ ជីនប៉ី គ្រុប (Jin Bei Group) ដែលជាកម្មសិទ្ធិរបស់ជនជាតិចិន ហើយការសម្រេចតម្កល់សាលក្រមនេះ គឺបន្ទាប់ពីសវនាការអង្គសេចក្ដី កាលពីថ្ងៃទី២៧ ខែវិច្ឆិកា ឆ្នាំ២០២៤ ។
រហូតមកដល់ពេលនេះ លោក ម៉ម រិទ្ធី បានជាប់ពន្ធនាគារអស់រយៈពេលជាង ៦ខែ ហើយ ៕
