សមាគមសម្ព័ន្ធអ្នកសារព័ត៌មានកម្ពុជា

តុលាការក្រុងភ្នំពេញព្រមានអតីតមេបក្សប្រឆាំង លោក កឹម សុខា ឱ្យឈប់ធ្វើសកម្មភាពនយោបាយ

លោក កឹម សុខា អតីតមេបក្សប្រឆាំង បានចេញពីសាលាដំបូងរាជធានីភ្នំពេញ បន្ទាប់ពីតុលាការសម្រេចព្រមានលោកឱ្យឈប់ធ្វើសកម្មភាពនយោបាយ។ រូបថតថ្ងៃទី២៩ ខែមិថុនា ឆ្នាំ២០២២។ ខេមបូចា/ ព្រីង សំរាំង
លោក កឹម សុខា អតីតមេបក្សប្រឆាំង បានចេញពីសាលាដំបូងរាជធានីភ្នំពេញ បន្ទាប់ពីតុលាការសម្រេចព្រមានលោកឱ្យឈប់ធ្វើសកម្មភាពនយោបាយ។ រូបថតថ្ងៃទី២៩ ខែមិថុនា ឆ្នាំ២០២២។ ខេមបូចា/ ព្រីង សំរាំង

សាលាដំបូងរាជធានីភ្នំពេញបានសម្រេចបដិសេធការស្នើសុំរបស់ព្រះរាជអាជ្ញាក្នុងការឃុំខ្លួនឡើងវិញលើ​លោក កឹម សុខា អតីតមេបក្សប្រឆាំង ដោយគ្រាន់តែសម្រេចចាត់វិធានការ​ព្រមាន​មិនឱ្យធ្វើសកម្មភាពនយោបាយ នៅរសៀលថ្ងៃពុធ ដោយសារលោក​បានបំពាន​បម្រាម​​របស់តុលាការ ក្រោយលោកបាន​​ចុះជួប​អ្នក​គាំទ្រ​របស់ខ្លួន​​កាលពីពេលថ្មីនេះ។

លោកចៅក្រម កូយ សៅ ប្រធានក្រុមប្រឹក្សាជំនុំជម្រះ បានសម្រេចចាត់​វិធានការ​ព្រមាន​លោក កឹម សុខា អតីតមេបក្សប្រឆាំង ពាក់ព័ន្ធនឹងការល្មើសលក្ខខណ្ឌ​នៅ​ក្រៅ​ឃុំ​របស់​គាត់ ដោយសារគាត់បានជួបជាមួយនឹងអ្នក​គាំទ្រនៅតាមខេត្ត​និងនៅផ្ទះរបស់គាត់​ក្នុងរាជធានី​ភ្នំពេញ​ក្នុងខែឧសភានិងមិថុនាដែលភ្ជាប់​នឹងសកម្ម​​នយោបាយ។

លោកចៅក្រមបានប្រកាសថា៖ «តុលាការរកឃើញថាពិតជាបានរំលោភកាតព្វកិច្ចដែលស្ថិត​ក្រោមការត្រួតពិនិត្យរបស់តុលាការ។ សកម្មភាពរបស់លោក កឹម​ សុខា ទាំងអស់​ជា​សកម្មភាព​នយោបាយ ដូច្នេះតុលាការសម្រេចស្តីបន្ទោសផ្ទាល់មាត់និងព្រមានជនជាប់ចោទ​ឱ្យឈប់ធ្វើសកម្មភាពនយោបាយទៀត បើសិនជាជនជាប់ចោទនៅតែប្រព្រឹត្តសកម្មភាព​ទាំងអស់ហ្នឹង [តុលាការ]នឹងចេញដីការចាប់ខ្លួនភ្លាមៗ»

លោក កឹម សុខា ដែលជាអតីត​ប្រធានគណបក្សសង្គ្រោះជាតិ ត្រូវបានចាប់ខ្លួនកាលពីថ្ងៃ ទី០៣ ខែកញ្ញា ឆ្នាំ២០១៧ និង​ត្រូវ​បាន​ចោទប្រកាន់ពីបទសមគំនិតជាមួយបរទេស ដែល​តាម​ចោទថា សហការជាមួយសហរដ្ឋអាមេរិកប៉ុនប៉ងធ្វើបដិវត្តន៍ពណ៌ ដើម្បីផ្តួលរំលំរដ្ឋាភិបាល នៃគណបក្សប្រជាជនកម្ពុជាដែល​កំពុង​កាន់​អំណាច។

ប្រជាពលរដ្ឋបានទៅចូលរួមគាំទ្រលោក កឹម សុខា អតីត​មេបក្ស​ប្រឆាំង នៅខាងក្រៅ​សាលា​ដំបូង​រាជធានី​ភ្នំពេញ​។ រូបថតថ្ងៃទី២៩ ខែមិថុនា ឆ្នាំ២០២២។ ខេមបូចា/ ព្រីង សំរាំង

លោក កឹម សុខា ត្រូវបានដាក់នៅក្រោមការត្រួតពិនិត្យរបស់តុលាការ ចាប់តាំងពី​លោក​ត្រូវ​បាន​ដោះលែងពីការឃុំខ្លួនបណ្តោះអាសន្នក្នុងខែវិច្ឆិកា ឆ្នាំ២០១៩។ ក្រោមលក្ខខណ្ឌ​នៃការ​ត្រួតពិនិត្យ លោកមិនត្រូវបានអនុញ្ញាតឱ្យចាកចេញពីប្រទេស ត្រូវបានគេហាមប្រាម​ពីការ​ធ្វើ​សកម្មភាពនយោបាយ ហើយត្រូវតែបង្ហាញខ្លួននៅពេលតុលាការកោះហៅ។

លោក កឹម សុខា បាន​អះអាងក្នុងសវនាការកន្លងមក​ថា លោក​​ធ្វើ​សកម្មភាពដោយ​​ស្រប​ច្បាប់និង​ប្រ​កប​​ដោយ​តម្លាភាពក្នុង​ការ​ព្យាយាម​យក​ឈ្នះ​ការ​បោះឆ្នោត។

គណបក្ស​សង្គ្រោះ​ជាតិ​ត្រូវ​បាន​តុលាការ​កំពូល​រំលាយ​កាលពី​ឆ្នាំ២០១៧ ហើយ​​សមាជិក​គណបក្សនេះ​ជាច្រើន​នាក់​ត្រូវ​បានចាប់ខ្លួន​ជុំវិញ​​អ្វី​ដែល​គេ​ជឿជាទូទៅ​​ថា ជា​​ការ​​ចោទប្រកាន់​​ពាក់ព័ន្ធរឿង​​នយោបាយ។ មេដឹកនាំកំពូលៗរបស់គណបក្ស​នេះ​បាននិរទេសខ្លួន ហើយ សមាជិកជាន់ខ្ពស់ជាង១០០នាក់ត្រូវបានហាមឃាត់មិនឲ្យធ្វើ​សកម្មភាព​នយោបាយ​រយៈ​ពេល​៥ឆ្នាំ៕

551 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម