គាប់ជួនទិវានៃក្តីស្រលាញ់ ១៤ កុម្ភៈ ប៉ះចំល្ងាចថ្ងៃសុក្រជាថ្ងៃចុងក្រោយនៃសប្ដាហ៍ការងារផងនោះ វិថីនានាមានសភាពណែនណាន់តាន់តាប់ចង្អៀតខុសប្លែកពីថ្ងៃធម្មតា ។
រីឯសកម្មភាពទិញនិងលក់ផ្កាភ្ញី ជាពិសេសផ្កាកុលាបក្រហម ដែលជានិមិត្តរូបនៃក្ដីស្រលាញ់ ឬក្ដីស្នេហ៍ស្មោះស្ម័គ្រ ក៏ហាក់មមាញឹករស់រវើកណាស់ដែរ គឺអតិថិជនក្មេងចាស់ប្រុសស្រី បានម្នីម្នានាំគ្នាទិញផ្កាដើម្បីជាមធ្យោបាយសម្រាប់សារភាព ក៏ដូចជាបង្ហាញនូវក្ដីគោរពស្រលាញ់ចំពោះក្រុមគ្រួសារ អ្នកដទៃ គ្រូបាធ្យាយ មិត្តរួមការងារ ព្រមទាំងសំណព្វហឫទ័យរបស់ខ្លួន ។
ក្នុងឱកាសទិវានៃក្ដីស្រលាញ់ ផ្កាកុលាបមួយទងដែលគេដាក់លក់នៅតាមហាងលក់ផ្កា ទីផ្សារ និងទីតាំងមួយចំនួននារាជធានីភ្នំពេញ មានតម្លៃជាមធ្យមពី ២.០០០រៀល ទៅ ៥.០០០រៀល គឹប្រមាណពី ៥០សេន ទៅ ១,២៥ដុល្លារ និងលើសពីនេះ ហើយផ្កាដែលគេតាំងលក់ទៀតសោត មិនមែនមានតែផ្កាស្រស់ធម្មជាតិប៉ុណ្ណោះទេ គឺមានទាំងផ្កាសិប្បកម្មច្នៃប្រឌិតផលិតពីស្លឹករុក្ខជាតិ សម្បកពោត រហូតដល់ផ្កាជ័រ និងផ្លាស្ទីកទៀតផង ។
ទិវានៃក្ដីស្រលាញ់ ( Valentine’s Day ) គឺជាទិវាដែលមនុស្សម្នាទូទាំងពិភពលោកប្រារព្ធក្នុងគោលបំណងបង្ហាញនូវក្ដីស្រលាញ់ និងការយកចិត្តទុកដាក់ចំពោះ គ្រួសារ មិត្តភក្ដិ និងអ្នកដែលខ្លួនស្រលាញ់ ។
ទិវានេះត្រូវបានគេកំណត់ធ្វើនៅថ្ងៃទី១៤ ខែកុម្ភៈ ជារៀងរាល់ឆ្នាំ ហើយតាមទម្លាប់ គូសង្សារ ឬគូស្នេហ៍ភក្ដីនឹងយកឱកាសនេះផ្តល់អំណោយចំពោះគ្នាដូចជា ជាពិសេសផ្កាកុលាបដើម្បីបង្ហើបបង្ហាញនូវក្ដីស្រលាញ់ ៕
