មន្ត្រីឲ្យដឹងថា រោងចក្រកាត់ដេរទីពីរ និងផ្សារពេញនិយមមួយនៅទីក្រុងភ្នំពេញបានបិទ និង ភូមិចំនួនបីផ្សេងទៀតត្រូវបិទខ្ទប់ ខណៈចំនួនអ្នកឆ្លងកូវីដ១៩ ក្នុងថ្ងៃចន្ទនេះហក់ឡើងមក២៧៧ករណី បន្ទាប់ពីមានការព្រមានថាកម្ពុជាកំពុងស្ថិតនៅ «លើមាត់ជ្រោះនៃគ្រោះមហន្តរាយ»។
អភិបាលរាជធានីភ្នំពេញ លោក ឃួង ស្រេង បានបញ្ជាឲ្យគ្រប់អាហាដ្ឋាន និងហាងកាហ្វេ កាត់បន្ថយការទទួលភ្ញៀវ និងបង្វែរទៅជាការវេចខ្ចប់វិញ ហើយក៏បានហាមឃាត់ការលក់គ្រឿងស្រវឹងរយៈពេលពីរសប្ដាហ៍ ស្របពេលដែលរដ្ឋាភិបាលបន្តវិធានការរឹតបន្តឹងការការពារ ការរាលដាលជំងឺកូវីដ១៩ ដែលគិតមកដល់ពេលនេះមានអ្នកស្លាប់ឡើងដល់៣០នាក់ មុនពិធីបុណ្យចូលឆ្នាំខ្មែរចូលមកដល់។
មន្ត្រីឲ្យដឹងថា ផ្សារចាស់ ត្រូវបានបិទនៅថ្ងៃចន្ទនេះ បន្ទាប់ពីអ្នកលក់ដូរមួយចំនួនរកឃើញថាមានវិជ្ជមានកូវីដ១៩ ខណៈចំនួនអ្នកវិជ្ជមានកូវីដ១៩ នៅសហគ្រាស ឌីន ហាន ឡើងលើស៦០០ករណី និងរោងចក្រមួយទៀតឈ្មោះ AM2 នៅខណ្ឌកំបូល ត្រូវបានបិទដែរ ហើយកម្មករត្រូវបញ្ជូនទៅធ្វើតេស្តបន្ទាប់ពីមានកម្មករចំនួន២៧នាក់រកឃើញវិជ្ជមានកូវីដ១៩។
មន្ត្រីមូលដ្ឋានឲ្យដឹងថាភូមិចំនួនបីទៀតនៅសង្កាត់ស្ទឹងមានជ័យ៣ គឺភូមិទ្រា៤ ភូមិដំណាក់ធំ២ និងដំណាក់ធំ៣ ត្រូវបិទខ្ទប់ ខណៈសហគ្រាស ឌីន ហាន នៅបន្តបិទរហូតពីរសប្ដាហ៍ តែថារោងចក្រជិត៤០ផ្សេងទៀតនឹងត្រូវនៅបន្តដំណើរការជាធម្មតា។
អភិបាលរងខណ្ឌមានជ័យ លោក ឌី រ័ត្នខេមរុណ មានប្រសាសន៍ថា មន្ត្រីរាជការ ក៏ដូចជាកម្មករនឹងត្រូវអនុញ្ញាតឲ្យធ្វើដំណើរចូលកន្លែងបិទខ្ទប់ ប៉ុន្តែសម្រាប់តែអ្នកមានការអនុញ្ញាតពិសេសតែប៉ុណ្ណោះ។
លោក ប្រាប់ខេបូចា ថា៖ «ជារួម បើសិនពួកគេនៅខាងក្រៅតំបន់បិទខ្ទប់ ប៉ុន្តែពួកគេមានលិខិតអនុញាត ពួកគេអាចចេញចូលដើម្បីធ្វើការជាធម្មតា»។ លោកបន្ថែមថា កម្មករ២ ៨០០នាក់នៅសហគ្រាស ឌីន ហាន បានធ្វើតេស្តរួចរាល់ហើយ និងមានជាង៦០០នាក់មានវិជ្ជមានកូវីដ១៩។
លោក ឲ្យដឹងទៀតថា៖ «អ្នកដែលនៅសេសសល់ ឯកឧត្តមអភិបាលក្រុងរាជធានីភ្នំពេញបញ្ជាអាជ្ញាធរឲ្យអនុវត្តវិធានការបិទខ្ទប់ និងធ្វើចត្តាឡីស័ករយៈពេល១៤ថ្ងៃនៅផ្ទះ»។
លោក ឃឹម ស៊ុនសូដា អភិបាលខណ្ឌកំបូលឲ្យដឹងដែរថាកម្មករសរុបចំនួន២៧នាក់នៅរោងចក្រ AM2 ក្នុងខណ្ឌកំបូលមានវិជ្ជមានកូវីដ១៩ ដែលបានធ្វើតេស្តកាលពីសប្ដាហ៍មុន។
លោកបន្ថែមថា៖ «កម្មករទាំងអស់ត្រូវបានដាក់ធ្វើចត្តាឡីស័ករយៈពេល១៤ថ្ងៃ ប៉ុន្តែអ្នកដែលពាក់ព័ទ្ធចំនួន ២៣នាក់ដែលប៉ះផ្ទាល់ជាមួយអ្នកវិជ្ជមាន ត្រូវបានដាក់ឲ្យនៅដាច់ដោយឡែក» ។ លោកឲ្យដឹងទៀតថាកម្មករនៅសល់៤៥០នាក់ផ្សេងទៀតមិនមានឆ្លងនោះទេ»។
ទោះបីជាសាលារាជធានីភ្នំពេញបានប្រកាសបិទផ្សារចាស់នៅព្រឹកថ្ងៃចន្ទ បន្ទាប់ពីមានអ្នកលក់ដូរមានវិជ្ជមានកូវីដ១៩ តែអាជ្ញាមិនអាចបញ្ជាក់មូលហេតុលម្អិតបានទេ រួមទាំងចំនួនករណីឆ្លងផងដែរ។
លោក ងី មានហេង ប្រធានមន្ទីរសុខាភិបាលរាជធានីភ្នំពេញ មានប្រសាសន៍ថាអ្នកលក់ដូរបានធ្វើតេស្តកូវីដ១៩។ លោកថាអាជ្ញាធរបានខិតខំធ្វើការអស់ពីលទ្ធភាព ដើម្បីកម្រិតការបិទ និងរំខានដល់ជីវភាពប្រជាពលរដ្ឋ ខណៈក៏បានព្យាយាមទប់ស្កាត់ការរាលដាលវិរុសបន្តទៀត។
លោកមានប្រសាសន៍ថា៖ «រដ្ឋ និងមន្ត្រីសុខាភិបាលមានអំណាចក្នុងការបិទកន្លែងដែលមានករណីកូវីដ១៩ច្រើន ប៉ុន្តែកន្លែងដែលមានមួយ ឬពីរករណី ពួកគេគ្រាន់តែស្នើឲ្យអ្នកទាំងនោះកុំឲ្យចេញក្រៅ»។
ក្រោយពីរយៈពេលមួយឆ្នាំក្នុងការទប់ស្កាត់ការរាលដាលជំងឺកូវីដ១៩ បានស្ទើរតែជោគជ័យទាំងស្រុង ព្រឹត្តិការណ៍២០ កុម្ភៈ បានធ្វើឲ្យមន្ទីរពេទ្យទប់ទល់លែងបាន ជាមួយនឹងអ្នកជំងឺថ្មីមានជិត១ ៥០០ករណីក្នុងរយៈពេលបួនថ្ងៃកន្លងមកនេះ។
ដើម្បីឆ្លើយតបទៅនឹងការកើនឡើងនេះ រដ្ឋបាលរាជធានីភ្នំពេញបានអនុវត្តបំរាមគោចរចំនួន១៤ថ្ងៃ និងបានបិទខ្ទប់តំបន់ដែលមានការឆ្លងរាលដាលខ្លាំង រួមទាំងសង្កាត់ស្ទឹងមានជ័យ១ ស្ទឹងមានជ័យ២ នៃខណ្ឌមានជ័យ ភូមិចំនូនប្រាំពីរនៅខណ្ឌពោធិ៍សែនជ័យ និងភូមិមួយក្នុងខណ្ឌសែនសុខ។
កាលពីថ្ងៃអាទិត្យ ភូមិចំនួនបីទៀតក្នុងសង្កាត់ស្ទឹងមានជ័យត្រូវបានបិទខ្ទប់ ខណៈដែលលោកនាយករដ្ឋមន្ត្រី ហ៊ុន សែន ចំណាយពេលបីម៉ោងលើកឡើងពីស្ថានការណ៍នេះ និងបានអះអាងថារដ្ឋាភិបាលនឹងផ្ដល់ថវិកា៣០ម៉ឺនរៀលក្នុងមួយគ្រួសារ សម្រាប់គ្រួសារមានអ្នកជំងឺកូវីដ១៩។
លោក នាយករដ្ឋមន្ត្រី លើកឡើងទៀតថាសម្រាប់អ្នកដែលត្រូវធ្វើចត្តាឡីស័ក ឬក៏ស្ថិតក្នុងតំបន់បិទខ្ទប់ រដ្ឋាភិបាលនឹងជួយចេញថ្ងៃទឹកភ្លើងកម្រិតអប្បបរមារយៈពេលពីពីរទៅបីខែ។ លោកបន្ថែមថា គ្រឹះស្ថានមីក្រូហិរញ្ញវត្ថុ និងធនាគារ បានយល់ព្រមពន្យាពេលបង់ប្រាក់សងរយៈពេលពីរខែសម្រាប់អ្នកជំងឺកូវីដ១៩។
កាលពីថ្ងៃអាទិត្យ លោក នាយករដ្ឋមន្ត្រី ហ៊ុន សែន បានប្រកាសតាមរយៈអនុក្រឹត្យថាការចាក់វ៉ាក់សាំងបង្ការកូវីដ១៩ ជាកាតព្វកិច្ចសម្រាប់មន្ត្រីស៊ីវិល និងកងកម្លាំងប្រដាប់អាវុធ លើកលែងតែអ្នកទាំងឡាយណាមានបញ្ហាសុខភាពប្រចាំកាយ។
អនុក្រឹត្យចែងថា៖ «កាតព្វកិច្ចក្នុងការទទួលការចាក់វ៉ាក់សាំងការពារជំងឺកូវីដ១៩ ត្រូវអនុវត្តចំពោះ មន្ត្រីរាជការសាធារណៈ និងកងកម្លាំងប្រដាប់អាវុធគ្រប់ប្រភេទ នៅក្នុងស្ថាប័ននីតិប្រតិបត្តិ ពលរដ្ឋទទួលអាណត្តិសាធារណៈដោយការបោះឆ្នោត និងមន្ត្រីរាជការសាធារណៈនៅក្នុងស្ថាប័ន នីតិប្បញ្ញត្តិ និងចៅក្រម ព្រះរាជអាជ្ញា និងមន្ត្រីរាជការសាធារណៈនៅក្នុងស្ថាប័នតុលាការ»។
អនុក្រឹត្យដដែលបញ្ជាក់ថាប្រភេទនៃវ៉ាក់សាំង និងនីតិវិធីចាក់វ៉ាក់សាំងគឺត្រូវអនុវត្តតាមគោលការណែនាំរបស់ក្រសួងសុខាភិបាល។
អនុប្រធានសហជីពសេរីកម្មករកម្ពុជា លោក ម៉ាន់ សេងហាក់ លើកឡើងថាទន្ទឹមនឹងការធ្វើតេស្តលើកម្មករដែលជាប់នៅកន្លែងបិទខ្ទប់ កម្មករដែលឆ្លងកាត់ចូលក្នុងតំបន់នោះក៏គួរត្រូវធ្វើតេស្តដែរ។
លោកបន្ថែមថា៖ «បើសិនជារោងចក្រនានានៅក្នុងតំបន់បិទខ្ទប់អនុញ្ញាតឲ្យកម្មករចូលទៅតំបន់នោះដើម្បីធ្វើការ នោះវាជាកង្វល់មួយ»។ លោកបានអំពាវនាវឲ្យមានវិធានការហ្មត់ចត់នៅក្នុងតំបន់បិទខ្ទប់ទាំងនោះ។
បន្ទាប់ពីការរាលដាលផ្ទុះឡើងនៅប៉ុន្មានថ្ងៃនេះ ក្រសួងសុខាភិបាលឲ្យដឹងនៅថ្ងៃចន្ទនេះថា ចំនួនអ្នកឆ្លងកូវីដ១៩ សរុបឡើងដល់ ៤ ៥១៥ករណី ក្នុងនោះមានចំនួន ៣ ៩៨២ករណីពាក់ព័ន្ធនឹងព្រឹត្តិការណ៍២០ កុម្ភៈ។
ប្រែសម្រួលពីអត្ថបទភាសាអង់គ្លេស៖ Phsar Chas closed, three more villages locked down as Covid spreads
