សមាគមសម្ព័ន្ធអ្នកសារព័ត៌មានកម្ពុជា

លោកនាយករដ្ឋមន្ត្រីណែនាំឱ្យផ្ដល់សិទ្ធិដល់សមាគមសម្ព័ន្ធ​សហគមន៍​កសិករកម្ពុជាដំណើរការឡើងវិញ

លោកនាយករដ្ឋមន្ត្រី ហ៊ុន សែន ជួបជាមួយលោក ថេង សាវឿន ប្រធានសមាគមសម្ព័ន្ធសហគមន៍កសិករកម្ពុជា និងសហការីចំនួនពីររូបទៀតនៅគេហដ្ឋានរបស់លោកផ្ទាល់កាលពីថ្ងៃទី១៧ ខែមិថុនា ឆ្នាំ២០២៣។ (រូបភាព៖ តេឡេក្រាមលោកនាយករដ្ឋមន្ត្រី)
លោកនាយករដ្ឋមន្ត្រី ហ៊ុន សែន ជួបជាមួយលោក ថេង សាវឿន ប្រធានសមាគមសម្ព័ន្ធសហគមន៍កសិករកម្ពុជា និងសហការីចំនួនពីររូបទៀតនៅគេហដ្ឋានរបស់លោកផ្ទាល់កាលពីថ្ងៃទី១៧ ខែមិថុនា ឆ្នាំ២០២៣។ (រូបភាព៖ តេឡេក្រាមលោកនាយករដ្ឋមន្ត្រី)

លោក​នាយក​រដ្ឋ​មន្ត្រី​​ ហ៊ុន សែន បាន​អំពាវ​នាវ​ឱ្យសមាគមសម្ព័ន្ធសហគមន៍កសិករកម្ពុជា​អាច​ដំណើរ​ការ​ឡើង​វិញ និង​ទម្លាក់​ចោល​បទ​ចោទ​ចំនួន​បី​ប្រឆាំង​នឹង​បុគ្គលិក​ស្ថាប័ន​មួយ​នេះ បន្ទាប់​ពី​ក្រ​សួង​មហាផ្ទៃ​បាន​ផ្អាក​ដំណើរ​ការ​បណ្ដោះ​អាសន្ន​កាល​ពី​ដើម​ខែ​នេះ​។​

​បន្ទាប់​ពី​​ជួប​ជាមួយប្រធាន​​សមាគមសម្ព័ន្ធសហគមន៍កសិករកម្ពុជា និង​បុគ្គលិក​ពីររូបទៀត​កាល​ពី​ថ្ងៃ​សៅរ៍ លោក​នាយក​រដ្ឋ​មន្ត្រី​បាន​សរសេរ​នៅ​ក្នុង​តេឡេក្រាម​​ថា៖ «យើង​ពិនិត្យ​ឃើញ​នូវ​ផលប្រយោជន៍​ដែលសមាគមបានធ្វើដូចនេះខ្ញុំបានលើក​ទឹកចិត្តឱ្យសមាគមបន្ត​សកម្មភាព​ដើម្បីផលប្រយោជន៍ប្រជាជនយើង»។ លោក​នាយក​រដ្ឋ​មន្ត្រីសរសេរ​បន្ថែមថា៖ «សមាគមត្រូវ​យកចិត្តទុកដាក់លើកិច្ចការពារចំពោះកម្មករក្នុងវិស័យកសិកម្មផងដែរ»

កាល​ពី​ខែ​ឧសភា សមត្ថកិច្ច​បាន​ឃុំ​ខ្លួន និង​សាក​សួរ​មនុស្ស​ចំនួន​១៧​នាក់​ដែល​បាន​ចូល​រួម​ក្នុង​សិក្ខាសាលា​ដែល​រៀប​ចំ​ដោយ​សមាគមសម្ព័ន្ធសហគមន៍កសិករកម្ពុជា​ក្នុង​ខេត្ត​រតនគិរី។ លោក ថេង​ សាវឿន និង​សហការី​លោក​ចំនួន​ពីរ​រូប​គឺ​លោក ញិល ភាព និង​លោក ថាន់ ហាច ត្រូវ​បាន​ចាប់​ខ្លួនបន្ទាប់​ពី​ការសាក​សួរ ដោយ​ចោទ​​ពីបទញុះញង់ និងរួមគំនិតក្បត់​​។ អ្នកនាំ​ពាក្យ​​ក្រ​សួង​មហាផ្ទៃ​លោក​ ខៀវ សុភ័ក្រ​​ បាន​ចោទ​ប្រកាន់​សមាជិក​របស់​សមាគមសម្ព័ន្ធ​សហគមន៍​​កសិករកម្ពុជា​ថា​រួម​គំនិត​ក្បត់​តាម​រយៈ «បដិវត្តន៍កសិករ»។​

បើ​តាម​សំណេរ​ក្នុង​តេឡេក្រាម លោក​នាយក​រដ្ឋ​មន្ត្រី បាន​ណែ​នាំ​ដល់​​រដ្ឋមន្ត្រី​ក្រ​សួង​យុត្តិធម៌ លោក កើត រិទ្ធ ឱ្យ​ធ្វើ​ការ​ជាមួយ​តុលាការ​ខេត្ត​រតនគិរី​លើក​លែង​ការ​ចោទ​ប្រកាន់ និង​អនុញ្ញាត​​​ឱ្យសមាគមសម្ព័ន្ធសហគមន៍កសិករកម្ពុជា អាច​ដំណើរ​ការ​ឡើង​វិញ​ឱ្យ​បាន​ឆាប់​តាម​ដែល​អាចធ្វើទៅ​បាន។​ ​

លោក ថេង សាវឿន ប្រាប់​ខេមបូចា ថា ​ក្នុង​ជំនួប​ជាមួយ​លោក​នាយក​រដ្ឋ​មន្ត្រី គឺ​ផ្ដោត​លើ​ការ​បន្ត​កិច្ច​សហការរវាង​សមាគម​ និង​រាជរដ្ឋាភិបាល​។​ លោក​ថា លោក​បាន​ប្រាប់​លោក​នាយក​រដ្ឋ​មន្ត្រីថា​ គ្មាន​ម្ចាស់​ជំនួយ​របស់​សមាគមសម្ព័ន្ធសហគមន៍កសិករកម្ពុជា​ណា​មួយ​​បញ្ជា​ឱ្យ​សមាគម «​បង្ក​ឱ្យ​មាន​អំពើ​ញុះ​ញង់​» នោះ​ទេ​។​

​លោក​ថា ក្នុង​ការ​ពិភាក្សា​មិន​មាន​និយាយ​រឿង​នយោបាយ ឬ​ការ​ចុះ​ចូល​ជាមួយ​គណបក្ស​ប្រជា​ជន​កម្ពុជា​នោះ​ទេ​។​

​លោក​បន្ថែម​ថា៖ «​ខ្ញុំ​បាន​ទៅ​ជួប​សម្ដេច​នាយក​រដ្ឋមន្ត្រី [ហ៊ុន សែន] មិន​មែន​ទៅ​រក​តំណែង​ក្នុង​រដ្ឋាភិបាល ឬ​តំណែង​នយោបាយ​ [ជាមួយ​គណបក្ស​កាន់​អំណាច​ទេ​]»។ លោក​បន្ត​ថា៖ «​គោល​បំណង​របស់​ខ្ញុំ​គឺ​ទៅ​ស្នើ​សុំ​សម្ដេច​ជួយ​អន្តរាគមន៍ឱ្យ​មាន​ការ​ទម្លាក់​ចោល​រាល់​បទ​ចោទ​ប្រកាន់​។ រឿង​សំខាន់​មួយ​ទៀត គឺ​បើក​ដំណើរ​ការ​សមាគម​ឡើង​វិញ​»។​

លោក​នាយក​រដ្ឋ​មន្ត្រី​បាន​ណែ​នាំ​ឱ្យ​សមាគមសម្ព័ន្ធសហគមន៍កសិករកម្ពុជាឱ្យ​ធ្វើជា​​តំណាង​របស់​កសិករ​ដោយ «​ប្រមូលបញ្ហា​របស់​កសិករ និង​ដាក់​ញ្ញតិ​ទៅ​អាជ្ញាធរខេត្ត​ និង​ក្រ​សួង​ពាក់​ព័ន្ធ» ពីព្រោះ​ថារដ្ឋាភិបាល «​មិន​ចង់​ឃើញ​រូបភាព​តវ៉ា»។ នេះ​បើ​តាម​ការ​បញ្ជាក់​របស់​លោក ថេង​ សាវឿន​។​

ក្រ​សួង​មហាផ្ទៃ​បាន​បញ្ជា​ឱ្យផ្អាក​ដំណើរ​ការ​បណ្ដោះ​អាសន្ន​ការិយាល័យសមាគមសម្ព័ន្ធ​សហគមន៍​កសិករកម្ពុជា​ក្នុង​ទី​ក្រុង​ភ្នំពេញ​ដើម្បី​បន្ត​ការ​ស៊ើប​អង្កេត។ រូបថតនៅថ្ងៃទី​១៩ ខែ​មិថុនា ឆ្នាំ​២០២៣​។ (ខេមបូចា/ ព្រីង សំរាំង)

​បើ​តាម​លោក ថេង សាវឿន លោក​នាយក​រដ្ឋ​មន្ត្រី​ ហ៊ុន សែន បាន​ប្រាប់​ថា​សមាគមសម្ព័ន្ធ​សហគមន៍កសិករកម្ពុជា​អាច​​យក​បញ្ហា​ទៅ​ជួប​លោក​ផ្ទាល់ បើ​សិន​ជា​អាជ្ញាធរ​មិន​ព្រម​ដោះ​ស្រាយ​ឱ្យ។​

ប្រធាន​ស្ដីទី​សមាគមសម្ព័ន្ធសហគមន៍កសិករកម្ពុជា លោក មឿន រតនា មាន​ប្រសាសន៍​ថា៖ «នេះ​ជា​ភ្លើង​ខៀវ​មួយ​ដែល​យើង​អាច​នាំ​យក​ [បញ្ហារបស់​យើង​]​ទៅ​កាន់​គាត់ [ហ៊ុន សែន]»។​

លោក​ថា លោក​អាច​ទទួល​យក​សំណើរបស់​​លោក​នាយក​រដ្ឋ​មន្ត្រី ដើម្បី​ជូន​ដំណឹង​ដល់​អាជ្ញាធរ​អំពី​ផល​លំបាក​របស់​កសិករ ពីព្រោះ​ថាសមាគម​ធ្វើ​ការ​ជាមួយ​កសិករ ដើម្បី​ជួយ​ពួក​គាត់​ឱ្យបាន​ប្រយោជន៍។ ប៉ុន្តែ​លោក​ក៏​បាន​ឃើញ​ពី​ចំណុច​ខ្វះ​ចន្លោះ​ពី​សំណើរបស់​លោក​នាយក​រដ្ឋ​មន្ត្រី​ដែរ​។​

លោក​បន្ថែម​ថា៖ «បើ​សិន​ជា​ប្រ​ជា​ពល​រដ្ឋ​មិន​ប្រមូល​ផ្ដុំ​តវ៉ា ហើយ [អាជ្ញាធរ​] ដោះស្រាយ​បញ្ហានោះ​ [សំណើរបស់​នាយក​រដ្ឋ​មន្ត្រី ] នឹង​មាន​ប្រយោជន៍»។ យ៉ាណា​លោក​ថា៖ «​ក្នុង​ករណី​​ដែល​ពួក​គាត់​ត្រូវ​រារាំង​មិន​ឱ្យប្រមូល​ផ្ដុំ​ ប៉ុន្តែ [អាជ្ញាធរ​] មិន​ដោះ​ស្រាយ​បញ្ហា​ពួកគេ នេះ​គឺ​ជា​ការ​រិត​ត្បិត​សិទ្ធ​កសិករ និង​សេរីភាព​បញ្ចេញ​មតិ​របស់​ពួកគេ»។​

សមាគមសម្ព័ន្ធសហគមន៍កសិករកម្ពុជា​​មាន​គម្រោង​ប្រជុំ​បន្ថែម​ទៀត​ជាមួយ​គណៈគ្រប់​គ្រង​ ក្រោយ​តុលាការ​ទម្លាក់​ចោល​បទ​ចោទ​ជា​ផ្លូវ​ការប្រឆាំង​លោក ថេង សាវឿន និង​បុគ្គលិក​ពីរ​រូប​ទៀត​។​

លោក រតនា បន្ត​ថា៖ «​[សមាគមសម្ព័ន្ធសហគមន៍កសិករកម្ពុជា​] នឹង​កែ​ប្រែ​រចនា​សម្ព័ន្ធ​ថ្នាក់​ដឹក​នាំ​សមាគម​ខ្លះ»។​

លោក សាវឿន ថា​លោក​មិន​បាន​លើក​និយាយ​ពី​លោក ចាន់ វិបុល ក្នុង​ជំនួប​ជាមួយលោក​នាយក​រដ្ឋមន្ត្រី​នោះទេ។ លោក ចាន់ វិបុល​ ជា​អ្នកស្រាវ​ជ្រាវ​ឯករាជ្យ ដែល​បាន​ចូល​រួម​ក្នុង​សិក្ខាសាលា​របស់​លោក ថេង សាវឿន ដែល​ពេល​នេះ​លោក​ក៏​កំពុង​ប្រឈមនឹង​បទ​ចោទ​ដូច​លោក ថេង សាវឿន ដែរ។ ពេល​នេះ លោក ចាន់ វិបុល កំពុង​នៅ​មាន​សេរីភាព​នៅ​ឡើយ​។​

​អ្នក​នាំពាក្យ​ក្រ​សួង​យុត្តិធម៌ លោក ជិន ម៉ាលីន មាន​ប្រសាសន៍​ថា​ក្រ​សួង​កំពុង​ពិនិត្យ​នី​តិវិធី​ច្បាប់​លើ​សំណុំ​រឿង​​នេះ​។​ ​អ្នកនាំពាក្យ​សាលា​ដំបូង​ខេត្ត​រតនគិរី លោក កែវ ពិសុទ្ធ មាន​ប្រសាសន៍​ថា៖ «​ចៅក្រម​ស៊ើប​សួរ​កំពុង​ធ្វើ​ការ​លើ​សំណុំ​រឿង​នេះ»

ប្រែសម្រួលពីអត្ថបទភាសាអង់គ្លេស៖ PM Hun Sen Calls for Reinstatement of CCFC

362 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម