សមាគមសម្ព័ន្ធអ្នកសារព័ត៌មានកម្ពុជា

លោកនាយករដ្ឋមន្ត្រីបញ្ជាឱ្យលុបអាជ្ញាប័ណ្ណវិទ្យុVOD ទោះបីស្ថាប័ននេះបានចេញលិខិតសុំអធ្យាស្រ័យ

បុរសនិងស្ត្រីដើរឆ្លងកាត់ការិយាល័យ VOD ក្នុងរាជធានីភ្នំពេញ កាលពីថ្ងៃទី១២ ខែកុម្ភៈ ឆ្នាំ២០២៣។ ខេមបូចា/ ព្រីង សំរាំង
បុរសនិងស្ត្រីដើរឆ្លងកាត់ការិយាល័យ VOD ក្នុងរាជធានីភ្នំពេញ កាលពីថ្ងៃទី១២ ខែកុម្ភៈ ឆ្នាំ២០២៣។ ខេមបូចា/ ព្រីង សំរាំង

លោកនាយករដ្ឋមន្រ្តី ហ៊ុន សែន បានបញ្ជាឱ្យក្រសួងព័ត៌មានលុបអាជ្ញាប័ណ្ណវិទ្យុ VOD ដោយ​កំណត់​ត្រឹមម៉ោង១០ព្រឹកថ្ងៃទី១៣ ខែកុម្ភៈ ទោះបីជា មជ្ឈមណ្ឌល ដើម្បីប្រព័ន្ធ​ផ្សព្វផ្សាយ​ឯករាជ្យ បានផ្ញើលិខិតទៅកាន់លោក ហ៊ុន សែន សុំ​អធ្យាស្រ័យក៏ដោយ ​បន្ទាប់ពីស្ថាប័ន​ព័ត៌មាន​នេះ ចេញអត្ថបទមួយកាលពីថ្ងៃទី៩ ខែកុម្ភៈ អំពីលោក ហ៊ុន ម៉ាណែត ដើរតួនាទី​ចុះហត្ថលេខាជំនួសនាយករដ្ឋមន្រ្តី ដើម្បីផ្តល់ជំនួយដល់ប្រទេសទួកគីដែល​រងគ្រោះរញ្ជួយ​​ដី។

បន្ទាប់ពីមានប្រតិកម្មពីលោក ហ៊ុន ម៉ាណែត បេក្ខភាពនាយករដ្ឋមន្រ្តី អំពីព័ត៌មាន​ដែល​ស្ថាប័ន​វីអូឌី បានចុះផ្សាយ លោកនាយករដ្ឋមន្រ្តី ក៏បានប្រតិកម្មយ៉ាងខ្លាំងពីករណី​នេះ ហើយនៅព្រឹកថ្ងៃទី១២​ ខែកុម្ភៈ នេះ លោកបានឱ្យពេលវេលាដល់វិទ្យុ VOD ធ្វើការសុំទោស​ជាសាធារណៈត្រឹមរយៈពេល២៤ម៉ោង អំពីការផ្សាយអត្ថបទរបស់ខ្លួន បើមិនដូច្នេះ នឹង​លុប​អាជ្ញាប័ណ្ណស្ថាប័ននេះនៅព្រឹកស្អែក។

បន្ទាប់ពី មជ្ឈមណ្ឌល ដើម្បីប្រព័ន្ធ​ផ្សព្វផ្សាយ​ឯករាជ្យ បានចេញ​លិខិតសូមការអភ័យទោស និងអធ្យាស្រ័យទៅកាន់រដ្ឋាភិបាល ជាសាធារណៈរួចមក។ បន្ទាប់មកទៀត លោកនាយករដ្ឋមន្រ្តី​ ហ៊ុន សែន បាន​ប្រកាស​នៅក្នុងទំព័រហ្វេសប៊ុកផ្ទាល់ខ្លួន ថាលោកមិនទទួលយកពាក្យសុំអធ្យាស្រ័យ ដែល​ស្ថាប័ននេះ បានចេញនោះទេ។

បើតាមទំព័រហ្វេសប៊ុករបស់ លោក ហ៊ុន សែន សរសេរថា៖ « តើការប្រើពាក្យសោកស្តាយនិង​សូមអធ្យាស្រ័យវាជំនួសឱ្យពាក្យសុំទោសបានដែរឬទេ? សម្រាប់ខ្ញុំមិនអាច​ទទួលយកបាន​ឡើយ។ តើការបកស្រាយបំភ្លឺនៅទីនេះមានចេតនាទម្លាក់កំហុសឱ្យ​មន្ត្រីរាជរដ្ឋាភិបាល​មែនទេ? ទុកជូនឯកឧត្តម ផៃ ស៊ីផាន ពិនិត្យលទ្ធភាពប្តឹងទៅតុលាការ»

លោកហ៊ុន សែន មានប្រសាសន៍ថាដើម្បីកុំឱ្យវែងឆ្ងាយ លោកសម្រេចមិនទទួលយក​ការ​សំដែងការសោកស្តាយ​​ និងសូមការអធ្យាស្រ័យជំនួសឱ្យការសុំទោស​របស់ស្ថាប័នVOD​ឡើយ។

លោកហ៊ុន សែន មានប្រសាសន៍ថា៖ «ក្នុងនាមរាជរដ្ឋាភិបាលដែលត្រូវការពារកិត្តិយស​របស់​ខ្លួន​ខ្ញុំសម្រេចបញ្ចប់រឿង នេះដោយឲ្យក្រសួងព័ត៌មានលុបចោលអាជ្ញាប័ណ្ណវិទ្យុ​វីអូឌី​(VOD)​ចាប់ពីពេលនេះតទៅនិងត្រូវបញ្ចប់ការផ្សាយនៅត្រឹមម៉ោង10.00នាទីថ្ងៃ១៣ កុម្ភះ ២០២៣ ជាកំហិត»

ចំណែកលិខិតរបស់ មជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ(CCIM) ដែល​ចេញ​ជាសាធារណៈដើម្បីសុំការអភ័យទោស ជុំវិញការផ្សាយអត្ថបទរបស់ខ្លួនថា ស្ថាប័នខ្លួនមាន​ការសោកស្ដាយដែលកើតមានការយល់ច្រឡំនានាពាក់ព័ន្ធនឹងអត្ថបទ«មន្ត្រីរដ្ឋាភិបាលថា ការដែលលោក ហ៊ុន ម៉ាណែត ដើរតួនាទីជំនួសឪពុកក្នុងការផ្តល់ជំនួយឱ្យតួកគី មិនមែន ជារឿងខុសឆ្គង» ចុះផ្សាយកាលពីថ្ងៃទី៩ ខែកុម្ភៈ ឆ្នាំ២០២៣។

មជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ លើកឡើងថា៖ «សូមគោរពជូនសម្តេច​អគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា វីអូឌី មានការសោកស្ដាយដែលកើតមានការយល់ច្រឡំនានាពាក់ព័ន្ធនឹងអត្ថបទ «មន្ត្រី​រដ្ឋាភិបាលថា ការដែលលោក ហ៊ុន ម៉ាណែត ដើរតួនាទីជំនួសឪពុកក្នុងការផ្តល់ជំនួយឱ្យ តួកគី មិនមែនជារឿងខុសឆ្លង»

លិខិតដដែលបញ្ជាក់ថា៖ «វីអូឌី តែងតែប្រកាន់ខ្ជាប់នូវ​គោលការណ៍​ក្រមសីលធម៌វិជ្ជាជីវៈ​សារព័ត៌មាន។ ជាថ្មីម្តងទៀត សារព័ត៌មានវីអូឌីសូមសំដែងការសោកស្ដាយ និង​សូម​អធ្យាស្រ័យ​ប្រសិនបើមានកំហុសឆ្គងណាមួយ ដោយអចេតនាដែលកើតឡើងទៅ​លើ​សម្តេចនាយករដ្ឋមន្ត្រី ដែលជាប្រមុខរាជរដ្ឋាភិបាល និងឯកឧត្តមបណ្ឌិត ហ៊ុន ម៉ាណត»។

បើតាមCCIM បានបញ្ជាក់ដែរថា អត្ថបទដែលស្ថាប័នខ្លួនចុះផ្សាយ គឺផ្សាយក្រោយអង្គភាព​អ្នកនាំពាក្យរាជរដ្ឋាភិបាលកម្ពុជា បានចេញសេចក្តីថ្លែងការណ៍មួយច្បាប់ កាលពីថ្ងៃទី៨ ខែកុម្ភៈ ឆ្នាំ២០២៣។ អ្នកសារព័ត៌មានរបស់វីអូឌី បានទាក់ទងទៅអ្នកនាំពាក្យរាជរដ្ឋាភិបាល ដើម្បីបញ្ជាក់ពីដើមចមនៃការចេញសេចក្ដីថ្លែងការណ៍នោះនិងសាកសួរព័ត៌មានបន្ថែម។

ចំណែអ្នកនាំពាក្យរាជរដ្ឋាភិបាល បានឆ្លើយតបដោយបញ្ជាក់ថា៖ «អ្នកសារព័ត៌មាន ហើយ​សមាសភាពអង្គការមិនមែនរដ្ឋាភិបាល គាត់ឆ្ងល់ ហើយគាត់វាយប្រហារ​ទៅលើ​ឯកឧត្តម​បណ្ឌិត ហ៊ុន ម៉ាណែត ហ្នឹង ដែលដូចជាគាត់ចុះហត្ថលេខាតំណាងសម្ដេចតេជោ ក្នុងការ​ផ្តល់ជំនួយហ្នឹងនោះណា៎!»។

ជុំវិញការបិទស្ថាប័នVOD លោក ខៀវ កាញារីទ្ធ រដ្ឋមន្រ្តីក្រសួងព័ត៌មាន បានថ្លែងនៅ​លើ​ហ្វេសប៊ុកលោកថា ករណីបិទស្ថាប័នVOD គឺជាមេរៀនទៅដល់​ស្ថាប័នផ្សព្វផ្សាយ​ផ្សេង​ទៀត។ ហើយស្ថាប័នដែលមិនព្រមចុះការបំភ្លឺ អាចប្រឈមនឹងការដកអាជ្ញាបណ្ណដូចគ្នា។

លោក កាញារីទ្ធ ថ្លែងថា៖«តំណក់ចុងក្រោយដែលធ្វើអោយទឹកហៀរចេញពីធុង! មិនដឹង​អ្នកណា​ជាអ្នកអោយយោបល់ VOD! តែមានតែស្ថានទូតទេ ដែលប្រឹងចៀស​មិនប្រើពាក្យ​«សូមទោស»! ស្ថាប័នកាសែតប្រើភាសាទូតទោះចង់ជួយក៏ពិតជាយ៉ាប់ហើយ! តែក៏ជា​មេរៀនដល់ស្ថាប័នផ្សព្វផ្សាយព័ត៌មានឯទៀតដែរ។ ស្ថាប័នដែលមិនព្រមចុះការ​បំភ្លឺ​របស់គេអាចប្រឈមនឹងការដកអាជ្ញាប័ណ្ណដូចគ្នា»

920 views

ព័ត៌មានថ្មីៗ

អត្ថបទពេញនិយម