ប៉ោយប៉ែតជាទីក្រុងជាយដែនដំបូងគេ ឆ្លងជំងឺកូវីដ១៩ ជាសហគមន៍ទ្រង់ទ្រាយធំ

អ្នកបើកតាក់ស៊ី លោក សំ សុផាត លីអង្ករឲ្យភ្ញៀវនៅកន្លែងត្រួតពិនិត្យចេញចូលរបស់សមត្ថកិច្ចក្រុងប៉ោយប៉ែត ថ្ងៃទី២៩មេសា ឆ្នាំ២០២១។ ខេមបូចា/ វណ្ណ វិចារ
អ្នកបើកតាក់ស៊ី លោក សំ សុផាត លីអង្ករឲ្យភ្ញៀវនៅកន្លែងត្រួតពិនិត្យចេញចូលរបស់សមត្ថកិច្ចក្រុងប៉ោយប៉ែត ថ្ងៃទី២៩មេសា ឆ្នាំ២០២១។ ខេមបូចា/ វណ្ណ វិចារ
Share on facebook
Share on twitter
Share on linkedin
Share on telegram
Share on whatsapp

នៅ​កណ្ដាលថ្ងៃក្ដៅហែង វេលាម៉ោងជាង២រសៀលថ្ងៃទី២៩ខែមេសា ​លើផ្លូវជាតិលេខ៥​ចំនុច​រង្វង់មូល​ច្រកចូលស្ទឹងបត់ ក្រុង​ប៉ោយប៉ែត​ខេត្ត​បន្ទាយមានជ័យ មានយាន​យន្ដ​រាប់សិប​គ្រឿង​ចតកកកុញបន្តកន្ទុយ​គ្នារង់ចាំឱ្យសមត្ថកិច្ចត្រួតពិនិត្យ ដើម្បីបានចេញចូលក្រុងប៉ោយប៉ែត។​អ្នកខ្លះបានចូលក្រុងអ្នកខ្លះត្រូវត្រឡប់ថយក្រោយ រីឯកអ្នកមួយចំនួនទៀត ត្រូវរៀបចំផ្ទេរ​ទំនិញជិតទីតាំងត្រួតពិនិត្យនោះ។

ញើសហូរជោគអាវ ពាក់ម៉ាស់ជិត ឃើញតែប្រឡង់ភ្នែក មន្ត្រីនគរបាលមួយរូបឈ្មោះវុធ  និ​យាយ​ថា ក្រុមការងាររបស់លោកប្រចាំការនៅគោលដៅនេះអស់រយៈពេល២ថ្ងៃមកហើយ​ដោយត្រូវយាមពីម៉ោង៦ព្រឹកដល់ម៉ោង៦ល្ងាច។ លោក​បន្តថា អ្នកដំណើរចូលក្រុងប៉ោយប៉ែតត្រូវមាន​ឯកសារ​ចេញចូល និងត្រូវចុះពី​លើ​​យានយន្ដ​ឱ្យ​នគរបាលថតរូបមុន ដើម្បីកំណត់អត្តសញ្ញាណអ្នកដំណើរ ។

លោក វុធ និយាយថា៖« បើគ្មានលិខិតអនុញ្ញាតឬការចាំបាច់ ដូចជាករណីមានជំងឺអីទេ យើងអត់ឱ្យចូលទេ​យើងឆែកគ្រប់ឡាន»។

អាជ្ញាធរខេត្តបន្ទាយមានជ័យផ្ដើមបិទខ្ទប់ការចេញចូលក្នុងក្រុងប៉ោយប៉ែត ​ចាប់តាំងពីព្រឹកថ្ងៃទី២៤ខែមេសា បន្ទាប់ពីមានអ្នកឆ្លងជំងឺកូវីដ១៩ កាន់តែច្រើន។ គិតត្រឹមថ្ងៃទី៣០ខែមេសា ​ខេត្តបន្ទាយ​មាន​ជ័យ​បាន​បានរកឃើញអ្នកឆ្លងកូវីដ១៩ ចំនួន៣១៨នាក់ កំពុងរស់​នៅក្រុងប៉ោយប៉ែត។ ក្រុងប៉ោយប៉ែត បានក្លាយជាក្រុងជាយដែនជាប់ព្រំប្រទល់ប្រទេសថៃ ដំបូងគេនៅកម្ពុជាដែលជំងឺកូវីដ១៩បានឆ្លងរីករាលដាលជាសហគមន៍ទ្រង់ទ្រាយធំ នៅចុងខែមេសា។ ការបិទខ្ទប់នេះនឹងធ្វើឡើងរហូតដល់ថ្ងៃទី០៩ ​ខែឧសភា។

អនុប្រធានមន្ទីរសុខាភិបាល ខេត្តបន្ទាយមានជ័យ វេជ្ជបណ្ឌិត រឿន សុធី ថ្លែងប្រាប់ខេមបូចា​ថា គ្រូពេទ្យរកឃើញអ្នកឆ្លងដំបូងជាបុរសជនបរទេស ដែលទៅរកសេវាព្យាបាលជំងឺសួត។​លោកបន្តថា បុរសម្នាក់នោះ ចូលមកប្រទេសកម្ពុជានៅខែមិនា និងមាន​លិខិត​បញ្ជាក់ថា បានធ្វើចត្តាឡីស័កត្រឹមត្រូវនៅសណ្ឋាគារមួយក្នុងរាជធានីភ្នំពេញហើយបានមក​ដល់ក្រុងប៉ោយប៉ែតតាំងពីថ្ងៃទី០៥ខែមេសា។ លោកបន្តថា ការផ្ទុះការឆ្លងរីលដាល​ជា​សហ​គមន៍​​នៅប៉ោយប៉ែតនេះ កើតឡើងក្នុងចំណោមអ្នកធ្វើការនៅកាស៊ីណូ ។

លោក រឿន សុធី៖«យើង​ជោគជ័យក្នុងការទប់ស្កាត់​ការឆ្លងរីករាលដាលក្នុង​ចំណោមពលករ​មកពីប្រទេសថៃ ប៉ុន្តែបែរ​ជាផ្ទុះនៅកណ្ដាលក្រុងទៅវិញ។ យើងបង្កើនការយកសំណាក និងធ្វើតេស្តរហ័ស ដើម្បីកំណត់អ្នកសង្ស័យជាមុន បន្ទាប់មកបញ្ជូនសំណាកទៅក្រសួង សុខាភិបាលពិនិត្យបន្តឈានទៅដល់ការព្យាបាល»។

លោកបន្តថា ក្នុងព្រឹត្តិការណ៍ឆ្លងជាសហគមន៍នៅប៉ោយប៉ែតនេះ អាជ្ញាធរបានយកសំណាក​មនុស្សចំនួន២៥០១សំណាកគិតត្រឹមព្រឹកថ្ងៃទី១ខែឧសភា។ ខេត្តបន្ទាយមានជ័យ បានយក​សំណាកសរុបចំនួនជាង៧២០០០សំណាក ចាប់តាំងពីផ្ទុះជំងឺកូវីដ១៩។

សេចក្ដីជូនដំណឹងរបស់រដ្ឋបាលខេត្តបន្ទាយមានជ័យបានកំណត់ការឆ្លងរីករាលដាលជំងឺកូវី១៩នៅប៉ោយប៉ែតជាការណ៍គួរឱ្យព្រួយបារម្ភ។ អាជ្ញាធរបានសម្រេចដាក់​ផ្នែកខ្លះនៃសង្កាត់​ចំនួន៣ជាតំបន់ក្រហម រួមមាន សង្កាត់ប៉ោយប៉ែតសង្កាត់ក្បាលស្ពាន និងសង្កាត់ផ្សារ​កណ្ដាល​។

មន្ត្រីនគរបាលបញ្ជារថយន្តឲ្យឈប់ដើម្បីត្រួតពិនិត្យនិងសាកសួរព័ត៌មាន នៅជិតរង្វង់មូលស្ទឹងបត់ ចំងាយប្រមាណ៥គីឡូម៉ែតពីទីប្រជុំជនប៉ោយប៉ែត ថ្ងៃទី២៩ មេសា ឆ្នាំ២០២១។ ខេមបូចា/ វណ្ណ វិចារ
មន្ត្រីនគរបាលបញ្ជារថយន្តឲ្យឈប់ដើម្បីត្រួតពិនិត្យនិងសាកសួរព័ត៌មាន នៅជិតរង្វង់មូលស្ទឹងបត់ ចំងាយប្រមាណ៥គីឡូម៉ែតពីទីប្រជុំជនប៉ោយប៉ែត ថ្ងៃទី២៩ មេសា ឆ្នាំ២០២១។ ខេមបូចា/ វណ្ណ វិចារ

សប្បុរស្រអែមសក់ស្កូវ ស្មាលីអង្ករកន្លះការ៉ុងផងនោះ បុរសវ័យជាង៥០​ឆ្នាំ​ឈ្មោះ​ សំ សុផាត ជាអ្នកបើករថយន្ត​ឈ្នួល​ពីទៅមក ប៉ោយប៉ែត-សិរីសោ​ភ័ណ្ឌ។ លោកប្រាប់​ថា អង្ករនៅលើស្មានេះ ជាអង្ករដែលភ្ញៀវផ្ញើឱ្យលោកដឹកយកទៅឱ្យកូនគេ រស់នៅក្នុងក្រុង​ប៉ោយ​​ប៉ែត។ រថយន្តរបស់លោក មិនអាចបើកចូលក្រុងប៉ោយប៉ែតបាននោះទេ ដូច្នេះលោកត្រូវ ជញ្ជូនអីវ៉ាន់ម្តងមួយៗដើម្បីដោះដូរនៅបារ៉ាស់បិទផ្លូវ។  

លោក សំ សុផាត«តាំងពីគេបិទមកខ្ញុំ ដឹកតែអីវ៉ាន់មកទេ ដឹកមកដល់ប៉ារាស់(រនាំង) អ្នកខាង ក្នុងគេចេញមកយក។ អីវ៉ាន់គ្មានអីក្រៅពីអង្ករ ម្ហូបចំណី ខ្លះមានផ្លែស្វាយ មានត្រីងៀត​អីចឹង​ទៅ អ្នកខាងស្វាយ(សិរីសោភ័ណ្ឌ)​គេផ្ញើឱ្យបងប្អូនកូនចៅគេដែលនៅក្នុងក្រុងខ្លាចអត់អីហូប ​ឬឡើងថ្លៃ»។

បុគ្គលិកកាស៊ីណូមួយកន្លែងនៅសង្កាត់ប៉ោយប៉ែត ក្រុងប៉ោយប៉ែត កញ្ញា ចាន់ ជាតា ថ្លែង​ប្រាប់​​​​ខេមបូចា តាមទូរសព្ទថា កញ្ញាកំពុងជាប់ធ្វើចត្តាឡីស័កនៅក្នុងកន្លែងធ្វើការ ដោយ​នាង​ធ្វើតេស្តដំបូងទទួលលទ្ធផលអវិជ្ជមាន ។​ កញ្ញាបន្តថា ទន្ទឹមនឹងខ្លាច​ឆ្លង​ជំងឺនាងក៏បារម្ភខ្លាចដាច់ស្បៀងដែរ ។

កញ្ញា ចាន់ ជាតា ​៖«ផ្ទុះភ្លាមៗ ខ្ញុំរកទៅទិញអីវ៉ាន់អីទុក តែស្រាប់តែឡើងថ្លៃគ្រប់មុខ តាំង​ពី​ពងទា មីត្រីខ អង្ករអីហ្នឹង ដល់អីចឹងទៅ ខ្ញុំទិញដែរតែទិញបានតិចតួចប៉ុណ្ណោះព្រោះប្រាក់ខែ​មិន​ទាន់បើកអត់លុយ។ អាជ្ញាធរមក​ប្រាប់ដែរថា ពួកគាត់ចែកស្បៀងឆាប់ៗនេះហើយ»។ 

ប្រធាន​សមាគម​ពង្រឹង​សេដ្ឋកិច្ច​ក្រៅ​ប្រពន្ធ័​កម្ពុជា​ លោក ឌិន ពុទ្ធី ឱ្យដឹងថា លោកមានទី​លំ​នៅ​ក្នុងសង្កាត់ប៉ោយប៉ែតដែរ តែភូមិរបស់លោកមិនទាន់ត្រូវដាក់ឱ្យស្ថិតក្នុងតំបន់ក្រហម​នៅ​ឡើយ។ លោកស្នើឱ្យអាជ្ញាធរផ្ដល់​ជំនួយដល់ប្រជាពលរដ្ឋរងគ្រោះទូទៅដោយគ្មាន​ការ​រើសអើង ។

លោក ឌិន ពុទ្ធី៖ ​«តាំងពី​កូវីដ​១៩ផ្ទុះមកខ្ញុំអត់ចំណូលសុទ្ធតែម្ដង ឃើញអាជ្ញាធរចែក​អំ​ណោយ​​​​​ដែរ តែគេជួយតែគ្នាគេបង​ប្អូនគេ សម្រាប់ពួក​ខ្ញុំ​ដែល​ធ្វើ​ការងារ​លើកស្ទួយសិទ្ធិអ្នករក​ស៊ីក្រៅប្រព័ន្ធអីនោះគេមិន​ឲ្យទេ។សូមស្នើអាជ្ញាធរ​ប៉ោយ​ប៉ែត​ផ្ដល់ជំនួយឲ្យអ្នកខ្វះ​ខាតកុំ​ឱ្យមានការរើសអើងនិន្នាការនយោបាយ»។

ទោះជាបែបណាក្ដីអភិបាលក្រុងប៉ោយប៉ែត​ លោក គៀត ហ៊ុល មានប្រសាសន៍ថា អាជ្ញាធរ​ចែកស្បៀងជូនប្រជាពលរដ្ឋមិនប្រកាន់និន្នាការឡើយ ។លោកថា ការផ្ដល់ស្បៀង​​ជូន​ប្រជាពលរដ្ឋជាការងារអាទិភាពចម្បងមួយដែលអាជ្ញាធរចាំបាច់ត្រូវធ្វើពេលនេះ។

លោក គៀត ហ៊ុល៖ «យើងចែកស្បៀងតាមរូបមន្ត រាប់ចំនួនមនុស្សជាក់ស្ដែង ដូច្នេះ គ្រួសារ​ណា​មានសមាជិកប៉ុន្មានយើងជូនតាមហ្នឹង ដោយគិតស្បៀងសម្រាប់ហូប​២អាទិត្យ។​ យើង​ធានាថាមិនឱ្យពួកគាត់ខ្វះ​ស្បៀង​ទេពិសេសគឺ​អង្ករ ចំពោះម្ហូបចំណីអាចនឹង​ខ្វះខាត តែ​អាជ្ញាធរ​​ព្យាយាមជួយពលរដ្ឋអស់ពីលទ្ធភាព»។

លោកគៀត ហ៊ុល ឱ្យដឹងថាអាជ្ញាធរផ្ដល់ជំនួយជូនពលរដ្ឋជាង៥០០នាក់រួច​ហើយកាលពីថ្ងៃ​ទី២៩មេសានិង គ្រោងផ្ដល់ជំនួយជូនពលរដ្ឋចំនួន៣ពាន់នាក់ទៀតនៅ​ថ្ងៃទី០១​ឧសភា​។

អភិបាលក្រុងរូបនេះបានបន្ថែមថា រដ្ឋបាលក្រុងបានរៀបចំអគារសម្រាប់ព្យាបាលជំងឺកូវីដ១៩កម្រិតស្រាលនិងអគារសម្រាប់ធ្វើចត្តាឡីស័កនៅបួនទីតាំង ដែលមានគ្រែសម្រាកចំនួនសរុបប្រមាណជាង១ពាន់គ្រែ។

អាជ្ញាធរខេត្តបន្ទាយមានជ័យ ក៏បានរៀបចំឱ្យប្រមូលទិញទំនិញចាំបាច់មួយចំនួនរួមមាន មី អង្ករ​ត្រីខ និងពងទា សម្រាប់ដាក់លក់ជូនប្រជាពលរដ្ឋ។

លោក គៀត ​ហ៊ុល  អះអាងថា៖​ «ទំនិញទាំងអស់ដែលយើងលក់គឺ​ថោក​ជាងនៅទីផ្សារ។​ឧទាហរណ៍ពងទា ខាងឈ្មួញធម្មតាលក់១០គ្រាប់៦ពាន់រៀល​ទៅ​៨០០០រៀល តែអាជ្ញាធរ​លក់ខ្ទង់១០គ្រាប់៤ពាន់៥រៀលទេ។​យើងបានទទួលជំនួយពីសប្បុរស​ជននានា​ជួយ​ចេញ​ខាត​ក្នុងគ្រាដ៏លំបាកនេះ»។

សេចក្ដីជូនដំណឹងរបស់សាលាខេត្តបន្ទាយមានជ័យ កំណត់ឱ្យអ្នករស់នៅក្នុងតំបន់ក្រហមទាំងអស់ត្រូវរស់នៅក្នុងផ្ទះ មិនអនុញ្ញាតឱ្យចេញក្រៅបរិវេណកំណត់នោះទេ។ ចំពោះអ្នកផ្សេងទៀត​​អាចចេញក្រៅធ្វើដំណើរទៅមកក្នុងក្រុងបានតែមិនអនុញ្ញាតឱ្យចេញក្រៅក្រុង។

តាមការសង្កេតជាក់ស្ដែង នៅចម្ងាយប្រមាណ៤០គីឡូម៉ែត្រពីក្រុងប៉ោយប៉ែតគឺ ក្រុងសិរីសោ​ភ័ណ្ឌ​ ខេត្តបន្ទាយ​មានជ័យមានសភាពស្ងប់ស្ងាត់ជាងមុន។ ភោជនីយដ្ឋាន ហាងកាហ្វេ​ទំនើបមួយចំនួន បំពាក់​ម៉ាស៊ីនវាស់កំដៅ​ និងទឹកអាល់កុល ព្រមទាំងផ្ដល់ជូនម៉ាស់សម្រាប់អតិថិជន ខណៈ​ដែល​ភោជនីយដ្ឋាន​ខ្លះ​លក់ត្រឹមអាហារខ្ចប់​ប៉ុណ្ណោះ។ ប៉ុន្តែនៅតាមតូបលក់ដូរសាមញ្ញ​នៅតែ​រក្សាទម្លាប់ចាស់​ដដែល​។ ​នៅតាមផ្សារនានាក្នុងក្រុងមានសភាពស្ងប់ស្ងាត់ខុសពីមុនពេលផ្ទុះជំងឺ ឯ​ទំនិញ​ពងទា ត្រីខ មី និងអង្ករ បានឡើងថ្លៃចាប់ពី២០%ឡើងទៅ។

រដ្ឋបាលខេត្តបន្ទាយមានជ័យបានសម្រេចជាបន្តបន្ទាប់ដោយជូនដំណឹង ស្នើកុំឱ្យ​ទំនិញឡើងថ្លៃ ប្រកាសផ្អាកកាស៊ីណូ និងរឹតបន្តឹងផ្នែកសន្តិសុខ។ សេចក្ដីជូនដំណឹងទាំងនោះ​សុទ្ធតែបញ្ជាក់ថា នឹងអស់សុពលភាពនៅពេលដែលមានការជូនដំណឹងជាថ្មី។

គិតត្រឹមថ្ងៃសៅរ៍ទី០១ ខែឧសភា កម្ពុជាមានអ្នកឆ្លងជំងឺកូវីដ១៩ ពាក់ព័ន្ធនឹងសហគមន៍២០កុម្ភៈ ចំនួន១៣២៣៧ករណី ក្នុងនោះមានអ្នកស្លាប់៩៦នាក់។ ​ចំនួន​ឆ្លងសរុប​មាន​​ ១៣៧៩០​ករណី គិត​ចាប់​ពី​មាន​ការ​ផ្ទុះ​ការ​ឆ្លង​រាលដាល​កូវីដ១៩ តាំងពី​ដើម​ឆ្នាំ​២០២០​មក៕

Share on facebook
Share on twitter
Share on linkedin
Share on telegram
Share on whatsapp
ព័ត៌មានថ្មីៗ »
អត្ថបទពេញនិយម »