កម្លាំងនគរបាលខេត្តស្វាយរៀង ចាប់ខ្លួនជនជាតិវៀតណាមចំនួនប្រាំនាក់បានវិញហើយ ដែលអ្នកទាំងនោះជាប់ចោទពីបទឆបោកតាមអនឡាញ រួមទាំងការឃុំឃាំងមនុស្សដោយខុសច្បាប់ និងបទល្មើសគ្រឿងញៀន ព្រមទាំងស្ត្រីម្នាក់ដែលរងការចោទថាបានជួយពួកគេរត់គេចខ្លួន និងជនជាប់ចោទខ្មែរម្នាក់ទៀត កាលពីថ្ងៃអង្គារ បន្ទាប់ពីពួកគេបានប៉ុនប៉ងរត់គេចចេញពីការឃុំឃាំងដោយមានទាំងផ្ទុះអាវុធផង។ អង្គការសង្គមស៊ីវិលបានអំពាវនាវឱ្យមានការស៊ើបអង្កេតឱ្យបានហ្មត់ចត់លើករណីនេះ។
វីដេអូឃ្លីបមួយដែលបានចែកចាយពេញបណ្តាញសង្គម បានបង្ហាញពីក្រុមជនជាប់ឃុំទាំង ប្រាំមួយនាក់នោះ កំពុងប៉ុនប៉ងរត់គេចខ្លួនយ៉ាងតក់ក្រហល់ ដោយមានផ្ទុះអាវុធដាក់គ្នាជាមួយកម្លាំងនគរបាល ខណៈដែលពួកគេទើបនឹងចុះពីលើរថយន្តពន្ធនាគារនៅក្នុងបរិវេណសាលាដំបូងខេត្តស្វាយរៀង។
ជនជាប់ឃុំម្នាក់បានដើរចូលទៅជិតស្ត្រីម្នាក់ដែលមានពាក់ម៉ាស់ និងស្លៀកពាក់ឈុតពណ៌ខ្មៅ ហើយតាមរយៈវីដេអូគេឃើញជននោះបានយកកាំភ្លើងពីស្ត្រីនោះ និងចាប់ផ្តើមបាញ់ទៅលើនគរបាលភ្លាមៗ ហើយពួកគេក៏ព្យាយាមរត់គេច។ យ៉ាងណាមិញ មិនមានរបាយការណ៍ពីអ្នករងរបួសក្នុងហេតុការណ៍នោះទេ។
លោក ឃៀង សុណាឌីន អ្នកនាំពាក្យអគ្គនាយកដ្ឋានពន្ធនាគារ បានឱ្យដឹងថា ជនជាប់ឃុំម្នាក់ត្រូវបានចាប់ខ្លួនត្រឡប់មកវិញ បន្ទាប់ពីមានការដេញតាមចាប់រួមជាមួយជនជាប់ឃុំខ្មែរម្នាក់ទៀត ដែលអ្នកទាំងនោះត្រូវមន្ត្រីពន្ធនាគារដឹកមកកាន់សាលាដំបូងខេត្តស្វាយរៀង។ លោកបន្ថែមថាចំណែកបុរសបួននាក់ទៀត និងស្ត្រីជាបក្សពួកនោះ ត្រូវចាប់បាននៅប៉ុន្មានម៉ោងក្រោយមក។
លោកមានប្រសាសន៍ថា៖ «ជនជាប់ចោទទាំងប្រាំមួយនាក់រងបទចោទប្រកាន់ពីបទល្មើសគ្រឿងញៀន ការកាន់កាប់អាវុធខុសច្បាប់ និងការបង្ខាំងមនុស្សដោយខុសច្បាប់»។ លោកបន្ថែមថា ពួកគេត្រូវបានបញ្ជូនទៅឃុំខ្លួនបណ្តោះអាសន្ននៅពន្ធនាគារតាំងពីខែមករា ឆ្នាំ២០២៥ មកម្ល៉េះ។
លោក អំ សំអាត នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ បានអំពាវនាវឱ្យនគរបាលធ្វើការស៊ើបអង្កេតករណីនេះឱ្យបានហ្មត់ចត់ និងពង្រឹងការគ្រប់គ្រងហានិភ័យសន្តិសុខពន្ធនាគារ។
លោកបានលើកឡើងថា៖ «ករណីនេះគួរជាមេរៀនមួយក្នុងការគ្រប់គ្រង និងសន្តិសុខសុវត្ថិភាពលើជនជាប់ឃុំ។ រឿងនេះត្រូវតែមានការស៊ើបអង្កេតឱ្យស៊ីជម្រៅ ដើម្បីលាតត្រដាងការពិត និងធានាថាមានចំណាត់ការតាមផ្លូវច្បាប់»។
លោក អំ សំអាត បានរំឭកដល់ហេតុការណ៍លើកមុន ដែលពាក់ព័ន្ធនឹងអ្នកទោសជនជាតិចិនតៃវ៉ាន់ម្នាក់ដែលត្រូវបានផ្តន្ទាទោសពីបទជួញដូរគ្រឿងញៀន ហើយបានរត់គេចខ្លួនពេលកំពុងទៅទទួលការព្យាបាលធ្មេញនៅក្នុងខេត្តសៀមរាប។
ចំណែកឯលោក ឡាយ ជុងហេង អ្នកនាំពាក្យសាលាដំបូងខេត្តស្វាយរៀង បាននិយាយយ៉ាងខ្លីថា កម្លាំងនគរបាលកំពុងធ្វើការលើរឿងនេះ ហើយលោកបានបដិសេធមិនធ្វើអត្ថាធិប្បាយលម្អិតបន្ថែមនោះទេ។
មន្ត្រីនគរបាលជាច្រើនរូប រួមទាំងលោក គង់ សំអាត ប្រធានពន្ធនាគារខេត្តស្វាយរៀង និងលោក ឯម សុវណ្ណារិទ្ធ មន្ត្រីគរបាលក្រុងបាវិត ក៏បានបដិសេធធ្វើអត្ថាធិប្បាយលើរឿងនេះផងដែរ។
ចំណែក លោក ពេជ្រ វីរៈ ស្នងការនគរបាលខេត្តស្វាយរៀង លោក ឆាយ គឹមខឿន អ្នកនាំពាក្យអគ្គស្នងការដ្ឋាននគរបាលជាតិ លោក ទូច សុឃៈ អ្នកនាំពាក្យក្រសួងមហាផ្ទៃ និងលោក ម៉ែន អេង អភិបាលរងខេត្ត និងជាអ្នកនាំពាក្យរដ្ឋបាលខេត្ត ក៏មិនអាចទាក់ទងសុំការអត្ថាធិប្បាយបានដែរ៕
ប្រែសម្រួលពីអត្ថបទភាសាអង់គ្លេស៖ Police Foil Escape Plan, Re-Capture 5 Vietnamese After Shootout at Svay Rieng Court
