សមាគមសម្ព័ន្ធអ្នកសារព័ត៌មានកម្ពុជា

សមត្ថកិច្ចថារកមិនឃើញជនបង្កគ្រោះថ្នាក់ចរាចរណ៍ដែលបណ្តាលឱ្យទារកម្នាក់ស្លាប់

ទារករងគ្រោះនៅក្នុងហេតុការណ៍គ្រោះថ្នាក់ចរាចរណ៍នៅលើស្ពានជ្រោយចង្វារ។ រូបភាពពីហ្វេសប៊ុកឈ្មោះ Phalla Phon
ទារករងគ្រោះនៅក្នុងហេតុការណ៍គ្រោះថ្នាក់ចរាចរណ៍នៅលើស្ពានជ្រោយចង្វារ។ រូបភាពពីហ្វេសប៊ុកឈ្មោះ Phalla Phon

សមត្ថកិច្ចពាក់ព័ន្ធនៅរាជធានីភ្នំពេញអះអាងថា រយៈពេលជិត១សប្តាហ៍ហើយដែល សាលាដំបូងរាជធានីភ្នំពេញចេញដីកាឱ្យនាំខ្លួនជនបង្កគ្រោះថ្នាក់ចរាចរណ៍ទាំងស្ថានភាព​ស្រវឹងនៅលើស្ថានជ្រោយចង្វារបណ្តាលឱ្យទារកអាយុ២ខែស្លាប់ និងមនុស្ស២នាក់ទៀត​រងរបួសធ្ងន់ ដើម្បីយកទៅបន្តតាមនីតិវិធីច្បាប់ ប៉ុន្តែសមត្ថកិច្ចរកមិនឃើញ។​

កាលពីម៉ោង២រំលងអធ្រាត្រចូលថ្ងៃទី៥ ខែធ្នូ ឆ្នាំ២០២២ មានករណីគ្រោះថ្នាក់ចរាចរណ៍​មួយ​នៅ​លើស្ពានជ្រោយចង្វារ ហើយមានការផ្សព្វផ្សាយពីសារព័ត៌មានមួយចំនួននៅ​កន្លែង​កើត​ហេតុ​ដែលបញ្ជាក់ថា បុរសម្នាក់បើកបររថយន្តស៊េរីទំនើបក្នុងស្ថានភាពស្រវឹង បុកម៉ូតូមួយ​គ្រឿង​​ដែលបើកបរដោយបុរសម្នាក់ដឹកស្ត្រី និងកូនតូចអាយុ២ខែម្នាក់ចេញពីមន្ទីរពេទ្យ។​ ក្រោយកើតហេតុសាធារណជនមួយចំនួនបានបង្ហាញក្តីអាណិតដល់ជនរងគ្រោះពិសេស​ទារកអាយុ២ខែដែលស្លាប់ ហើយខ្លះទៀតទាមទារឱ្យមានវិធានការផ្លូវច្បាប់ចំពោះជនបង្ក។​

ជុំវិញករណីនេះ លោក ស ថេត ស្នងការនគរបាលរាជធានីភ្នំពេញ បានឱ្យដឹងថា លោកបាន​ទទួលដីកាពីសាលាដំបូងរាជធានីភ្នំពេញជិត១សប្តាហ៍ហើយ ឱ្យនាំខ្លួនជនបង្កទៅបន្ត​នីតិវិធី​តាមផ្លូវច្បាប់ ប៉ុន្តែលោកថា នៅមិនទាន់រកជននោះឃើញនៅឡើយទេ។​

លោក ស ថេត ថ្លែងថា៖ «ឥឡូវយើងកំពុងធ្វើការលើជនបង្កហ្នឹង ឥឡូវយើងមានដីកាហើយ យើងកំពុងតាមរកហើយ​»។​

របាយការណ៍របស់ស្នងការដ្ឋាននគរបាលរាជធានីភ្នំពេញឱ្យដឹងថា ភាគីបង្កគ្រោះថ្នាក់នេះ​ឈ្មោះ សោម ណូរីទីឃា ភេទប្រុសអាយុ១៩ឆ្នាំ មានទីលំនៅផ្ទះលេខ៥៣ ផ្លូវកែវចិន្តា ភូមិ៣ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ។​

អធិការនគរបាលខណ្ឌជ្រោយចង្វារ លោក លៀក ចាន់រាបសា បញ្ជាក់ថា លោកមិនទាន់​ទទួល​បានបញ្ជាថ្មីៗពីថ្នាក់លើ ឬ តុលាការលើករណីបុរស​បង្កគ្រោះថ្នាក់ចរាចរណ៍នេះនៅ​ឡើយទេ។​

លោក ចាន់រាបសា បញ្ជាក់ថា៖ «មកដល់ម៉ោងនេះខ្ញុំអត់ហ៊ាននិយាយថា ខ្ញុំបានទទួល​ ឬ​អត់បានទទួលទេ តែបច្ចុប្បន្នខ្ញុំអត់ទាន់បានទទួល ប៉ុន្តែមិនដឹងថា ទៅដល់កន្លែងខ្ញុំឬនៅ?»។​

មេប៉ុស្តិ៍នគរបាលសង្កាត់ជ្រោយចង្វារលោក តាំង អឿន ឱ្យដឹងថា លោកទទួលដីកាពី​តុលាការ ដើម្បីនាំខ្លួនជនបង្កនោះ៤ថ្ងៃហើយ ហើយលោកបានឃ្លាំមើល​ជាប្រចាំ​តែ​លោក​មិនឃើញជនបង្កនោះនៅផ្ទះទេ។​

លោក តាំង អឿន ឱ្យដឹងថា​៖ «ខ្ញុំកំពុងតែឃ្លាំមើលតែអត់ឃើញនៅផ្ទះទេ ខ្ញុំឃ្លាំមើលរហូត តែអត់ឃើញតែម្តង មិនដឹងថា គាត់ទៅណាមកណា យើងអត់ដឹង»។​

ពេលដែលក្រុមការងារព្យាយាមសាកសួរហេតុអ្វីមន្ត្រីសមត្ថកិច្ចមិនចូលសួរដល់ក្នុងផ្ទះ? ហើយសួរនាំពីព័ត៌មានមួយចំនួនទៀតពីជនបង្កនោះ លោក តាំង អឿន ថ្លែងថា មិនអាច​និយាយ​បានទេ បើចង់ដឹងឱ្យទៅសាកសួរផ្ទាល់ដល់កន្លែងហើយលោកក៏ប្រាប់ថា ជាប់រវល់​បិទទូរសព្ទទៅ។​

អ្នកនាំពាក្យសាលាដំបូង​រាជធានីភ្នំពេញ លោក ប្លង់ សុផល មិនអាចសុំការអត្ថាធិប្បាយ​បានទេ ខណៈអ្នកនាំពាក្យសាលាដំបូង​រាជធានីភ្នំពេញម្នាក់ទៀត លោក អ៊ី រិន្ទ បញ្ជាក់ថា លោកមិនបានដឹងពីការវិវត្តន៍ចុងក្រោយ​នៃសំណុំរឿង​នេះនៅឡើយ​ទេ។

ជនបង្កគ្រោះថ្នាក់ចរាចរណ៍ទាំងស្ថានភាព​ស្រវឹងនៅលើស្ថានជ្រោយចង្វារ​បណ្តាលឱ្យ​ទារកអាយុ២ខែស្លាប់ និងមនុស្ស២នាក់ទៀត​រងរបួសធ្ងន់។ រូបភាពហ្វេសប៊ុក​ស្នងការនគរបាលរាជធានីភ្នំពេញ​

លោក ផន ផល្លារ ប្រធានអង្គការមណ្ឌលកុមារកំព្រាមែកឈើ ​ដែលបានជួយទំនុកបម្រុង ដល់គ្រួសារជនរងគ្រោះថ្លែងថា សមត្ថកិច្ចពាក់ព័ន្ធមានការធ្វេសប្រហែស ដែលក្រោយកើតហេតុភ្លាមសមត្ថកិច្ចបានឃាត់ខ្លួនជនបង្ក ប៉ុន្តែក្រោយមកបានដោះលែង រហូតដល់ពេលនេះបែរជាថា តាមរកមិនឃើញទៅវិញ។​

លោក ផន ផល្លារ លើកឡើងថា៖ «ជាការធ្វេសប្រហែសមួយដែលមិនដឹងពីស្ថានភាព​ជនរងគ្រោះ​កម្រិតណាផង បែរជាដោះលែងជនបង្កទៅវិញ។ ឥឡូវឧទាហរណ៍ថា ជនបង្ករត់ទៅក្រៅស្រុក ហើយបាត់ដំណឹងសូន្យឈឹង [អ៊ី]ចឹងវាជារឿងដែលគួរ​ឱ្យសោកស្តាយ​ដែល​ផ្តល់ឱកាសឱ្យជនបង្ករត់បាន»។

លោក ផន ផល្លា ក៏បានអំពាវនាវដល់ស្ថាប័នពាក់ព័ន្ធបន្តយកចិត្តទុកដាក់ក្នុងការស្វែង​រក​យុត្តិធម៌​ក្នុងករណីនេះ ហើយលោកក៏បន្តធ្វើយុទ្ធនាការទាមទារយុត្តិធម៌​លើហ្វេសប៊ុក​របស់​លោករហូតមានយុត្តិធម៌លើករណីនេះ។​

អ្នកស្រី មុច ស្រីល័ក្ខ ម្តាយទារកដែលស្លាប់ក្នុងករណីគ្រោះថ្នាក់ចរាចរណ៍​នៅលើស្ពាន​ជ្រោយចង្វារ​នេះ ថ្លែងថា ពេលនេះរូបគាត់កំពុងតែឈឺចាប់រាងកាយធ្ងន់ធ្ងរ ខណៈបុរស​ជា​អ្នក​ជិតខាងម្នាក់ដែលបើកម៉ូតូជូនអ្នកស្រីយកកូនទៅពេទ្យនោះ នៅមានបញ្ហា​ធ្ងន់ធ្ងរ​ដូចគ្នា​គឺ រហូតត្រូវវះកាត់ខួរក្បាល។​ អ្នកស្រី មុច ស្រីល័ក្ខ បញ្ជាក់ថា រូបគាត់នៅ​បន្តទាមទារ​យុត្តិធម៌​សម្រាប់កូនរបស់គាត់ដែលទើបមានអាយុ២ខែ។​

អ្នកស្រី មុច ស្រីល័ក្ខ បន្ថែមថា៖ «ខ្ញុំនៅតែទាមទារឱ្យដោះស្រាយរឿងខ្ញុំហ្នឹង ខ្ញុំអត់សុខចិត្តទេ ព្រោះខ្ញុំបាត់បង់កូនហើយ»។​

អ្នកនាំពាក្យសមាគមការពារសិទ្ធិមនុស្សអាដហុក លោក សឹង សែន ករុណា ជំរុញឱ្យអាជ្ញាធរ​ពាក់ព័ន្ធ​ស្វែងរកយុត្តិធម៌ដល់ជនរងគ្រោះក្នុងករណីនេះ ក៏ជាការបង្ហាញពីសង្គម​មាន​យុត្តិធម៌​។ លោកបន្តថា បើករណីនេះ សមត្ថកិច្ចមិនអាចចាប់ជនបង្កមកផ្តន្ទាទោសបាននោះ នឹងរង​ការ​រិះគន់ច្រើនពីមហាជន។​

លោក សែនករុណា មានប្រសាសន៍ថា៖ «បើគ្រាន់តែជនប្រព្រឹត្តដែលមានអត្តសញ្ញាណហើយ យើងមិនអាចចាប់មកបានវាអាចរងការ រិះគន់ពីមហាជនព្រោះសមត្ថកិច្ចកម្ពុជា បើយើង​និយាយ​ពីសមត្ថភាពអាចចាប់ដល់អ្នកលាក់គ្រឿងញៀន នៅកំប៉ុងឡេនៅខ្វេះខ្វាវឃើញ ចុះមនុស្សប៉ុណ្ណាណីម៉េចចាប់មិនបាន។ [អ៊ី]ចឹងវាអាចរងការរិះគន់ពីសាធារណជន»។​

មាត្រា៨៥ នៃច្បាប់ស្តីពីចរាចរណ៍ផ្លូវគោក ចែងថា ជនណាដែលបើកបរដោយធ្វេសប្រហែស ខ្ជីខ្ជា មិនប្រុងប្រយ័ត្ន ឬមិនគោរពកាពត្វកិច្ចដែលបទប្បញ្ញត្តិស្តីពីចរាចរណ៍ផ្លូវគោកតម្រូវ បណ្ដាលឱ្យស្លាប់អ្នកដទៃ ត្រូវផ្តន្ទាទោសដាក់ពន្ធនាគារពី១ឆ្នាំ ទៅ៣ឆ្នាំ ពិន័យជាប្រាក់ពី៤ ០០០ ០០០ (បួនលាន)រៀល ទៅ ១៥ ០០០ ០០០ (ដប់ប្រាំលាន)រៀល និងអាចត្រូវផ្តន្ទាទោស ដោយទោសបន្ថែមមួយ ឬច្រើន ដូចមានចែងក្នុងមាត្រា៥៣ (ប្រភេទទោសបន្ថែម) នៃ​ក្រមព្រហ្មទណ្ឌ។

មាត្រាដដែលនៃច្បាប់ស្តីពចរាចរណ៍ផ្លូវគោកខាងលើក៏បានចែងដែរថា អំពើល្មើសខាង​លើ​នេះ​​ត្រូវផ្តន្ទាទោសដាក់ពន្ធនាគារពី២ឆ្នាំ ទៅ៥ឆ្នាំ និងពិន័យជាប្រាប់ពី១០លានរៀលទៅ ២៥លានរៀល កាលបើអ្នកបើកបរស្ថិតក្នុងស្ថានភាពស្រវឹង ឬ បណ្តាឱ្យមានអ្នកស្លាប់​ច្រើន​នាក់ ឬក៏រត់គេចខ្លួនពីកន្លែងកើតហេតុក្នុងគោលបំណងគេចវេះពីការទទួលខុសត្រូវជាដើម។​

បើតាមអ្នកស្រី មុច ស្រីល័ក្ខ បញ្ជាក់ ថា ក្រោយពេលកើតហេតុភ្លាម ពេលដែលរូបគាត់មិនទាន់​ដឹងខ្លួនស្រួលបួលនោះគឺនគរបាលចរាចរណ៍ឱ្យរូបគាត់ផ្តិតមេដៃ ពាក់ព័ន្ធការសរសេរ​សំណុំ​រឿង តែក្រោយមកទើបគាត់ដឹងថា ការផ្តិចមេដៃនោះ​គឺក្នុងន័យឱ្យគាត់ទទួលសំណង​២៥០០​ដុល្លារអាមេរិក ដើម្បីបញ្ចប់ការប្តឹងតវ៉ា ទើបគាត់ប្រកាសមិនទទួលស្គាល់កិច្ចសន្យានោះវិញ៕

1,807 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម