គ្រឿងស្រវឹង និងការផ្សព្វផ្សាយពាណិជ្ជកម្មគ្រឿងស្រវឹង នៅតែជាក្តីកង្វល់អំពីផលប៉ះពាល់ចំពោះសង្គមជាតិ និងសុខុមាលភាពរបស់ប្រជាពរដ្ឋកម្ពុជា ។
ទាក់ទិននឹងកង្វល់នេះ កាលពីថ្ងៃទី១៦ ខែធ្នូ ឆ្នាំ២០២៤ នាយករដ្ឋមន្ត្រី ហ៊ុន ម៉ាណែត អមដោយរដ្ឋមន្រីក្រសួងសុខាភិបាល លោក ឈាង រ៉ា ព្រមទាំងថ្នាក់ដឹកនាំ រដ្ឋមន្ត្រី មន្ត្រីជាន់ខ្ពស់ នៃក្រសួង ស្ថាប័នពាក់ព័ន្ធមួយចំនួនទៀត បានជួបតំណាងក្រុមហ៊ុនស្រាបៀរ និងក្រុមហ៊ុនផ្សព្វផ្សាយពាណិជ្ជកម្ម ។ ជំនួបនេះដើម្បីពិភាក្សាអំពីក្រមប្រតិបត្តិនៃការផ្សព្វផ្សាយពាណិជ្ជកម្មគ្រឿងស្រវឹងឱ្យសមស្រប ក្នុងបំណងកាត់បន្ថយផលប៉ះពាល់ផ្នែកសេដ្ឋកិច្ច វប្បធម៌ ប្រពៃណី សណ្តាប់ធ្នាប់សង្គម សុខុមាលភាពសាធារណៈ និងជំរុញឱ្យមានការប្រកួតប្រជែងប្រកបដោយសុចរិតភាព ។
ទិន្នន័យនៃការស្ទង់មតិប្រជាសាស្រ្ត និងសុខភាពកម្ពុជាឆ្នាំ២០២១-២០២២ បង្ហាញអំពីទំនាក់ទំនងយ៉ាងសំខាន់ រវាងការប្រើប្រាស់គ្រឿងស្រវឹង និងការកើតឡើងនូវអំពើហិង្សាដៃគូក្នុងគ្រួសារ ។ ទិន្នន័យក៏បានបញ្ជាក់ដែរថា៖ «ប្រហែល ៤៩,៥ ភាគរយ នៃស្ត្រីដែលមានអាយុពី១៥ ទៅ ៤៩ឆ្នាំ តែងតែទទួលរងនូវអំពើហិង្សា នៅពេលដែលដៃគូរបស់ខ្លួនផឹកស្រវឹង» ។
គិតត្រឹមពាក់កណ្តាលឆ្នាំ២០២៤ គ្រោះថ្នាក់ចរាចរណ៍ទូទាំងប្រទេសបានកើតឡើងចំនួន ១.៥៣៤ករណី បណ្តាលឱ្យមនុស្សស្លាប់ចំនួន ៧៩៣នាក់ និងរបួសចំនួន ២.១១៦នាក់ ក្នុងនោះរបួសធ្ងន់ ១.២៣៤នាក់ ។ អគ្គស្នងការរងនៃអគ្គស្នងការដ្ឋាននគរបាលជាតិ លោក ចេវ ហាក់ មានប្រសាស៍ថា ៣ ភាគរយ នៃគ្រោះថ្នាក់ចរាចរណ៍ទាំងនេះ គឺកើតឡើតក្រោមឥទ្ធិពលនៃគ្រឿងស្រវឹង ។