សមាគមសម្ព័ន្ធអ្នកសារព័ត៌មានកម្ពុជា

លោកនាយករដ្ឋមន្ត្រីបញ្ជាឱ្យកងកម្លាំងប្រដាប់អាវុធបាញ់ទម្លាក់ដ្រូននៅតាមព្រំដែនវៀតណាម

រថយន្តយោធាកម្ពុជាធ្វើដំណើរតាមបណ្តោយផ្លូវមួយពីភ្នំពេញទៅខេត្តក្រចេះ រតនគិរី និងមណ្ឌលគិរី ឆ្ពោះទៅព្រំដែនវៀតណាមកាលពីថ្ងៃទី២៧ ខែមិថុនា ឆ្នាំ២០២៣។ (ខេមបូចា/ ព្រីង សំរាំង)
រថយន្តយោធាកម្ពុជាធ្វើដំណើរតាមបណ្តោយផ្លូវមួយពីភ្នំពេញទៅខេត្តក្រចេះ រតនគិរី និងមណ្ឌលគិរី ឆ្ពោះទៅព្រំដែនវៀតណាមកាលពីថ្ងៃទី២៧ ខែមិថុនា ឆ្នាំ២០២៣។ (ខេមបូចា/ ព្រីង សំរាំង)

លោកនាយក​រដ្ឋមន្ត្រី ហ៊ុន សែន បាន​បញ្ជា​ឱ្យ​កងទ័ព​ដែល​ឈរជើង​នៅ​តាម​បណ្តោយ​​ព្រំដែន​ជាមួយ​ប្រទេស​វៀតណាម​ «បាញ់​ទម្លាក់» យន្តហោះ​គ្មាន​មនុស្ស​​បើ​ក​មិន​ស្គាល់​អត្តសញ្ញាណ​ជាច្រើនគ្រឿង ​ដែល​ហោះ​ចូល​ទឹកដី​កម្ពុជា យោង​តាម​​សារសំឡេងបង្ហោះ​​តាម​​បណ្តាញ​សង្គមហ្វេសប៊ុកកាលពី​ថ្ងៃ​អង្គារ ទី២៧ ខែមិថុនា​។

លោក ហ៊ុន សែន មាន​ប្រសាសន៍ថា៖ «យើង​ត្រូវ​ប្រើ​អាវុធ​ដ៏ទំនើប​របស់​យើង ​ដើម្បី​បាញ់​ទម្លាក់​ដ្រូន​ណាក៏ដោយ​​ដែល​ហោះ​ចូល​ក្នុង​ទឹក​ដី​កម្ពុជា។ អាវុធយ៉ាងហោចណាស់ត្រូវ​មាន១០០ដើម ដើម្បីបាញ់ទម្លាក់ដ្រូន​នេះ យកទៅ​ឱ្យច្រើនគ្រឿង​តាមដែលអាចធ្វើបាន»

លោក ហ៊ុន សែន បាន​បញ្ជាឱ្យលោក ទៀ បាញ់ រដ្ឋមន្ត្រីក្រសួងការពារជាតិ លោក វង្ស ពិសេន អគ្គមេបញ្ជាការនៃកងយោធពលខេមរភូមិន្ទ និងលោក ហ៊ីង ប៊ុនហៀង មេបញ្ជាការ​កងអង្គរក្សផ្ទាល់របស់លោក «បញ្ចេញនៅអាវុធសម្រាប់បាញ់[យន្តហោះ]» ទៅកាន់ទីកន្លែង​ដែលយន្តហោះ​គ្មានមនុស្សបើកហោះចូលក្នុង​ទឹកដីកម្ពុជា។

លោក ហ៊ុន សែន មាន​ប្រសាសន៍ថា៖ «សូម​បញ្ចេញ​​កម្លាំង​ជា​បន្ទាន់​ ដើម្បី​អនុវត្ត​នូវ​វិធានការ​ចាំបាច់​​ ដើម្បី​​ការពារ​នួវការ​ឈ្លានពាន​ ឬ​ការ​ស៊ើប​ការណ៍ណាមួយ​​ពីសំណាក់​ដ្រូន ដែល​យើង​មិន​ដឹងពី​ប្រភពថា វាមកពីខាងណា​»

ខេមបូចា មិន​អាចទាក់​ទង​មេ​បញ្ជាការ ឬ​អ្នក​នាំ​ពាក្យ​កងយោធពលខេមភូមិន្ទ​​​ ដើម្បី​សុំ​ការ​អត្ថាធិប្បាយ​បាន​ទេ។

លោក ហ៊ុន សែន បាន​បញ្ជា​ឱ្យ​លោក ហ៊ីង ប៊ុនហៀង បញ្ជូន​ទ័ព​ចំនួន៥០០​នាក់ រួមទាំង​កម្លាំង​ប្រឆាំង​ភេរវកម្ម ទៅ​តាម​បណ្តោយ​ព្រំដែន​ជាប់នឹង​ប្រទេស​វៀតណាម ក្នុង​ខេត្ត​រតនគិរី ភាគ​ឦសាន។

រថយន្ត​យោធា​កម្ពុជា​ធ្វើ​ដំណើរ​តាមបណ្តោយ​ផ្លូវមួយ​ពី​ភ្នំពេញ​ទៅ​ខេត្ត​ក្រចេះ រតនគិរី និង​មណ្ឌលគិរី ឆ្ពោះ​ទៅ​ព្រំដែន​វៀតណាមកាល​ពី​​ថ្ងៃ​ទី២៧ ខែ​មិថុនា ឆ្នាំ​២០២៣។ (ខេមបូចា/ ព្រីង សំរាំង)

លោក ញ៉ែម សំអឿន អភិបាលខេត្តរតនគិរីមានប្រសាសន៍ថា យន្តហោះគ្មានមនុស្សបើក​បានហោះចូលទឹកដីខេត្តរតនគិរីកាលពីសប្តាហ៍មុន បន្ទាប់ពីមានការវាយប្រហារបែប​ភេរវកម្មនៅប្រទេសវៀតណាម។

លោក សំអឿន បាន​ប្រាប់ខេមបូចា​ថា៖​ «គិត​មក​ដល់​ពេល​នេះ ​ដ្រូន​បាន​ហោះ៤លើក​​ហើយ​តាម​ខ្សែ​បន្ទាត់​ព្រំដែន [រតនគិរី]»។ លោកបន្តថា៖ «ដ្រូន​បានហោះនៅពេលយប់​ចូលតំបន់ស​នៅតាមព្រំដែន នៅពេលដែលយើងបាញ់ វាគេចខ្លួនទៅបាត់»

កាសែតរដ្ឋវៀតណាម VnExpress បានរាយការណ៍ថា ជនសង្ស័យចំនួន៨៤នាក់​ត្រូវបាន​ចាប់​ខ្លួនពីបទជាប់ពាក់ព័ន្ធក្នុងការវាយប្រហារយ៉ាងសាហាវទៅលើការិយាល័យគណៈកម្មាធិការប្រជាជនក្នុងខេត្តដាក់ឡាក់​របស់វៀតណាមតាមបណ្តោយព្រំដែនជាមួយខេត្តមណ្ឌលគិរី។

លោក ហ៊ុន សែន បានថ្លែងថា កម្ពុជា​បាន​សួរ​វៀតណាម​ថា តើ​យន្តហោះ​គ្មាន​មនុស្ស​បើកនេះ​​ជា​របស់​ខ្លួនឬយ៉ាងណា ប៉ុន្តែ​​វៀតណាម​ថា មិនមែន​ទេ​។

លោក ហ៊ុន សែន បានបន្តថា៖ «ខ្ញុំអាចប៉ាន់ស្មានថា ដ្រូន​ដែលមាន​ចំនួនដ៏ច្រើននេះ​ គឺ​ជា​ដ្រូន​ពួកបច្ចាមិត្ត ដែលបានធ្វើសកម្មភាព​វាយប្រហារទៅ​ក្នុង​ទឹកដីវៀតណាម ហើយឥឡូវមាន​សញ្ញា​ថា មួយចំនួន​កំពុងបាក់ទ័ព​រត់ចូលមកក្នុងទឹកដី​ប្រទេសកម្ពុជា[ជាភេរវករ]»

លោក ហ៊ុន សែន បន្ថែមថា ប្រទេសកម្ពុជា​បាន​សហការ​ជាមួយ​វៀតណាម ដើម្បី​​ទប់ស្កាត់​ក្រុម​ជន​វាយប្រហារពី​ការ​​ប៉ុនប៉ង​ឆ្លង​កាត់​តាម​តំបន់​ព្រំដែន​ខេត្តរតនគិរី មណ្ឌលគិរី និង​ខេត្តក្រចេះ ចាប់តាំងពី​មាន​ការវាយប្រហារ​មក​។

លោក ថង សាវុន អភិបាលខេត្តមណ្ឌលគិរី និងលោក វ៉ា ថន អភិបាល​ខេត្ត​ក្រចេះ​បដិសេធមិនធ្វើអត្ថាធិប្បាយទេ៕

រថយន្ត​យោធា​កម្ពុជា​ធ្វើ​ដំណើរ​តាមបណ្តោយ​ផ្លូវមួយ​ពី​ភ្នំពេញ​ទៅ​ខេត្ត​ក្រចេះ រតនគិរី និង​មណ្ឌលគិរី ឆ្ពោះ​ទៅ​ព្រំដែន​វៀតណាមកាល​ពី​​ថ្ងៃ​ទី២៧ ខែ​មិថុនា ឆ្នាំ​២០២៣។ (ខេមបូចា/ ព្រីង សំរាំង)

ប្រែសម្រួលពីអត្ថបទភាសាអង់គ្លេស៖ Prime Minister Orders Armed Forces To Shoot Down Drones Along Vietnam Border

256 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម