សមាគមសម្ព័ន្ធអ្នកសារព័ត៌មានកម្ពុជា

នាយករដ្ឋមន្ត្រីថា ពុំមានបំណងផ្លាស់ប្ដូរលំនៅឋានពលរដ្ឋនៅឃុំព្រះដាក់ ខណៈពលរដ្ឋនៅឃុំបាគងផ្ទុះការតវ៉ា

ប្រជាពលរដ្ឋនៅឃុំបាគង ស្រុកប្រាសាទបាគង ខេត្តសៀមរាប ផ្ទុះការតវ៉ានៅមុខសាលាឃុំ ពាក់ព័ន្ធនឹងការផ្លាស់ប្តូរទីលំនៅ។ រូបថតនៅថ្ងៃទី៦ ខែតុលា ឆ្នាំ២០២២។ រូបភាពផ្តល់ដោយ ច័ន្ទ រស្មី
ប្រជាពលរដ្ឋនៅឃុំបាគង ស្រុកប្រាសាទបាគង ខេត្តសៀមរាប ផ្ទុះការតវ៉ានៅមុខសាលាឃុំ ពាក់ព័ន្ធនឹងការផ្លាស់ប្តូរទីលំនៅ។ រូបថតនៅថ្ងៃទី៦ ខែតុលា ឆ្នាំ២០២២។ រូបភាពផ្តល់ដោយ ច័ន្ទ រស្មី

លោកនាយករដ្ឋមន្ត្រី ហ៊ុន សែន​ អំពាវនាវឱ្យប្រជាពលរដ្ឋដែលតវ៉ាកាលពីម្សិលមិញ​ស្ងៀមស្ងាត់ ពីព្រោះពុំមានតម្រូវការណាមួយឱ្យប្រជាពលរដ្ឋរស់នៅឃុំព្រះដាក់ ស្រុកបន្ទាយស្រី ខេត្តសៀមរាប ចាកចេញទៅកាន់ទីតាំងថ្មីទេ។

ការលើកឡើងរបស់លោកនាយករដ្ឋមន្ត្រីធ្វើឡើងបន្ទាប់ពីមានការតវ៉ាពីប្រជាពលរដ្ឋ​រស់នៅ​ឃុំព្រះដាក់រាប់រយ​គ្រួសារ កាលពីថ្ងៃពុធម្សិលមិញ ដោយពួកគេបារម្ភពីការផ្លាស់ប្ដូរទីលំនៅ។

ក្នុងពិធីបើកសន្និសីទ «ចក្ខុវិស័យកម្ពុជាឆ្នាំ២០២២» លោកនាយករដ្ឋមន្រ្តី ហ៊ុន សែន ថ្លែងថា  ការផ្លាស់ប្ដូរលំនៅឋានប្រជាពលរដ្ឋទាំងស្រុងនៅឃុំព្រះដាក់គឺពុំអាចធ្វើទៅរួចឡើយ។ លោក​បន្ត​ថា អង្គការយូណេស្កូក៏ពុំតម្រូវឱ្យមានការផ្លាស់ទីលំនៅពលរដ្ឋដែលរស់នៅច្រើនជំនាន់ដែរ គ្រាន់តែតម្រូវឱ្យតំបន់នោះកុំសង់សំណង់រឹងច្រើនពេក។

លោក ហ៊ុន សែន មានប្រសាសន៍ថា៖ «ចឹងសូមប្រជាជនដែលរស់នៅឃុំព្រះដាក់មាន​ការ​ស្ងប់ចិត្ត ​យើងមិនអាចធ្វើទទឹងទិសហើយទៅរុះរើប្រជាជនដែល​រស់នៅរាប់ទាំង​សាលាឃុំ​បើទៅ ទៅទាំងសាលាឃុំអស់។ បើសិនធ្វើរបៀបនេះលុបឃុំព្រះដាក់ចោល តែមិនមែនជា​គោលដៅ​ដែលយើងត្រូវធ្វើនោះទេ»

លោក ហ៊ុន សែន បន្តថា៖ «យើងក៏បានដឹងដែរថាឃុំព្រះដាក់ត្រូវកសាងឡើងប្រមាណ​៣០០ទៅ៤០០ឆ្នាំមុនរួចទៅហើយ។ ហើយឃុំនេះជាផ្នែកមួយដែលទាក់ទងនឹងរដ្ឋបាល​ដែនដី​របស់យើងទៀតផង  ប៉ុន្តែហេតុដូចម្ដេចបានជាប្រជាជនចាប់ផ្ដើមព្រួយបារម្ភអំពីរឿងនេះ»

លោកនាយករដ្ឋមន្រ្តី ហ៊ុន សែន បន្តថា ស្អែកនេះ លោក ជា សុផារ៉ា រដ្ឋមន្រ្តីក្រសួងដែនដី និង លោកស្រី ភឿង​ សកុណា រដ្ឋមន្រ្តីក្រសួងវប្បធម៌​នឹងចុះជួបប្រជាពលរដ្ឋដើម្បី​ពន្យល់​លម្អិតជុំវិញករណីនេះ។

លោក ចាន់ សារិន វ័យ៦០ឆ្នាំ រស់នៅភូមិតាកុះ  ឃុំព្រះដាក់ ប្រាប់ថា លោកសប្បាយចិត្ត​នៅពេលទទួលដំណឹងថាថ្នាក់ដឹកនាំពុំអនុញ្ញាតឱ្យមានការរុះរើផ្ទះពលរដ្ឋ។

លោក សារិន ឱ្យដឹងថា៖ «ខ្ញុំទទួលបានហើយ ខ្ញុំក៏អរដែរសម្រាប់បងប្អូនប្រជាពលរដ្ឋ ខ្ញុំ​សប្បាយចិត្តព្រោះឮថាមិនឱ្យរុះរើ មិនឱ្យធ្វើអីផ្ដេសផ្ដាស»

លោក សារិន ប្រាប់ថា លោកមិនចង់ចាកចេញពីភូមិកំណើតដែលជាដីកេរ្តិ៍ដូនតានេះឡើយ។ លោកបន្តថា ទីលំនៅសព្វថ្ងៃដែលមានដីចំការ៤ហិកតា ធ្វើឱ្យជីវភាពគ្រួសារ​លោករស់នៅ​សមរម្យ។

លោក សារិន និយាយថា៖ «ដាំដូង ស្វាយ ខ្នុរ ស្រូវ ដីខ្ញុំវាសមរម្យអាចរស់នៅបាន។ ដី​គេហដ្ឋានទទឹង២៥ និងបណ្ដោយ៧៣ម៉ែត្រ និងដីចំការ៤ហិកតា ដល់ឮថា[ផ្លាស់ប្ដូរ]នេះ អ្នកណាមិនស្ដាយចិត្ត»

លោក ចាន់ ណិល វ័យ៤៥ឆ្នាំ រស់នៅភូមិថ្នាល់ទទឹង ឃុំព្រះដាក់ ប្រាប់ថា លោកពុំទាន់​ទទួល​បានព័ត៌មានពីថ្នាក់ដឹកនាំប្រាប់ពលរដ្ឋថាមិនរុះរើផ្ទះនេះនៅឡើយទេ។

លោក ណិល បន្តថា ស្អែកនេះ លោកពុំដឹងទេថាតើអាចចូលរួមស្ដាប់ការ​ពន្យល់ពីមន្រ្តី​រដ្ឋាភិបាល ដោយសារអាជ្ញាធរតម្រូវឱ្យពលរដ្ឋត្រឹម១០នាក់ក្នុង១ភូមិប៉ុណ្ណោះ​ឱ្យចូលរួម។

លោក ណិល បញ្ជាក់ថា៖ «អត់ចង់ចាកចេញទៅណាបើដីកេរ្តិ៍ដូនតាមក បើទៅ រកស៊ីអី ដីវាតូច[នៅរុនតាឯក]»

ប្រជាពលរដ្ឋនៅឃុំព្រះដាក់ ស្រុកបន្ទាយស្រី ខេត្តសៀមរាប បានទៅតវ៉ានៅមុខសាលាឃុំ បន្ទាប់ពីមន្ត្រីក្រសួងដែនដីដើរប្រាប់ពីការដោះដូរទីលំនៅទៅតំបន់ផ្សេង។ រូបថតនៅថ្ងៃទី៥ ខែតុលា ឆ្នាំ២០២២។ ខេមបូចា/ បញ្ញា ឆព័ណ្ណ
ប្រជាពលរដ្ឋនៅឃុំព្រះដាក់ ស្រុកបន្ទាយស្រី ខេត្តសៀមរាប បានទៅតវ៉ានៅមុខសាលាឃុំ បន្ទាប់ពីមន្ត្រីក្រសួងដែនដីដើរប្រាប់ពីការដោះដូរទីលំនៅទៅតំបន់រុនតាឯក។ រូបថតនៅថ្ងៃទី៥ ខែតុលា ឆ្នាំ២០២២។ ខេមបូចា/ បញ្ញា ឆព័ណ្ណ

លោក ភិន ថោង​ មេឃុំព្រះដាក់ ស្រុកបន្ទាយស្រី ថ្លែងថា ស្ថានភាពប្រជាពលរដ្ឋ​នៅថ្ងៃនេះ​ហាក់ស្ងប់ស្ងាត់បន្ទាប់ពីមានការបកស្រាយពីថ្នាក់ដឹកនាំ។ បើតាមមេឃុំរូប​នេះ ឱ្យដឹងថា ការ​ជួបជុំគ្នានៅថ្ងៃស្អែកនេះ ធ្វើឡើងនៅសាលាឃុំព្រះដាក់ ចាប់ពីម៉ោង៨ព្រឹក ដោយ​តម្រូវ​ឱ្យ​ពលរដ្ឋចូលរួមចំនួន១៣នាក់ក្នុងមួយភូមិ ក្នុងនោះមានមេភូមិម្នាក់ អនុភូមិម្នាក់ និងសមាជិក​ភូមិម្នាក់។

លោក ថោង បន្ថែមថា៖ «បងប្អូនប្រជាពលរដ្ឋថ្ងៃនេះគាត់ស្ងប់ស្ងាត់ធម្មតាអត់មានបញ្ហា​អីទេ»។

លោក ស៊ុំ ម៉ាប់ រដ្ឋលេខាធិការក្រសួងវប្បធម៍​និងវិចិត្រសិល្បៈ មានប្រសាសន៍ថា ពុំទាន់មាន​ស្ថិតិច្បាស់លាស់ពីចំនួនប្រជាពលរដ្ឋត្រូវផ្លាស់ប្ដូរលំនៅឋានចេញពីតំបន់បេតិកភណ្ឌដែល​ពលរដ្ឋកំពុងតវ៉ានោះនៅឡើយទេ។

លោក ម៉ាប់ ថ្លែងថា៖ «ចុះលើកនេះអាចមានស្ថិតិច្បាស់លាស់បន្ទាប់យុទ្ធនាការវាស់វែងហើយ អាចដឹងពីចំនួនគ្រួសារ»។

បើតាមរដ្ឋលេខាធិការក្រសួងវប្បធម៌រូបនេះ ឱ្យដឹងថា កន្លែងដែលចុះបញ្ជីបេតិកភណ្ឌ​ពិភព​លោក​មានចំនួន ៤០១គីឡូម៉ែត្រការ៉េ ក្នុងនោះចែកចេញជាបីតំបន់​​ គឺតំបន់អង្គរ​មានទទឹង​១៧គីឡូម៉ែត្រ និងបណ្ដោយ២៧គីឡូម៉ែត្រ, តំបន់បន្ទាយស្រី មានទទឹង៤គីឡូម៉ែត្រ និង​បណ្ដោយ​៥គីឡូម៉ែត្រ និងតំបន់បាគងមានទទឹង៣គីឡូម៉ែត្រ និងបណ្ដោយ៤គីឡូម៉ែត្រ ដែល​គ្រប់ដណ្ដប់លើ៤ស្រុក និងក្រុង​១ ដោយស្មើ១០០ភូមិ។

លោក ស៊ាង មួយឡៃ ប្រធានគម្រោងសិទ្ធិលំនៅឋាន និងស្រាវជ្រាវនៃអង្គការ​សមាគម​ធាង​ត្នោត មានប្រសាសន៍ថា រាល់ការផ្លាស់ប្ដូរទីលំនៅណាមួយ អាជ្ញាធរគួរតែជជែកគ្នាជាមួយ​ពលរដ្ឋដើម្បីឈានទៅរកដំណោះស្រាយដែលអាចទទួលយកបាន។ លោក មួយឡៃ បន្តថា ការដោះស្រាយបញ្ហាដីធ្លីប្រជាពលរដ្ឋត្រូវតែមានទាំងសមភាពនិងសមធម៌ផងដែរ។

លោក មួយឡៃ បន្ថែមថា៖ «ដាក់គោលការណ៍រួមទូទៅតែមួយ អ្នកខ្លះគាត់សប្បាយចិត្ត​ដែល​មានផ្ទះតូច តែអ្នកមានផ្ទះធំគាត់ធ្វើម៉េចសប្បាយចិត្ត ព្រោះគាត់បានដូចគេដូចឯង ចឹងត្រូវ​តែ​មាន ស្អីមួយបន្ថែមលើហ្នឹងដើម្បីឱ្យពួកគាត់អាចសុខចិត្តក្នុងការទទួលយកសំណងនេះ»។

ខណៈដែលលោក នាយករដ្ឋមន្រ្តី ហ៊ុន សែន ថ្លែងទៅកាន់ប្រជាពលរដ្ឋនៅឃុំព្រះដាក់ ឱ្យរក្សាការស្ងៀមស្ងាត់។ នៅព្រឹកថ្ងៃព្រហស្បតិ៍នេះ ប្រជាពលរដ្ឋរស់នៅឃុំបាគង ស្រុក​ប្រាសាទបាគង ខេត្តសៀមរាប ផ្ទុះការតវ៉ាជុំវិញការផ្លាស់ប្ដូរលំនៅឋាន​ទៅកាន់​តំបន់​រុនតាឯក។

ប្រជាពលរដ្ឋនៅឃុំបាគង ស្រុកប្រាសាទបាគង ខេត្តសៀមរាប ផ្ទុះការតវ៉ានៅមុខសាលាឃុំ ពាក់ព័ន្ធនឹងការផ្លាស់ប្តូរទីលំនៅ។ រូបថតនៅថ្ងៃទី៦ ខែតុលា ឆ្នាំ២០២២។ រូបភាពផ្តល់ដោយ ច័ន្ទ រស្មី

លោក ហាត់ ហូយ វ័យ៣៣ឆ្នាំ រស់នៅភូមិលលៃ ឃុំបាគង ស្រុកប្រាសាទបាគង តាំងពីដូនតា​មក បានប្រាប់ថា ព្រឹកមិញនេះ មានប្រជាពលរដ្ឋជាច្រើននាក់ធ្វើការតវ៉ានៅ​មុខសាលាឃុំ​រហូត​មន្រ្តីស្រុកចុះប្រាប់ថានឹងប្រជុំជាមួយថ្នាក់លើដើម្បីរកដំណោះស្រាយ ទើបមានការ​បំបែកគ្នា។

លោក ហូយ ឱ្យដឹងថា​ ដើមហេតុដែលនាំឱ្យផ្ទុះការតវ៉ានេះ ព្រោះម្សិលមិញនិងថ្ងៃនេះ មាន​មន្រ្តីអាជ្ញាធរអប្សរាចុះមកសួរនាំប្រជាពលរដ្ឋពីការផ្លាស់ប្ដូរទីលំនៅ ព្រមទាំងកុហកពលរដ្ឋ​មួយ​ចំនួន​ដើម្បីឱ្យផ្ដិតមេដៃទៀតផង។

លោក ហូយ បញ្ជាក់ថា៖ «ពេលគាត់[អាជ្ញាធរអប្សរា]ចូលផ្ទះទី១ ផ្ទះទី១បដិសេធអត់ចេញទេ។​ គាត់ចេញពីផ្ទះទី១ទៅផ្ទះទី២ គាត់មានពាក្យកុហកថាផ្ទះទី១គេយល់ព្រមហើយ ដល់ផ្ទះទី២​គេអត់ព្រមទៀត រហូតដល់មានផ្ទះខ្លះគាត់នៅដាច់ស្រយាល គាត់អ់តដឹង ពួកក្រុមនោះ​[អាជ្ញាធរ​អប្សរា]ប្រាប់ថាខាងគេចេញអស់ហើយ នៅតែយើងទេ ប្រយ័ត្នទៅក្រោយគេអត់មាន​ដីនៅ ពួកគាត់[ពលរដ្ឋ]ភ័យខ្លាចអត់មានដីនៅក៏ផ្ដិតមេដៃទៅ»។

លោក ហាត់ ហូយ បន្តថា លោកនិងអ្នកភូមិផ្សេងទៀតពុំព្រមចាកចេញ​ពីទីលំនៅ​បច្ចុប្បន្ន​ឡើយ។

លោក ហូយ បន្ថែមថា៖ «ទៅកន្លែងថ្មីមុខរបរក៏វាអត់ទាន់មាន ហើយអត់មានអីរីកចម្រើន​កន្លែងហ្នឹង(រុនតាឯក)។ ណាមួយទៅនោះអត់មានដីស្រែអាស្រ័យផលផងហ្នឹង នៅនេះ​ខ្ញុំមានដីស្រែប្រហែល៣ហិកតាដាំបន្លែ»

លោក បាន់ ង៉ុយ វ័យ៤៥ឆ្នាំ រស់នៅភូមិថ្នាល់ត្រង់ ឃុំបាគង ដែលចូលរួមតវ៉ានៅព្រឹកនេះ និយាយថា អាជ្ញាធរបានចុះមកសួរនាំប្រជាពលរដ្ឋពីការផ្លាស់ប្ដូរលំនៅឋាន​ទៅកាន់តំបន់​រុនតាឯក។

លោក ង៉ុយ និយាយថា៖ «ទើបតែដឹងគេចុះមកម្សិលមិញនិងថ្ងៃនេះ ដោះដូរដីប្រជាពលរដ្ឋ​នៅជុំវិញប្រាសាទ ឱ្យទៅរុនតាឯក។ អត់ទៅទេ ខ្ញុំអត់ព្រមហ្នឹងឯងបានតវ៉ា​នៅសាលាឃុំ​ព្រឹកមិញ។ ខ្ញុំធ្លាប់រស់នៅតាំងពីកេរ្តិ៍ដូនតាមក»។​

យោងតាមហេ្វសបុកផេកក្រសួងរៀបចំដែនដី នគរូបនីយកម្ម និងសំណង់ ឱ្យដឹងថា គិតត្រឹម​ថ្ងៃទី​០២ ខែកញ្ញា​ ឆ្នាំ២០២២​នេះ​ ប្រជាពលរដ្ឋ​ដែលគ្រប់លក្ខខណ្ឌនិងស្ម័គ្រចិត្តរុះរើសំណង់​ខុសច្បាប់​ស្ថិតក្នុងតំបន់រមណីយដ្ឋានអង្គរ​សរុបចំនួន ១ ១១៧គ្រួសារ​។

238 views

ព័ត៌មានថ្មីៗ

អត្ថបទពេញនិយម