សមាគមសម្ព័ន្ធអ្នកសារព័ត៌មានកម្ពុជា

នាយករដ្ឋមន្រ្តីជំរុញឈ្មួញបង្វែរការទិញបំណែកសាច់បង្កកពីក្រៅប្រទេស​ទៅសាច់ផលិតក្នុងស្រុក

លោកនាយករដ្ឋមន្ត្រី ហ៊ុន ម៉ាណែត ថ្លែងក្នុងពិធីបិទសន្និបាតបូកសរុបការងាររបស់ក្រសួងកសិកម្ម រុក្ខប្រមាញ់ និងនេសាទ ទូទាំងប្រទេសឆ្នាំ២០២៣ និងទិសដៅអនុវត្តឆ្នាំ២០២៤ នៅថ្ងៃទី៣០ ខែមករា ឆ្នាំ២០២៤។ (រូបភាព៖ STPM)
លោកនាយករដ្ឋមន្ត្រី ហ៊ុន ម៉ាណែត ថ្លែងក្នុងពិធីបិទសន្និបាតបូកសរុបការងាររបស់ក្រសួងកសិកម្ម រុក្ខប្រមាញ់ និងនេសាទ ទូទាំងប្រទេសឆ្នាំ២០២៣ និងទិសដៅអនុវត្តឆ្នាំ២០២៤ នៅថ្ងៃទី៣០ ខែមករា ឆ្នាំ២០២៤។ (រូបភាព៖ STPM)

លោកនាយករដ្ឋមន្រ្តី ហ៊ុន ម៉ាណែត ជំរុញឱ្យឈ្មួញដែលនាំចូលបំណែក​នៃសាច់បង្កក​ពីក្រៅ​ប្រទេស​បង្វែរការបញ្ជាទិញទៅកាន់អ្នកផលិតសាច់បង្កកក្នុងស្រុកជំនួសវិញ ខណៈឈ្មួញ​បញ្ជា​​ទិញទទូចឱ្យការផលិតសាច់បង្កកក្នុងស្រុកឱ្យមានគុណភាពស្របតាម​ស្តង់ដារ​អន្តរជាតិ​។

ថ្លែងក្នុងពិធីបិទសន្និបាតបូកសរុបការងារឆ្នាំ២០២៣ និងលើកទិសដៅការងារបន្តឆ្នាំ២០២៤ របស់​ក្រសួងកសិកម្ម លោកនាយករដ្ឋមន្រ្តី ហ៊ុន ម៉ាណែត ជំរុញឱ្យអ្នកបញ្ជាទិញ​បំណែក​នៃ​សាច់បង្កកពីក្រៅប្រទេសបង្វែរការកម្មង់ទៅកាន់អ្នកផ្គត់ផ្គង់ក្នុងស្រុកវិញ កំឡុងពេល​រដ្ឋាភិបាល​ផ្អាកការនាំចូលសាច់បង្កកជាបណ្ដោះអាសន្នក្នុងរយៈពេល៦ខែចាប់ពីខែមីនាដល់​ខែកញ្ញាខាងមុខ។

បន្ទាប់ពីឈ្មួញកណ្ដាល និងអ្នកផលិតសាច់បង្កកក្នុងស្រុកបានផ្សារភ្ជាប់ទំនាក់ទំនង​គ្នានា​រយៈ​ពេល​៦ខែនេះ លោក ហ៊ុន ម៉ាណែត សង្ឃឹមថា អ្នករកស៊ីទាំងនោះនឹងបន្តកិច្ច​សហការគ្នា​បន្ត​ទៀត បើទោះបីរដ្ឋាភិបាលអនុញ្ញាតឱ្យមានការនាំចូលបំណែកនៃសាច់បង្កកឡើងវិញក្ដី។

បើតាមលោកនាយករដ្ឋមន្រ្តី បានឱ្យដឹងថា ការណ៍ដែលរដ្ឋាភិបាលផ្អាកការនាំចូលបំណែក​នៃ​សាច់បង្កក ដែលមាន សាច់ជ្រូក សាច់មាន់ ជាដើម គឺដើម្បីជំរុញឱ្យកសិករ​ក្នុង​ស្រុកមាន​លទ្ធភាព​ក្នុងការប្រកួតប្រជែងលើទីផ្សារ និងជាផ្នែកមួយនៃការលើកកម្ពស់​ផលិតផល​ក្នុង​ស្រុក​ផងដែរ។

លោក ហ៊ុន ម៉ាណែត ថ្លែងថា៖ «ផ្អាកនាំចូលមួយរយៈខ្លីនៃសាច់បង្កកនេះ យើង​សង្ឃឹមថា​ វា​នឹង​ជួយ​ ទី១ សម្រាលបន្ទុកដល់កសិកររបស់យើងដែលចិញ្ចឹមជ្រូក ប៉ុន្តែពេលជាមួយគ្នា យើង​ [យក] ឱកាសនេះដើម្បីព្យាយាម ភ្ជាប់នូវផ្សារផ្ទៃក្នុងរបស់យើង ដើម្បីឱ្យពេលការ​លើក​លែង​៦ខែនេះចប់ ក៏នៅមានការផ្សារភ្ជាប់ បានន័យថា អ្នកបញ្ជាទិញគ្រឿងបង្កកនេះ ក៏នៅ​អាច​បង្វែរ​បាន​មកខាងក្នុង (អ្នកផលិតសាច់បង្កកក្នុងស្រុក) បានជាច្រើន»។

លោកនាយករដ្ឋមន្រ្តី អះអាងថា កម្ពុជាមិនអាចហាមឃាត់ការនាំចូលផលិតផលពី​ក្រៅ​ប្រទេស​​បានរហូតនោះទេ ដោយសារទង្វើនេះប្រឆាំងនឹងគោលការណ៍​អង្គការពាណិជ្ជកម្ម​ពិភពលោក និងកិច្ចព្រមព្រៀងពាណិជ្ជកម្មសេរី។

កាលពីថ្ងៃទី១២ ខែមករា ឆ្នាំ២០២៤ ក្រសួងកសិកម្មនិងក្រសួងពាណិជ្ជកម្មបានប្រកាសរួមគ្នា ដោយផ្អាកការនាំចូលគ្រឿងក្នុងនិងបំណែកនៃសាច់បង្កកចាប់ពីថ្ងៃទី១២ ខែមីនា ដល់ថ្ងៃទី១២ ខែកញ្ញា ឆ្នាំ២០២៤។

ថ្លែងក្នុងពិធីនេះដែរ រដ្ឋមន្រ្តីក្រសួងកសិកម្ម លោក ឌិត ទីណា មានប្រសាសន៍ថា ដើម្បីជំរុញ​ការងារ​ពិសោធន៍លើវិស័យកសិកម្មប្រកបដោយស្តង់ដារអន្តរជាតិ ក្រសួងកំពុងរៀបចំបង្កើត​មន្ទីរពិសោធន៍កសិកម្មជាតិ និងការបង្កើតគណៈបសុពេទ្យដើម្បីលើកកម្ពស់ក្នុងការ​គ្រប់​គ្រង​វិជ្ជាជីវៈពេទ្យសត្វនិងការចិញ្ចឹមសត្វ។

បន្ថែមពីលើនេះ លោកថា ក្រសួងកសិកម្មក៏គ្រោងនឹងបង្កើតបណ្ឌិតសភាវិទ្យាសាស្រ្តកម្ពុជា ដោយ​ប្រមូលផ្ដុំអង្គភាពស្រាវជ្រាវដាក់ស្ថិតក្រោមគ្រិះស្ថានសាធារណៈថ្មីមួយ ដើម្បីជំរុញ​ប្រសិទ្ធភាព និងនិរន្តភាពសេដ្ឋកិច្ច។

លោកមានប្រសាសន៍ថា៖ «បន្ថែមពីលើនេះទៀត ក្រសួងកំពុងរៀបចំព្រះរាជក្រឹត្យ​បង្កើត​មន្ទីរ​ពិសោធន៍កសិកម្មជាតិ ដើម្បីជំរុញការងារពិសោធន៍វិស័យកសិកម្ម​ឱ្យសម្រេច​បាន​តាម​ស្តង់ដារ​អន្តរជាតិ និងព្រះរាជក្រឹត្យបង្កើតគណៈបសុពេទ្យ ដើម្បីលើកកម្ពស់​ក្នុងការគ្រប់គ្រង​វិជ្ជាជីវៈបសុពេទ្យ និងការចិញ្ចឹមសត្វ»

តែទោះជាយ៉ាងណាក៏ដោយ អ្នកបញ្ជាទិញបំណែកនៃសាច់បង្កកពីក្រៅប្រទេសមួយរូប លោក ហាន វីរៈ លើកឡើងថា លោកប្រហែលនឹងបោះបង់មុខរបរមួយនេះ ដោយសារតែសាច់បង្កក​ក្នុងស្រុកមិនមានគុណភាព។

លោកអះអាងថា នៅកម្ពុជាការផលិតសាច់បង្កកខ្វះលក្ខណៈបច្ចេកទេស ទាំងម៉ាស៊ីន​ទុកដាក់​សាច់ និងការកាត់សាច់ជាផ្នែកៗ តាមឆ្អឹងជំនី និងសាច់បីជាន់ជាដើម។

ការនាំចូលបំណែកនៃសាច់បង្កកនេះ លោកបានលក់សាច់បង្កកបន្តនៅតាម​ភោជនីយដ្ឋាន​នានា ដោយមានចន្លោះពី៥ទៅ១០តោនក្នុងមួយខែ។ លោកបញ្ជាក់ថា មិនមានអ្នកត្រូវការ​នោះ​ទេ ប្រសិនបើសាច់បង្កកនោះគ្មានគុណភាព។

ទន្ទឹមនេះ លោក វីរៈ ស្នើឱ្យក្រុមហ៊ុនផលិតបំណែកនៃសាច់បង្កក​ក្នុងស្រុកធ្វើការ​ផលិតឱ្យ​មាន​គុណភាព ទើបលោកគាំទ្រ។

លោកបន្ថែមថា៖ «ចំពោះខ្ញុំប្រហែលផ្អាកមុខរបរហ្នឹងហើយ ពីព្រោះសាច់ក្នុងស្រុកយើង វា​អត់​អាចបង្កកមានគុណភាពដូចស្រុកគេ ដោយសារខ្វះបច្ចេកទេសនិងសម្ភារៈ»

បំណែកសាច់ជ្រូករបស់អាជីវករដាក់លក់នៅក្នុងផ្សារអូរឫស្សី រាជធានីភ្នំពេញ នៅថ្ងៃទី១៧ ខែមករា ឆ្នាំ២០២៤។ (ខេមបូចា/ អាន វិចិត្រ)

ឆ្លើយតបចំពោះការពង្រឹងគុណភាពក្នុងការផលិតសាច់បង្កក អ្នកនាំពាក្យក្រសួងកសិកម្ម លោក ឃឹម ហ្វីណង់ បញ្ជាក់ថា ក្រសួងកសិកម្មកំពុងជំរុញលើកទឹកចិត្តឱ្យមានការផលិត​សាច់​បង្កក​ប្រកបដោយគុណភាព។

ការសម្រេចក្នុងការផ្អាកនាំចូលបំណែកនៃសាច់បង្កកនេះ លោក ហ្វីណង់ ថា គឺតបតាមការ​ស្នើសុំ​របស់សមាគមអ្នកចិញ្ចឹមសត្វនៅកម្ពុជា និងបន្ទាប់ពីអាជ្ញាធរ​បានសិក្សាពីករណី​នេះ​យ៉ាងម៉ត់ចត់។

យោងតាមការសិក្សា លោក បញ្ជាក់ថា អាជ្ញាធររកឃើញថា បំណែកនៃសាច់បង្កក (មិនមែន​សាច់​បង្កកទូទៅ) បានជះផលប៉ះពាល់អាក្រក់ដល់ការផ្គត់ផ្គង់ទីផ្សារ និងការប្រកួត​ប្រជែង​ក្នុង​វិស័យនេះ។

ជាមួយគ្នានេះ លោក ហ្វីណង់ ថា ការផ្អាកក្នុងរយៈពេល៦ខែ ក៏ដើម្បីទុកពេលឱ្យ​អ្នកចិញ្ចឹម​សត្វ​រៀបចំខ្លួន និងបង្កើនសមត្ថភាពក្នុងការផលិតបំណែកសាច់បង្កកឱ្យមានគុណភាព ហើយ​លោកសង្ឃឹមថា បន្ទាប់ពីរដ្ឋាភិបាលអនុញ្ញាតឱ្យនាំចូលសាច់បង្កកវិញ អ្នកចិញ្ចឹមសត្វ​​នៅ​កម្ពុជា​​នឹងមានសមត្ថភាពក្នុងការប្រកួតប្រជែងជាមួយសាច់បង្កកមកពីក្រៅប្រទេស។

លោកបញ្ជាក់ថា៖ «កន្លងមកអត់ដែលមានបានធ្វើការហាមឃាត់ទេ ឥឡូវផ្អាកមួយរយៈ [៦ខែ] ដើម្បី​ឱ្យ​ឧស្សាហកម្មហ្នឹងគាត់អាចស្ដារការប្រកួតប្រជែងរបស់គាត់ឡើងវិញបាន»

បន្ថែមពីលើនេះ លោក ហ្វីណង់ អះអាងថា ក្រសួងក៏បានត្រួតពិនិត្យ​មើលអំពីអតិផរណា​ផង​ដែរ មុននឹងធ្វើការសម្រេចផ្អាកជាបណ្ដោះ​អាសន្ន ដើម្បីធានាថា មិនមានការឡើង​ថ្លៃទំនិញ​នោះទេ។

មហាសេដ្ឋីវិស័យកសិកម្មលោក ម៉ុង ឫទ្ធី មានប្រសាសន៍ថា ការផលិតសាច់បង្កកនៅកម្ពុជា​មានលក្ខណៈដូចទៅនឹង ប្រទេសអង់គ្លេសនិងអាមេរិក ហើយការផលិតនោះជាផ្នែកៗ ទាំង​ជើង និងក្បាលជាដើម ប៉ុន្តែពុំមានអ្នកបញ្ជាទិញឡើយ។ 

លោកបន្តថា បំណែកនៃសាច់បង្កកដែលនាំចូលមានតម្លៃថោក ដោយសារសាច់បង្កក​ទាំង​នោះ​ធ្វើពីសត្វដែលមានជំងឺ។ ជាកន្លែងសត្វឃាតដ្ឋាន និងដាក់ឱ្យសាច់ត្រជាក់

លោកបន្ថែមថា៖ «ខ្ញុំជឿថាយ៉ាងហោចណាស់ក៏គ្រាន់បើជាងអត់ដែរ រដ្ឋាភិបាលជួយ​ប៉ុណ្ណឹង»។ 

ប្រធានសមាគមអ្នកចិញ្ចឹមសត្វនៅកម្ពុជា លោក ស្រ៊ុន ពៅ មានប្រសាសន៍ថា មានក្រុមហ៊ុន​ចំនួន២ ដែលមានកន្លែងសត្វឃាតដ្ឋាន និងកាប់សាច់ដើម្បីលក់ឱ្យឈ្មួញទិញសាច់បង្កក ក្នុង​នោះ​មានក្រុមហ៊ុន ស៊ីភី និង​ក្រុមហ៊ុន អឹមខេ។

លោកបានអះអាង បច្ចុប្បន្នេះ មានឈ្មួញកណ្ដាលប្រមាណ៤នាក់ បានមកទាក់ទង​ខាង​សមាគម​​ដើម្បី​បញ្ជាទិញសាច់បង្កក បន្ទាប់ពីរដ្ឋាភិបាលសម្រេចផ្អាកជាបណ្ដោះអាសន្ន​ក្នុង​រយៈពេលខ្លី​ខាង​មុខនេះ។

លោកថ្លែងថា៖ «វាជាកត្តាមួយល្អហើយ​ កត្តាមួយដែលសមាគមយើងចង់បាន»

កសិករចិញ្ចឹមជ្រូកមួយរូបនៅខេត្តតាកែវ លោក ស៊ន ស៊ិន និយាយថា បច្ចុប្បន្នលោកបាន​ផ្អាកការចិញ្ចឹមជ្រូកជាបណ្ដោះអាសន្ន ដោយសារតម្លៃថោក ខណៈចំណីចិញ្ចឹមសត្វជ្រូកថ្លៃ។

បើទោះបីជារដ្ឋាភិបាលប្រកាសផ្អាកនាំចូលសាច់បង្កកមួយរយៈពេលក៏ដោយ សម្រាប់លោក ស៊ិន នៅតែមានការភ័យខ្លាចចំពោះការធ្លាក់ថ្លៃនៃតម្លៃសាច់ជ្រូកដដែល។ 

តែយ៉ាងណា លោកថា នៅពេលដែលសាច់ជ្រូកហក់ឡើងខ្ពស់បន្ទាប់​ពីរដ្ឋាភិបាលផ្អាកការ​នាំចូលបំណែកនៃសាច់បង្កក លោកនឹងចាប់ផ្ដើមប្រកបរបរចិញ្ចឹម​ជ្រូក​នេះ​សាឡើងវិញ។

លោកបន្ថែមថា៖ «ខ្ញុំរអា ដាក់ខាតៗ វា [សាច់ជ្រូក] ថោក ចំណីថ្លៃ»

បើតាមរបាយការណ៍បូកសរុបការងាររបស់ក្រសួងកសិកម្ម នៅឆ្នាំ២០២៣ និងទិសដៅ​ឆ្នាំ​២០២៤ បានឱ្យដឹងថា នៅឆ្នាំ២០២៣ កម្ពុជាបាននាំចេញផលិតផលកសិកម្ម​ចំនួន ៨៤៤៩៤១៤,៣៦តោន ដោយបានធ្លាក់ចុះ១,៩ភាគរយ​ បើប្រៀបធៀបរយៈពេលដូចគ្នា​ នៅឆ្នាំ២០២២។

របាយការណ៍ដដែលបន្តថា នៅឆ្នាំ២០២៣ ការចិញ្ចឹមសត្វលក្ខណៈពាណិជ្ជកម្មបានកើនឡើង ០,៥ ភាគរយ ធៀបឆ្នាំ២០២២ ប៉ុន្តែអត្រានៃការចិញ្ចឹមសត្វលក្ខណៈគ្រួសារ​បានថយចុះ ០,៨៤​ ភាគរយ បើធៀបនៅឆ្នាំ២០២២ ដោយការថយចុះនេះបណ្ដាលមកពីតម្លៃសត្វ​រស់​ថយចុះ។

ក្រសួងបានបង្ហាញថា ក្នុងឆ្នាំ២០២៣ ផលិតកម្មសត្វក្នុងស្រុកអាចផ្គត់ផ្គង់​សាច់បាន​ប្រមាណ​ ៣២០ពាន់​តោន ស្មើនឹង៩៨ភាគរយនៃតម្រូវការសរុប។ បរិមាណសាច់ដែលខ្វះខាតត្រូវបាន​នាំចូលពីបរទេស ដើម្បីបំពេញតម្រូវការសម្រាប់ម្ហូបអាហារ និងធ្វើជាវត្ថុធាតុដើម​ផលិតចំណី​សត្វលម្អ​ដូចជា ឆ្កែ និងឆ្មាជាដើម។ 

ដើម្បីបំពេញតម្រូវការនេះ កម្ពុជា បាននាំចូលសាច់ និងផលិតសត្វសរុប ៩,២៥ ពាន់តោន ក្នុងនោះ​មាន​ជ្រូកកណ្ដុល ៣ពាន់ក្បាល ពពែ៣៣៦ក្បាល ចៀម ៤០០ក្បាល មាន់សាច់​រស់ ៣,៥៥លានក្បាល ទាសាច់រស់ ១៧០ពាន់ក្បាល (៤,៤៩ពាន់តោន) និងសាច់ចម្រុះ មាន​សាច់​ជ្រូក ចៀម មាន់ ទា​ ក្ងាន ក្រួច គោ ក្របី ប្រហិត សាច់ក្រក ហ្រ្វូម៉ា ​និង​ផលិតផល​សត្វ (៤,៧៦ពាន់តោន)៕

610 views

ព័ត៌មានថ្មីៗ

អត្ថបទពេញនិយម