សមាគមសម្ព័ន្ធអ្នកសារព័ត៌មានកម្ពុជា

ក្រុមហ៊ុនឯកជនសម្រុកឈូសឆាយដីព្រៃតំបន់ភ្នំតាម៉ៅ ខណៈសាធារណជននិងសង្គមស៊ីវិលផ្ទុះការរិះគន់

គ្រឿងចក្រត្រៀមឈូសឆាយតំបន់ដីព្រៃភ្នំតាម៉ៅដែលរដ្ឋបានផ្ទេរឲ្យក្រុមហ៊ុនឯកជន ដើម្បីអភិវឌ្ឍ នៅឃុំក្រាំងធ្នង់ស្រុកបាទី ខេត្តតាកែវ។ រូបថតថ្ងៃទី៤ ខែសីហា ឆ្នាំ២០២២។ ខេមបូចា/ សុវណ្ណ ស្រីពេជ្រ
គ្រឿងចក្រត្រៀមឈូសឆាយតំបន់ដីព្រៃភ្នំតាម៉ៅដែលរដ្ឋបានផ្ទេរឲ្យក្រុមហ៊ុនឯកជន ដើម្បីអភិវឌ្ឍ នៅឃុំក្រាំងធ្នង់ស្រុកបាទី ខេត្តតាកែវ។ រូបថតថ្ងៃទី៤ ខែសីហា ឆ្នាំ២០២២។ ខេមបូចា/ សុវណ្ណ ស្រីពេជ្រ

ដីព្រៃតំបន់ភ្នំតាម៉ៅរាប់រយហិកតាត្រូវបានឈូសឆាយយ៉ាងឆាប់រហ័ស ដោយក្រុមហ៊ុនឯកជន​ដែលប្រើប្រាស់គ្រឿងចក្រប្រមាណ៣០គ្រឿងកាប់ឆ្ការយ៉ាងសកម្ម និងមានកងកម្លាំងយាម​កាម​​យ៉ាង​តឹងរ៉ឹង។ នេះបើតាមការអះអាងរបស់ប្រជាពលរដ្ឋនិងព្រះសង្ឃគង់នៅវត្តភ្នំតាម៉ៅ។

ព្រះចៅអធិការនៅអាស្រមថ្មអន្ទោង ស្ថិតក្នុងតំបន់ភ្នំតាម៉ៅ ព្រះតេជព្រះគុណ សុទ ផល្លី មាន​សង្ឃ​ដីកាថា មកទល់ពេលនេះដីព្រៃនៅតំបន់ភ្នំតាម៉ៅរងការឈូសឆាយ​អស់ប្រមាណ​៣០០​ហិកតាទៅហើយ ដោយមានគ្រឿងចក្រប្រហែល៣០គ្រឿង សម្រុកកាប់ឆ្ការព្រៃតូចធំក្នុង​តំបន់នេះ។

ព្រះអង្គបានបន្តថា តែងតែឮសម្លេងសត្វតូចធំរត់ និងផ្អើល ហើយព្រះសង្ឃ​សោក​ស្ដាយ​ជាខ្លាំងមិនអាចរៀបរាប់បាន​នៅពេលដែលឃើញសត្វព្រៃ និងដើមឈើតូចធំត្រូវបាន​កាប់ដើម្បីអភិវឌ្ឍន៍បែបនេះ។

ព្រះអង្គមានសង្ឃដីកាថា៖ «ស្ដាយខ្លាំង​ ស្ដាយនិយាយលែងចេញ អារម្មណ៍នេះវាអណ្ដែត​អណ្ដូង​ស្រាលខ្លួន ធ្លាប់តែមានព្រៃឈើស្រស់បំព្រង ដល់គេឈូសអស់និយាយលែងចេញ»។

ព្រះអង្គបានឱ្យដឹងថា តាមពិតព្រៃតំបន់នេះមានឈើដែលមានតម្លៃ និងមានសត្វរស់នៅ​អាស្រ័យ​ក្នុងព្រៃ មិនដូចការលើកឡើងរបស់រដ្ឋបាលព្រៃឈើឡើយ។ ហើយទំហំព្រៃតំបន់នេះ តាមដែលព្រះសង្ឃសាកសួរមេព្រៃ មានប្រមាណ៤ពាន់ជាងហិកតា ហើយបច្ចុប្បន្នមាន​៤​ក្រុមហ៊ុន​កំពុងទទួលបានសិទ្ធិកាន់កាប់អភិវឌ្ឍន៍ ដែលរដ្ឋទើបតែផ្ដល់សិទ្ធិឱ្យ។

តាមការសង្កេតឃើញថានៅតាមផ្លូវជុំវិញកន្លែងក្រុមហ៊ុនឯកជនកាប់ឆ្ការ ការពារ​ដោយ​កង​កម្លាំង ដើម្បីរារាំងមិនឱ្យមានពលរដ្ឋ ឬអ្នកក្រៅចូលឡើយ។ មិនត្រឹមតែប៉ុណ្ណោះ​មាន​ទាំង​សង់រោងសម្រាប់យាមនៅដើមផ្លូវចូលទៀតផង។

ពលរដ្ឋមួយរូបរស់នៅភូមិថ្នល់ទក្សិណ ឃុំក្រាំងធ្នង់ ស្រុកបាទី  គឺលោក ធូ សាមុត ប្រាប់​ខេមបូចា ​ថា មកទល់ពេលនេះ មានគ្រឿងចក្រប្រមាណ៣០គ្រឿង កំពុងឈូសឆាយ​យ៉ាង​សកម្ម ថែមទាំងមានកងកម្លាំងប្រដាប់អាវុធយាមតាមផ្លូវ មិនឱ្យមានពលរដ្ឋចូលឡើយ។ លោក​មិនពេញចិត្តទាល់តែសោះចំពោះការអភិវឌ្ឍរបស់ក្រុមហ៊ុនឧកញ៉ាធំៗនៅស្រុកខ្មែរ ហើយ​លោកស្គាល់ច្បាស់ថាដីដែលកំពុងឈូសឆាយនោះជារបស់ឧកញ៉ា ឡេង ណាវ៉ាត្រា និងពុង ឃាវសែ។

លោករៀបរាប់ថា៖ «ខ្ញុំមានតែការសោកស្ដាយ បានតែកម្ទេច ចុះអាកន្លែងដទៃមិនធ្វើ មកធ្វើអី​កន្លែងធម្មជាតិទៅវិញ? អាកន្លែងព្រៃធម្មជាតិសុខសាន្តគេរស់នៅ»

លោកឱ្យដឹងថា ការអភិវឌ្ឍនេះ មិនត្រឹមតែប៉ះពាល់សត្វព្រៃ និងគម្របធម្មជាតិទេ ថែមទាំង​ប៉ះ​ពាល់ដីចំណីរបងផ្ទះប្រជាពលរដ្ឋប្រមាណ២០០ខ្នងផ្ទះទៀតផង រហូតមកដល់ពេលនេះ​មិនមានក្រុមហ៊ុនណាចេញសងឡើយ។​

ពលរដ្ឋរូបនេះអះអាងថា នៅពេលដែលដីព្រៃរាប់រយហិកតាទាំងនេះ ត្រូវបានឈូសឆាយ និងអភិវឌ្ឍន៍ទៅជាបុរី អគារទំនើប ប្រជាជននឹងបាត់បង់ចំណូល​ពីការអាស្រ័យផល​នៅក្នុង​ព្រៃនោះ។

លោក សាមុត បន្ថែមថា៖ «បាត់បង់ធំ ព្រោះអីប្រជាជន១០%គាត់អាស្រ័យផលពីក្នុងព្រៃ ដូចជាជីកទំពាំង គោះអង្រ្កង ជីកក្ដួច ជីកដំឡូងទៀន ដល់តែអភិវឌ្ឍន៍គាត់​រកចំណូល​បាន​ឯណា ក្រីក្រ»។

សកម្មភាពដឹកគ្រឿងចក្រចូលតំបន់ដីព្រៃភ្នំតាម៉ៅដើម្បីឈូសឆាយក្នុងការអភិវឌ្ឍ​ ក្នុងស្រុកបាទី ខេត្តតាកែវ។ រូបថតថ្ងៃទី៤ ខែសីហា ឆ្នាំ២០២២។ ខេមបូចា/ សុវណ្ណ ស្រីពេជ្រ

រីឯលោក ហាក់ មាំង ជាមេភូមិ អាយុ៦២ឆ្នាំ ជាមេភូមិបាទី ថ្លែងថា ការអភិវឌ្ឍនេះមិនបាន​ប៉ះពាល់​ដល់ប្រជាពលរដ្ឋ និងសត្វព្រៃនៅភ្នំតាម៉ៅឡើយ ថែមទាំងជារឿងល្អទៀតផង។

លោក មាំង ថ្លែងថា៖ «ធ្វើម៉េចបើប្រទេសជាតិយើងវាអភិវឌ្ឍន៍ចឹង ដីហ្នឹងសម្បត្តិរបស់រដ្ឋ ចឹងរដ្ឋគាត់អ្នកអភិវឌ្ឍន៍ ធ្វើម៉េចឱ្យតែទៅមុខ»។

ជុំវិញករណីនេះ រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានបដិសេធមិនបកស្រាយ ដោយឱ្យទាក់ទងទៅរដ្ឋបាលព្រៃឈើ។​

លោកបន្តទៀតថា៖ «ចូរប្អូនធ្វើទំនាក់ទំនងជាមួយរដ្ឋបាលព្រៃឈើ ដែលបានផ្តល់លេខ​ជូន​កាល​ពីថ្ងៃម្សិលមិញរួចហើយ តាមរយៈប្រកាសព័ត៌មាន»។

ចំណែកមន្ទីរកសិកម្ម រុក្ខាប្រមាញ់ និងនេសាទខេត្តតាកែវ លោក ញិប ស្រ៊ន និងប្រធាន​ឧទ្យានសួនសត្វ និងមជ្ឈមណ្ឌលសង្រ្គោះសត្វព្រៃភ្នំតាម៉ៅ គឺលោក ញឹក រតនៈ ពេជ្រ មិនអាច​ទាក់ទងសុំការបកស្រាយបានឡើយ។

បើតាមសេចក្ដីប្រកាសមួយកាលពីថ្ងៃទី៤ ខែសីហា រដ្ឋបាលព្រៃឈើ បានឱ្យដឹងថា ព្រៃនៅ​ភ្នំតាម៉ៅ ជាប្រភេទអាកាស្យា ប្រេងខ្យល់ និងឈើធម្មជាតិ និងពោរពេញដោយដីខ្សាច់ ដូច្នេះ​ដើមឈើមិនមានការលូតលាស់ល្អទេ។ ដូចនេះហើយ ទើបរាជរដ្ឋាភិបាលសម្រេចយកតំបន់​នេះ​​សម្រាប់ធ្វើការអភិវឌ្ឍ ដោយសារជាតំបន់មួយដែលនៅក្បែរទីក្រុង ក្បែរព្រលាន​យន្តហោះ​ថ្មី និងកៀកតំបន់ទេសចរណ៍ទន្លេបាទី។

សេចក្ដីប្រកាសបានបញ្ជាក់ថា៖ «ការដោះដូរ គឺអនុវត្តដោយមានភាពតឹងរ៉ឹង មានការវាយតម្លៃ​ពីក្រុមហ៊ុនឯកជន និងមានគណកម្មការ ឯកជនភាវូនីយកម្មដែលមានអន្តរក្រសួងពិនិត្យនិង​វាយតម្លៃអំពីការដោះដូរយ៉ាងត្រឹមត្រូវ»។

រដ្ឋបាលព្រៃឈើបានបញ្ជាក់ថា តំបន់នេះ ពុំមានសត្វព្រៃសំខាន់ៗ ជិតផុតពូជ និងកម្រ ដូច​ការ​លើកឡើងនោះទេ ហើយតំបន់នេះមានជ្រូកព្រៃដែលតែងតែមករំខានដល់ដំណាំ​ប្រជាពលរដ្ឋ។ សត្វព្រៃដែលលើកឡើងកន្លងមកគឺជាសត្វព្រៃបាន ថែរក្សានៅក្នុង​ឧទ្យាន​សួនសត្វភ្នំតាម៉ៅដែលមានសុវត្ថិភាព១០០% ហើយការអភិវឌ្ឍនេះមិនមានការប៉ះពាល់​ទាល់តែ​សោះ។

សេចក្ដីប្រកាសដដែលបន្ថែមថា៖ «ការអភិវឌ្ឍតែងតែប្រើប្រាស់ដីសម្រាប់អភិវឌ្ឍមិនមែនមាន​តែ​នៅ​​តំបន់ភ្នំតាម៉ៅនោះទេ ឲ្យតែតំបន់អភិវឌ្ឍមាន ផលប៉ះពាល់តិចតួច ហើយត្រឡប់​មក​វិញ​​បានផ្តល់ការងារជូនប្រជាពលរដ្ឋច្រើននៅតំបន់នោះ និងការផ្តល់កំណើនសេដ្ឋកិច្ច​ជាតិ»។

គ្រឿងចក្រត្រៀមឈូសឆាយតំបន់ដីព្រៃភ្នំតាម៉ៅដែលរដ្ឋបានផ្ទេរឲ្យក្រុមហ៊ុនឯកជន ដើម្បីអភិវឌ្ឍ នៅឃុំក្រាំងធ្នង់ ស្រុកបាទី ខេត្តតាកែវ។ រូបថតថ្ងៃទី៤ ខែសីហា ឆ្នាំ២០២២។ ខេមបូចា/ សុវណ្ណ ស្រីពេជ្រ

យោងតាមឯកសារ​ផ្លូវ​ការ​មួយ​ចេញផ្សាយដោយវីអូឌីកាលពីថ្ងៃទី២ ខែសីហា ដីព្រៃតំបន់​ភ្នំតាម៉ៅ គឺមាន៤ក្រុមហ៊ុនដែលទទួលបានសិទ្ធិកាន់កាប់ ក្នុងនោះមានក្រុមហ៊ុនឯកជនមួយ​មិន​ច្បាស់​ពី​អត្តសញ្ញាណបានដី៥០០ហិកតា ពីរដ្ឋបាលព្រៃឈើ។ ចំណែកផ្ទៃដី៧០០ហិកតា​ផ្សេង​ទៀត បច្ចុប្បន្ន​ត្រូវបានស្នើសុំដោយ​ក្រុម​ហ៊ុន TP Moral Group របស់​ឧកញ៉ា ឃុន សៀខណៈ​រដ្ឋមន្រ្តីក្រសួងកសិកម្ម អះអាងថាទីតាំងដីដ៏ធំនេះត្រូវបានលក់ទៅឱ្យ​ក្រុមហ៊ុន​អភិវឌ្ឍន៍ និងម្ចាស់ផលិកម្ម​ចម្រៀង​កាឡាក់ស៊ី របស់​ឧកញ៉ា ឡេង ណាវ៉ាត្រា

ទន្ទឹមនឹងនេះ ក៏មានសេចក្ដីប្រកាសមួយរបស់ម្ចាស់ក្រុមហ៊ុន ឆាយណា ប៉ោយប៉ែត ស៊ៃថឺឡាយថ៍ ទំនងជាក្រុមហ៊ុនមួយក្នុងចំណោមក្រុមហ៊ុន៤ខាងលើ ស្នើសុំកម្លាំងសត្ថកិច្ច ដើម្បីរក្សាសន្តិសុខសណ្ដាប់ធ្លាប់ក្នុងការចាប់ផ្ដើមអនុវត្តគម្រោងឈូសឆាយ និងអភិវឌ្ឍន៍​ផ្ទៃដី៥២៦,៦ ហិកតា នៅឃុំក្រាំងធ្នង់ និងឃុំកណ្តឹង ស្រុកបាទី ខេត្តតាកែវ។

ជុំវិញភាពចម្រូងចម្រាស ដែលរដ្ឋប្រគល់ដីព្រៃភ្នំតាម៉ៅទៅឱ្យក្រុមហ៊ុនឧកញ៉ាអភិវឌ្ឍន៍ មាន​មតិសាធារណៈនិងក្រុមសង្គមស៊ីវិលបានរិះគន់ និងធ្វើពហិការមិនគាំទ្រជំនួញរបស់​ឧកញ៉ា​ទាំងនោះ។

ដោយឡែក កាលពីថ្ងៃទី១ ខែកក្កដា អង្គភាពប្រឆាំងអំពើពុករលួយ (ACU)​ ​បានអះអាងថា អង្គភាពខ្លួន រកមិនឃើញសោះឡើយ ពីភាពមិនប្រក្រតីចំពោះការដោះដូរដីនៅ​ភ្នំតាម៉ៅ​នោះ​ទេ។​ បន្ថែមពីនេះ ACU បានឱ្យដឹងថា រដ្ឋនឹងបង្កើតទីតាំង៣បន្ថែមទៀត​ ​​នៅខេត្តកំពង់ឆ្នាំង សៀមរាប និងមណ្ឌលគិរី ដែលមាន​ទំហំធំជាង ដើម្បីជំនួសតំបន់សួនសត្វភ្នំតាម៉ៅនេះ។

បើយោងតាមលិខិត​ចុះ​ថ្ងៃ​ទី​១៤ ខែ​មករា ឆ្នាំ​២០២២ របស់​ទីស្ដីការ​គណៈរដ្ឋមន្ត្រី ​បានឱ្យ​ដឹង​ថា រដ្ឋាភិបាល​បាន​យល់ព្រម​ឱ្យ​មាន​ការ​ដោះដូរ​ដី​ចំនួន ៣០០​ហិកតា នៅ​ស្ថានីយ​ចិញ្ចឹម​គោ​ពូជ​ភ្នំ​តាម៉ៅ និង​ដី ៥០០​ហិកតារ​របស់​រដ្ឋបាល​ព្រៃឈើ​ភ្នំ​តាម៉ៅ​ឱ្យ​ទៅ​ក្រុមហ៊ុន «ខ្មែរ ហ្វ្រេស មីល ឯ.ក» ដើម្បី​ធ្វើការ​អភិវឌ្ឍ។លិខិត​ដដែល​បញ្ជាក់​ថា ដី​ចំនួន៣០០​ហិកតា​នៅ​ស្ថានីយ​ចិញ្ចឹម​គោ​ពូជ​ភ្នំ​តាម៉ៅ នឹង​ត្រូវ​ដោះដូរ​ជាមួយ​ដី​ទំហំ៤០០​ហិកតា​នៅ​ស្រុក​ទឹកផុស ខេត្ត​កំពង់ឆ្នាំង។

ចំណែក​ដី​ចំនួន៥០០​ហិកតាទៀត​របស់​រដ្ឋបាល​ព្រៃឈើ​ភ្នំ​តាម៉ៅ ត្រូវ​បាន​ផ្លាស់​ទៅ​បង្កើត​នៅ​សួនសត្វលើ​ផ្ទៃដី​ទំហំ២៥០​ហិកតា ស្ថិត​ក្នុង​ស្ថានីយ​ស្ដារ និង​អភិវឌ្ឍន៍​ព្រៃឈើ​បន្ទាយស្រី ក្នុង​ស្រុក​បន្ទាយស្រី និង​ស្រុក​ស្វាយលើ ខេត្ត​សៀមរាប។

គ្រឿងចក្រកំពុងធ្វើផ្លូវចូលដីព្រៃតំបន់ភ្នំតាម៉ៅដែលពលរដ្ឋប្រាប់ថាជាដីរបស់លោក​ឧកញ៉ា ឡេង ណាវ៉ាត្រា។ រូបថតថ្ងៃទី៤ ខែសីហា ឆ្នាំ២០២២។ ខេមបូចា/ សុវណ្ណ ស្រីពេជ្រ

លោក សាន់ ម៉ាឡា មន្ត្រីតស៊ូមតិរបស់សមាគមបណ្តាញយុវជនកម្ពុជា(CYN) លើកឡើងថា គម្រោងឈូសឆាយព្រៃនៅតំបន់ភ្នំតាម៉ៅ គឺជារឿងមិនសមទំនង និងផ្ទុយពីស្មារតីរបស់​ក្រុម​អ្នកស្រឡាញ់បរិស្ថាន និងប្រជាជនចង់បាន។

លោកស្នើឱ្យរដ្ឋាភិបាលបន្តរក្សាទុកតំបន់ព្រៃមួយនេះទុកជាព្រៃធម្មជាតិ ព្រោះវាបានរួម​ចំណែកជួយសេដ្ឋកិច្ចរបស់ប្រជាជនអាស្រ័យផលក្បែរនោះ និងចំណូលចូលរដ្ឋផងដែរ។ 

លោក ម៉ាឡា ក៏បានបដិសេធទាំងស្រុងចំពោះការលើកឡើងរបស់រដ្ឋបាលព្រៃឈើ ថ្វីត្បិតតែ​មិន​មែន​អ្នកជំនាញ តែលោកអះអាងថាដីនៅតំបន់ព្រៃព្រះរកា និងព្រៃឡង់ មានសណ្ឋាន​ដី​ដូចគ្នា ម្ដេច​ក៏មានដើមឈើលូតលាស់ល្អ។​ ហេតុផលមួយទៀត បើដីតំបន់ភ្នំតាម៉ៅមិនល្អ ហេតុអ្វីកាល​ពី២០ឆ្នំាមុន ជ្រើសយកតំបន់នេះមកដាំដើមឈើទៅវិញ?

លោក ម៉ាឡា ថ្លែងថា៖ «វាជារឿងដែលអត់គួរឱ្យជឿ ដែលក្រសួងថាដោយសារតែ​សត្វជ្រូក​ព្រៃទៅរំខាន និងស៊ីបំផ្លាញដំណាំរបស់ប្រជាពលរដ្ឋ ជាមូលហេតុចម្បងមួយដែលក្រសួង​សម្រេច​ឈូសឆាយព្រៃនោះ វាបង្ហាញពីភាពឆោតល្ងង់ និងខ្វះមធ្យោបាយរបស់អាជ្ញាធរ​ដែនដី»

លោកអះអាងថា ដើមចមនៃការអភិវឌ្ឍព្រៃតំបន់ភ្នំតាម៉ៅនេះ ទំនងជាក្រុមហ៊ុនឯកជន និងមន្រ្តីពាក់ព័ន្ធសំឡឹងឃើញពីផលប្រយោជន៍ដែលទទួលបានពីគម្រោងអចលនទ្រព្យ ច្រើនជាងគុណតម្លៃនៃការអភិរក្សព្រៃឈើ និងសត្វព្រៃ ពិសេសតម្លៃនៃទេសចរណ៍​អេកូធម្មជាតិ។

លោក និក ម៉ាក នាយកកម្មវិធីសង្គ្រោះ និងថែទាំសត្វព្រៃនៃអង្គការសម្ព័ន្ធមិត្តសត្វព្រៃ បាន​ចេញសេចក្ដីថ្លែងការណ៍មុនពេលមានការឈូសឆាយព្រៃ លោកបានធ្វើការ​អភិរក្ស​សត្វព្រៃ​នៅស្រុកខ្មែរ២០ឆ្នាំ ហើយសំណូមពររដ្ឋាភិបាលកម្ពុជា ឱ្យពិចារណាឡើងវិញ​នូវ​គម្រោង​អភិវឌ្ឍន៍​នានា ដើម្បីការពារព្រៃភ្នំតាម៉ៅទុកជាជម្រកសុវត្ថិភាព​សម្រាប់​សត្វព្រៃ​គ្រប់​ប្រភេទ និងជាកន្លែងកម្សាន្តធម្មជាតិនៅជិតក្រុងភ្នំពេញ៕

273 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម