សមាគមសម្ព័ន្ធអ្នកសារព័ត៌មានកម្ពុជា

ក្រុមហ៊ុនឯកជនមួយទទួលបានដីនៅមាត់ទន្លេជិត១៣ហិកតា ខណៈ​ប្រជាពលរដ្ឋជាង៣០០គ្រួសារប្រឈមការបណ្ដេញចេញ

ប្រជាពលរដ្ឋនៅភូមិផ្សារតូចប្រឈមនឹងការបណ្ដេញចេញបន្ទាប់ពីរដ្ឋាភិបាលបានប្រគល់ដីនៅតាមបណ្ដោយមាត់ទន្លេសាបទៅក្រុមហ៊ុនឯកជនមួយសម្រាប់អភិវឌ្ឍន៍។ រូបភាពថតថ្ងៃទី១៥ ខែមីនា ឆ្នាំ២០២៣។ ខេមបូចា/ព្រីង សំរាំង
ប្រជាពលរដ្ឋនៅភូមិផ្សារតូចប្រឈមនឹងការបណ្ដេញចេញបន្ទាប់ពីរដ្ឋាភិបាលបានប្រគល់ដីនៅតាមបណ្ដោយមាត់ទន្លេសាបទៅក្រុមហ៊ុនឯកជនមួយសម្រាប់អភិវឌ្ឍន៍។ រូបភាពថតថ្ងៃទី១៥ ខែមីនា ឆ្នាំ២០២៣។ ខេមបូចា/ព្រីង សំរាំង

ប្រជា​ពល​រដ្ឋ​ក្រី​ក្រ​ជាង​៣០០​គ្រួសារ​រស់​នៅ​ក្នុង​ខណ្ឌឫស្សីកែវ ខាង​ជើង​ស្ពាន​ជ្រោយចង្វារ កំពុង​ប្រឈម​នឹង​ការ​បណ្ដេញ​ចេញ​ពី​លំនៅ​ដ្ឋាន ដើម្បី​យក​ដី​ឱ្យ​ក្រុម​ហ៊ុន​ធ្វើ​ការ​អភិវឌ្ឍនៅ​ទី​តាំង​នោះ​។​​

លោក​នាយក​រដ្ឋ​មន្ត្រី​ ហ៊ុន សែន កាលពី​ខែ​កញ្ញា ឆ្នាំ​២០២២ បាន​ចុះ​ហត្ថលេខា​លើ​អនុក្រឹត្យ​មួយ​ដោយ​សម្រេច​ផ្ដល់​ដី​ទំហំ​១២,៩៨​ហិកតា​នៅ​តាម​បណ្ដោយ​មាត់​ទន្លេ​ទៅ​ឱ្យ​ក្រុម​ហ៊ុន​ឯកជន​មួយ​ឈ្មោះ​ថា​ អ៊ែតវ៉ានស៍ ត្រាស់ (ខេមបូឌា) ឯ.ក​ (Advanced Trust (Cambodia) Co., Ltd) ដែល​មាន​ស្រ្តី​ម្នាក់​ឈ្មោះ​ថា​ លន់ ណារី ជា​ម្ចាស់​កម្មសិទ្ធិ​។ ផ្ទៃ​ដី​ផ្ដល់​ទៅ​ឲ្យ​ក្រុម​ហ៊ុន​នោះ​មាន​ទីតាំង​នៅ​ក្នុង​ភូមិ​ផ្សារ​តូច សង្កាត់​ទួលសង្កែ​១ និង​សង្កាត់​ឫស្សី​កែវ ដែល​មាន​តម្លៃ​ប្រហាក់​​ប្រហែល​នឹង​១០​លាន​ដុល្លារ​។​

ក្រុម​ហ៊ុន​​ អ៊ែតវ៉ានស៍ ត្រាស់ (ខេមបូឌា) ឯ.ក​ បាន​ចុះ​បញ្ជី​នៅ​ក្រ​សួង​ពាណិជ្ជកម្ម​កាល​ពី​ឆ្នាំ​២០១៩ និងបាន​ដាក់​ឈ្មោះ​អ្នកស្រី លន់ ណារី ជា​នាយក និង​ជា​ប្រធាន​ក្រុម​ហ៊ុន​។​

ពេល​ទាក់​ទង​តាម​ទូរស័ព្ទ​ អ្នក​ស្រី ណារី​ បាន​បដិសេធ​ថា​ខ្លូន​ជា​ម្ចាស់​ក្រុមហ៊ុន​។​

អ្នក​ស្រី​បាន​លើក​ឡើង​ថា៖ «​[លោកនាយក] គាត់​បាន​ចេញ​ទៅ​ក្រៅប្រទេស ហើយ​គាត់​បាន ទុក​ទូរស័ព្ទ​គាត់​នៅ​នឹង​ខ្ញុំ»។ អ្នកស្រី​បន្ត​ថា៖ «ខ្ញុំ​មិន​បាន​ដឹង​ច្បាស់​ពី​រឿង​នេះ​ទេ។ ខ្ញុំ​ជា​សាច់​ញាតិ​របស់​គាត់»។​

យ៉ាងណា អ្នកស្រី​មិ​ន​បាន​ប្រាប់​ពី​អត្តសញ្ញាណ​អ្នក​ដែល​អ្នកស្រី​អះអាង​ថាជា​ម្ចាស់​ក្រុម​ហ៊ុន​ពិត​ប្រាកដនោះទេ​។​​

កាល​ពី​ខែ​តុលា ឆ្នាំ​មុន​ ខេមបូចា បាន​ចុះ​ផ្សាយ​ថា​ប្រ​ជា​ពល​រដ្ឋ​ប្រហែល​ជា​៨០​ភាគរយ​នៃ​​​ប្រជា​ពល​រដ្ឋ​៣០០​គ្រួសារ​មាន​ភាព​ស្ទាក់ស្ទើរ​ក្នុង​ការ​ផ្លាស់​ទី​លំនៅ​ទៅ​កាន់​ឃុំ​សំរោង ក្នុង​ខណ្ឌ​ព្រែកព្នៅ ដែល​មាន​ចម្ងាយ​១០​គីឡូម៉ែត្រ​ពី​ទី​តាំង​បច្ចុប្បន្ន​។​ ការ​ដោះ​ដូរ​នេះ គឺ​ដើម្បី​បើក​ផ្លូវ​ឱ្យ​ក្រុម​ហ៊ុន​​ អ៊ែតវ៉ានស៍ ត្រាស់ (ខេមបូឌា) ឯ.ក យក​ដី​អភិវឌ្ឍន៍​។​

ប្រ​ជា​ពល​រដ្ឋ​ម្នាក់​ដែល​រស់​នៅ​លើ​ទី​តាំង​នេះ បាន​ប្រាប់​ខេមបូចា ​កាលពី​ខែ​តុលា ឆ្នាំ​មុន​ថា៖ «ខ្ញុំ​មិន​ចង់​[ចាកចេញ]​ទេ ប៉ុន្តែ​ខ្ញុំ​គ្មាន​ជំរើស»។ អាជ្ញាធរ​បាន​ចំណាយ​ពេល​អស់​ជា​ច្រើន​ខែ​ក្នុង​ការ​ដាក់​សម្ពាធ​ឱ្យ​ប្រ​ជា​ពល​រដ្ឋ​ចាកចេញ បន្ទាប់ពី​បានជូន​ដំណឹង​ពី​ការ​បណ្ដេញ​ចេញ​កាលពី​ខែ​កក្កដា ឆ្នាំមុន រួម​ទាំង​មាន​ការ​គំរាម​កំហែង​ចាប់​ខ្លួន និង​បាន​ចាប់​ផ្ដើម​វាយ​កំទេច​ផ្ទះ​ប្រ​ជា​​​ពល​រដ្ឋ​ដោយ​មិន​មាន​ការ​យល់ព្រម​ផង​ដែរ​។​

កម្មករ​ប្រុសៗ​កំពុង​ធ្វើ​ការ​នៅ​ការដ្ឋាន​សំណង់​នៅ​ជាប់ច្រាំង​ទន្លេ​សាប​ក្បែរ​ស្ពាន​ជ្រោយ​ចង្វារ ជាទី​ដែល​រដ្ឋាភិបាល​បាន​ផ្ដល់​ដី​ទំហំ​១២​ហិកតា​ទៅ​ឲ្យ​ក្រុម​ហ៊ុន​ឯកជន​សម្រាប់​អភិវឌ្ឍន៍​ក្នុង​ទី​ក្រុង​ភ្នំពេញ។ រូបភាព​ថត​ថ្ងៃទី​១៥ ខែមីនា ឆ្នាំ​២០២៣។ ខេមបូចា/ព្រីង សំរាំង
កម្មករ​ប្រុសៗ​កំពុង​ធ្វើ​ការ​នៅ​ការដ្ឋាន​សំណង់​នៅ​ជាប់ច្រាំង​ទន្លេ​សាប​ក្បែរ​ស្ពាន​ជ្រោយ​ចង្វារ ជាទី​ដែល​រដ្ឋាភិបាល​បាន​ផ្ដល់​ដី​ទំហំ​១២​ហិកតា​ទៅ​ឱ្យ​ក្រុម​ហ៊ុន​ឯកជន​សម្រាប់​អភិវឌ្ឍន៍​ក្នុង​ទី​ក្រុង​ភ្នំពេញ។ រូបភាព​ថត​ថ្ងៃទី​១៥ ខែមីនា ឆ្នាំ​២០២៣។ ខេមបូចា/ ព្រីង សំរាំង

មន្ត្រី​នរគបាល​ចូល​និវត្តន៍​វ័យ​៦៧​ឆ្នាំ លោក ឃឿន សាវុធ ដែល​បាន​រស់​នៅ​តាម​មាត់​ទន្លេ​ក្នុង​ផ្សារ​តូច២០​ឆ្នាំ​មក​ហើយ​នោះ មាន​ប្រសាសន៍​ថា លោក​យល់​ថា​ប្រ​ជា​ពល​រដ្ឋ​បាន​ទទួល​សំណង​មិន​សមរម្យ​នោះទេ បន្ទាប់​ពី​បាន​ទទួល​ការ​ជូន​ដំណឹង​ស្ដីពី​ការ​បណ្ដេញ​ចេញ​​កាលពី​ពីរ​ខែ​កន្លងទៅ​។​

លោក​ឱ្យ​ដឹងថា៖ «ជា​ទូទៅ​ យើង​មិន​ជំទាស់​ទៅ​នឹង​ការ​អភិវឌ្ឍ​ប្រទេស​ជាតិទេ ប៉ុន្តែពួកគេ​គួរតែ​​ផ្ដល់​សំណង​សមរម្យ​[ដល់ពួក​យើង]»។ លោក​បន្ថែម​ថា៖ «ខ្ញុំ​នឹង​មិន​ចាកចេញទេ បើ​សិន​ជា​គ្មាន​សំណង​សមរម្យ ពីព្រោះ​ថា​យើង​ត្រូវ​តែ​ចរចា​សម្រាប់​សំណង»។​

លោក​អះអាង​ថា អាជ្ញាធរ​បាន​សន្យា​ផ្ដល់​ដី​មួយ​កន្លែងក្នុង​ខណ្ឌព្រែក​ព្នៅ​​ដល់​រូប​លោក​។​

លោក​បន្តថា៖ «​ពួកគេ​មិ​នទាន់​បាន​កំណត់​ពេល​វេលា​សម្រាប់​រើចេញ​នៅ​ឡើយ​ទេ ប៉ុន្តែ​ពួកគេ​បាន​និយាយ​ថា​ពួកគេ​បាន​ត្រៀម​ដី​រួច​រាល់​ហើយ»។ លោកបន្ថែម​​ថា៖ «​យើង​មិន​ទាន់​បាន​ឃើញ​ដី​ទេ គេ[អាជ្ញាធរ]បាន​ត្រឹម​បង្ហាញ​យើង​ពី​ដី​នោះ​តាម​រយៈរូប​ក្នុង​ទូរសព្ទ​»។​

លោក ឃឿន សាវុធ រស់នៅ​ទាំង​ក្ដី​បារម្ភ​ពី​ការ​បណ្ដេញ​ចេញ​ពី​ភូមិ​ផ្សារ​តូច​ក្នុង​រាជធានីភ្នំពេញ រូបភាព​ថត​ថ្ងៃទី​១៥ ខែមីនា ឆ្នាំ​២០២៣។ ខេមបូចា/ ព្រីង សំរាំង

លោក វណ្ណ សុផាត មន្ត្រី​សម្រប​សម្រួល​សិទ្ធិ​មនុស្ស​មជ្ឈមណ្ឌល​សិទ្ធិមនុស្ស​កម្ពុជា បាន​អំពាវ​នាវ​ឱ្យអាជ្ញាធរ​ពាក់ព័ន្ធ​សិក្សា​ឱ្យ​បាន​ដិត​ដល់​អំពី​ផល​ប៉ះពាល់​បរិស្ថាន និង​សង្គម មុន​សម្រេច​ធ្វើ​ឯកជនីយកម្មលើ​ដីរបស់​រដ្ឋ ហើយ​លោក​ក៏​ជំរុញ​ឱ្យ​មាន​ការ​ផ្ដល់​សំណង​សមរម្យ​សម្រាប់​គ្រួសារ​ដែល​ត្រូវ​បណ្ដេញ​ចេញ​។ លោក​ថា គ្រួសារ​ទាំងនោះ​ទំនងជា​អាច​ត្រូវ​បណ្ដេញ​ចេញ​ដោយ​បង្ខំ​។​

មេភូមិ​ផ្សារតូច លោក វ៉ាន់ សាវឿន ឱ្យ​ដឹងថា​ គម្រោង​អភិវឌ្ឍន៍​នេះ​នឹង​ប៉ះពាល់ប្រជាពល​រដ្ឋ៣៣២គ្រួសារ​ក្នុង​សង្កាត់​ទួល​សង្កែ១ ហើយ​ក្នុង​នោះ​មាន​១០២​គ្រួសារបាន​ផ្លាស់​លំនៅ​រួច​រាល់​ហើយ។ ​លោក​ថា លោក​មិន​បាន​ដឹង​ពី​គម្រោង​របស់​ក្រុម​ហ៊ុន​នោះទេ​។​

លោក​ឲ្យ​ដឹងថា៖ ​«​ខ្ញុំ​មិន​ដឹង​ទេ ប្រហែល​ជា​ពួកគេ​ធ្វើ​ខុនដូ ខ្ញុំអត់ដឹងដែរ»។​

អភិបាល​រង​រាជធានី​ភ្នំពេញ លោក កើត ឆែ អះអាង​ថា​លោក​មិន​បាន​ដឹង​អំពី​គម្រោង​អភិវឌ្ឍន៍​ ឬ​ការ​ផ្ដល់​ដី​ទៅ​ឱ្យ​ក្រុម​ហ៊ុន​នោះដែរ។​

លោក​ប្រាប់​តាម​ទូរស័ព្ទ​ថា៖ «​បង​មិន​បាន​ដឹង​ពីឯកសារ​[អនុក្រឹត្យ​]នោះទេ តើ​ឱ្យ​ខ្ញុំ​ឆ្លើយ​សំណួរ​លោក​បែបម៉េច?»​

លោក​បន្ត​ថា៖ «​អូនឯង​អ្នក​សារពត៌មាន ពេល​បង​ឆ្លើយ​ថាអត់បាន​ដឹង អូនឯងអត់ខិតខំ​ខ្នះ​ខ្នែង​រក​ព័ត៌មាន…​និយាយឱ្យត្រង់បង​មិន​មែន​ជា​ចំណាប់​ខ្មាំង​អូនឯងទេណា ហើយ​បងក៏​គ្មាន​កាតព្វកិច្ច​ឆ្លើយ​សំណួរ​អូន​ដែរ»។​

លោក​បាន​បង្វែរ​សំណួរ​ទាក់ទង​នឹងគ្រួសារ​ដែល​រង​ផល​ប៉ះពាល់​ទៅ​​កាន់​អាជ្ញាធរ​ខណ្ឌវិញ​។​

ប៉ុន្តែ​អភិបាលខណ្ឌ​ឫស្សី​កែវ លោក ឯក ឃុនដឿន បាន​បង្វែរ​សំណួរ​ទាំង​នេះ​ទៅ​កាន់​មន្ត្រី​សាលារាជធានី​ភ្នំពេញ​វិញដែរ​​។​

លោក​មាន​ប្រសាសន៍​ខ្លីមុន​ដាក់​ទូរស័ព្ទ​ចុះ​​ថា៖ «​យើង​បាន​ដោះ​ស្រាយ​បញ្ហា​ជូន​ប្រ​ជាពល​រដ្ឋ[នៅទីនោះ]»។​

ប្រជា​ពល​រដ្ឋ​រស់​នៅ​ភូមិ​ផ្សារ​តូចរង​ការ​បណ្ដេញ​ចេញ​បន្ទាប់​ពី​រដ្ឋាភិបាល​បាន​ផ្ដល់​ដី​តាម​មាត់ ទន្លេសាប​ទៅ​ឱ្យក្រុម​ហ៊ុន​ឯក​ជន​ធ្វើ​ការ​អភិវឌ្ឍ។ រូបភាព​ថត​ថ្ងៃទី​១៥ ខែមីនា ឆ្នាំ២០២៣។ ខេមបូចា/ ព្រីង សំរាំង

រាយការណ៍​បន្ថែមដោយ អ៊ឹង ស៊ា

ប្រែសម្រួលពីអត្ថបទភាសាអង់គ្លេស៖ Private Company Receives Nearly 13 Hectares of Riverside Property, More than 300 Families Face Eviction

1,391 views

ព័ត៌មានថ្មីៗ

អត្ថបទពេញនិយម