កាលពីថ្ងៃអង្គារ តុលាការខេត្តកំពង់ឆ្នាំងបានកាត់ទោសនិងផ្តន្ទាទោសម្ចាស់ស្ថានីយវិទ្យុមួយឲ្យជាប់ពន្ធនាគាររយៈពេល២០ខែដោយសារតែលោកធ្វើសេចក្តីរាយការណ៍អំពីជម្លោះដីធ្លីរវាងក្រុមអ្នកភូមិនិងក្រុមមន្ត្រីយោធាក្នុងខេត្តនេះ។
បើតាមអ្នកសង្កេតការណ៍របស់ខេមបូចានៅតុលាការ បានឲ្យដឹងថា តុលាការខេត្តបានផ្តន្ទាទោស លោក សុខ ឧត្តម ដែលជាអ្នកគ្រប់គ្រងស្ថានីយវិទ្យុរិទ្ធិសែននិងបានបង្គាប់ឲ្យបង់ប្រាក់ពិន័យ២០លានរៀល ឬប្រហែល ៥០០០ដុល្លារពីបទញុះញង់អ្នកភូមិតាមរយៈសេចក្តីរាយការណ៍របស់លោកអំពីជម្លោះដីធ្លី ។
លោក ឧត្តម ត្រូវបានចាប់ខ្លួនកាលពីថ្ងៃទី១៣ ខែឧសភានិងត្រូវបានចោទប្រកាន់ពីបទញុះញង់តាមរយៈការផ្សាយផ្ទាល់តាមហ្វេសប៊ុកដែលលោកបានអត្ថាធិប្បាយអំពីដីរបស់អ្នកភូមិដែលត្រូវបានរំលោភយកតាមរយៈសម្បទានដីសង្គមកិច្ចយោធានៅដែនជម្រកសត្វព្រៃភ្នំឱរ៉ាល់។ ជម្លោះនេះពាក់ព័ន្ធនឹងមន្ត្រីយោធាជាន់ខ្ពស់ នូ សំរិទ្ធ ដែលមិនបានបង្ហាញមុខអំឡុងសវនាការទេ។
លោក ហុង គឹមហាក់ អ្នកនាំពាក្យសាលាដំបូងខេត្តបានបញ្ជាក់ថា លោក សុខឧត្តម ពិតជាត្រូវបានផ្តន្ទាទោសនិងពិន័យប្រាក់ ៥០០០ដុល្លារ។
លោក អ៊ុន ចាន់ថុល មេធាវីការពារលោក ឧត្តម បាននិយាយថា លោកនឹងពិភាក្សាជាមួយកូនក្តីពីលទ្ធភាពប្តឹងឧទ្ធរណ៍ជាមួយនឹងតុលាការជាន់ខ្ពស់។
លោកបានមានប្រសាសន៍ថា៖ «[ សាលក្រម ] គឺជាឆន្ទានុសិទ្ធិរបស់ចៅក្រម ប៉ុន្តែប្រសិនបើយើងមិនអាចទទួលយកបានទេ នោះយើងអាចប្តឹងឧទ្ធរណ៍ទៅតុលាការជាន់ខ្ពស់»។
ខណៈពេលលោកត្រូវបានគេនាំខ្លួនចេញពីបន្ទប់សវនាការ លោក សុខ ឧត្តម បាននិយាយថា លោកខកចិត្តនឹងសាលក្រមនេះ ហើយថា លោកនឹងប្តឹងឧទ្ធរណ៍។
លោក មាស សុភ័ណ្ឌ អ្នកនាំពាក្យក្រសួងព័ត៌មាន មិនអាចធ្វើអត្ថាធិប្បាយបានទេ ដោយលោករវល់ក្នុងកិច្ចប្រជុំ។
អំឡុងពេលសវនាការកាលពីខែមុន លោក អ៊ី ថាវរៈ ចៅក្រមជំនុំជម្រះបានមានប្រសាសន៍ថា លោក ឧត្តម បានញុះញុង់អ្នកភូមិ។ សាក្សីបីនាក់រួមទាំងមន្ត្រីជាន់ខ្ពស់យោធាលោក នូ សំរិទ្ធិ ដែលគេរំពឹងថា នឹងបង្ហាញភស្តុតាងដាក់បន្ទុកលើលោក ឧត្តម នោះមិនបានបង្ហាញវត្តមាននៅតុលាការទេ។
យោងតាមការសាកសួរលោក នូ សំរិទ្ធិ កាលពីថ្ងៃទី១២ ខែឧសភានិងត្រូវបានអានក្នុងតុលាការនោះ ថា មានអ្នកកាសែតប្រហែល៣០នាក់កាលពីថ្ងៃទី១២ ខែឧសភា ដែលបានញុះញង់អ្នកភូមិឲ្យកាន់កាប់ដីនៅឃុំឆែបក្នុងខេត្តនេះ ទីដែលយោធាមានបំណងសាងសង់កន្លែងបាញ់គ្រាប់ពិត។
អ្នកស្រី នុត សុវន្ធូរ ភរិយារបស់លោក ឧត្តម បាននិយាយថា សាលក្រមនេះអយុត្តិធម៌ ហើយថាគ្មានភស្តុតាងដែលបង្ហាញថា លោក ឧត្តម បានញុះញង់អ្នកភូមិនោះទេ។ អ្នកស្រីបាននិយាយថា ស្វាមីរបស់អ្នកស្រីតែងតែរាយការណ៍អំពីវិវាទដីធ្លីនៅក្នុងខេត្តនេះ ហើយជឿថា មន្ត្រីជាន់ខ្ពស់ដូចជាលោក នូ សំរិទ្ធិ នេះមិនពេញចិត្តនឹងរឿងរបស់លោក ឧត្តម។
អ្នកស្រី សុវន្ធូរ បាននិយាយថា៖ «ខ្ញុំគិតថា ក្នុងករណីនេះ មានមន្ត្រីមានអំណាចមួយចំនួនដែលនៅពីក្រោយខ្នង ដើម្បីធ្វើបាបគាត់»។
នៅក្នុងការផ្សាយផ្ទាល់តាមហ្វេសប៊ុករបស់លោក ឧត្តម កាលពីថ្ងៃទី១២ ខែឧសភា លោកបានរាយការណ៍ថា ជម្លោះដីធ្លីបានចាប់ផ្តើម បន្ទាប់ពីយោធាដណ្តើមយកដីពីអ្នកភូមិដែលបានប្រើប្រាស់សម្រាប់កសិកម្មនៅក្នុងឃុំជាប ស្រុកទឹកផុស។ លោកបាននិយាយថា អ្នកភូមិបានរស់នៅទីតាំងនោះមុនពេលតំបន់នេះត្រូវបានក្រសួងបរិស្ថានប្តូរទៅជាដែនជម្រកសត្វព្រៃភ្នំឱរ៉ាល់ទៅទៀត។
លោកបន្តថា យោធាចង់បានដីនៅដែនជម្រកសត្វព្រៃនេះ ដើម្បីបង្កើតកន្លែងបាញ់គ្រាប់ពិត ស្របពេលអភិបាលខេត្តចោទប្រកាន់អ្នកភូមិថា បានចូលកាន់កាប់ដីរដ្ឋ។
លោក ហ៊ីម ខទៀត ជាមន្ត្រីគ្រប់គ្រងស្រាវជ្រាវ និងតស៊ូមតិនៅខេមបូចាបាននិយាយថា វាចម្លែកណាស់ដែលតុលាការកាត់ទោសតែលោក ឧត្តម នៅពេលមានអ្នកកាសែតប្រហែល១០នាក់ផ្សេងទៀតធ្វើសេចក្តីរាយការណ៍ពីបញ្ហាតែមួយ។
លោក ខទៀត បាននិយាយថា៖ «ខ្ញុំគិតថា វាគឺជាការផ្តន្ទាទោសធ្ងន់ធ្ងរលើលោក ឧត្តម ដែលជាអ្នកសារព័ត៌មានអាជីព ដែលហ៊ានផ្សព្វផ្សាយការពិត»។
លោក សំ ចាន់គា អ្នកសម្របសម្រួលអង្គការសិទ្ធិមនុស្សអាដហុកប្រចាំខេត្តកំពង់ឆ្នាំងបានប្រសាសន៍ថា លោក ឧត្តម គ្រាន់តែសម្តែងមតិរបស់លោកនិងផ្សព្វផ្សាយព័ត៌មានជូនសាធារណៈប៉ុណ្ណោះ។
លោកមានប្រសាសន៍ថា៖ «តាមមតិរបស់ខ្ញុំ នេះគឺជាចេតនាបង្រ្កាបលើប្រព័ន្ធផ្សព្វផ្សាយ ដើម្បីកុំឲ្យរិះគន់គោលនយោបាយរបស់រដ្ឋ»។
លោក ចាន់គា បានបន្ថែមថា៖ «ការផ្តន្ទាទោស [ លោក ឧត្តម ] ប្រហែលជាប់ពាក់ព័ន្ធនឹងបញ្ហាដែលលោកបានលើកឡើងថា អាចប៉ះពាល់ដល់ប្រយោជន៍របស់មន្ត្រីជាន់ខ្ពស់នៅក្នុងខេត្តនេះ»៕
ប្រែសម្រួលពីអត្ថបទភាសាអង់គ្លេស៖ Provincial journalist convicted for reporting military-linked land dispute