សំណង់ផ្ទះលំហែឯកជនមួយកន្លែងស្ថិតក្នុងឃុំអូរដំបង១ ខេត្តបាត់ដំបង ដែលសង់រំលោភ ចូលចំណីច្រាំងស្ទឹងសង្កែ ត្រូវបានមហាជនរិះគន់ និងស្នើឱ្យអាជ្ញាធរចុះចាត់វិធានការ ប៉ុន្តែរដ្ឋបាលខេត្តបាត់ដំបង អះអាងថាជាសំណង់ស្របច្បាប់។
លោក យិន ម៉េងលី មន្រ្តីអង្កេតការណ៍របស់សមាគមអាដហុក ប្រចាំខេត្តបាត់ដំបង ថ្លែងថា លោកមិនបានដឹងថាម្ចាស់សំណងផ្ទះលំហែនោះជាបុគ្គលណាឡើយ ប៉ុន្តែយោងតាមច្បាប់ សំណង់ដែលសង់រំលោភលើច្រាំងទន្លេរដូច្នេះ គឺខុសនឹងច្បាប់នៃប្រទេសកម្ពុជារួចទៅហើយ។
លោក ម៉េងលី លើកឡើងថា៖ «ទីមួយ ទីតាំងនៃការសាងសង់នេះ គឺវាជាប់នឹងស្ទឹងតែម្ដង បើ ពិនិត្យទៅលើអនុក្រឹត្យរបស់រដ្ឋាភិបាល គឺវាអត់ត្រូវទេ។ ទីពីរ យើងកំពុងតែឆ្ងល់ថាសំណង់នេះមានច្បាប់ ឬអត់ច្បាប់»។
លោក ម៉េងលី បន្តថា សំណង់នេះបានសង់ឡើងជាយូរមកហើយ មិនមែនទើបតែថ្មីៗនេះ ប៉ុន្តែលោកមិនដឹងថាសំណង់នេះសង់ដោយស្របច្បាប់ ឬខុសច្បាប់នោះទេ។ លោកថា សាធារណជន បានរិះគន់ចំពោះសំណង់នេះ ដោយនិយាយថាជារបស់អ្នកមានអំណាច និងស្នើឱ្យអាជ្ញាធរពាក់ព័ន្ធគួរមានចំណាត់ការប្រសិនបើសំណង់នេះខុសច្បាប់។
មន្ត្រីរូបនេះបន្តថា៖ «ខាងមន្ទីរដែនដីគួរបកស្រាយឱ្យបានច្បាស់ ព្រោះឥឡូវនេះមហាជនទូទៅគេកំពុងតែឆ្ងល់ ហើយយើងក៏អត់ទាន់ឃើញការបំភ្លឺពីមន្ទីរពាក់ព័ន្ធដែរ ថាតើសំណង់ហ្នឹងជាសំណង់របៀបម៉េច ព្រោះម្នាក់ៗបាននិយាយអំពីការចាក់ដីចូលស្ទឹង។ យើងកុំថាទាល់តែចាក់ដីចូលស្ទឹង គ្រាន់តែចម្ងាយយើងមើលឃើញខុសទៅហើយ»។
យ៉ាងណាមិញ មន្ត្រីសហមាគមអាដហុករូបនេះ ទទូចឱ្យមន្ត្រីជំនាញសិក្សាឱ្យបានច្បាស់ពីបញ្ហាចាក់ដីចូលស្ទឹងសង្កែ ដើម្បីសាងសង់ផ្ទះដូច្នេះ ដើម្បីកុំឱ្យមហាជនរិះគន់ ជាពិសេសប្រសិនបើសំណង់នេះខុសច្បាប់ អាជ្ញាធរគប្បីចាត់វិធានការ ដើម្បីកុំឱ្យប៉ះពាល់ទៅដល់ប្រជាជននៅពេលដែលទឹកស្ទឹងឡើង។
លោក ម៉េងលី បន្ថែមថា៖ «បើសិនជារឿងនេះជារឿងពិត ការសាងសង់ខុសច្បាប់ វាទៅជារឿងស្ដង់ដាពីរ ស្ដង់ដារបី បានន័យថាអស់លោកឯកឧត្តម គាត់អាចសាងសង់ស្រេចតែចិត្ត អាហ្នឹងសូមមន្ទីរបំភ្លឺឱ្យច្បាស់ឱ្យមហាជនអស់ចម្ងល់»។
យោងតាមហ្វេសប៊ុកផ្លូវការរបស់អង្គការមាតាធម្មជាតិកម្ពុជា កាលពីថ្ងៃទី១៩ ខែមិថុនា លើកឡើងថា ស្ទឹងសង្កែដែលជាស្ទឹងប្រវត្តិសាស្រ្តស្ថិតនៅខេត្តបាត់ដំបង មានអ្នកមានអំណាចសង់លំនៅឋានដោយចាក់ដីចូលស្ទឹងសង្កែ ដោយមិនមានមន្ទីរជំនាញណាម្នាក់ចុះអន្តរាគមន៍ឡើយ។ ហើយតាមរយៈសារព័ត៌មានផ្សេងៗចុះផ្សាយថា សំណង់នេះជាគម្រោងរីសតឯកជនរបស់ឧកញ៉ា ទុយ គី ដែលស្និទ្ធនឹងអ្នកកាន់អំណាច ដោយមានការយាមកាមពីឧត្តមសេនីយ៍ត្រី មៀន ឡាយ ដែលជាស្នងការរងខេត្តបាត់ដំបង។
សំណេររបស់អង្គការមាតាធម្មជាតិសរសេរ យ៉ាងដូច្នេះថា៖ «ស្ទឹងសង្កែ ដែលជាស្ទឹងប្រវត្តិសាស្រ្តមួយរបស់ប្រទេសកម្ពុជា កំពុងត្រូវបានរំលោភបំពានដោយអ្នកមានលុយ មានអំណាច ដោយការចាក់ដីរំលោភចូលស្ទឹង និងការសាងសង់សំណង់រឹងនៅលើទីនោះ។ អ្វីដែលគួរឱ្យអស់សំណើចទៀតនោះ គឺសំណង់ដែលសង់រំលោភលើមាត់ស្ទឹងនេះ ត្រូវបានសាងសង់ទល់មុខនឹងសាលាឃុំអូរដំបង១ ស្រុកសង្កែ ខេត្តបាត់ដំបងតែម្តង។ នេះបង្ហាញថាមន្ត្រីមូលដ្ឋានហាក់មិនអាចអើពើរនឹងការរំលោភបំពាននេះទាល់តែសោះ»។
ក្រោយមានមតិសាធារណជនរិះគន់ ក៏ដូចជាតាមរយៈការផ្សព្វផ្សាយរបស់អង្គការមាតាធម្មជាតិ រដ្ឋបាលខេត្តបាត់ដំបងបានចេញសេចក្ដីបំភ្លឺមកថា មន្ទីរជំនាញបានចុះពិនិត្យដោយផ្ទាល់ហើយរកឃើញថា សំណង់នោះជាសំណង់ស្របច្បាប់របស់លោក ចៅ ម៉ាដូនេត ហើយការចាក់ដីចូលស្ទឹងមិនមែនជាការលុបច្រាំងស្ទឹងឡើយ គឺចាក់ដីដើម្បីទប់ច្រាំងកុំឱ្យបាក់ដីតែប៉ុណ្ណោះ និងមានប្រជាពលរដ្ឋសាទរទៀតផង។
លិខិតរដ្ឋបាលខេត្តបង្ហាញថា៖ «ចំពោះការចោទប្រកាន់ថាបុគ្គលនេះ ឬបុគ្គលនោះជាម្ចាស់កម្មសិទ្ធិលើដីដូចការចុះផ្សាយលើបណ្ដាញសង្គម របស់គណនីហ្វេសប៊ុកផេកឈ្មោះ មាតាធម្មជាតិកម្ពុជា Mother Nature Cambodia និងគណនី ហ្វេសប៊ុកឈ្មោះ លោក មេភូមិ រដ្ឋបាលខេត្តបាត់ដំបងសូមច្រានចោលទាំងស្រុងនៅព័ត៌មាន មិនពិតទាំងអស់នេះ»។
ទន្ទឹមនឹងនេះ រដ្ឋបាលខេត្តបាត់ដំបងបានលើកឡើងថា ការផ្សព្វផ្សាយរបស់អង្គការមាតាធម្មជាតិ និងគណនីហ្វេសប៊ុកឈ្មោះ លោក មេភូមិ គឺជាការចោទប្រកាន់ និងជាព័ត៌មានបែបញុះញង់ បំភ្លៃការពិតក្នុងគោលបំណងទុច្ចរិតវាយប្រហារមកលើអាជ្ញាធរក្នុងផ្លូវនយោបាយ ខណៈកម្ពុជានឹងបោះឆ្នោតនាពេលខាងមុខ។
ទីតាំងសំណង់រីសតនេះ ស្ថិតនៅប្របមាត់ស្ទឹងសង្កែ ត្រើយខាងកើត ក្នុងភូមិបោះពោធិ ឃុំអូរដំបង១ ស្រុកសង្កែ ខេត្តបាត់ដំបង ដោយប្រើប្រាស់គ្រឿងចក្រដើម្បីកាយ និងចាក់អាចម៍ដីបន្ថែមចូលមាត់ស្ទឹងសង្កែ ប៉ុន្តែរដ្ឋបាលខេត្តអះអាងថាជាការចាក់ធ្វើជើងទេ ដើម្បីកុំឱ្យបាក់ច្រាំងស្ទឹងតែប៉ុណ្ណោះ ។
ជុំវិញបញ្ហានេះ លោក សួន សុភា ប្រធានមន្ទីរដែនដី នគរូបនីយកម្ម និងសំណង់ នៃខេត្តបាត់ដំបង ថ្លែងប្រាប់ខេមបូចា ថា ចំពោះបញ្ហាសំណង់លំនៅឋាននេះ គឺបានទៅដល់ដៃអាជ្ញាធរស្រុកហើយ ហើយលោកមិនអាចអធិប្បាយអ្វីបន្ថែមទៀតបានទេចំពោះបញ្ហានេះ ដោយបានឱ្យអ្នកសារព័ត៌សាកសួរព័ត៌មានបន្ថែមទៅអាជ្ញាធរស្រុក។
លោក សុភា ថ្លែងថា៖ «ការងារសំណង់ហ្នឹងគឺបានប្រគល់ឱ្យស្រុក សំណង់ផ្ទះ៥០០ការ៉េហ្នឹងគឺស្រុកគេគ្រប់គ្រង ព្រោះអាហ្នឹងជាសមត្ថកិច្ចរបស់ស្រុក»។
លោក ឡុង ផលគុណ ប្រធានមន្ទីរធនធានទឹក និងឧត្តុនិយមខេត្តបាត់ដំបង មិនអាចទាក់ទងបានឡើយគិតត្រឹមរសៀលថ្ងៃ២១ ខែមិថុនា នេះ។
លោក សុខ លូ អភិបាលខេត្តបាត់ដំបង បានបដិសេធមិនឆ្លើយសំណួរ ដោយឱ្យស្រង់ខ្លឹមសារនៃសេចក្ដីបំភ្លឺរបស់រដ្ឋបាលខេត្តបាត់ដំបង។
លោក សុខ លូ ថ្លែងថា៖ «យកតាមសេចក្ដីប្រកាសរបស់រដ្ឋបាលខេត្តទៅ»។
ជុំវិញបញ្ហានេះ លោក សាន់ ម៉ាឡា មន្រ្តីជាន់ខ្ពស់ផ្នែកតស៊ូមតិនៃបណ្តាញយុវជនកម្ពុជា (CYN) យល់ឃើញថា សំណង់នានាដែលសាងសង់ធ្វើឱ្យប៉ះពាល់ទៅដល់សោភណ្ឌភាព និងលក្ខណៈធម្មជាតិនៃស្ទឺងសង្កែ នឹងធ្វើឱ្យប៉ះពាល់ដល់បរិស្ថាន ពិសេសភាពស្រស់ស្អាតនៃស្ទឹងសង្កែ ដូច្នេះអាជ្ញាធរខេត្តបាត់ដំបងគួរមានវិធានការ និងហាមឃាត់សកម្មភាពសាងសង់នេះ។
លោក ម៉ាឡា ថ្លែងថា៖ «ក្នុងនាមយើងជាពលរដ្ឋខ្មែរ ជាយុវជនយើងស្នើឱ្យអាជ្ញាធខេត្តបាត់ដំបងពិចារណាឡើងវិញ មិនគួរណាឱ្យអ្នកមានលុយអ្នកមានអំណាចសាងសង់សំណង់ផ្ដេសផ្ដាសនៅតាមបណ្ដោយមាត់ស្ទឹងសង្កែនោះទេ»។
លោក ម៉ាឡា ច្រានចោលចំពោះការលើកឡើងរបស់រដ្ឋបាលខេត្តបាតដំបង ដែលអះអាងថា សំណង់នោះជាសំណង់ស្របច្បាប់ ត្បិតថាទីតាំងដែលសង់គឺមានចម្ងាយត្រឹមតែ១២ម៉ែត្រប៉ុណ្ណោះពីច្រាំងស្ទឹងសង្កែ ខណៈច្បាប់សាងសង់នៅតាមមាត់ច្រាំងទន្លេ សមុទ្រ បឹងបួ កំណត់ចម្ងាយពីច្រាំងប្រមាណ៣០ម៉ែត្រ។
លោក ម៉ាឡា បន្ថែមថា៖ «ច្បាប់ស្ដីពីការគ្រប់គ្រងចំណី ស្ទឹង ប្រឡាយ បឹងធម្មជាតិបានកំណត់ច្បាស់ហើយពីប្រវែងដែលមាត់ស្ទឹងហ្នឹងទាំងអស់នោះត្រូវអភិរក្សទុក តែយើងវាស់វែងតាម Google earth យើងឃើញថាចម្ងាយនោះមិនដល់១០ម៉ែត្រផង ដែលជាការអនុវត្តប្រាសចាកពីច្បាប់ជាធរមាន»។
លោក នាង ចន្ទថារ៉ា អភិបាលស្រុកសង្កែ បដិសេធការឆ្លើយបំភ្លឺជុំវិញការសាងសង់សំណង់លយចូលស្ទឹងសង្កែ ហើយលោកអភិបាលស្រុកឱ្យយោងខ្លឹមសារតាមសេចក្ដីប្រកាសរបស់រដ្ឋបាលខេត្តបាត់ដំបង។ ខណៈពេលដែលអ្នកសារព័ត៌មានសួរទៅលោកបន្តទៀត ប៉ុន្តែលោកបែរជាស្នើឱ្យអ្នកសារព័ត៌មានទៅសាលាស្រុកសង្កែ ដើម្បីងាយស្រួលផ្តល់បទសម្ភាស។
លោក ចន្ទថារ៉ា និយាយថា៖ «អញ្ជើញមកសាលាស្រុកមក! មើលលិខិតសាលាខេត្តទៅ ខេត្តគេបំភ្លឺហើយៗ»។
គួរជម្រាបជូនថា យោងតាមមាត្រា៣៦ នៃច្បាប់ស្ដីពីការគ្រប់គ្រងធនធានទឹកនៅកម្ពុជាបានចែងថា បុគ្គលណាដែលលុបបឹងធម្មជាតិ ស្រះ ត្រពាំង និងអាងទឹកដោយខុសច្បាប់ នឹងត្រូវផ្ដន្ទាទោសពិន័យជាប្រាក់ពី៥លានរៀលទៅ១០លានរៀល និងឬដាក់ពន្ទនាគារពីមួយ១ឆ្នាំ ទៅដល់ប្រាំ៥ឆ្នាំ៕
