ព័ត៌មានជាតិ

សាធារណជនរង់ចាំមើលការសម្អាតទីក្រុងភ្នំពេញ ដោយក្រុមហ៊ុនប្រមូលសំរាមថ្មី

៣ កក្កដា ២០២១ ម៉ោង ១៣:០៣
ង៉ាយ ណៃ

ក្រុមហ៊ុនគ្រប់គ្រងសំណល់សំរាមថ្មីចំនួនបីបានចាប់ផ្តើមប្រតិបត្តិការប្រមូលសំរាមក្នុងរាជធានីភ្នំពេញ កាលពីថ្ងៃព្រហស្បតិ៍ បន្ទាប់ពីរដ្ឋាភិបាលបានលុបចោលកិច្ចសន្យាផ្តាច់មុខរបស់ក្រុមហ៊ុនប្រមូលសំរាម ស៊ីនទ្រី។

អ្នកនាង សេង ស្រីលាភ ពលរដ្ឋអាយុ ២៩ឆ្នាំរស់នៅសង្កាត់គោករកា ក្នុងខណ្ឌព្រែកព្នៅ បាននិយាយថា នាងស្វាគមន៍ការវិវត្តថ្មីនេះ ដោយលើកឡើងថា ក្រុមហ៊ុនស៊ីនទ្រី មិនបានធ្វើការសម្អាតទីក្រុងបានល្អនោះទេ។

ស្រីលាភ បាននិយាយថា៖ «សំរាមនៅមុខផ្ទះខ្ញុំគរឡើងដូចភ្នំ ពីព្រោះក្រុមហ៊ុនតែងតែយឺតយ៉ាវក្នុងការប្រមូលសំរាម»។

អ្នកនាងបានថ្លែងបន្តថា៖ «ពួកគេមកម្តងឬពីរដងក្នុងមួយសប្តាហ៍ ហើយពេលខ្លះ ឡានសំរាមបានបើកកាត់ ដោយមិនបានប្រមូលសំរាមនោះទេ»។ ដោយនាងបន្ថែមថា៖ «ប្រសិនបើខ្ញុំចង់ឲ្យពួកគេប្រមូលសំរាមលឿន ខ្ញុំត្រូវតែបង់ប្រាក់ឲ្យអ្នកប្រមូលសំរាម។ ខ្ញុំសង្ឃឹមថា ក្រុមហ៊ុនថ្មី ដែលទទួលបន្ទុកលើការប្រមូលសំរាមក្នុងសង្កាត់ខ្ញុំ អាចផ្លាស់ប្តូរស្ថានភាពនេះបាន»។

កាលពីខែតុលា ឆ្នាំ២០១៩ រដ្ឋបាលក្រុងភ្នំពេញបានលុបចោលសិទ្ធិផ្តាច់មុខរបស់ក្រុមហ៊ុន ស៊ីនទ្រី ក្នុងការផ្តល់សេវាកម្មប្រមូលនិងដឹកជញ្ជូនសំណល់រឹងនៅក្នុងរាជធានី បន្ទាប់ពីមានការត្អួញត្អែរពីសាធារណជនពាក់ព័ន្ធនឹងសំរាម ដែលមិនត្រូវបានប្រមូល ឬធ្លាក់កំពប់តាមដងផ្លូវនានាក្នុងក្រុងភ្នំពេញ។ ហើយអាជ្ញាធរក្រុងបានជ្រើសរើសក្រុមហ៊ុនបីដើម្បីចែករំលែកសេវាកម្មប្រមូលសំរាម។

កញ្ញា ឡាយ សុភាវតី ពលរដ្ឋម្នាក់នៅខណ្ឌដង្កោ បានប្រាប់អ្នកសារព័ត៌មានថា កញ្ញាសង្ឃឹមថា ក្រុមហ៊ុនថ្មីនឹងធ្វើបានប្រសើរជាងក្រុមហ៊ុនមុន។

កញ្ញាបានថ្លែងថា៖ «នេះជារឿងល្អមួយនៅពេលមានក្រុមហ៊ុនបីផ្សេគ្នាធ្វើការក្នុងគោលដៅតែមួយ ហើយខ្ញុំជឿថា នឹងមានភាពប្រសើរជាងនៅពេលដែលយើងពឹងតែទៅលើក្រុមហ៊ុនស៊ីនទ្រី ដើម្បីប្រមូលសំរាមនៅក្នុងទីក្រុង»។

នៅក្នុងសេចក្តីថ្លែងការណ៍មួយកាលពីថ្ងៃទី៣០ ខែមិថុនា ជូនចំពោះពលរដ្ឋក្នុងរាជធានីភ្នំពេញពាក់ព័ន្ធនឹងក្រុមហ៊ុនប្រមូលសំរាមថ្មីចំនួនបី ដែលនឹងចាប់ផ្តើមប្រតិបត្តិការនៅថ្ងៃទី០១ ខែកក្កដា អាជ្ញាធរក្រុងបាននិយាយថា ទីក្រុងនឹងត្រូវបែងចែកជាបីតំបន់ ដែលគ្របដណ្តប់លើខណ្ឌចំនួន ១៤។ ក្រុមហ៊ុន 800 Super/Global Action for Environment Awareness Public Limited នឹងរ៉ាប់រងខណ្ឌទួលគោក ឬស្សីកែវ សែនសុខ ជ្រោយចង្វារ និងព្រែកព្នៅ។ ក្រុមហ៊ុន Mizuda Group Co, Ltd នឹងរ៉ាប់រងខណ្ឌដូនពេញ ៧មករា ដង្កោ ពោធិ៍សែនជ័យ និងកំបូល ហើយក្រុមហ៊ុន Cintri និង Everbright នឹងផ្តល់សេវាកម្មប្រមូលសំរាមក្នុងខណ្ឌចំការមន បឹងកេងកង មានជ័យ និងច្បារអំពៅ។

សេចក្តីថ្លែងការណ៍ បានសរសេរថា៖ «នៅក្នុងដំណាក់កាលអន្តរកាលនៃផ្ទេរសេវាកម្មប្រមូល និង ដឹកជញ្ជូនសំរាម ពីក្រុមហ៊ុនចាស់មកឲ្យប្រតិ្តករថ្មី គឺអាចនឹងមានការរអាក់រអួលខ្លះ នៃការផ្តល់សេវា ជាពិសេស នៅតំបន់ដែលទទួលខុសត្រូវដោយក្រុមហ៊ុនថ្មី»។ សាលារាជធានីភ្នំពេញបានអំពាវនាវឲ្យពលរដ្ឋរៀបចំសំរាមតាមពេលវេលាសមស្រមដើម្បីជួយរក្សាទីក្រុងឲ្យបានស្អាត។

អភិបាលខណ្ឌដង្កោអ្នកស្រី គឹម ញ៉េប បាននិយាយថា អាជ្ញាធរបានជួយសម្រួលដល់ការងាររបស់ក្រុមហ៊ុនទាំងនោះ ហើយថា អ្នកសារព័ត៌មានគួរសួរទៅខាងក្រុមហ៊ុនផ្ទាល់សម្រាប់ព័ត៌មានបន្ថែម។

អ្នកស្រីបានថ្លែងថា៖ «សម្រាប់ខ្ញុំ ពួកគេ [ក្រុមហ៊ុន] បានដេញថ្លៃបានជោគជ័យ ដែលមានន័យថា ពួកគេមានសមត្ថភាពគ្រប់គ្រាន់ដើម្បីធ្វើការបានល្អ»។ អ្នកស្រីបានបិទទូរសព្ទដោយមិនអត្ថាធិប្បាយបន្ថែម។

អភិបាលក្រុងភ្នំពេញលោក ឃួង ស្រេង បដិសេធធ្វើអត្ថាធិប្បាយ ហើយអ្នកនាំពាក្យសាលារាជធានីភ្នំពេញលោក ម៉េត មាសភក្តី មិនអាចទាក់ទងសុំការអធិប្បាយបាននោះទេ។

លោក ប៉ាង លីដា អភិបាលរងខណ្ឌពោធិ៍សែនជ័យ បាននិយាយថា លោកមិនទាន់អាចវាយតម្លៃបាននោះទេ ដោយសារតែក្រុមហ៊ុនទើបតែចាប់ផ្តើមប្រតិបត្តិការ។

លោកបានថ្លែងថា៖ «ពួកគេទើបតែចាប់ផ្តើមប្រមូលសំរាម យើងមិនទាន់ដឹងថា ពួកគេនឹងជោគជ័យ ឬបរាជ័យនោះទេ។ ប៉ុន្តែមិនទាន់មានបញ្ហាណាមួយ [នៅថ្ងៃប្រមូលសំរាមដំបូងនោះទេ] ហើយយើងកំពុងរង់ចាំមើលសកម្មភាពរបស់ពួកគេបន្ថែមទៀត»។

អ្នកនាំពាក្យក្រសួងបរិស្ថានលោក នេត្រ ភក្រ្តា បានមានប្រសាសន៍ថា ការបែងចែកតំបន់ប្រមូលសំរាមគឺធ្វើឡើងដើម្បីអនុញ្ញាតឲ្យក្រុមហ៊ុនមានអាជ្ញាបណ្ណប្រមូលសំរាមឲ្យបានទាន់ពេលវេលា។

លោកបានថ្លែងថា៖ «ខណៈចំនួនពលរដ្ឋរស់នៅក្រុងភ្នំពេញកំពុងកើនឡើង ហើយបរិមាណសំរាមបន្តកើនឡើងដូចគ្នាជារៀងរាល់ថ្ងៃ ការបង្កើនចំនួនក្រុមហ៊ុនប្រមូលសំរាមនឹងជួយឲ្យការប្រមូលសំរាមបានលឿន និងមានប្រសិទ្ធភាពជាងមុន»។

មន្រ្តីជាន់ខ្ពស់សាលារាជធានីភ្នំពេញមួយរូប ដែលសុំមិនបញ្ចេញឈ្មោះ ដោយសារនិយាយថា មិនត្រូវទទួលបានការអនុញ្ញាតឲ្យនិយាយទៅកាន់សារព័ត៌មាន បានលើកឡើងថា មានក្រុមហ៊ុនចំនួន ១០ពីបណ្តាប្រទេសផ្សេងៗ ដែលបានចូលរួមនៅក្នុងការដេញថ្លៃ។ លោកបានបន្តថា ការជ្រើសរើសក្រុមហ៊ុនគឺធ្វើឡើងតាមរយៈការវាយតម្លៃទៅលើបទពិសោធន៍ប្រមូលសំរាមក៏ដូចជា តម្លៃសរុបរបស់ក្រុមហ៊ុន។

មន្រ្តីរូបនេះបាននិយាយថា បន្ទាប់ពីមានការថ្លឹងថ្លែងយ៉ាងដិតដល់ពីសំណាក់គណៈកម្មាធិការវាយតម្លៃ ក្រុមហ៊ុនចំនួនបីត្រូវបានជ្រើសរើសជាក្រុមហ៊ុនប្រមូលសំរាម និងផ្តល់នូវកិច្ចសន្យាចំនួនដប់ឆ្នាំជាមួយនឹងសាលារាជធានីភ្នំពេញ។

លោកបានថ្លែងថា៖ «ក្រុមហ៊ុនទាំងនេះមានបទពិសោធនៅក្នុងការប្រមូលសំរាម»។ លោកបានបន្ថែមថា ជាឧទាហរណ៍ ក្រុមហ៊ុន 800 Super/Global Action for Environment Awareness Public Limited បានផ្តល់សេវាកម្មប្រមូលសំរាមនៅខេត្តសៀមរាប បន្ទាយមានជ័យ កែប និងកំពត អស់រយៈពេលជាច្រើនឆ្នាំមកនេះ។ ក្រុមហ៊ុន Mizuda Group Co, LTD គឺជាក្រុមហ៊ុនធំមួយមានមូលដ្ឋាននៅប្រទេសចិន។

លោកបានបន្តថា៖ «ផ្អែកលើបទពិសោធនិងសមត្ថភាព ខ្ញុំជឿថា ការកកស្ទះក្នុងការប្រមូលសំរាមនឹងធ្លាក់ចុះយ៉ាងខ្លាំង»។

មន្រ្តីរូបនេះបាននិយាយថា ក្រសួងបរិស្ថានបានកំណត់នូវតំបន់សម្រាប់ក្រុមហ៊ុនទាំងនេះដើម្បីផ្តល់សេវាកម្ម។ នៅក្រោមកិច្ចសន្យានេះ ក្រុមហ៊ុននីមួយៗត្រូវប្រមូលសំរាម ១.០០០តោនក្នុងមួយថ្ងៃ ហើយយកទៅចាក់ចោលនៅកន្លែងចាក់សំរាមក្នុងខណ្ឌដង្កោ។

លោកបានថ្លែងថា៖ «ឥឡូវនេះ យើងកំពុងគ្រោងនឹងបង្កើតកន្លែងចាក់សំរាមមួយទៀតក្នុងខេត្តកណ្តាលដើម្បីបំពេញតម្រូវការនៃការកើនឡើងសំរាម។ ដោយផ្អែកលើទិន្នន័យផ្លូវការ សំរាមចំនួន ៣.០០០តោនគឺត្រូវចាក់ចោលជារៀងរាល់ថ្ងៃក្នុងក្រុងភ្នំពេញ»។

លោកបានបន្ថែមថា កម្មករភាគច្រើនប្រចាំក្រុមហ៊ុន 800 Super/Global Action for Environment Awareness Public Limited និងក្រុមហ៊ុន Mizuda Group Co, LTD គឺជា អតីតនយោជិតក្រុមហ៊ុន Cintri។

ប្រធានក្រុមហ៊ុនស៊ីនទ្រី លោក សេង សាវី បានបញ្ជាក់ថា ក្រុមហ៊ុនបានបញ្ឈប់ការងារកម្មករមួយចំនួនដើម្បីកាត់បន្ថយការចំណាយមិនចាំបាច់។

លោកបានថ្លែងថា៖ «ក្រុមហ៊ុនត្រូវបញ្ឈប់ការងារកម្មករមួយចំនួន ដោយសារតែយើងត្រូវគ្រប់គ្រងការចំណាយតាមស្ថានការណ៍»។

កាលពីខែតុលាឆ្នាំមុន កម្មករក្រុមហ៊ុនស៊ីទ្រី មួយចំនួនបានធ្វើបាតុកម្ម បន្ទាប់ពីឮដំណឹងថា សាលារាជធានីភ្នំពេញគ្រោងនឹងផ្តល់កិច្ចសន្យាឲ្យក្រុមហ៊ុនប្រមូលសំរាមបីផ្សេងទៀត ដោយការណ៍នេះអាចឲ្យពួកគេបាត់បង់ការងារនៅក្រុមហ៊ុនស៊ីនទ្រី។ ពួកគេទាមទារឲ្យនិយោជកសន្យាផ្តល់ប្រាក់បំណាច់អតីតភាពការងារ ប្រាក់សំណង ប្រាក់ខែចុងក្រោយ ប្រាក់ឈប់សម្រាកប្រចាំឆ្នាំដែលនៅសេសសល់ និងប្រាក់ឧបត្ថម្ភប្រសិនបើកិច្ចសន្យារបស់ពួកគេត្រូវបានផ្តាច់។

លោក សាន ដារ៉ាវីដ ស្ថាបនិកក្រុមយុវជនសំរាម បានស្វាគមន៍ប្រតិបត្តិការគ្រប់គ្រងសំរាមថ្មី ដោយមានគោលដៅកាត់បន្ថយគំនរសំរាមក្នុងក្រុងភ្នំពេញ ដោយនិយាយថា ក្រុមហ៊ុនស៊ីនទ្រី មិនអាចធ្វើការងារនេះបានតែឯកឯងនោះទេ។

លោកបាននិយាយថា៖ «នេះជាសញ្ញាល្អនៅពេលដែលក្រុមហ៊ុនកាន់តែច្រើនចូលរួម ដូច្នេះនឹងមានការប្រកួតប្រជែង ហើយប្រហែលនឹងធ្វើឲ្យការប្រមូលសំរាមមានប្រសិទ្ធភាពជាងមុន»។

លោក តូច កុសល ប្រធានសហព័ន្ធសហជីពកម្មករក្នុងវិស័យទេសចរណ៍កម្ពុជា បាននិយាយថា ចំណាត់ការខាងលើនេះអាចជួយលើកកម្ពស់លក្ខខណ្ឌការងារសម្រាប់កម្មករប្រមូលសំរាម។

លោកបាននិយាយថា៖ «ខ្ញុំគិតថា នៅពេលមានក្រុមហ៊ុនប្រមូលសំរាមកាន់តែច្រើន សេវាកម្មនឹងទាន់ពេលវេលា និងលឿនជាងមុន។ ទីពីរ នឹងមានលក្ខខណ្ឌល្អ ប្រសិនបើមានក្រុមហ៊ុនច្រើនប្រជែងគ្នា ហើយប្រាក់បៀរវត្សរ៍កម្មករនឹងល្អជាងមុនផងដែរ»៕ (រាយការណ៍បន្ថែមដោយ ឃួន ណារីម)

ប្រែសម្រួលពីអត្ថបទភាសាអង់គ្លេស៖ Public waiting to see whether new garbage collectors can clean up Phnom Penh

696 views