សមាគមសម្ព័ន្ធអ្នកសារព័ត៌មានកម្ពុជា

តុលាការខេត្តរតនគិរីសម្រេចដោះលែង លោក ថេង សាវឿន និងសហការី ឱ្យនៅក្រៅឃុំ

តុលាការខេត្តរតនគិរីដែលចៅក្រមបានចោទប្រកាន់មនុស្សបួននាក់ពីបទរួមគំនិតក្បត់និងញុះញង់។ (ផ្តល់ដោយអង្គការ លីកាដូ)
តុលាការខេត្តរតនគិរីដែលចៅក្រមបានចោទប្រកាន់មនុស្សបួននាក់ពីបទរួមគំនិតក្បត់និងញុះញង់។ (ផ្តល់ដោយអង្គការ លីកាដូ)

ប្រធានសមាគមសម្ព័ន្ធសហគមន៍កសិករកម្ពុជា(CCFC)​ លោក ថេង សាវឿន និងសហការីពីរ នា​ក់​ផ្សេងទៀតត្រូវបានតុលាការខេត្តរតនគិរី​ សម្រេចដោះលេងឱ្យនៅក្រៅឃុំ និងដាក់ឱ្យស្ថិត​ក្រោមការត្រួតពិនិត្យពីតុលាការ។

បើតាមលោក អ៊ុង សុភាព ស្នងការខេត្តរតនគិរី ប្រាប់ខេមបូចា ថា លោក ថេង សាវឿន និង​លោក ញ៉ិល ភាព បុគ្គលិកជាន់ខ្ពស់ និងលោក ថាន់ ហាច បុគ្គលិកគម្រោង ពិតជាត្រូវ​បាន​ដោះលែងឱ្យមានសេរីភាព ប៉ុន្តែ​ស្ថិ​ត​នៅក្រោមការត្រួតពិនិត្យរបស់តុលាការ នារសៀល​ថ្ងៃ​ទី៣០ ខែមិថុនានេះ។

លោក សុភាព និយាយថា៖ «បាទ!​យើងវិវត្តន៍ទៅតាមខ្លឹមសារនៃលិខិតរបស់តុលាការ​ អនុញ្ញាត​ឱ្យគាត់នៅក្រៅឃុំ ស្ថិតក្រោមការត្រួតពិនិត្យ[ពីតុលាការ]»

ចំណែកលោក កែវ ពិសុទ្ធ អ្នកនាំពាក្យតុលាការខេត្តរតនគិរី ក៏បានបញ្ជាក់ដែរថា លោក ថេង សាវឿន និងសហការពីរនាក់ទៀត ត្រូវបានដោះលែងឱ្យនៅក្រៅឃុំពិតប្រាកដមែន។

លោកពិ សុទ្ធ ថ្លែងថា៖ «ពិតជាមានការដោះលែងអ្នកទាំង៣ហ្នឹងឱ្យនៅក្រៅឃុំ​បណ្ដោះ​អាសន្ន»។

ទាក់ទងនឹងបទបញ្ញាត្តិនានា លោកស្នងការខេត្តរតនគិរី និងអ្នកនាំពាក្យតុលាការខេត្តរតនគិរី មិនបានបញ្ជាក់ច្បាស់ទេ បើទោះបីជាមានការដោះលែងឱ្យនៅក្រៅឃុំក៏ដោយ។

លោក ពិសុទ្ធ ថ្លែងថា៖ «ទាក់ទងនឹងលក្ខខណ្ឌ ខ្ញុំមិនបានដឹងច្បាស់ទេ ខ្ញុំមិនមែនជាអ្នកធ្វើការ​បច្ចេកទេស»។​

ភរិយាលោក ថេង សាវឿន គឺអ្នកស្រី ញូង សុខហេង បានបង្ហាញក្ដីរំភើបក្រោយប្ដីអ្នកស្រី និងក្រុមការងារពីររូបទៀតបានដោះលែងឱ្យនៅក្រៅឃុំបណ្ដោះអាសន្ន។

​​​​អ្នកស្រី សុខហេង និយាយថា៖ «ខ្ញុំមានអារម្មណ៍សប្បាយចិត្តជាពន់ពេកពេល​គាត់ត្រូវ​បាន​ដោះលែងឱ្យមានសេរីភាពឡើងវិញ ហើយចំពោះចំណាត់ការយ៉ាងណាទៀត​នោះបន្ទាប់ពី​ពួកគាត់ទាំងបីត្រូវបានដោះលែង។ ខ្ញុំមិនទាន់ដឹងនៅឡើយទេរង់ចាំតុលាការ​ជាអ្នក​សម្រេច​បន្តទៀត»។

អ្នកស្រី ដេត ហួ ជាប្រជាកសិករមកពីខេត្តកោះកុងដែលចូលរួមក្នុងការតវ៉ាឱ្យដោះលែង លោក ថេង សាវឿន និងសហការីពីររូបទៀត បានបង្ហាញក្ដីរំភើប និងសប្បាយរីករាយ​យ៉ាង​ដែលឮដំណឹងថាពួកគាត់ត្រូវបានដោះលែងឲ្យមានសេរីភាពបន្ទាប់ពីការឃុំឃាំងដោយ​តុលាការខេត្តរតនៈគិរី នៅថ្ងៃទី១៧ ខែឧសភា កន្លងមក។

អ្នកស្រី ដេត ហួ បានមានប្រសាសន៏ថា៖ «ខ្ញុំសប្បាយចិត្តណាស់ពេលបានឮថា​គាត់ត្រូវ​បានដោះលែងចឹង។ គាត់គ្មានទៅធ្វើស្អីខុសទេ។ គាត់គ្រាន់តែជាអ្នក​ជួយប្រជាកសិករ​ពី​បច្ចេកទេសដាំដុះ ប្រើប្រាស់ថ្នាំ អីជាដើមឱ្យប្រជាកសិករមាន​របរកសិកម្មមួយ​ចិញ្ចឹមជីវិត​សមស្របប៉ុណ្ណោះ»។

អ្នកស្រី ហួ អះអាងថា លោក ថេង សាវឿន និងសហការីជាមនុស្សល្អ និងជួយសង្គមដោយ​ចេញពីចិត្ត មិនទាក់ទងនឹងរឿងនយោបាយឡើយ។

អ្នកស្រី ហួ និយាយថា៖ «ខ្ញុំជឿជាក់ថាពួកគាត់ជាមនុស្សល្អ ហើយស្មោះត្រង់ព្រោះយើង​ស្គាល់គ្នា​ឡើង១០ឆ្នាំហើយៗ កសិករមួយណាក៏ស្គាល់គាត់ថាជាមនុស្សល្អ។ គេដោះ​លែងគាត់ត្រូវហើយ ព្រោះគាត់មិនដែលនិយាយរឿងនយោបាយអីទេ គាត់មានតែ​បដិសេធ»

បន្ទាប់ពីដោះលែងឱ្យនៅក្រៅឃុំ លោក ថេង សាវឿន បានចេញវីដេអូ អរគុណ និងសុំទោស​ទៅលោកនាយករដ្ឋមន្រ្តី ហ៊ុន សែន ចំពោះកំហុសកន្លងមកដែលបាន​លង់ជឿបរទេស និង​ក្រុម​នយោបាយជ្រុលនិយម។

ក្នុងវិដេអូ លោក សាវឿន បញ្ជាក់ថា៖‍ «បន្ទាប់ពីខ្ញុំបានប្រព្រឹត្តនូវកំហុស លង់ជឿ​ដោយ​បុគ្គល​បរទេស ឬជាបុគ្គលអ្នកនយោបាយបក្សប្រឆាំជ្រុលនិយមមួយចំនួន រហូតដល់មាន​ចេតនា​ប្រមូល​ផ្ដុំញុះញង់ឱ្យមានការងើបឡើងតវ៉ាផ្ដួលរំលំរដ្ឋាភិបាលដោយស្របច្បាប់។ខ្ញុំសូម​សន្យា​នឹងមិនធ្វើសកម្មភាព និងចូលរួមជាដាច់ខាតនូវកាអូសទាញជាបុគ្គល ជាក្រុមដើម្បី​ប្រឆាំង​រដ្ឋាភិបាលស្របច្បាប់នោះឡើយ»

សូមជម្រាបជូនថា សមត្ថកិច្ចខេត្តក្រចេះ បានឃាត់ខ្លួនថ្នាក់ដឹកនាំ និងបុគ្គលិកសមាគម​សម្ព័ន្ធ​សហគមន៍កសិករកម្ពុជា(CCFC)​ចំនួន​១៧​នាក់នៅថ្ងៃទី១៧ខែឧសភា បន្ទាប់មកអ្នក​ផ្សេង​ចំនួន​១៤នាក់ត្រូវបានដោះលែង ប៉ុន្តែបន្តឃុំខ្លួន​លោក ថេង សាវឿន ប្រធានសមាគម លោក ញ៉ិល ភាព បុគ្គលិកជាន់ខ្ពស់ និងលោក ថាន់ ហាច បុគ្គលិកគម្រោង។

បន្ទាប់ពីបន្តនីតិវិធីសាកសួរ សាលាដំបូងខេត្តរតនគិរី បានសម្រេចចោទប្រកាន់លោក ថេង សាវឿន និងសហការីពីររូប​ពីបទ​រួមគំនិតក្បត់ ដែលប្រឈមនឹងជាប់ពន្ធនាគារហូតដល់១០ឆ្នាំ និងពិន័យជាប្រាក់មួយចំនួន​ទៀតផងដែរ។

យោងមាត្រា៤៥៣នៃក្រមព្រហ្មទណ្ឌចែងថាអំពើរួមគំនិតក្បត់គឺជាគម្រោងដែលបង្កើតឡើងដោយ​​មនុស្សច្រើននាក់ដើម្បីប្រព្រឹត្តឧបឃាត កាលបើគម្រោងនេះត្រូវបានសម្តែងចេញ​ជា​រូប​រាង​ច្បាស់​លាស់​ដោយអំពើជាក់ស្តែង​មួយឬច្រើន។ ការរួមគំនិតក្បត់ត្រូវផ្តន្ទាទោស​ដាក់​ពន្ធនាគារ​៥ឆ្នាំទៅ​១០ឆ្នាំ៕

296 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម