សមាគមសម្ព័ន្ធអ្នកសារព័ត៌មានកម្ពុជា

ប្រជាពលរដ្ឋរាប់ពាន់គ្រួសារផ្សេងទៀតប្រឈមនឹងការចាកចេញ​ពី​តំបន់អង្គរទៅកាន់ទីតាំងពង្រីកបន្ថែម

លោក ខ្នូ សុវណ្ណ បង្ហាញដីស្រែ១,៥ហិកតានៅភូមិពាក់ស្នែង ឃុំពាក់ស្នែក ខេត្តសៀមរាប កាលពីថ្ងៃទី៩ ខែមីនា ឆ្នាំ២០២៣ ដែលថាអាជ្ញាធរនឹងប្រើប្រាស់ដីនេះដើម្បីផ្ដល់ជាលំនៅឋានដល់ក្រុមគ្រួសារដែលនឹងត្រូវផ្លាស់ទីលំនៅចេញពីតំបន់អង្គរវគ្គទីពីរ។ (ខេមបូចា/ ឃួន ណារីម)
លោក ខ្នូ សុវណ្ណ បង្ហាញដីស្រែ១,៥ហិកតានៅភូមិពាក់ស្នែង ឃុំពាក់ស្នែក ខេត្តសៀមរាប កាលពីថ្ងៃទី៩ ខែមីនា ឆ្នាំ២០២៣ ដែលថាអាជ្ញាធរនឹងប្រើប្រាស់ដីនេះដើម្បីផ្ដល់ជាលំនៅឋានដល់ក្រុមគ្រួសារដែលនឹងត្រូវផ្លាស់ទីលំនៅចេញពីតំបន់អង្គរវគ្គទីពីរ។ (ខេមបូចា/ ឃួន ណារីម)

ផ្ទៃ​ដី​ក្នុង​ខេត្ត​សៀម​រាប​ចំនួន​៨៩៦​ហិកតា​បន្ថែម​ទៀត​នឹង​ត្រូវ​ប្រើ​ប្រាស់​សម្រាប់​ប្រ​ជា​ពល​រដ្ឋ​រាប់​ពាន់​គ្រួសារ​ដែល​ត្រូវ​ផ្លាស់ទី​លំនៅ​​ពី​តំបន់​បេតិកភណ្ឌ​អង្គរ​។ នេះ​បើ​តាម​អនុក្រឹត្យ​ដែល​ចុះ​ហត្ថលេខា​ដោយ​លោក​នាយករដ្ឋ​មន្ត្រី​ ហ៊ុន សែន និង​ត្រូវ​បាន​ចុះ​ផ្សាយ​ជា​​សាធារណៈ​នៅ​ក្នុង​សៀវភៅ​រាជកិច្ច​ថ្ងៃទី​១៧ ខែឧសភា​។​

ផ្ទៃ​ដី​ថ្មី​នេះ​មាន​ទី​តាំង​ស្ថិត​នៅ​ខាង​លើ​ទី​តាំង​ដី​៥១៤​ហិកតា​កាល​ពី​​​លើក​មុន​ដែល​ផ្ដល់​ជូន​​ក្រុ​ម​គ្រួសារ​ផ្លាស់​លំនៅ​ពី​តំបន់​អង្គរ​នេះ​ដែរ។ ទី​តាំង​ថ្មី​នេះស្ថិតនៅ​ក្នុង​ឃុំ​ពាក់​ស្នែង ឃុំ​ស្វាយ​ចេក និង​ឃុំ​លាងដៃ ក្នុង​ស្រុក​អង្គរ​ធំ​។​​

​មេ​ឃុំ​ពាក់​ស្នែង​មាន​ប្រ​សាសន៍​ថា​ប្រ​ជា​ពល​រដ្ឋ​​ ​៣ ៥០០​គ្រួសារ​នឹង​អាច​​ចាប់​ផ្ដើម​មក​រស់​នៅ​ទី​តាំង​ថ្មី​ក្នុង​ឃុំ​របស់​លោក​នៅ​ដើម​ខែ​កក្កដា ខណៈ​មេឃុំ​ពីរ​ផ្សេង​ទៀត​ថា​ខ្លួន​មិន​ទាន់​បាន​ទទួល​ព័ត៌មាន​ជាក់​លាក់​នៅ​ឡើយ​។​

​គិត​តាំង​ពី​ខែ​តុលា​ឆ្នាំ​មុន រដ្ឋាភិបាល​មាន​បំណង​ផ្លាស់​ទី​ប្រ​ជា​ពល​រដ្ឋ​ចំនួន​ ១០ ០០០​គ្រួសារ ដែល​រដ្ឋា​ភិបាល​អះអាង​ថា​បាន​រស់​នៅ​ដោយ​ខុស​ច្បាប់​ក្នុង​តំបន់​ឧទ្យាន​អង្គរ ទៅ​កាន់ពីរ​ទីតាំង​​ផ្សេង​គ្នា​។​ 

​អង្គការ​លើក​លែង​ទោស​អន្តរជាតិ​ប្រាប់​ខេមបូចា​ថា ខ្លួន​មាន​ក្ដីបារម្ភ​ថា​ការ​ផ្លាស់ទី​លំនៅ​​ប្រជាពល​រដ្ឋ​ជា​លើក​ទី​ពីរ​នេះ​អាច​នឹង​នាំ​ឱ្យ​មាន​ «ការជម្លៀស​ដោយ​បង្ខំ» កាន់​តែ​ច្រើនដើម្បី​ឱ្យ​អ្នក​ទាំង​នោះ​ចាក​ចេញ​ពី​តំបន់​អង្គរ​ទៅ​កាន់​ទីតាំង​ថ្មី​ដែល​មិ​ន​ទាន់​បាន​រៀប​ចំ​រួច​រាល់​សម្រាប់​​អ្នក​ទាំង​នោះ​​។​​

កសិករ​ក្នុង​ឃុំ​ពាក់​ស្នែង​ម្នាក់​បាន​ប្រាប់​ខេមបូចា ​ថា លោក​ត្រូវ​បាន​គេ «បង្ខំ» ឱ្យ​ទទួល​យក​ដី​​ក្នុង​ទំហំ​តូច​ដែល​មិន​ទាំង​ដឹង​ថា​នៅ​ទី​ណា​ឱ្យ​ប្រាកដ ដើម្បី​បើក​ផ្លូវ​ឱ្យមាន​ការ​ពង្រីក​ទីតាំង​សម្រាប់​អ្នក​ផ្លាស់ទី​លំនៅ​ថ្មី ខណៈកសិករ​យ៉ាង​តិច​១២​គ្រួសារ​ផ្សេង​ទៀតបានដាក់ពាក្យ​បណ្ដឹង​ក្រោយជួបបញ្ហា​ដូចគ្នាបែបនេះដែរ នេះ​បើ​តាម​ការ​ឱ្យ​ដឹង​​​ពី​លោក​មេឃុំ សុខ ស៊ី​។​​

​លោក​ ឡុង កុសល​ អ្នក​នាំពាក្យ​អាជ្ញាធរជាតិ​អប្សរា មាន​ប្រសាសន៍​ថា​​ទី​តាំង​ដែល​ត្រូវ​ទទួល​អ្នក​ផ្លាស់​ចេញ​ពី​អង្គរ​ត្រូវ​ពង្រីក​បន្ថែម​ដើម្បី​ទទួល​​ប្រ​ជា​ពល​រដ្ឋ​ជា​ច្រើន​គ្រួសារ​បន្ថែម​ទៀត​។​

​លោក កុសល អះអាង​ថា ​គ្មាន​រណា​រង​ផល​ប៉ះពាល់ «​អវិជ្ជមាន» ពី​គម្រោង​ពង្រីង​កន្លែង​ទទួល​អ្នក​ផ្លាស់​ទីលំនៅ​នេះ​ទេ ហើយ​ថាគ្រួសារ​ដែល​ «ស្ម័គ្រចិត្ត» ចាក​ចេញ​ពី​តំបន់​អង្គរ​នឹង​ទទួល​បាន​ដី​ទំហំ​២០​ម៉ែត្រគុណ​នឹង​៣០​ម៉ែត្រ ដូច​ទៅ​នឹង​ប្រជា​ពល​រដ្ឋ​ជា​ច្រើន​គ្រួសារ​ដែល​បាន​ផ្លាស់​ទៅ​នៅ​ឃុំ​រុន​តាឯកដែរ​។​

​បើ​តាម​លោក កុសល រដ្ឋាភិបាល​មិន​ទាន់​ផ្លាស់​ប្រជា​ពល​រដ្ឋ​ចេញ​ពី​តំបន់​អង្គរ​ទៅពាក់ស្នែង​នៅ​​ឡើយ​ទេ ដោយ​ថា​កំពុង​រង់​ចាំ​ការ​កសាង​ហេដ្ឋារចនាសម្ព័ន្ធ ដូច​ជា​ទឹក ភ្លើង និង​ផ្លូវ​ សម្រាប់​​គ្រួសារ​ទាំង​នោះ​ជា​មុន​សិន​។ លោក​ថា​ លោ​ក​មិន​បាន​ដឹង​ច្បាស់​ថា​នឹង​មាន​​ប្រជាពលរដ្ឋ​ប៉ុន្មាន​គ្រួសារ​ដែល​នឹង​ត្រូវ​ផ្លាស់​ទៅ​ទី​នោះ​ទេ ប៉ុន្តែ​ថា​អាជ្ញាធរ​នឹង​រៀប​ចំ​ឱ្យ​បាន​ល្អ​​។​

លោក​ថ្លែង​ថា៖ ​«​យើង​បាន​គិត​អំពីអ្វីដែលអាចកើតឡើងបាន​មុន​នឹង​ធ្វើ​អ្វី​មួយ»។ លោកបន្ថែម​ថា៖ «​​យើង​មិន​ធ្វើ​ការ​ងារ​ណា​ដែល​ប៉ះពាល់​ «អវិជ្ជមាន» ដល់​គ្រប់​គ្នា​នោះទេ»។​

​ការ​ស៊ើប​អង្កេត​មួយ​របស់​ខេមបូចា​ចេញ​ផ្សាយ​កាលពី​ខែ​មេសា បាន​រក​ឃើញ​ថា​ប្រជា​ពល​រដ្ឋ​ជា​ច្រើន​គ្រួសារ​ដែល​ត្រូវ​ជម្លៀស​ទៅ​កាន់​ឃុំ​រុន​តាឯក កាល​ពី​វគ្គ​ទី​មួយ មាន​អារម្មណ៍​ថា​ពួកគេ​គ្មាន​ជម្រើស និង​ខ្វះ​ខាត​​របស់​ដែល​ជា​តម្រូវ​ការ​ចាំ​បាច់​ដូច​ជា​ទីជម្រក ទឹក និង​មុខរបរ នៅ​ពេល​ទៅ​ដល់​ទី​តាំង​ថ្មី​។​

ពល​រដ្ឋ​​​ម្នាក់​រស់​នៅ​ក្នុង​​ឃុំ​ពាក់​ស្នែង​​លើក​ឡើង​ថា​លោក​មិន​ពេញ​ចិត្ត​នឹង​ការ​ទទួលបាន​ដី​២០​ម៉ែត្រគុណ​នឹង​៣០​ម៉ែត្រ ដែល​អាជ្ញាធរ​ផ្ដល់​ឱ្យ​កាលពី​​ពីរ​ខែ​មុន​ជា​ថ្នូរ​នឹង​ដី​ស្រែ​១,៥​ហិកតា​របស់​លោក​ ដែល​គេ​នឹង​យក​សម្រាប់​ជា​ទីតាំង​ទទួល​អ្នក​ផ្លាស់​មក​ថ្មី​នោះទេ។​​

លោក ខ្នូ សុវណ្ណ ដែល​មាន​វ័យ​៥១​ឆ្នាំ​ហើយ​នោះ បាន​និយាយ​ទៀត​ថា លោកត្រូវ​គេ «បង្ខំ» ឱ្យ​ដោះ​ដូរ​ដី​ស្រែ​របស់​ខ្លួន​ជាមួយ​នឹង​ដី​ដែល​មាន​ទំហំ​ត្រឹម​០,៣​ហិកតា ទាំង​ដែល​ទី​តាំង​ថ្មី​មិន​​ទាន់​ដឹង​ថា​នៅ​ទី​ណា​នៅ​ឡើយ​។​​

​លោក សុវណ្ណ​ បញ្ជាក់​ថា៖ «​គេ​បង្ខំពួក​យើង»។ លោកបន្ត​ថា៖ «​ពួកគេ​ឱ្យ​យើង​​នូវ​ដី​តែ​ប្រាំ​ឡូតិ៍​ប៉ុណ្ណោះ។ បើ​សិន​ជា​​យើង​ទាមទារ​ច្រើន​ ពួកគេ​នឹង​មិ​ន​ឱ្យទេ។ ​មិន​ថា​យើង​ពេញ​ចិត្ត​ឬអត់ទេ យើង​ត្រូវ​តែ​ទទួល​យក​វា»។​

​អាជ្ញាធរ​បាន​ផ្ដល់​លិខិត​មួយ​សន្លឹក​បញ្ជាក់​ថា ​លោកបាន​យល់​ព្រម​ទទួល​ការ​ដោះ​ដូរ​ដី ប៉ុន្តែ​មិន​បាន​បញ្ជាក់​ពេល​វេលាជាក់​លាក់​ថា​លោក​នឹង​ត្រូវ​ចាក​ចេញ​នៅ​ពេល​ណា​នោះ​ទេ​។ ខណៈ​ដែល​បច្ចុប្បន្ន​លោក សុវណ្ណ កំពុង​ធ្វើ​ស្រែ​លើ​ដី​របស់​ខ្លួន​នៅ​ឡើយ លោក​នៅ​មិន​ទាន់​ដឹង​ថា​ដី​ថ្មី​ដែល​លោក​ទទួល​បាន​ប្រាំ​ឡូតិ៍​នោះ​នឹង​នៅ​ជាប់​គ្នា​ឬ​យ៉ាងណា​។​

លោកបន្ថែម​ថា៖ «​យើង​បាន​ស្នើ​សុំ​ដី​ប្រាំ​ឡូតិ៍នោះ​ឱ្យ​នៅ​ជាប់​គ្នា ប៉ុន្តែ​មិន​ដឹង​ថាគេ​ឱ្យ​យើង​ឬអត់»។ លោក​បន្ថែម​ថា៖ «​បើ​សិន​ជា​មិន​បាន​ទេ យើង​មិន​អាច​ធ្វើ​ស្រែ​ចម្ការ​បាន​ទេ។ វានឹង​ប៉ះពាល់​ជីវភាព​របស់​យើង។ យើង​ខំរក​ប្រាក់​ដើម្បី​បង់​ធនាគារ និង​ធ្វើ​ស្រែ​ដើម្បី​ទុក​ហូប​»។​

អង្គការ​លើក​លែង​ទោស​អន្តរជាតិ​បាន​ពិពណ៌នា​ការ​ផ្លាស់​ទីលំនៅ​ប្រ​ជា​ពល​រដ្ឋ​ចេញ​ពី​តំបន់​អង្គរ​នេះ​ថា «​បន្លំ​ជម្លៀស​ដោយ​បង្ខំ» ដោយ​ប្រើ​ឈ្មោះ​អង្គការ​យូណេស្កូ តែ​ត្រូវ​បាន​រាជរដ្ឋាភិបាល​បដិសេធ​ចំពោះ​ការ​លើក​ឡើង​នេះ​។​

​ប្រជា​ពល​រដ្ឋ​មួយ​ចំនួន​ដែល​​គេ​យក​ដី​សម្រាប់ទុក​​ទទួល​អ្នក​ផ្លាស់​ទីលំនៅពី​តំបន់​អង្គរ​លើក​ឡើង​ថា ​ពួកខ្លួន​មិន​បាន​ទទួល​សំណង​សមរម្យ​នោះ​ទេ​។ កាលពីខែ​មេសា ខេមបូចា បាន​និយាយ​ជាមួយ​​ប្រ​ជា​ពលរដ្ឋ​ម្នាក់​ក្នុង​ឃុំ​ពាក់​ស្នែង ដែល​ថា​បាន​បាត់​បង់​ដី ​១៥ ០០០​ម៉ែត្រ​ការ៉េ និង​ទទួល​ដី​បាន​វិញ​ត្រឹម ​៣ ០០០​ម៉ែត្រ​ការ៉េដែល​ជា​សំណង​អាជ្ញាធរ​ផ្ដល់​ឱ្យ និង​មិន​ទាន់​ច្បាស់​​ទីតាំង​នៅ​ឡើយ​។​​

លោក ស៊ី មេឃុំ​ពាក់ស្នែង មាន​ប្រសាសន៍​ថា​ក្នុង​ឃុំ​របស់​លោក​មាន​ប្រជា​ពល​រដ្ឋ​ចំនួន​១២​គ្រួសារ​នៅ​មិន​ទាន់​យល់ព្រម​ទទួល​សំណង​ដែល​អាជ្ញាធរ​ផ្ដល់​ឱ្យ​ដី​ទំហំ​២០ម៉ែត្រគុណ​នឹង​៣០​ម៉ត្រ ឬ​ស្នើ​នឹង​០,១២​ហិកតា ជា​ថ្នូ​នឹង​ដី​ស្រែ​ពួកគេ​មួយ​ហិកតា​នៅ​ឡើយ​។​

​មេឃុំ​រូប​នេះ​បញ្ជាក់​ថា​ករណី​របស់​ប្រជា​ពល​រដ្ឋ​១២​គ្រួសារ​នេះ​បាន​បញ្ជូន​ទៅ​អាជ្ញាធរ​ខេត្ត​ហើយ តែ​ថា​មិន​ទាន់​មាន​ដំណោះ​ស្រាយ​។ លោក​បន្ថែម​ថា​បើ​សិន​ជា​អ្នក​ទាំង​នោះ​នៅ​តែ​បដិសេធ​ពួកគេ​អាច​នឹង​មិន​ទទួល​បាន​ដី​អ្វី​ទាំង​អស់។​​

អភិបាលខេត្ត​សៀមរាប លោក ទៀ សីហា មិន​អាចទាក់​ទង​សុំ​អត្ថាធិប្បាយ​បានទេ​។​

​លោក គឿន កែប មេឃុំ​លាង​ដៃ មាន​ប្រសាសន៍​ថា​លោក​នៅ​មិន​ទាន់ទ​ទួល​បាន​ដំណឹង​ពី​ការ​កាត់ដី​ជិត​៩០០​ហិកតា​ក្នុង​ឃុំ​របស់​លោក​នៅ​ឡើយ​។​

លោក ឈួន ឯម មេឃុំ​ស្វាយ​ចេក មាន​ប្រសាសន៍​ដែរថា ​មានតែប្រ​ជា​ពល​រដ្ឋ​មួយ​គ្រួសារ​ប៉ុណ្ណោះ​ដែល​នៅ​មិន​ទាន់​អាច​ដោះស្រាយ​បាន ហើយថា​ករណី​នេះ​ត្រូវ​បានបញ្ជូន​ទៅ​​ថ្នាក់​ស្រុក​ហើយ​។​

លោក​បន្ថែម​ថា គ្រួសារ​មួយ​ដែលមិន​ពេញ​ចិត្ត​នឹង​សំណង​ដែល​ទទួល​បាន​ ពីព្រោះ​ថា​ដី​ដែល​គេ​បាត់​បង់​មាន​ទំហំ​ធំ​។ គ្រួសារខាងលើ​​មិន​អាច​ទាក់ទង​សុំ​ការ​អត្ថាធិប្បាយ​ទេ ​ប៉ុន្តែ​​ប្រជាពលរដ្ឋ​ជា​ច្រើន​គ្រួសារ​ទៀត​ក្នុង​ឃុំ​ស្វាយ​ចេក​មិន​ទាន់​បាន​ដឹង​ពី​ការ​ដោះដូរ​ដី​សម្រាប់​គ្រួសារ​ប្រជា​ពល​រដ្ឋ​ដែល​ផ្លាស់​មក​ថ្មី​នោះទេ​។​

មន្ត្រី​សិទ្ធិមនុស្ស​អង្គការ ​លីកាដូ ​ប្រចាំ​ខេត្ត​សៀម​រាប មាន​ប្រសាសន៍​ថា​ លោក​មិន​ទាន់​បាន​ទទួល​ដំណឹង​ពី​ការ​ពង្រីង​ទី​តាំង​ជិត​៩០០​ហិកតា​​ក្នុង​ឃុំ​ទាំង​បី​នេះនៅ​ឡើយ​។ ប៉ុន្តែ​លោកបន្ត​ថា បញ្ហា​មុន​ជាមួយ​គ្រួសារ​ដែល​មាន​ស្រាប់​ដែល​រង​ផល​ប៉ះពាល់​ដោយ​ផ្ទៃដី៥១៤ហិកតា​ដែល​​ត្រូវ​បែងចែក​ជា​ផ្ទះដល់​គ្រួសារ​ថ្មី​ត្រូវ​បាន​ដោះស្រាយ​រួច​ហើយ​។​​

លោក​នាយក​រដ្ឋ​មន្ត្រី ហ៊ុន សែន មាន​ប្រសាសន៍​ថា​ការ​ផ្លាស់​ទី​លំនៅ​ប្រជា​ពល​រដ្ឋ​ដ៏​ច្រើន​នេះ​ គឺ​ធ្វើ​ឡើង​ដើម្បី​ស្រប​តាម​គោលការណ៍​អង្គកា​រ​យូណេស្កូ និង​ដើម្បី​ឱ្យ​តំបន់​ឧទ្យាន​អង្គរ​នៅ​តែ​ស្ថិត​ក្នុង​បញ្ជី​តំបន់​បេតិ​កភណ្ឌ​ពិភព​លោក​។​

អង្គកា​រយូណេស្កូ ដែល​ជា​ស្ថាប័ន​ជំនាញ​ក្នុង​ការ​គ្រប់​គ្រង​តំបន់​អង្គរ បាន​បដិសេធ​ជា​សាធារណៈ​​ថា ​ខ្លួន​មិន​ជាប់ពាក់ព័ន្ធ​នឹង​ការ​ផ្លាស់​ទីលំនៅ​ប្រជា​ពល​រដ្ឋ​នេះទេ ថ្វី​បើ​ស្ថាប័ននេះ​កន្លង​មក​ធ្លាប់​បាន​លើក​ឡើង​ម្ដង​ជាពីរ​ដង​ឱ្យ​មាន​ការ​រុះរើ​ «សំណង់​ខុសច្បាប់» ជុំ​វិញ​ប្រសាទ​អង្គរ​។​

​អ្នកនាំពាក្យ​អង្គការ​យូណេស្កូ បាន​ប្រាប់​ខេមបូចា​តាម​សារអេឡិចត្រូនិក​កាលពីថ្ងៃ​ព្រហស្បត្តិ៍ សប្តាហ័មុនថា​៖ «​ដូច​ដែល​យូណេស្កូ​បាន​បញ្ចាក់​ជា​ច្រើន​ដង​រួច​មក​ហើយ អង្គការ​យូណេស្កូ និង​គណៈកម្មាធិការ​បេតិកភ័ណ្ឌ​ពិភព​លោក​មិន​ពាក់​ព័ន្ធ​នឹង​កម្មវិធី​ផ្លាស់ទី​លំនៅ​នេះ​ទេ ហើយ​ថា​ក៏​មិន​បាន​ស្នើ​​ទៅអាជ្ញាធរ​កម្ពុជា​ឱ្យ​មាន​ការ​ផ្លាស់​ទីលំនៅ​ប្រជា​ពល​រដ្ឋ​ដែរ»។​

អង្គការ​យូណេស្កូ​និយាយ​ថា ការិយាល័យ​របស់​ខ្លួន​នៅ​ទីក្រុង​ភ្នំពេញ​បាន​ទទួល​ការ​ធានា​ពី​រដ្ឋាភិបាល​កម្ពុជាថា​នឹង​គោរព​នូវ​ការ​អភិវឌ្ឍប្រកប​ដោយ​ចេរភាព និង​គោរព​គោលការណ៍​មូលដ្ឋាន​គ្រឹះ​សិទ្ធិ​មនុស្ស​។​ អង្គការ​យូណេស្កូ បន្ត​ថា​ រដ្ឋាភិបាល​កម្ពុជា​បាន​បញ្ជាក់​យ៉ាង​ច្បាស់​ថា​ខ្លួន​បាន​ផ្ដល់​នូវ​សំណង​ត្រឹម​ត្រូវ​ទៅ​កាន់​គ្រួសារ​ដែល​ប៉ះ​ពាល់​ក្នុង​គម្រោង​ផ្លាស់ទី​លំនៅ​នេះ។​

កាល​ពី​ថ្ងៃទី​២២ ខែមីនា អង្គការ​យូណេស្កូ​បាន​ស្នើ​ឱ្យ​ក្រសួង​វប្បធម៌ ដែល​គ្រប់​គ្រង​លើ​អាជ្ញាធរ​​ជាតិ​អប្សរាឱ្យ «​ផ្ដល់​ព័ត៌មាន​បន្ថែមលើ​បញ្ហា​ផ្លាស់​ទីលំនៅ​ប្រជា​ពល​រដ្ឋ» នៅ​តំបន់​អង្គរ​។​

អង្គការ​យូណេស្កូ​បន្ថែម​ថា ​ខ្លួន​នឹង «យក​ព័ត៌មាន​ពាក់​ព័ន្ធ​ទាំង​អស់» ដូច​ជា​ «របាយការណ៍​ពី​រដ្ឋាភិបាល» និង​ «ព័ត៌មាន​របស់​ភាគីទីបី» ដើម្បី​ផ្ដល់​ជូន​ទៅ​កាន់​គណៈកម្មាធិការ​បេតិកភ័ណ្ឌ​ពិភព​លោក ដែល​គណៈកម្មាធិការ​នេះ​មាន​តំណាង​មកពី​រប្រទេស​ចំនួន​២១ ហើយ​និង​មាន​ការ​រៀប​ចំ​កិច្ច​ប្រជុំ​មួយ​នៅ​ខែ​កញ្ញា ខាង​មុខ​ដើម្បី​ពិនិត្យ វាយ​តម្លៃ​លើ​ស្ថាន​ភាព​ជាក់​ស្ដែង​នៅ​ឧទ្យានអង្គរ​។​

​អ្នកនាំពាក្យ​អង្គការ​យូណេស្កូ​ សរសេរ​បន្ថែម​ថា៖​ «នៅ​ក្រោម​យន្តការ​អនុសញ្ញា​អង្គការ​យូណេស្កូ​​ឆ្នាំ​១៩៧២ ​រដ្ឋជា​សមាជិក​ទាំងអស់​នៃគណៈកម្មាធិការ​នឹង​សិក្សា​ពីស្ថានភាព រួច​នឹង​ធ្វើ​ការ​សម្រេច​ចិត្ត​ដ៏​ត្រឹម​ត្រូវ​មួយ​»។​

Joe Freeman នាយករង​ស្ដី​ទី​ប្រចាំ​តំបន់​របស់​អង្គការ​លើក​លែង​ទោស​អន្តរជាតិ​សម្រាប់​ផ្នែក​ទំនាក់ទំនង បង្ហាញ​កង្វល់​របស់​ខ្លួន​តាម​រយៈ​សារអេឡិចត្រូនិក​ផ្ញើ​មក​កាន់​ខេមបូចា ​ថា ការ​ផ្លាស់ទី​លំនៅ​ជា​លើក​ទី​ពីរ​នេះ​អាច​នាំ​ឱ្យ​មានប្រជា​ពល​រដ្ឋ​កាន់​តែច្រើនដែល​មាន​បញ្ហា​ត្រូវ​ដោះ​ស្រាយ​ដូច​ប្រជា​ពល​រដ្ឋ​នៅ​តំបន់​រុន​តាំឯក​ដែរ​។​

លោកបន្ត​ថា៖ «​ប្រជា​ពល​រដ្ឋ​ជា​ច្រើន​កំពុង​ជាប់​បំណុល ពីព្រោះ​ពួកគេ​មិន​មានការ​ងារធ្វើ ឬ​ផ្ទះ​ដែល​មិន​ទាន់​សាងសង់​រួច​ពេល​ពួកគេ​ទៅ​ដល់​កន្លែង​ថ្មី​នោះ»។ លោក​បន្ថែមថា៖ «​បើ​តាម​ការ​ស្រាវ​ជ្រាវ​របស់​យើងបង្ហាញ​ថា​រដ្ឋាភិបាល​មិន​បាន​មាន​វិធានការ​ត្រឹម​ត្រូវ​ក្នុង​ការ​ការពារ​ពល​រដ្ឋ​ពី​ការ​ជម្លៀស​ដោយ​បង្ខំ​ ស្រប​ទៅ​តាម​បទដ្ឋាន​សិទ្ធិ​មនុស្ស​អន្តរជាតិ​នោះទេ រួម​មាន​ដូចជា​ខ្វះ​ការ​ជូន​ដំណឹង​ជាមុន ហើយ​នឹង​ការ​ប្រឹក្សា​ត្រឹម​ត្រូវ​ជាមួយ​នឹង​អ្នក​រង​ផល​ប៉ះពាល់​ពីការ​បណ្ដេញ​​ចេញ និង​នីតិវិធី​ដោះស្រាយ​បញ្ហា​ជា​ដើម​»។​​

សម្រាប់​គ្រួសារ​ដែល​ត្រូវ​ផ្លាស់​ទៅ​រស់​នៅ​រុនតាឯក​បាន​ទទួល​ស័ង្កសី​សម្រាប់​ប្រក់​ផ្ទះ ដែល​ផ្ដល់​ជា​សាច់​ប្រាក់៣០០​ដុល្លារ ព្រម​ជាមួយ​បណ្ណ​ក្រី​ក្រ មុង ក្រណាត់​តង់​មួយ និង​ការ​ផ្ដល់​ជា​ម្ហូប​អាហារ​សម្រាប់​រយៈពេល​ពីរ​ខែ។ នេះ​បើ​តាម​របាយការណ៍​របស់​អង្គការ​លើក​លែង​ទោស​អន្តរជាតិ​។​

​អង្គការ​លើក​លែង​ទោស​អន្តរជាតិ​បាន​អំពាវនាវ​ឱ្យ​អាជ្ញាធរ​ធានា​ថា ​ប្រជា​ពល​រដ្ឋ​ដែល​ត្រូវ​ផ្លាស់ទី​លំនៅ​ទាំងពីរ​ទីតាំង​បាន​ទទួល​លំនៅ​ឋាន​សមរម្យ មាន​បង្គន់​អនាម័យ និង​កន្លែង​ទុក​ដាក់​សំរាម​ត្រឹមត្រូវ សំណង​សមរម្យ និង​មាន​ឱកាស​ការងារ​ត្រឹម​ត្រូវ​។​

​អ្នកនាំពាក្យ​អង្គការ​ដដែល​លើក​ឡើងថា៖ «​បើ​តាម​ស្ថាន​ភាព​នៅ​រុន​តាឯក​បច្ចុប្បន្ន​ ទី​តាំង​គឺ​ពិបា​ក​រស់​នៅ ហើយ​យើង​បានអំពាវ​នាវ​ឱ្យ​រដ្ឋាភិបាល​បញ្ឈប់​ការ​ជម្លៀស​ប្រជា​ពល​រដ្ឋ​ទៅ​កាន់​ទី​នោះ​ទេ​»។​

​ស្រប​ពេល​ដែល​ហេដ្ឋារចនាសម្ព័ន្ធ​នៅ​រុន​តាឯក​មាន​ភាព​ល្អប្រសើរ​ឡើង​ក្រោយពី​ការ​​ផ្លាស់​ទីលំនៅ​ទៅ​​បាន​ប៉ុន្មាន​ខែ អ្នកស្រី គឹម ការី វ័យ​៥៤​ឆ្នាំ ដែល​ត្រូវ​ផ្លាស់​ឱ្យ​ទៅរស់​នៅ​រុន​តាឯក​កាលពីខែ​កុម្ភៈ ប្រាប់​ខេមបូចា ថា ​អ្នក​ស្រី​នៅ​តែ​មិន​អាចរក​ប្រាក់​ចិញ្ចឹម​ជីវិត​បាន​​នៅ​ទី​នោះ​។​

អ្នកស្រីថ្លែង​ថា៖ «​ខ្ញុំ​មិន​អាច​លក់​ម្ហូម​បានទេ»។ អ្នកស្រីបន្តថា៖ «​ខ្ញុំ​មិន​អាច​រក​ប្រាក់​បាន។ វាស្ងាត់​​ពេក។ ខ្ញុំ​បាន​ត្រឹម​តែ​នៅ​ផ្ទះ​ប៉ុណ្ណោះ​»។​ ​

អ្នកស្រី ការី ​លើកឡើងទៀត​ថា៖ «ខ្ញុំ​បាន​ទទួល​ជំនួយ​បន្តិច​បន្តួច​ព្រោះ​ខ្ញុំ​មាន​បណ្ណ​ក្រីក្រ»។ អ្នកស្រី​បន្ថែម​ថា៖ «​ហើយ​ឥឡូវ​ខ្ញុំ​មាន​តែ​ការ​ចំណាយ តែគ្មាន​ចំណូល​ទេ»

ប្រែសម្រួលពីអត្ថបទអង់គ្លេស៖ Relocation Site Expanded for Thousands More Angkor Families Facing Removal

484 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម