ភ្លៀងធា្លក់ក្នុងកំឡុងប៉ុន្មានថ្ងៃជាប់ៗគ្នា បណ្តាលឱ្យផ្ទះសម្បែងរបស់ប្រជាពលរដ្ឋ នៅតាមដងស្ទឹងព្រែកត្នោត ស្ថិតក្នុងខណ្ឌដង្កោ រាជធានីភ្នំពេញ លិចលង់យ៉ាងដំណំ ។
លោក ហង្ស ជុំ ចៅសង្កាត់ស្ពានថ្ម ប្រាប់ ខេមបូចា នៅថ្ងៃទី២៩ ខែកក្កដាថា រយៈពេល២ថ្ងៃហើយ គឺចាប់តាំងពីថ្ងៃទី២៨ ដល់ទី២៩ ខែកក្កដា ប្រជាពលរដ្ឋប្រមាណជាង ២០ខ្នងផ្ទះ ក្នុងចំណោមប្រជាពលរដ្ឋជាង ៧០០គ្រួសារ នៃសង្កាត់ស្ពានថ្ម បានរងប៉ះពាល់ខ្លាំងដោយសារជំនន់ទឹកភ្លៀង ។ រីឯដីបង្កបង្កើនផលមួយចំនួនក៏ត្រូវលិចលង់ដែរ ។ ទោះបីយ៉ាងណា ពុំមានប្រជាពលរដ្ឋណាម្នាក់រងគ្រោះថ្នាក់នោះទេ ។
ដើម្បីជាដំណោះស្រាយ និងជាទស្សនវិស័យយូរអង្វែង លោកនាយករដ្ឋមន្ត្រី ហ៊ុន ម៉ាណែត ថ្លែងនៅក្នុងពិធីបិទសន្និបាត នាក្រសួងធនធានទឹក និងឧតុនិយម កាលពីថ្ងៃទី១០ ខែមេសា ឆ្នាំ២០២៤ ថា គម្រោងដែលមានថវិកាចំនួន ៣០០លានដុល្លារ ត្រូវបានអនុម័ត សម្រាប់ដំណោះស្រាយបញ្ហាទឹកជំនន់នៅរាជធានីភ្នំពេញ ។
របាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ នៅឆ្នាំ២០២៣ បង្ហាញថា អ្នកបោះតង់ពីរនាក់បានបាត់បង់ជីវិតនិង ២នាក់ទៀតរងរបួស បន្ទាប់ពីតង់របស់ពួកគេត្រូវបានព្យុះបក់បោក និងទឹកជ្រោះគួច នៅារមណីយដ្ឋានទឹកធ្លាក់ឪម៉ាល់ ស្ថិតក្នុងឃុំម៉ាក់ប្រាង្គ ស្រុកទឹកឈូ ខេត្តកំពត ហើយប្រជាពលរដ្ឋជាង ១២ម៉ឺនគ្រួសារបានរងផលប៉ះពាល់ ក្នុងនោះ ១៧៩គ្រួសារ ត្រូវបានជម្លៀសចេញពីផ្ទះសម្បែង ខណៈទឹកកំពុងតែជោរជន ផ្ទះ ៩.០៥៣ខ្នង សាលារៀន ១៩ខ្នង ផ្លូវ ២៤.៩១៧ម៉ែត្រ រងផលប៉ះពាល់ ហើយស្រូវជិត ១២.០០០ ហិកតារ រងការលិចលង់ ៕
