សមាគមសម្ព័ន្ធអ្នកសារព័ត៌មានកម្ពុជា

ពលរដ្ឋនៅឃុំមួយនៃខេត្តស្វាយរៀងផ្ទុះការកើតជំងឺរាគក្អួតបន្តគ្នា

ស្ត្រីម្នាក់កំពុងពក្មេងស្រីម្នាក់ដៃជាប់សេរ៉ូម នៅក្នុងបរិវេណមន្ទីរពេទ្យបង្អែកស្រុករមាសហែក ខេត្តស្វាយរៀង នៅថ្ងៃទី១៥ ខែវិច្ឆិកា ឆ្នាំ២០២៣។ (រូបថតផ្តល់ឱ្យ)
ស្ត្រីម្នាក់កំពុងពក្មេងស្រីម្នាក់ដៃជាប់សេរ៉ូម នៅក្នុងបរិវេណមន្ទីរពេទ្យបង្អែកស្រុករមាសហែក ខេត្តស្វាយរៀង នៅថ្ងៃទី១៥ ខែវិច្ឆិកា ឆ្នាំ២០២៣។ (រូបថតផ្តល់ឱ្យ)

ប្រជាពលរដ្ឋនៅក្នុងឃុំអំពិល ស្រុករមាសហែក ខេត្តស្វាយរៀង ទាំងចាស់ទាំងក្មេងកើតមាន​ជំងឺ​រាគក្អួតបន្តបន្ទាប់គ្នារយៈពេលប្រមាណ​១ខែមកនេះ នាំឱ្យអ្នកភូមិបារម្ភថា ជាប្រភេទជំងឺឆ្លង​ដែល​អាចប៉ះពាល់ធ្ងន់ធ្ងរដល់សុខភាព និងអាយុជីវិត។

ប្រជាពលរដ្ឋរស់នៅក្នុងឃុំអំពិល អ្នកស្រី ខៀវ សារុន ឱ្យដឹងថា ២សប្តាហ៍មុនចៅ​របស់​អ្នកស្រី​បាន​រាគក្អួតហើយទៅសម្រាកនៅមន្ទីរពេទ្យបង្អែកស្រុកមួយរយៈ។ លុះដល់ពេលនេះ អ្នកស្រី​ខ្លួន​ឯង​កំពុង​ឈឺរាគក្អួតមានអាការៈដូចចៅដែរ។

អ្នកស្រី មានការព្រួយបារម្ភដោយសារជំងឺដូចគ្នានេះកើតឡើងច្រើន មិនធ្លាប់មានពីមុនមក។

អ្នកស្រី ខៀវ សារុន៖ «ដេកនៅពេទ្យស្រុកហ្នឹង ភាគច្រើនក្អួតហើយរាគម៉ងគ្រូ ក្មេងៗ ក្មេងៗតូចៗ​អត់ទាន់ដល់១ខួប ពីរបីខែ ១ខួបជាង បួនប្រាំឆ្នាំ ដប់ឆ្នាំ។ និយាយទៅសឹងថាទាំងអស់​ក្មេងហ្នឹង​គ្រាន់​ថា អាការៈក្អួតរាគដូចគ្នា គ្រាន់ថាខ្លះវាខ្សោយចឹងលេបថ្នាំនៅមណ្ឌល​[សុខភាព] នៅឃុំអី​ជា​ទៅអ៊ីចឹងក៏អន់ទៅ តែភាគច្រើនគឺគាត់ដេកនៅស្រុក[មន្ទីរពេទ្យបង្អែកស្រុករមាសហែក]ហ្នឹង។ បើខ្ញុំ​មើលទៅក្នុងបន្ទប់ដែលខ្ញុំនាំចៅខ្ញុំហ្នឹងដេកហ្នឹង៩០ភាគរយគឺក្អួតរាគទាំងអស់គ្នា»

អ្នកស្រី សារុន បន្ថែមថា«នៅក្នុងបន្ទប់ហ្នឹងគ្រែប្រហែលជាខ្ទង់២០គ្រែ និយាយទៅជំងឺហ្នឹងទាំងអស់ [រាគក្អួត] ហើយដល់ពេលខ្ញុំដើរចេញពីបន្ទប់ចៅខ្ញុំទៅមើលបន្ទប់មួយដែលបន្ទប់ក្មេងនៅជិតហ្នឹងដែរ សួរទៅភាគច្រើនគឺជំងឺហ្នឹងទាំងអស់ដែរគ្រូ។ ខ្ញុំចូលមើលបាន​២បន្ទប់ហ្នឹង ភាគច្រើនគឺជំងឺហ្នឹង»។

ដូចគ្នាដែរប្រជាពលរដ្ឋម្នាក់ទៀត អ្នកស្រី ចេង ពិសី ឱ្យដឹងថា កូនរបស់អ្នកស្រី អាយុ១ខួប៧ខែ ក៏បាន​ក្អួត និងរាគភ្លាមៗ ដោយមិនមានអាការៈធ្វើទុក្ខអីមុននោះទេ។

អ្នកស្រី ចេង ពិសី៖«ក្អួតប្រមាណប្រាំមួយប្រាំពីរដងម៉ាអស់ជាតិហ្នឹង។ ពេទ្យគេឱ្យអាថ្នាំវីតាមីន​ហ្នឹង​បៀម មុនដំបូងបៀមអាថ្នាំវីតាមីនហ្នឹងហើយក៏វាលែងមាន មុនដំបូងវារកចេះចង្អោរៗជាប់រហូត»

ពលរដ្ឋម្នាក់ទៀត អ្នកស្រី យឹម សារ៉ាន ឱ្យដឹងថា ចៅរបស់អ្នកស្រីអាយុ១ខួប១ខែ បាន​រាគផង​ក្អួត​ផង រយៈេពលមួយសប្តាហ៍ពេញ ធ្វើ​ឱ្យ​គាត់មានការព្រួយបារម្ភខ្លាំង។

អ្នកស្រី យឹម សារ៉ាន៖«និយាយរួមរាគរហូត រាគហើយក្អួតៗ ដល់ថ្នាក់ខ្ញុំក្នុង១យប់១ថ្ងៃ​ខ្ញុំប្រើ​ខោ​ទឹក​នោម​ក្មេងអាបេធំ៣០ជាងប្រើបាន​តែ១យប់១ថ្ងៃ។ វារាគជាប់រហូតម៉ង។ និយាយទៅថាវាអត់ទាន់​ដល់​កន្លះម៉ោងទេម្តងទៀតហើយ។ វាដូចយើងលាងអីហើយមិនទាន់បានច្រកខោអីផង មកម្តទៀត​ក៏មានដែរ រហូតអ៊ីចឹងហា៎ពូ»

អ្នកស្រី សារ៉ាន ឱ្យដឹងទៀតថា ដំបូងឡើយចៅរបស់អ្នកស្រីនាំយក​ទៅព្យាបាលនៅពេទ្យឯកជន​ក្នុង​ឃុំរយៈពេល៣ថ្ងៃ ប៉ុន្តែអការៈហាក់មិនធូរស្បើយ ហើយក៏អ្នកស្រីសម្រេច​នាំចៅទៅព្យាបាល​នៅ​មន្ទីរ​ឯកជនទៅឯខេត្តស្វាយរៀង ដោយបារម្ភពីសុវត្ថិភាពរបស់​ចៅអ្នកស្រី។

ពលរដ្ឋភាគច្រើនបាននាំគ្នាទៅព្យាបាលនៅមន្ទីរពេទ្យបង្អែកស្រុករមាសហែក និងអ្នកខ្លះទៀត​ចំណាយ​លុយទៅព្យាបាលនៅពេទ្យឯកជន។ ពួកគាត់អះអាងថាមូលហេតុដែលមិន​ទៅ​មណ្ឌល​សុខភាព​ឃុំអំពិលដោយសារនៅទីនោះខ្វះថ្នាំព្យាបាល។

ប្រជាពលរដ្ឋនៅក្នុងឃុំនេះថ្លែងថា ពួកគេព្រួយបារម្ភថានេះជាប្រភេទជំងឺឆ្លង ឬអាសន្នរោគ ដែល​អាច​ប៉ះពាល់ធ្ងន់ធ្ងរដល់សុខភាព និងអាយុជីវិត។

ជំទប់ទី១នៃឃុំអំពិល លោក វ៉ាន់ វៃ ឱ្យដឹងថា ចៅរបស់លោកក៏កើតជំងឺនេះដែរ ប៉ុន្តែក្រោយដាក់ថ្នាំ​ហើយមួយពេលខ្លីក៏ជាវិញ។ លោកបន្តថា ស្ថានភាពរាគក្អួតនេះ មិនមែនជាប្រភេទជំងឺឆ្លងធ្ងន់ធ្ងរ​ទេ​អាចគ្រាន់តែបញ្ហាខ្វះអនាម័យតែប៉ុណ្ណោះ។

លោក វ៉ាន់ វៃ ឱ្យដឹងទៀតថា អាជ្ញាធរឃុំតែងផ្សព្វផ្សាយអប់រំពីបញ្ហាសុខភាពជាប្រចាំដោយឱ្យ ពលរដ្ឋ​ចេះរក្សាអនាម័យហើយពេលមានជំងឺត្រូវទៅមន្ទីរពេទ្យ។

លោក វ៉ាន់ វៃ៖«ជួនកាលយើងធ្វើការផ្សព្វផ្សាយផ្នែកអានាម័យផ្នែកអីចឹងទៅ យើងតែងតែធ្វើ​តាម​ខែនីមួយៗតាមភូមិចឹងហា៎។ យើងតែងតែផ្សព្វផ្សាយរហូតដែរហ្នឹង ជំរុញឱ្យប្រជាពលរដ្ឋបញ្ជូនកូន បើមានបញ្ហាបញ្ជូនកូនទៅមណ្ឌលសុខភាព ឬក៏មន្ទីរពេទ្យបង្អែកអ៊ីចឹងទៅ»

ប្រធានមណ្ឌលសុខភាពឃុំអំពិល គង់ សុផាត មានប្រសាសន៍ថា លោកបានប្រមូលព័ត៌មានពី​ស្ថានភាព​អ្នកជំងឺទាំងនេះ ពីអាជ្ញាធរនៅតាមភូមិហើយ។ លោកបន្តថា ស្ថានភាពទាំងនេះ អាច​បណ្តាលមកពីការពុលអាហារ និងខ្វះអនាម័យមិនមែនជាជំងឺឆ្លងគួរឱ្យព្រួយបារម្ភទេ។

លោក គង់ សុផាត៖«ទាក់ទងអាបញ្ហាការហូបចុករបស់គាត់ ទាក់ទងនឹងពុលចំណី​អាហារការ​ហូប​ចុក​របស់គាត់ ទាក់ទងការផ្លាស់ប្តូរអាកាសធាតុរដូវកាល ទាក់ទងការបរិភោគអនាម័យ​របស់​គាត់​ភាគ​ច្រើន។ បាទ! អាកាសធាតុប្រែប្រួល ជូនកាលទឹក អនាម័យ បន្លែបន្លុកហូបចុកអី ទាក់ទងគាត់​មិនសូវ​បានសម្អាតអ៊ីចឹងទៅ ចំណីចំណុកអីចឹងទៅ»

ឃុំអំពិលជាឃុំមួយនៅស្រុករមាសហែក ខេត្តស្វាយរៀង មានប្រជាពលរដ្ឋជិត២ពាន់គ្រួសារ(១ ៩០៥​គ្រួសារ)ស្មើនឹងជាង៧ពាន់នាក់(៧ ៥០១នាក់) ស្រី៣៨៨៦នាក់។

តាមពលរដ្ឋឱ្យដឹងថា ពួកគេភាគច្រើនពឹងលើរបរកសិកម្មមានជីវភាពលំបាក ហើយក្នុងស្ថានភាព​វិបត្តិសេដ្ឋកិច្ចនេះមានការបន្ថយអាហារផង អាចជាបញ្ហាមួយប៉ះពាល់ដល់សុខភាព៕

302 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម