សមាគមសម្ព័ន្ធអ្នកសារព័ត៌មានកម្ពុជា

មន្ត្រីចូលនិវត្តន៍ម្នាក់នៅខេត្តកំពង់ឆ្នាំងថាធនាគារហត្ថាបង្ខំឱ្យគាត់លក់ផ្ទះសងបំណុល

ទីតាំងសាខាធនាគារហត្ថា ស្ថិតក្នុងក្រុងកំពង់ឆ្នាំង ខេត្តកំពង់ឆ្នាំង។ រូបថតនៅថ្ងៃទី១៥ ខែធ្នូ ឆ្នាំ២០២២។ ខេមបូចា/ អាន វិចិត្រ
ទីតាំងសាខាធនាគារហត្ថា ស្ថិតក្នុងក្រុងកំពង់ឆ្នាំង ខេត្តកំពង់ឆ្នាំង។ រូបថតនៅថ្ងៃទី១៥ ខែធ្នូ ឆ្នាំ២០២២។ ខេមបូចា/ អាន វិចិត្រ

មន្ត្រីចូលនិវត្តន៍នៅខេត្តកំពង់ឆ្នាំង១រូបអះអាងថា រូបគាត់ត្រូវប្រធានធនាគារ​ហត្ថា​ប្រចាំខេត្ត​នេះបង្ខំឱ្យលក់ផ្ទះក្នុងតម្លៃទាបដើម្បីសងបំណុលបើមិនធ្វើដូច្នោះទេ​ប្រឈម​ការប្តឹងទៅ​តុលាការ​ឈានដល់ការរឹបអូសលក់ឡៃឡុង ខណៈអ្នកស្រីស្នើសុំបន្ថយចំនួន​បង់សង​បណ្តោះ​អាសន្នរង់ចាំការលក់ផ្ទះបានតម្លៃសមតាមទីផ្សារទើបសងផ្តាច់ទាំងស្រុង។​

អ្នកស្រី ទៀង រ៉ាដា ជាមន្ត្រីសុខាភិបាលចូលនិវត្តន៍ថ្លែងថា នៅថ្ងៃទី១២ ខែធ្នូ កន្លងទៅ ប្រធាន​ធនាគារហត្ថាប្រចាំខេត្តកំពង់ឆ្នាំងឈ្មោះ ស៊ុក ស៊ីណាន រួមទាំងបុគ្គលិក២រូប​ទៀត បាន​ទៅ​ដល់ផ្ទះអ្នកស្រី ដែលប្រើពាក្យសម្តីធ្ងន់ៗ និងបង្ខំឱ្យអ្នកស្រីលក់ផ្ទះក្នុងតម្លៃទាប ឱ្យតែបាន​លុយ​បង់ធនាគារ។​

អ្នកស្រី ទៀង រ៉ាដា បញ្ជាក់ថា៖ «​គេថា ចង់ឱបផ្ទះ ឱបទ្រព្យធ្វើអី? លក់ឡៃឡុងឱ្យគេទៅ៥ទៅ​៦ម៉ឺនទៅ។​ ហើយលក់៥ឬ៦ម៉ឺនហ្នឹងហើយខ្ញុំទៅជ្រកក្រោមដើមឈឺ? »។

អ្នកស្រី ទៀង រ៉ាដា អាយុ៦២ ឆ្នាំ ធ្លាប់បម្រើការងារជាមន្ត្រីមន្ទីរសុខាភិបាលខេត្តកំពង់ឆ្នាំង​ពី​ឆ្នាំ១៩៧៩ដល់ឆ្នាំ២០១៩។ បច្ចុប្បន្នអ្នកស្រីនៅជំពាក់លុយធនាគារហត្ថា ៣២ ០០០ ដុល្លារ ដែលបានខ្ចីយកទៅសាងសង់ផ្ទះកាលពីឆ្នាំ២០១៦។ អ្នកស្រីឱ្យដឹងថា កាលពីគាត់​មិន​ទាន់ចូលនិវត្តន៍ មានប្រាក់ខែទាំងមន្ត្រី និងលុយធ្វើការងារ​ថែមខាងក្រៅខ្លះ​ទទួលបាន​ជាង​ ១ ០០០​ដុល្លារក្នុង១ខែ ប៉ុន្តែចាប់តាំងពីរូបគាត់ចូលនិវត្តន៍នៅឆ្នាំ២០១៩មក ប្រាក់បៀវត្សរ៍​ទទួល​បានតែជាង១០០ដុល្លារតែប៉ុណ្ណោះ ចំណែកសុខភាពក៏ទ្រុឌទ្រោមដែរ។​​

អ្នកស្រីបន្តថា គាត់មិនបានគេចវេះពីការបង់សងធនាគារទេ គ្រាន់តែថា សុំបន្ថយចំនួនបង់​សង​គឺធនាគារតម្រូវឱ្យគាត់បង់សង​៥៥០ដុល្លារក្នុង១ខែ ប៉ុន្តែគាត់ស្នើសុំបង់ត្រឹម៣៥០ដុល្លារ​ក្នុង១ខែសិន រង់ចាំលក់ផ្ទះដាច់ក្នុងតម្លៃតាមទីផ្សារនឹងបង់សងផ្តាច់តែម្តង។​

​មន្ត្រីចូលនិវត្តន៍ដែលកំពុងមានជំងឺទឹកនោមផ្អែមរូបនេះ ឱ្យដឹងថា មួយរយៈចុងក្រោយនេះ​រូបគាត់មិនមានលុយទិញថ្នាំ ហើយក៏ដេកមិនសូវលក់ដែរព្រោះស្មុគស្មាញរឿង​ធនាគារ​បង្ខំ​ឱ្យលក់ផ្ទះ។​

អ្នកស្រី ទៀង រ៉ាដា លើកឡើងថា៖ «ដល់ខ្ញុំពិបាកចិត្តពេក យប់មិញអត់ដេកលក់ទេលោកគ្រូ ចាប់ពីម៉ោង១២ ក្រោកទល់ភ្លឺ។ ខ្ញុំនេះដាច់ទាំងលុយអត់បានទៅពេទ្យផង ខ្ញុំមានជំងឺទឹកនោម​ផ្អែម ខ្ញុំខានលេបថ្នាំទឹកនោមផ្អែមជិត២ខែហើយ»។​

បញ្ហានេះ អ្នកស្រី ទៀង រ៉ាដា បានទៅជួបជាមួយមន្ត្រីមូលដ្ឋានសុំអន្តរាគមន៍ចាប់ពីថ្នាក់ភូមិ សង្កាត់ ក្រុង និងខេត្ត ប៉ុន្តែមិនទាន់ទទួលបានដំណោះស្រាយ​ណាមួយដែលគាត់​ទុកចិត្ត​នៅ​ឡើយ ខណៈរូបគាត់កំពុងបារម្ភតុលាការរឹបអូសយកផ្ទះដូចការអះអាងរបស់ធនាគារ​ហត្ថា​។

អ្នកស្រី ទៀង រ៉ាដា កំពុងអង្គុយពិនិត្យមើលតារាងបង់ប្រាក់របស់ធនាគារ នៅក្រុងកំពង់ឆ្នាំង ខេត្តកំពង់ឆ្នាំង។ រូបថតនៅថ្ងៃ​ទី១៥ ខែធ្នូ ឆ្នាំ២០២២។ ខេមបូចា/ អាន វិចិត្រ

​លោក បេ សារុំ អភិបាលរងក្រុងកំពង់ឆ្នាំងថ្លែងថា រូបគាត់បានជួបពិភាក្សាជាមួយអ្នកស្រី ទៀង រ៉ាដា ដែរ ប៉ុន្តែគាត់ថា អាជ្ញាធរមិនមានសិទ្ធិឃាត់វិធានការរបស់ធនាគារបានទេ។​

លោក បេ សារុំ ថ្លែងថា៖ «ក្រុងមិនមានសិទ្ធិទៅឃាត់គេ  អត់មានសិទ្ធិអីទៅឃាត់ខាងធនាគារ​គេ​បានទេ [អ៊ី]ចឹងឱ្យគាត់ខាងហ្នឹងបងទៅពឹងពាក់មេធាវីណាទៅ ពឹងគេទៅ ប៉ុន្តែឱ្យក្រុងទៅ​ទំនាក់​ទំនង ឬ ទៅឃាត់គេអត់បានទេ»។​

មន្ត្រីឃ្លាំមើលអង្គការ លីកាដូ ប្រចាំខេត្តកំពង់ឆ្នាំង លោក គង់ ច័ន្ទមុនី ថ្លែងថា ក្នុងស្ថានភាព​ដែល​ពលរដ្ឋមានបញ្ហាសេដ្ឋកិច្ចពួកគេមានសិទ្ធិស្នើទៅធនាគារដើម្បីពន្យារពេល ឬ រៀបចំកម្ចី​ឡើង​វិញ។ ចំពោះការគំរាមកំហែងដល់អតិថិជននេះ លោកថា អតិថិជនអាចប្តឹងត្រឡប់វិញ​បាន។​

លោក ច័ន្ទមុនី មានប្រសាសន៍ថា៖ «គាត់មានសិទ្ធិប្តឹងជនទាំងឡាយណា​ដែលគំរាមកំហែង​គាត់​បាន នៅក្នុងក្រមព្រហ្មទណ្ឌគាត់មានសិទ្ធិ ករណីគំរាមឬប្រើពាក្យអសុរោះអីហ្នឹង។ ព្រោះ​គាត់នៅក្នុងច្បាប់ជាមនុស្សធម្មតា រឿងជំពាក់បំណុលជារឿងមួយផ្សេង កិច្ចសន្យាជារឿងមួយ​ផ្សេង ហើយរឿងខុសច្បាប់គឺការគំរាមកំហែងដល់មនុស្ស»

អ្នកនាំពាក្យសមាគមគ្រឹះស្ថានមីក្រូហិរញ្ញវត្ថុកម្ពុជា លោក កាំង តុងងី ឱ្យដឹងថា សមាគម​របស់​លោកក៏បានទទួលពាក្យស្នើសុំឱ្យ​ជួយ​ដោះស្រាយពីអ្នកស្រី ទៀង រ៉ាដា ដែរ ហើយថា ពេលនេះ សមាគមរបស់លោកកំពុងប្រមូលព័ត៌មានបន្ថែមពីគ្រប់ភាគី។ ធនាគារ​ហត្ថា​​ក៏ជា​សមាជិកមួយរបស់សមាគមគ្រឹះស្ថានមីក្រូហិរញ្ញវត្ថុកម្ពុជា។

ចំពោះការប្រើពាក្យអសុរោះលើអ្នកស្រី ទៀង រ៉ាដា ឬ ការបង្ខំឱ្យលក់ផ្ទះនេះ លោក កាំង តុងងី ថ្លែងថា លោកមិនទាន់ទទួលបានព័ត៌មាន ឬ ភស្តុតាងលើករណីនេះទេ។ ប៉ុន្តែលោកថា បើមានករណីនេះកើតឡើងមែនសមាគមនឹងមានវិធានការ។​

លោក កាំង តុងងី បន្ថែមថា៖ «បើសិនជាបុគ្គលិកហ្នឹង គាត់ធ្វើចឹងមែន រហូតដល់គំរាម ដល់​បង្ខំឱ្យអតិថិជនលក់ទ្រព្យធានាមែន ចឹងនេះជាការប្រព្រឹត្តិខុសក្រមសីលធម៌ ខុសក្រមប្រតិបត្តិ​របស់វិស័យទាំងមូល ហើយបុគ្គលិកប្រឈម នឹងបញ្ឈប់ពីការងារបើសិនជាយើង​រកឃើញ​ករណី​ហ្នឹងកើតឡើងមែន»

ផ្ទះរបស់អ្នកស្រី ទៀង រ៉ាដា ដែលបានខ្ចីលុយពីធនាគារហត្ថា មកធ្វើផ្ទះកាលពីឆ្នាំ២០១៩ ស្ថិតក្នុងក្រុងកំពង់ឆ្នាំ ខេត្តកំពង់ឆ្នាំង។ រូបថតនៅថ្ងៃទី១៥ ខែធ្នូ ឆ្នាំ២០២២។ ខេមបូចា/ អាន វិចិត្រ

លោក មេធាវី សុក សំអឿន ផ្តល់យោបល់ថា អ្នកស្រី ទៀង រ៉ាដា គួរតែស្វែងរកការចរចាពី​ថ្នាក់ដឹកនាំធនាគារ ហើយកត់ត្រាកំណត់​ហេតុទុក ដើម្បីប្រើជាភស្តុតាង​បើសិនជារឿងនេះ​ត្រូវបន្តដល់តុលាការ។​

លោក សុក សំអឿន ថ្លែងថា​៖ «ធ្វើលិខិតជាលាយលក្ខអក្សរកាន់ទៅជួបគេចឹងទៅតាម​សំណូម​​ពររបស់យើងចឹងទៅ ឱ្យតែសមហេតុ​សមផលបញ្ជាក់ថាយើងមានចិត្តសង ប្រយ័ត្ន​តែធនាគារខ្លះវាខូច វាប្តឹងពីបទព្រហ្មទណ្ឌថា យើងឆរបោកឆរអីណា។ បើយើងមានក្រដាស​​ស្នាមចឹងអាចទប់ទល់បាន»។​

ជុំវិញករណីនេះ លោក ស៊ុក ស៊ីណាន ប្រធានធនាគារហត្ថាប្រចាំខេត្តកំពង់ឆ្នាំ ថ្លែងថា រូបលោក មិនបានគំរាមកំហែងឱ្យអ្នកស្រី ទៀង រ៉ាដា លក់ផ្ទះដូចការចោទប្រកាន់ទេ។

លោក ស៊ុក ស៊ីណាន លើកឡើងថា៖ «ទាក់ទងគាត់ថា គំរាមកំហែងឱ្យលក់អីហ្នឹងអត់មានទេ មានតែការសម្របសម្រួលទៅតាមអ្វីដែលគាត់ស្នើសុំទេ»។​

អ្នកស្រី ទៀង រ៉ាដា នៅតែបញ្ជាក់ថា លោក ស៊ុក ស៊ីណាន ពិតជាបានបង្ខំឱ្យគាត់លក់ផ្ទះ​ក្នុង​តម្លៃទាប ហើយប្រើពាក្យប្រមាថ​លើរូបគាត់ជាមនុស្សវ័យចាស់​ពិតមែនគឺមានទាំងសាក្សី​ក្មេងៗ​នៅអង្គុយទីនោះបានឮផងដែរ។

អ្នកស្រី ទៀង រ៉ាដា ឱ្យដឹងថា៖ «ក្មេងស្រីដែលស្តាប់ឮ មួយឈ្មោះ ខាន់ សុវណ្ណតី មួយឈ្មោះ ទឹម មួយហុង វានៅអង្គុយហ្នឹងថ្ងៃនោះ។ ខ្ញុំចង់ឱ្យស្បថតែម្តង ប្រមាថមើលងាយតែម្តង មនុស្ស​ខ្ញុំមិនសន្សំរឿងទេ»។​

អ្នកស្រី ទៀង រ៉ាដា បន្ថែមថា ប្តីគាត់ជាទាហានបានស្លាប់ក្នុងសមរភូមិនៅឆ្នាំ១៩៩០ ហើយ​បច្ចុប្បន្នគាត់រស់នៅជាមួយកូនស្រី មេម៉ាយម្នាក់ ដែលមានកូនស្រីតូចមួយ។ អ្នកស្រីថា ផ្ទះ​របស់​គាត់កំពុងរស់នៅក្នុងក្រុងកំពុងឆ្នាំងនេះ ទំហំទទឹង៦,៤ ម៉ែត្រ បណ្តោយ ២២ម៉ែត្រ ស្ថិត​នៅលើដី ទទឹង ១២,៥ ម៉ែត្រ បណ្តោយ ៥០ ម៉ែត្រ ដោយអ្នកស្រីដាក់លក់ក្នុងតម្លៃ១៧ម៉ឺន​ដុល្លារ​តាំងពីឆ្នាំ២០១៩មក ដើម្បីយក​លុយ​សងធនាគារ និងរកទិញផ្ទះទីតាំងថ្មី​ដែលធូរថ្លៃ​ជាង​នេះសម្រាប់រស់នៅ ប៉ុន្តែចាប់តាំងពីដាក់លក់មកមិនដែលមានគេទាក់ទងទិញនោះទេ៕

1,934 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម