ក្នុងសេចក្តីប្រកាសព័ត៌មានថ្ងៃទី៥ ខែកក្កដា ឆ្នាំ២០២៦ អាជ្ញាធរជាតិព្រះវិហារ បានគូសបញ្ជាក់ថា អង្គពិធីដែលមានការចូលរួមពីលោកស្រី ភឿង សកុណា រដ្ឋមន្ត្រីក្រសួងវប្បធម៌កម្ពុជា និងលោក Flavio BONETTI ប្រធានការិយាល័យអង្គការយូណេស្កូប្រចាំកម្ពុជា បានរំលឹកឡើងវិញពីវិនាសកម្មដ៏ធ្ងន់ធ្ងរចំពោះប្រាសាទព្រះវិហារដែលជាបេតិកភ័ណ្ឌពិភពលោក។ ជាវិនាសកម្មដែលបង្កឡើងដោយការទម្លាក់គ្រាប់បែកពីកងទ័ពថៃមកលើប្រាសាទព្រះវិហារ កាលពីអំឡុងសង្គ្រាម ក្នុងឆ្នាំ ២០២៥។
តាមអាជ្ញាធរជាតិព្រះវិហារ ប្រាសាទព្រះវិហារបានរងការខូចខាតធ្ងន់ធ្ងរសរុប ៥៦២កន្លែង និងបានបង្ខំឲ្យប្រជាជន ១ម៉ឺន៦ពាន់នាក់ចាកចេញពីតំបន់បេតិកភណ្ឌពិភពលោកមួយនេះ។ ក្នុងនោះក៏មានការខូចខាតផ្ទះសម្បែង វត្តអារ៉ាម សាលារៀន មណ្ឌលសុខភាព និងហេដ្ឋារចនាសម្ព័ន្ធសាធារណៈជាច្រើន។
ឆ្លើយតបនឹងស្ថានភាពខូចខាតដ៏ធ្ងន់ធ្ងរនេះ អាជ្ញាធរជាតិព្រះវិហារបានបញ្ជាក់ពីការសង្គ្រោះបន្ទាន់ប្រាសាទព្រះវិហារតាមអនុសាសន៍របស់អង្គការយូណេស្កូ និង ICC-Prah Vihear។ វិធានការទាំងនោះរួមមាន ការបោសសំអាតអាវុធយុទ្ធភ័ណ្ឌមិនទាន់ផ្ទុះ និងគ្រាប់បែកចង្កោម ការទល់ទ្រសង្គ្រោះរចនាសម្ព័ន្ធប្រាសាទពីការដួលរលំបន្តទៀត ការប្រមូលបំណែកថ្ម និងចម្លាក់ដើម្បីអភិរក្ស ការថតឯកសារ3D ប្រាសាទទាំងមូល និងការស្តារប្រព័ន្ធផ្លូវទឹកបុរាណ។
កិច្ចការទាំងអស់នេះ បើតាមអាជ្ញាធរជាតិព្រះវិហារ គឺបានថវិកាមកពីរដ្ឋាភិបាលកម្ពុជា អង្គការយូណេស្កូ អង្គការ ALIPH និងស្ថានបេសកម្មអចិន្ត្រៃយ៍បារាំងប្រចាំអង្គការយូណេស្កូ។ លើសពីនេះ អាជ្ញាធរជាតិព្រះវិហារ បានប្រកាសពីការងារអទិភាពចំពោះមុខ គឺការបន្តជួសជុលប្រាសាទ ការស្តារព្រៃឈើ និងប្រព័ន្ធអេកូឡូស៊ីតំបន់បេតិកភ័ណ្ឌ ការស្តារវិស័យទេសចរណ៍ និងការលើកកម្ពស់ជីវភាពសហគមន៍។
លោកស្រី ភឿង សកុណា រដ្ឋមន្ត្រីក្រសួងវប្បធម៌ បានបញ្ជាក់ក្នុងសេចក្តីប្រកាសព័ត៌មានថា រដ្ឋាភិបាលកម្ពុជា ប្តេជ្ញាការការពារបូរណភាពទឹកដី និងសម្បត្តិវប្បធម៌នានាស្របតាមច្បាប់អន្តរជាតិ ពិសេសខិតខំអភិរក្ស និងជួសជុលប្រាសាទព្រះវិហារសម្រាប់ទុកតកូនចៅជំនាន់ក្រោយៗទៀត៕
ប្រភព៖ RFI | ដោយ៖ អ៊ឹង ប៊ុនថន
