សាលក្រមរបស់តុលាការឧទ្ធរណ៍ក្រុងប៉ារីស នៅថ្ងៃទី៧កក្កដា ស្តីពីលោកស្រី ម៉ារីន ឡឺពែន (Marine Le Pen) ត្រូវបានប្រជាជនបារាំងនិងអ្នកនយោបាយ ទទ្ទឹងរងចាំស្តាប់លទ្ធផលជាខ្លាំង ព្រោះសាលក្រមនេះ នឹងមកកំណត់សេណារីយ៉ូថ្មី សម្រាប់ការប្រកួតប្រជែងគ្នា ក្នុងការបោះឆ្នោតប្រធានាធិបតីឆ្នាំ២០២៧។ លោកស្រី ម៉ារីន ឡឺពែន ជាប់ចោទពីបទប្រើប្រាស់ថវិការបស់សហភាព ចំនួនជាង៤លានអឺរ៉ូ យកទៅចំណាយឲ្យប្រាក់ខែបុគ្គលិកជំនួយការសភា របស់គណបក្សលោកស្រី។ កាលពីខែមេសា ឆ្នាំ២០២៥ លោកស្រីត្រូវបានតុលាការជាន់ទី១ ប្រកាសផ្តន្ទាទោសជាប់ពន្ធនាគារ៤ឆ្នាំ ត្រូវបង់ពិន័យចំនួន១សែនអឺរ៉ូ និងមិនអាចឈរឈ្មោះបោះឆ្នោតបានរយៈពេល៥ឆ្នាំ។
គួរបញ្ជាក់ថា សាលក្រមសាលាឧទ្ធរណ៍ចេញនៅថ្ងៃទី៧កក្កដា បានកំណត់ទោសស្រាលជាងមុន។ ចៅក្រមបារាំងបានសម្រេចឲ្យលោកស្រី ម៉ារីន ឡឺពែន ជាប់ទោសពន្ធនាគារ៣ឆ្នាំ ក្នុងនោះមួយឆ្នាំជាទោសព្យួរនៅក្រៅឃុំ តែលោកស្រីត្រូវពាក់ឧបករណ៍ខ្សែអេឡិកត្រូនិក។ មានន័យថាលោកស្រី ត្រូវឃុំខ្លួនក្នុងផ្ទះ តែអាចមានករណីពិសេស ដោយគោរពតាមនីតិសុំការអនុញ្ញាតពីចៅក្រមអនុវត្តទោស។
ជាមួយគ្នានេះ សាលក្រមបានកំណត់ថាលោកស្រីម៉ារីន ឡឺពែន មិនអាចឈរឈ្មោះបោះឆ្នោតបាន រយៈពេល៤៥ខែ ក្នុងនោះ៣០ខែគឺជាទោសព្យូរ។ ដោយលោកស្រី បានអនុវត្តទោសនេះ បាន១៥ខែហើយ ចន្លោះពីសេចក្តីសម្រេចទីមួយនិងសាលក្រមសាលាឧទ្ធរណ៍ ដូច្នេះមានន័យថា លោកស្រីម៉ារីន ឡឺពែន អាចឈរឈ្មោះជាបេក្ខជនប្រធានាធិបតីបាន សម្រាប់ការបោះឆ្នោតនៅខែមេសាឆ្នាំក្រោយ។ ទោះជាយ៉ាងណា បណ្តាអ្នកនយោបាយបារាំង បានលើកឡើងថាលោកស្រី ម៉ារីន ឡឺពែន មិនអាចឈរឈ្មោះបានទេ ព្រោះលោកស្រីគឺជាទណ្ឌិត ទោះនៅក្រៅឃុំពាក់ខ្សែអេឡិកត្រូនិកក៏ដោយ។
គួរកត់សំគាល់ដែរថា លោកស្រីម៉ារីន ឡឺពែន ធ្លាប់បានអះអាងច្រើនដងថា លោកស្រីនឹងមិនឈរឈ្មោះជាបេក្ខជនប្រធានាធិបតីឡើយ ប្រសិនបើលោកស្រីត្រូវជាប់ទោសពាក់ខ្សែឧបករណ៍តាមដានអេឡិកត្រូនិក ព្រោះវានឹងមករំខានដល់យុទ្ធនាការឃោសនាបោះឆ្នោត។ លោកស្រីក៏ធ្លាប់បានបង្ហើបដែរ ថាបើប្តឹងទាស់ឡើងទៅតុលាការកំពូល ក៏គ្មានន័យដែរ ព្រោះទោះជាលោកស្រីឈ្នះ ក៏វាយឺតពេលបាត់ទៅហើយដើម្បីឃោសនាបោះឆ្នោត។
សូមបញ្ជាក់ថា ជាច្រើនខែមកហើយ ដែលគណបក្សនយោបាយធំៗនៅបារាំង បានត្រៀមរងចាំស្តាប់លទ្ធផលនៃសាលក្រមនេះ ដើម្បីត្រៀមយុទ្ធសាស្ត្ររៀងៗខ្លួន។ ក្នុងករណីលោកស្រីម៉ារីន ឡឺពែនសម្រេចចិត្តដកខ្លួន នោះគឺលោក ហ្សកដាន់ បារដេឡា (Jordan Bardella) មនុស្សជំនិតបំផុតរបស់លោកស្រី ដែលនឹងក្លាយជាបេក្ខជនប្រធានាធិបតី របស់បក្សស្តាំនិយមជ្រុលបារាំង។ លោកហ្សកដាន់ បារដេឡា អាយុ៣០ឆ្នាំ កំពុងទទួលបានប្រជាប្រិយភាពច្រើន ហើយផ្អែកតាមការស្ទាបស្ទង់មតិ គឺអាចឈ្នះឈានដល់ការបោះឆ្នោតជុំទី២។ កាលៈទេសៈពេលនេះលំបាកពេកណាស់ សម្រាប់លោកស្រីម៉ារីន ឡឺពែន ព្រោះ លោកស្រីបានដើរមកដល់ជិតមាត់ទ្វារអំណាចទៅហើយ តែពេលនេះត្រូវស្ថិតនៅចំពោះមុខជំរើស២ ៖ ដកខ្លួនដើម្បីឲ្យបក្សរបស់លោកស្រីឈ្នះ ឬក៏ប្រថុយឈរឈ្មោះដើម្បីបានក្លាយជាប្រធានាធិបតីដូចក្តីស្រម៉ៃជាយូរយាមកហើយ!
ប្រភព៖ RFI | ដោយ៖ ម៉ម ពិសី
