អង្គការឃ្លាំមើលសិទ្ធិមនុស្ស Human Rights Watch បានឲ្យដឹងថា ស្ថាប័នហិរញ្ញវត្ថុអន្តរជាតិ (IFC) របស់ធនាគារពិភពលោក បានបដិសេធលទ្ធផលស៊ើបអង្កេតរបស់ការិយាល័យត្រួតពិនិត្យផ្ទៃក្នុងរបស់ខ្លួនដែលរកឃើញថា ការវិនិយោគរបស់ IFC ក្នុងវិស័យមីក្រូហិរញ្ញវត្ថុកម្ពុជាបានបង្កផលប៉ះពាល់ដល់ពលរដ្ឋមួយចំនួន។ ក្នុងសេចក្តីឆ្លើយតបដែលចេញផ្សាយនៅថ្ងៃទី២៤ ខែមិថុនា ឆ្នាំ២០២៦ ស្ថាប័ន IFC បានបដិសេធការរកឃើញរបស់ការិយាល័យប្រជាពលរដ្ឋ (CAO) ដែលជាស្ថាប័នឯករាជ្យត្រួតពិនិត្យបណ្តឹង និងការអនុលោមតាមគោលនយោបាយរបស់ IFC។ ការិយាល័យប្រជាពលរដ្ឋ (CAO) បានសន្និដ្ឋានថា IFC មិនបានអនុវត្តតាមគោលនយោបាយបរិស្ថាន និងសង្គមរបស់ខ្លួនក្នុងការការពារក្រុមពលរដ្ឋក្រីក្រ និងងាយរងគ្រោះដែលទទួលកម្ចីហរិញ្ញវត្ថុឡើយ។
លោកស្រី Elaine Pearson នាយិកាប្រចាំតំបន់អាស៊ីនៃអង្គការឃ្លាំមើលសិទ្ធិមនុស្សបានលើកឡើងថា ការសម្រេចរបស់ក្រុមប្រឹក្សាភិបាល IFC ដែលបដិសេធលទ្ធផលស៊ើបអង្កេតនេះបានប៉ះពាល់ដល់ការទទួលខុសត្រូវ និងយុត្តិធម៌សម្រាប់អ្នកខ្ចីប្រាក់មីក្រូហិរញ្ញវត្ថុនៅកម្ពុជា។ តាមអ្នកជំនាញផ្នែកសិទ្ធិមនុស្សរូបនេះ ស្ថាប័នហិរញ្ញវត្ថុអន្តរជាតិគួរតែទទួលស្គាល់ការទទួលខុសត្រូវរបស់ខ្លួន និងចាប់ផ្តើមដំណើរការដោះស្រាយផលប៉ះពាល់ដែលបានកើតឡើង ជំនួសឲ្យការបដិសេធ។
លោកស្រី Elaine Pearson ចាត់ទុកការសម្រេចរបស់ IFC ជាការបិទផ្លូវចំពោះការទទួលខុសត្រូវ និងដំណោះស្រាយសម្រាប់ពលរដ្ឋកម្ពុជាដែលរងផលប៉ះពាល់ពីប្រាក់កម្ចីមីក្រូហិរញ្ញវត្ថុដែលគាំទ្រដោយ IFC។ គួរបញ្ជាក់ថា បញ្ហានេះពាក់ព័ន្ធនឹងបណ្តឹងដែលបានដាក់នៅឆ្នាំ២០២២ ដោយតំណាងអ្នកខ្ចីប្រាក់មីក្រូហិរញ្ញវត្ថុកម្ពុជាចំនួន ១៨នាក់។ ក្រោយការស៊ើបអង្កេតជាង១ឆ្នាំ ការិយាល័យប្រជាពលរដ្ឋរបស់HRW បានចេញរបាយការណ៍ប្រវែង ១៤២ទំព័រ ដោយរកឃើញថា IFC មិនបានធ្វើការគ្រប់គ្រាន់ក្នុងការការពារពលរដ្ឋងាយរងគ្រោះ ក៏ដូចជាមិនបានធានាថា ស្ថាប័នមីក្រូហិរញ្ញវត្ថុមានប្រព័ន្ធដោះស្រាយបណ្តឹងប្រកបដោយប្រសិទ្ធភាព។
យ៉ាងណាមិញ របាយការណ៍ HRW បានរកឃើញថា IFC មិនបានវាយតម្លៃច្បាស់លាស់ពីផលប៉ះពាល់សង្គម និងបរិស្ថានទៅលើជនជាតិដើមភាគតិច មុនពេលវិនិយោគទៅលើស្ថាប័នមីក្រូហិរញ្ញវត្ថុមានប្រតិបត្តិការនៅតំបន់ដែលមានជនជាតិដើមភាគតិចរស់នៅ។
តាមរយៈលទ្ធផលនៃរបាយការណ៍នេះ HRW រកឃើញថា កម្ពុជាមានបំណុលមីក្រូឥណទានក្នុងមនុស្សម្នាក់ខ្ពស់ជាងគេនៅលើពិភពលោក។ តាមអង្គការឃ្លាំមើលសិទ្ធិមនុស្ស IFC បានវិនិយោគជាង ៤០០លានដុល្លារអាមេរិកក្នុងស្ថាប័នមីក្រូហិរញ្ញវត្ថុកម្ពុជា ក្នុងរយៈពេល១០ឆ្នាំចុងក្រោយ ទោះបីមានការព្រមានអំពីបញ្ហាបំណុលច្រើនពេក និងការផ្តល់កម្ចីដែលអាចបង្កគ្រោះថ្នាក់តាំងពីឆ្នាំ២០១៦ ក៏ដោយ។
ទន្ទឹមនឹងការច្រានចោលការរកឃើញរបស់ HRW IFC បានអះអាងពីការអនុវត្តបានត្រឹមត្រូវ នូវគោលនយោបាយខ្លួន និងថា កន្លងមក IFC បានស្នើផែនការជួយការដាក់ពាក្យបណ្តឹងរបស់ពលរដ្ឋរងគ្រោះដូចជា ការរៀបចំរចនាសម្ព័ន្ធបំណុល ការពន្យារពេលសងប្រាក់ និងការកែប្រែអត្រាការប្រាក់។ យ៉ាងណាក៏ដោយ ការិយាល័យប្រជាពលរដ្ឋនៃអង្គការ HRW បានរិះគន់ថា វិធានការទាំងនេះមិនគ្រប់គ្រាន់ និងមិនបានផ្តល់ការដោះស្រាយពេញលេញដល់អ្នកខ្ចីប្រាក់ដែលរងផលប៉ះពាល់៕
ប្រភព៖ RFI | ដោយ៖ ស៊ឹម ចាន់សំណាង
