ថ្លែងក្នុងឱកាសអបអរទិវាសហគ្រាសធុនមីក្រូ តូច និងមធ្យម កាលពីថ្ងៃទី២៧ ខែមិថុនា ឆ្នាំ២០២៦ លោកនាយករដ្ឋមន្រ្តី ហ៊ុន ម៉ាណែត បានចោទជាសំនួរថា បច្ចុប្បន្នលោកមិនបានដឹងច្បាស់ទេថា នីតិវិធីប្រតិបត្តិការស្តង់ដារ (SOP) របស់ស្ថាប័ននីមួយៗមានលក្ខណៈបន្ស៊ីគ្នា ឬអត់។ ការណ៍នេះជាហេតុផលដែលលោក ហ៊ុន ម៉ាណែត ជម្រុញឱ្យស្ថាប័នទាំងអស់ពិភាក្សាគ្នាឡើងវិញអំពីនីតិវិធីប្រតិបត្តិការស្តង់ដារ (SOP) ដើម្បីឈានដល់ការសម្រេចរួមមួយ និងកាត់បន្ថយភាពចន្លោះប្រហោង ក្នុងកិច្ចការងារត្រួតពិនិត្យគុណភាពចំណីអាហារនៅកម្ពុជា។ នាយករដ្ឋមន្ត្រីកម្ពុជាបានសង្កត់ធ្ងន់ថា ក្រសួងស្ថាប័នទាំងអស់ត្រូវរៀបចំនីតិវិធីស្តង់រួមមួយ ធ្វើយ៉ាងណាដើម្បីធានាថា ការគ្រប់គ្រងផលិតផលប្រកបដោយ សង្គតិភាព តម្លាភាព ប្រសិទ្ធភាព និងការទទួលខុសត្រូវច្បាស់លាស់។
គួរជ្រាបថា កិច្ចការងារត្រួតពិនិត្យគុណភាពចំណីអាហាររបស់ស្ថាប័នរដ្ឋនៅកម្ពុជាកន្លងមកត្រូវបានកត់សម្គាល់ថាបានអនុវត្តភារកិច្ចជាន់គ្នា និងហាក់មិនសូវមានប្រសិទ្ធភាព។ លោកនាយករដ្ឋមន្រ្តីមានសុទ្ឋិនិយមថា ស្ថាប័នរួមដែលមានតួនាទីត្រួតពិនិត្យគុណភាពសុវត្ថិភាពចំណីអាហារនឹងជួយកាត់បន្ថយភាពស្មុគ្រស្មាញដល់ស្ថាប័នពាក់ព័ន្ធទាំងអស់។ វិស័យឯកជនក៏មានភាពងាយស្រួលក្នុងការប្រតិបត្តិការអាជីវកម្ម ខណៈពលរដ្ឋក៏នឹងទទួលបានផលិតផលប្រកបដោយគុណភាព និងស្តង់ដារអនាម័យ។
លោកបណ្ឌិត ជ័យ តិច អ្នកស្រាវជ្រាវការអភិវឌ្ឍសង្គម-សេដ្ឋកិច្ច យល់ថា ការបង្រួមស្ថាប័នត្រួតពិនិត្យគុណភាពចំណីអាហារដែលនាយករដ្ឋមន្ត្រីផ្តួចផ្តើមឡើងនេះ នឹងអាចកាត់បន្ថយអំពើពុករលួយ និងបង្កើនទំនុកចិត្តដល់វិស័យឯកជន និងពលរដ្ឋ។ ចំពោះលោក ជ័យ តិច ចាប់ពីនៅតាមច្រកព្រំដែនរហូតដល់មានការចែកចាយនៅលើទីផ្សារ កម្ពុជាត្រូវការតែអង្គភាពមួយគត់នៅក្នុងការត្រួតពិនិត្យសុវត្ថិភាពអាហារនៅកម្ពុជា៕
ប្រភព៖ RFI | ដោយ៖ សើ ដាវី
