ក្នុងថ្ងៃទី២ នៃពិធីកាន់ទុក្ខថ្នាក់ជាតិអ៊ីរ៉ង់ ឥស្សរជនធំៗអញ្ជើញចូលរួមឈរជួរមុខ ក្នុងឱកាសសូត្រធម៌ឧទ្ទិសវិញ្ញាណក្ខន្ធអាយ៉ាតូឡា អាលី ខាមេណី។ វត្តមាននៅថ្ងៃអាទិត្យ ទី៥កក្កដា គឺមាន ប្រធានាធិបតី ម៉ាស៊ូត ប៉េហ្សេខ្ជន់ ប្រធានរដ្ឋសភា អគ្គមេបញ្ជាកងទ័ព រួមទាំង អ្នកមុខអ្នកការក្នុងជួររដ្ឋាភិបាលនិងជួរសាសនាអ៊ីស្លាមអ៊ីរ៉ង់ ជាច្រើននាក់។ ប្រមុខឆ្មាំបដិវត្តអ៊ីរ៉ង់ដ៏មានឥទ្ធិពល លោក អាម៉ាដ វ៉ាហិឌី ស្ទើរតែមិនដែលចេញមុខសោះ ក៏លេចមុខជាសាធារណៈដែរ។
ទូរទស្សន៍ជាតិអ៊ីរ៉ង់ ក៏បង្ហាញមុខកូនប្រុស អាលី ខាមេណី ចំនួន ៣ នាក់ ដែលជួយលីលែងមឈូមឪពុក។ ពួកគេឈ្មោះ មុស្តាហ្វា, មៃសាំ និង ម៉ាស៊ូត ។ តែគ្មានវត្តមានរបស់លោក មុត្ឆតាបា ខាមេណី ដែលបានស្នងតំណែង ប្រមុខដឹកនាំសាសនាអ៊ីរ៉ង់ ពីឪពុកនោះឡើយ។ បណ្តាញព័ត៌មានអន្តរជាតិជាច្រើន បញ្ជាក់ថា លោក មុត្ឆតាបា រងរបួសព្រោះការវាយប្រហារធ្ងន់ធ្ងរ និងកំពុងព្យាបាលរបួសជើងជាទម្ងន់។
មានអាយុ៨៦ឆ្នាំ មគ្គុទេសក៍សាសនារបស់អ៊ីរ៉ង់ អាយ៉ាតូឡា អាលី ខាមេណី ស្លាប់ក្រោមគ្រាប់ប្លោងថ្ងៃទី២៨កុម្ភៈ ថ្ងៃដំបូងនៃការបញ្ឆេះភ្លើងសង្គ្រាមពីសំណាក់សហរដ្ឋអាមេរិកនិងសម្ព័ន្ធមិត្តអ៊ីស្រាអែល។ នៅទីសក្ការៈ Grand Mosalla កណ្តាលទីក្រុងតេហេរ៉ង់ ក្បែរនឹងមឈូសខ្មោច អាលី ខាមេណី ក៏មានមឈូមសមាជិកក្រុមគ្រួសារផ្សេងទៀត ដូចជាសពកូនស្រីម្នាក់ កូនប្រសាប្រុសម្នាក់ ហើយខ្មោចចៅស្រីប្រុស ២នាក់ ដែលមានអាយុត្រឹម ១៤ខែ។
ប្រជាពលរដ្ឋអ៊ីរ៉ងចូលរួមគោរពវិញ្ញាណក្ខន្ធនៅកណ្តាលរដ្ឋធានី ចំនួនយ៉ាងតិច ចន្លោះពី ១៥ ទៅ ២០លាននាក់។ នេះបើតាមអាជ្ញាធរក្រុងតេហេរ៉ង់ ។ តាមធម្មតា ពិធីបុណ្យសពអាយ៉ាតូឡា អាលី ខាមេណី គ្រោងត្រូវរៀបចំធ្វើនៅខែមីនា។ គេបានលើកពេលព្រោះតែសង្គ្រោម ហើយក៏មិនមែនចៃដន្យទេ ដែលអ៊ីរ៉ង់ជ្រើសរើសថ្ងៃចាប់ផ្តើមពីបុណ្យសព នៅថ្ងៃទី៤កក្កដា ពោលគឺចំទិវាខួបបុណ្យឯករាជ្យអាមេរិក។ អ៊ីរ៉ង់ ចង់បង្ហាញពីការប្រមូលផ្តុំសាមគ្គីភាពមាំមួនរបស់ពលរដ្ឋអ៊ីរ៉ង់ដែលគោរពស្រឡាញ់អាយ៉ាតូឡា អាលី ខាមេណី និងចាត់ទុកលោកជា វីរបុរសជាតិ។ ក្នុងឱកាសបុណ្យសពនេះដែរ ក៏មានបដា រូបភាពនិងអក្សរ សរសេរអំពាវនាវឲ្យសម្លាប់សងសឹកទៅលើប្រធានាធិបអាមេរិក លោកដូណាល់ ត្រាំ និងនាយករដ្ឋមន្ត្រីអ៊ីស្រាអែល លោក បេនចាមិន នេតាន់យ៉ាហ៊ូ។ អ្នកខ្លះទៀត ចង់ឈប់ឲ្យចរចាជាមួយអាមេរិកទៀតផង។ លើសពីនេះ ប្រជាជនអ៊ីរ៉ង់ក៏បង្ហាញភាពចងកំហឹងស្អប់ខ្ពើមចំពោះប្រទេសជិតខាង ដោយចោទថា «ក្បត់» ដ្បិតប្រទេសទាំងនោះចូលដៃជាមួយអាមេរិកនិងអ៊ីស្រាអែល។
សពអាលី ខាមេណី នឹងត្រូវបញ្ចុះនៅថ្ងៃទី៩កក្កដា៕
ប្រភព៖ RFI | ដោយ៖ ហេង ឧត្តម
