ព្រះចៅអធិរាជជប៉ុន ណារូហ៊ីតូ ដែលបច្ចុប្បន្នមានព្រះជន្ម៦៦ព្រះវស្សា មានបុត្រតែមួយអង្គគត់ គឺព្រះអង្គម្ចាស់ក្សត្រី អៃកូ ព្រះជន្ម២៤ព្រះវស្សាដែលប្រជាជនជប៉ុនគោរពស្រលាញ់បំផុត។ ក៏ប៉ុន្តែ ទំនៀមទំលាប់បុរាណរបស់ជប៉ុន មិនអនុញ្ញាតឲ្យមនុស្សស្រីឡើងធ្វើជាព្រះចៅអធិរាជឡើយ។ ច្បាប់គ្រប់គ្រងរាជបល្លង្កឆ្នាំ១៨៨៩ និងច្បាប់ឆ្នាំ១៩៤៧ បានចែងយ៉ាងច្បាស់ថា មានតែមនុស្សភេទប្រុស និងជាប់សែរស្រឡាយព្រះញាតិវង្សខាងបិតាតែប៉ុណ្ណោះ ទើបអាចស្នងរាជបល្លង្កជាព្រះចៅអធិរាជ្យបាន។
អនាគតនៃរាជវង្សជប៉ុន នាពេលពេលបច្ចុប្បន្ននេះ ពឹងផ្អែកតាំងស្រុងទៅលើព្រះអង្គម្ចាស់ ហ៊ីសាអ៊ីតូ (Hisahito) ព្រះជន្ម១៩ព្រះវស្សា ដែលត្រូវជាព្រះភាគិនេយ្យ ឬក្មួយប្រុស របស់ព្រះចៅអធិរាជ ណារូហ៊ីតូ។ ប្រសិនបើទៅថ្ងៃខាងមុខ ព្រះអង្គម្ចាស់ ហ៊ីសាអ៊ីតូ ពុំមានបុត្រាទេនោះ នោះរាជបល្លង្កជប៉ុននឹងគ្មានអ្នកស្នងរាជបន្តឡើយ។
ដើម្បីបង្ការវិបត្តិនេះ រដ្ឋសភាជប៉ុនបានអនុម័តច្បាប់វិសោធនកម្ម កាលពីថ្ងៃសុក្រ ទី១៧កក្កដា ដើម្បីពង្រីកចំនួនសមាជិកគ្រួសារព្រះញាតិវង្ស និងរកមនុស្សប្រុសមកបម្រុង។ កំណែទម្រង់ថ្មីនឹងអនុញ្ញាត ឲ្យព្រះបរមរាជវាំងជប៉ុន អាចទទួលត្រឡប់មកវិញ នូវអតីតសមាជិកគ្រួសារព្រះញាតិវង្ស ភេទប្រុស អាយុចាប់ពី១៥ឆ្នាំឡើងទៅ តែត្រូវនៅលីវ។
សូមបញ្ជាក់ថា ច្បាប់កំណែទម្រង់ថ្មីនេះ បានសំដៅទៅដល់មែកធាងគ្រួសារព្រះញាតិវង្សជប៉ុន ចំនួន១១វង្សត្រកូល ដែលបានចាកចេញពីព្រះបរមរាជវាំង ក្រោយពេលជប៉ុនចាញ់សង្គ្រាមលោកលើកទី២។ ផ្អែកតាមខុទ្ទកាល័យព្រះបរមរាជវាំងជប៉ុន វង្សត្រកូលទាំងនេះ មានពូជពង្សតែមួយជាមួយនឹងព្រះចៅអធិរាជ តាំងតែពីសតវត្សរ៍ទី១៥។ ជាមួយច្បាប់ថ្មីនេះ គ្រួសាររាជវង្សជប៉ុន មានសមាជិកសរុប១៦នាក់ ក្នុងនោះប្រុស៥នាក់។
តែយ៉ាងណាក៏ដោយ សភាជប៉ុនបានបន្តរក្សាប្រពៃណីចាស់ជាធរមានដដែល ពោលគឺមនុស្សស្រី នៅតែមិនអាចឡើងគ្រងរាជបានឡើយ។ តែទន្ទឹមគ្នានេះ ច្បាប់ថ្មីនេះបានលុបចោលវិធានចាស់មួយ ដែលតម្រូវឲ្យដកចេញពីគ្រួសារព្រះញាតិវង្ស នូវម្ចាស់ក្សត្រីណាដែលមានស្វាមីជារាស្ត្រសាមញ្ញ។
សូមជំរាបជូនថា ការស្ទាបស្ទង់មតិមួយធ្វើឡើងកាលពីខែមិថុនាដោយសារព័ត៌មាន Mainichi បានបង្ហាញលទ្ធផលថា មានប្រជាជនជប៉ុនតែ២៣%ទេ ដែលគាំទ្រឲ្យមនុស្សប្រុសសមាជិកថ្មីដែលត្រលប់ចូលមកក្នុងគ្រួសារព្រះញាតិវង្សវិញ អាចឡើងគ្រងរាជបាន ខណៈអ្នកប្រឆាំងមានចំនួន៣៤%។ ដោយឡែកប្រជាជនជប៉ុនជាង៧០% គាំទ្រឲ្យមនុស្សស្រីអាចឡើងធ្វើជាព្រះចៅអធិរាជ និង៤០%គាំទ្រឲ្យមានព្រះចៅអធិរាជ្យប្រុស ដែលជាប់សែស្រឡាយព្រះញាតិវង្សខាងព្រះមាតា។
គួរបញ្ជាក់ដែរថា វិសោធនកម្មថ្មីនេះ គឺគណបក្សអភិរក្សនិយមរបស់លោកស្រីសាណាអេ តាកាអ៊ិឈិ ដែលជាអ្នកជំរុញចង់បាន។ លោកស្រីនាយករដ្ឋមន្ត្រី តាកាអ៊ីឈិ តែងអះអាងជានិច្ច ថាលោកស្រីមិនគាំទ្រឲ្យមនុស្សមនុស្សស្រីឡើងគ្រងរាជ្យជាដាច់ខាត។ លោក Hideya Kawanishi សាស្ត្រាចារ្យនៅសកលវិទ្យាល័យណាហ្គោយ៉ា បានលើកឡើងថា ច្បាប់កំណែទម្រង់ថ្មីនេះ មិនឆ្លើយតបទៅនឹងអ្វីដែលប្រជាជនជប៉ុនចង់បាន ព្រមទាំងរបត់សង្គមសម័យទំនើបឡើយ។ អ្នកជំនាញរាជវង្សជប៉ុនរូបនេះបន្ថែមថា ភាពមានៈរឹងរូសរបស់គណបក្សអភិរក្សនិយម ដែលមិនស្តាប់ការយល់ឃើញរបស់ប្រជាជន នឹងធ្វើឲ្យស្ថាប័នព្រះចៅអធិរាជ ដែលជានិម្មិតរូបជាតិដ៏ធំបំផុត នឹងត្រូវបាត់បង់ការគាំទ្រពីប្រជានុរាស្ត្រជប៉ុន៕
ប្រភព៖ RFI | ដោយ៖ ម៉ម ពិសី
